༄༅།།གནས་ཆེན་བཞག་བྲ་དཀར་མོའི་ངོ་སྤྲོད།

རིག་འཛིན་བསྟན་སྲུང་། རྩོམ་སྒྲིག་པ།དབང་ཆེན།ཡོང་ཁུངས།ཁམས་པའི་རིག་གནས་དྲ་བ། སྤེལ་དུས། 07-13


  
གནས་ཆེན་བཞག་བྲ་དཀར་མོའི་ངོ་སྤྲོད།

   དཀར་མཛེས་ཁུལ་དར་མདོ་རྫོང་ལྷ་སྒང་གྲོང་རྡལ་གྱི་གོ་རོ་མའི་ས་ཆའི་ཤར་སྟོད་བཞག་བྲ་དཀར་པོའི་མཐོ་ཚད་ལ་མཚོ་འཕགས༥༨༢༠ཡོད།རི་དེ་ནི་ཁམས་ཕྱོགས་ཀྱི་གནས་རི་དང་གཞི་བདག་རྩ་ཆེན་ཞིག་ཏུ་བརྩིས་ཡོད།དེ་ཡང་སྤྱིར་བཞག་བྲ་ཟེར་དོན་ནི་ཨ་མྱེ་རྨ་ཆེན་དང་ཁོང་གི་སྲས་གཉིས་ཡུལ་འདིར་ཕེབས་སྐབས་མི་ཉག་ཕྱོགས་ཀྱི་གཞི་བདག་རྣམས་འཛོམས་ནས།ཁྱེད་ཀྱི་སྲས་འདི་ཡུལ་འདིའི་གནས་བདག་དུ་བཞག་བྲ་དང་མི་བྲ་ཞེས་ཞུ་བ་ཕུལ་སྐབས་རྨ་རྒྱལ་སྤོམ་རས་བཞག་བྲ་ཞེས་པས་བཞག་བྲ་ཞེས་མིང་ཐོགས་སོ།།

    གནས་རི་འདིའི་བདག་པོ་ནི་མི་དཀར་རྟ་དཀར་གཞོན་ནུའི་ཆ་བྱད་ཅན་ཞིག་ཡིན་ཟེར་སྲོལ་ཡོད།གནས་རི་འདི་ཉིད་ལ་ཤམ་བྷ་ལ་གཉིས་པ་ཞེས་པའི་གོ་དོན་ནི་སྔོན་ཀཿདམ་པ་བདེ་གཤེགས་ཀྱིས་མཛད་པའི༼  གནས་ཡིག་ཐར་ལམ་བགྲོད་བྱེད༽ ཅེས་པའི་ནང་དུ་སྤྱིར་ཤམ་བྷ་ལ་ནི་དུས་ཀྱི་འཁོར་ལོ་ནས་གསུངས་པ་ལྟར།རིགས་ལྡན་ཉེར་ལྔའི་ཐོག་མ་རིགས་ལྡན་འཇམ་དཔལ་གྲགས་པ་ནས་ཉེར་ལྔ་པ་དྲག་པོ་འཁོར་ལོ་ཅན་བར་དུ་བྱོན་སའི་གནས་དེ་ཡིན་ཡང་འདིར་རྟེན་འབྲེལ་གྱི་གནད་སྒོ་ཁྱད་པར་ཅན་ཡོད་པར་བརྟེན།མི་ཉག་བཞག་བྲའི་གནས་རི་འདི་ནི་དོན་ལ་ཤམ་བྷ་ལ་དངོས་དང་ཁྱད་པར་མེད་ཀྱང་།ཤམ་བྷ་ལ་གཉིས་པ་ཞེས་བརྗོད་དེ་གནས་འདི་ཉིད་དང་འབྲེལ་བ་བྱས་ན་འབྲེལ་ཚད་ཚང་མ་ཚེ་འདི་ཕྱི་ཐམས་ཅད་ལ་འབྲས་བུ་བཟང་པོ་ཐོབ་པ་ཐེ་ཚོམ་མི་དགོས་ཞེས་ཡང་ཡང་གསུངས་སོ།།གནས་ཡིག་དེ་ལོ་བཅུའི་དུས་འཁྲུགས་སྐབས་བོར་བརླགས་ཤོར་སོང་ངོ་།།

   གནས་འདིའི་མིང་གི་རྣམ་གྲངས་ནི།ཤར་སྟོད་བཞག་བྲ།བཞག་བྲ་ལྷ་རྩེ།མི་ཉག་བཞག་བྲ་དཀར་པོ།ཤམ་བྷ་ལ་གཉིས་པ།བསྟན་སྲུང་བཞག་བྲ་ལྷ་རྩེ།ཤར་སྟོད་ཀྱི་དུང་རི་དཀར་པོ།

