གཙོ་ངོས།>> རྩོམ་རིག>>སྙན་རྩོམ།

རྩོམ་པ་པོ། གཙང་བསྟན་འཛིན། རྩོམ་སྒྲིག་པ།དབང་ཆེན།ཡོང་ཁུངས།ཁམས་པའི་རིག་གནས་དྲ་བ། སྤེལ་དུས། ༢༠༢༡ལོའི་ཟླ་བ་༠༤ཚེས་༠༧ཉིན།

༄༅།།འཕགས་མ་དབྱངས་ཀྱི་རྒྱལ་མོ།

ངག་གི་རྒྱུད་སྐུད་མགྲིན་སྙན་མས།།

སྣ་ཚོགས་ཡིད་དགའ་འགུག་གླུ་འཁྲོལ།།

རྟེན་འབྱུང་བག་ཆགས་རིག་པའི་གཤིས།།

འདི་ན་རྫོགས་པའི་ཉམས་དབྱངས་འཐེན།།

གང་དག་ས་དང་ལམ་མ་ཞུགས།།

དེ་འདྲིས་ལྕམ་གྱི་མཛའ་བརྩེ་མེད།།

འོན་ཀྱང་སྣང་བ་ཞེན་པའི་དབྱངས།།

གར་གྱི་ལྷ་མོའི་རྒྱན་དུ་བཞེངས།།

རྣམ་པར་དག་པའི་འཁོར་ལོའི་མགོན།།

སྐྱབས་མཆོག་མཚུངས་མེད་ཡིད་བཞིན་གྱིས།།

རྣམ་ཐར་འོད་སྟོང་ལྡན་པའི་གཟུགས།།

གང་ཁྱོད་མཛེས་པའི་ཡོན་ཏན་སོགས།།

སྡེབ་ལེགས་ཚིག་གིས་རབ་རྒྱན་པས།།

དེ་བས་སོ་སྐྱེ་ཕལ་བའི་བློས།།

མི་འབྲལ་འདོད་པའི་གད་རྒྱང་གིས།།

རྟག་ཏུ་མཛའ་བའི་ལོངས་སུ་སྤྱོད།།

མཐོ་པོའི་ཁྲི་དང་དམའ་བའི་ཐང་།།

གཟར་བའི་ལམ་དང་བདེ་བའི་ཞིང་།།

རྒྱལ་བའི་ལུང་དང་འདོད་པའི་ངག།

གང་དག་ཁྱབ་ལ་མཛད་པ་གང་།།

ཕྱོགས་ཞེན་ཆགས་པའི་སྡང་བས་སྟོབས།།

སུ་ལའང་ཐུགས་དགོངས་མ་དཀྲུགས་པར།།

ཞི་བའི་ཚོགས་སུ་ལྷམ་མེར་བཞུགས།།

སྔོན་ཚེ་དེ་བཞིན་གཤེགས་པའི་ལུང་།།

ད་ལྟ་ཕལ་བ་བདག་གི་དབྱངས།།

སྔོན་ཚེ་བདེ་སྟོང་བྱམས་པའི་གཟུང་།།

ད་ལྟ་འཕྲུལ་བའི་ཞེན་དབྱངས་སོགས།།

གང་དང་གཅིག་ན་ཞེན་མེད་ཀྱིས།།

ཐམས་ཅད་མཉམ་པའི་མ་མ་དེ།།

ས་བཅུ་ཕྱིན་པའི་འཕགས་མ་གྲགས།།

དད་པ་གསེར་གྱི་སྡོང་པོ་ལ།།

འཛུམ་པའི་སྨིན་ལེགས་ཀྱུ་རུ་རུ།།

དེ་ལ་གཡས་འཁྱིལ་དུང་གི་སྒྲས།།

བགས་ཆགས་ཞེན་པའི་གཉིད་ལས་དགྲོལ།།

མགོན་ལ་བཞེངས་པའི་གུར་ཁྱིམ་ནས།།

ཐུགས་རྗེའི་ཆར་སྤྲིན་ཤར་ར་ར།།

དེ་ལ་བསིལ་བའི་ཤམ་བུ་ཡིས།།

སྒྲིབ་པའི་མེ་ལྕེ་གཟེབས་སུ་བཅིངས།།

བདེ་ཆེན་རོལ་བའི་ངང་ཚུལ་གྱིས།།

དག་པ་ལྷ་ཡི་མཛའ་གླུ་བླངས།།

དེ་ཐོས་གསུང་གི་གདུལ་བྱ་ཡི།།

གང་ཁྱོད་རྟག་ཏུ་བསྟེན་པར་བྱ།།

39.7K

ཐག་རག་ཡིག་བསྒྱུར་མ་ལག

དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས།蜀ICP备14009601号-1