རྒྱུ་ཡོད་ལྟག་སྒོ་འཛུལ་ས་མེད། །
དེ་ནི་ཏང་གི་རང་ལུགས་ཡིན། །
གཡོ་ཅན་མཐེ་བོང་བསྒྲེང་ས་མེད། །
དེ་ཡང་ཏང་གི་སྒྲིག་སྲོལ་ཡིན། །
མི་དམངས་བུ་ལྟར་སྐྱོང་བ་དང་། །
ཕྱོགས་ཞེན་ཆགས་སྡང་མེད་པ་སྟེ། །
འགྲོ་ཀུན་བདེ་ལ་འཁོད་པ་ནི། །
གུང་ཁྲན་ཏང་གི་འགྲོ་ལུགས་ཡིན།
བློ་སེམས་བལ་ལྟར་འཇམ་པ་གཅིག།
གཡོ་རྫུན་ཟློས་གར་མེད་པ་གཉིས། །
ཀུན་ཕན་སྲོག་གི་སྙིང་པོ་གསུམ། །
ཏང་གི་ལམ་ཕྱོགས་ཁག་གསུམ་མོ། །
རྐུ་འཕྲོག་རྒྱ་ལས་ཐར་ས་མེད། །
ནག་པོ་སེལ་ཞིང་ངན་པ་འཇོམས། །
བཙན་པོར་རྒོལ་ཞིང་གཉོམ་ཆུང་སྐྱོང་། །
ཐམས་ཅད་ཏང་གི་རྩ་བ་ཡིན། །
ཐེངས་གཅིག་ཟེར་ནས་ཐར་ས་མེད། །
རྒས་འདུག་ཟེར་ནས་གཏོང་སྲོལ་མེད། །
ནོར་འཁྲུལ་མགོ་ལ་བབས་པ་གང་། །
འགན་གྱིས་གཞུ་བ་ཏང་གི་སྲོལ། །
ཡག་པོ་ཡག་གིས་བརྒྱན་པ་དང་། །
ངན་ཅན་ཁྲིམས་ཀྱིས་བཅུན་པ་སོགས། །
ལས་ཀུན་དྲང་བདེན་ལ་ཕྱོགས་པ། །
ཏང་གི་འགྱུར་མེད་གཤིས་ལུགས་ཡིན། །
ཕ་མ་དགྲ་རུ་འཛིན་པ་དང་། །
ཉེ་དུ་རྫུན་གྱིས་ཁྲིད་པ་སྟེ། །
མཐའ་དག་རང་དོན་ལ་འབད་པ། །
འཇོམ་པར་བྱེད་པ་ཏང་གི་ལུགས། །
རི་སྐྱེས་རི་ནས་གསོད་པ་དང་། །
གོ་ལར་རྨ་ཤུལ་བཟོ་བ་སོགས། །
སྙིང་པོ་དངུལ་ལ་ཆགས་པ་གང་། །
རྩ་གཏོར་བཏང་བ་ཏང་གི་གཤིས། །
རི་སྡེ་ཁྲ་མོ་ལྷུན་ཆགས་ཤིང་། །
གྲོང་དང་གྲོང་ཚོ་བརྗིད་ཆགས་སེ། །
མངའ་ཁོངས་ཀུན་པོ་ཁུ་སིམ་མེ། །
མུ་ནས་སྐྱོང་བ་ཏང་གི་འགན། །
ཨ་གསར་གཏམ་གྱིས་བློ་མི་མགུ །
དཔལ་དང་འབྱོར་བས་དམངས་མི་བསླུ། །
བཙན་པོ་གཏམ་གྱིས་གང་མི་བཙོང་། །
དེ་ཡང་ཏང་གི་དཔའ་སྤོབས་ཡིན། །
རང་ཚུགས་བརྟན་པ་གངས་ཀྱི་གཤིས། །
རྫུན་ཚིག་མི་སྨྲ་ཡང་དག་བློ། །
གང་དུ་གནས་པ་དེ་རུ་བྲིན། །
དྲང་བའི་སྲོལ་ཏེ་ཏང་གིས་གཏོད། །
འཐབ་ཕྱོགས་གསར་པར་བློ་ཐིམ་ཞིང་། །
སྤྱི་མཐུན་ལམ་དུ་སྤོ་མཛད་པ། །
མ་རིག་མུན་སེལ་སྒྲོན་མེ་སྟེ། །
ཏང་གི་དགེ་མཚན་ཨེ་མ་རྨད། །
ཏང་གི་ངོ་མཚར་གཞལ་དུ་དཀའ། །
ཏང་གི་འགྲོ་དོན་ཟབ་ཅིང་མཐུག །
ཏང་གི་རིག་གཞུང་མཐའ་བྲལ་བས། །
ཚིག་གི་སྒྲོམ་དུ་བསྡུ་མ་ནུས། །