གཙོ་ངོས།>> རྩོམ་རིག>>སྙན་རྩོམ།

སྟག་རིག་འབྲུག་ཐར། རྩོམ་སྒྲིག་པ།དབང་ཆེན།ཡོང་ཁུངས།ཁམས་པའི་རིག་གནས་དྲ་བ། སྤེལ་དུས། ༢༠༢༡ལོའི་ཟླ་བ་༠༤ཚེས་༠༢ཉིན།

༄༅།།དཔྱིད་ལ་དཀྲོལ་བའི་མགུར།

སྟོད་དུ་ཁ་བའི་མེ་ཏོག་གར་ལ་རྩེན།།

སྨད་དུ་ཆར་གྱི་ཟེགས་མ་ལང་ལོང་གཡོ།།

     མཁའ་དབྱིངས་གཅིག་པའི་སྟོད་སྨད་ཧྲག་བར་གྱི།།

དཔྱིད་ཟླ་གསུམ་པའི་ནམ་ཟླ་འགྱུར་བག་རྒོད།།

ཁ་བའི་ཕྱིང་ཞྭ་རི་ལུང་ཐང་ལ་བསྐྱོན།།

གཤོག་ལྡན་བྱེའུས་ཞབས་རྗེས་རི་མོ་བཀོད།།

རླུང་བུ་ཕྲན་ཙམ་ལྡང་བའི་འཕང་འགྲོས་ལ།།

     ཕྱེ་མར་བཏགས་པའི་ཁ་བས་མཐོང་ལམ་བསྒྲིབས།།

ལྗང་མྱུག་གསར་དུ་འབུ་བའི་རྟེན་འབྲེལ་ལ།།

རབ་དཀར་ཁ་བས་དཔྱིད་ཀྱི་བུ་ཆུང་སྦྲུམ།།

          འདབ་ཆགས་གཤོག་འགྱུའི་ཡང་རྩལ་དགུང་ལ་བསྟོད། །

འབུ་སྲིན་རྨི་ལམ་ཁོང་ནས་སད་ལ་རེམ།།

ཁྲི་གདུགས་ཉི་མ་རི་བོའི་ཕྲག་ལས་འཕགས།།

འོད་ཟེར་སྟོང་ལྡན་འཛིན་མའི་ཐོང་གར་འཕྲོས།།

རེ་ལྟོས་ལྗང་བུས་ས་ཤུན་བརྟོལ་ནས་ཀེར།།

སྔོ་ལྗང་དཔྱིད་ཀྱི་མ་མ་བག་རེ་བྲོ།།

སྤྲིན་པ་གར་དུ་བསྡེབས་པའི་ཉིང་བཅུད་ལས།།

དཔྱིད་ཆར་ཐོག་མ་མི་ཡུལ་མགྲོན་དུ་སླེབས།།

ཞབས་ཁྲུས་ཐེངས་ཤིག་མཛད་པའི་ངང་མདངས་ལ།།

སྣུམ་ལོག་འབྲོག་གི་བུ་མོའི་བཟོ་ལྟ་མངོན།།

   དཔྱིད་རླུང་གར་མའི་ཕུ་ལྕག་ལན་འགའ་བྲབས།།

 འཁྲི་ཤིང་གཡུ་ལོ་ལྡེམ་པར་ཉེར་བསྡོགས་རྩོམ།།

མེ་ཏོག་ཐེའུ་ཁ་ཕྱེ་བའི་བྲེལ་འཚུབ་སློང་།།

སྦྲང་མས་གཤོག་གླུ་ལེན་པར་གྲེ་བ་བསངས།།

ལྗན་ལྗིན་ཡལ་བར་དོར་བའི་ཆུ་མོའི་རྒྱུན།།

   སྙན་མོའི་ངག་ལ་དབྱངས་ཀྱི་གདངས་དྲངས་ཏེ།།

རྩྭ་ཕྲན་ཐ་ཐོར་སྐྱེས་པའི་ཡུར་རྐའི་གཞུང་།།

 སྦྲུལ་གཟུགས་ཀྱ་ཀྱུ་བགྲོད་པ་མི་ཚེའི་བཤུལ།།

དཔྱིད་ཉི་དྲོན་མོའི་ཀློང་གི་བུ་ཆུང་གིས།།

དཔེ་ཁུག་ལེབ་མོ་རྒྱབ་ལ་རབ་བཀོད་དེ།།

   གདོང་ལ་འཛུམ་ཆུང་སྐར་ཕྲན་འཚེར་བཞིན་དུ།།

  གླུ་ཆུང་གོམ་ཁར་བརྒྱུས་ནས་སློབ་རར་ཕྱོགས།།


39.7K

ཐག་རག་ཡིག་བསྒྱུར་མ་ལག

དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས།蜀ICP备14009601号-1