   གནས་རི་འདིའི་སྐུ་གསུང་ཐུགས་ཡོད་ཏན་འཕྲིན་ལས་ཀྱི་གནས་རྣམས་ནི།སྐུ་ཡི་གནས་རི་མི་ཉག་འབོ་གངས་དཀར།གསུང་གི་གནས་རི་བཞག་མོ་སྨན་བཙུན་གཞོན་ནུ།ཐུགས་ཀྱི་གནས་མཆོག་མི་ཉག་མགར་ཐར་དགོན་པ།ཡོན་ཏན་གྱི་གནས་ཕག་མོ་རི།འཕྲིན་ལས་ཀྱི་གནས་ལྷ་སྒང་གི་གནས་རྣམས་ཡིན་ནོ།།

    གནས་རིའི་རྩ་བའི་ཚ་ཆུ་རྣམས་ནི།བཻ་རོ་ཚ་ཆུ།ཕོ་ལོག་ཚ་ཆུ།བརྒྱ་ཤོང་ཚ་ཆུ།མཁལ་མའི་ཚ་ཆུ།གཟེར་འཇོམས་ཚ་ཆུ།ཀུན་ཕན་ཚ་ཆུ་སོགས་ཚ་མིག་དྲུག་བདུན་ཙམ་ཡོད་པ་དེ་ནད་རིགས་ཀུན་ལ་ཕན་ནོ།།

   རི་བོ་ནི། གནས་རི།རྫ་རི།བྲག་རི།གངས་རི།ནགས་རི།སྤང་རི།གཡའ་རི།གཏེར་རི་སོགས་ཡོད།

    ཆུའི་སྐོར་ལ།རང་བྱུང་གཏེར་ཆུ།ཆུ་མིགསྨན་ཆུ།རྫ་ཆུ།གངས་ཆུ།ཚེ་ཆུ།འབབ་ཆུ།གྲུབ་ཆུ།གླང་ཆུ་བཅས་སོ།།

    བླ་མཚོ་ནི།ནང་གི་བླ་མཚོ་བཞག་བྲ་གཡུ་མཚོ།ཕྱིའི་བླ་མཚོ་མཚོ་གསུམ་ཁའི་མཚོ།རྒྱུ་མ་རྒྱུ་ཁུག་མཚོ།མི་རྒོད་མཚོ།གསང་བའི་བླ་མཚོ།ས་གཡང་མཚོ།ལུ་འདན་མཚོ་བཅས་སོ།།

    ཤིང་སྣའི་རིགས་ནི། ཤུག་པ།སྟག་མ།ཐང་ཤིང་།བེ་ལོ་ཤིང་།ཁྲེད་པ་ཤིང་།སུ་རུ།སྤེན་མ།གླང་མ།ཉ་བྲུག ཁྲ་མ།འོམ་བུ།སྲ་ཤིང་།སུར་དཀར་སོགས་ཤིང་རིགས་དུ་མ་ཡོད་དོ།།

      ཟ་རྒྱུའི་ལྡུམ་རིགས་ནི།རྫ་ལྕུམ།ལྕུམ་མདུང་།ཆུ་ལྕུམ།དཀར་ཡང་།ཤ་མོ་རིགས་ལ།ཤ་བ་གྲོད་པུ།བྱེའུ་ཙེ་ལག་པ།འབྲུག་གྲགས་ཤ་མོ།ཉ་ལ་ཉ་ཅོ།རྒན་མོ་འཕང་ཤ  བེ་ལོ་ཤ་མོ་སོགས་ཡོད།

     གཏེར་རྫས་སྐོར་ལ།ཞ་ཉེ།དངུལ།གསེར།ཟངས།གཡུ།ལྕགས།རྡོ་ཤེལ།རག་བཅས་ཡོད་པར་བཤད།

    གཅན་གཟན་དང་རི་དྭགས་ཀྱི་རིགས་ནི། སྟགབཤད་སྲོལགཟིག  དྲེད་མོ།ཕག་རྒོད།ཤ་བ།དོམ། གླ་བ།དགོ་བ།འཕར་བ།ཝ།སྤྱང་ཀི་བཅས་ཡོད།

    བྱའི་རིགས་ལ།བྱེའུ་རིགས་དུ་མ་དང་།ཁུ་བྱུག འཇོལ་མོ།བྱ་དཀར།གོང་མོ།བྱ་རྒོད།ཁྲ།གླག ཕོ་རོག  སྐྱ་ག་སོགས་ཡོད།

    སྨན་རྩྭའི་རིགས་ནི།སྨན་ཆེན།མཐོང་བ་སུམ་ལྡན་འཛོམས་ཡོད།དབྱར་རྩྭ་དགུན་འབུ།དབང་པོ་ལག་པ།རྩ་མཁྲིས།གཡའ་ཀྱི་མ།སྙི་བ།སྟོང་རི་ཟིལ་པ།ཀླུ་བདུད་རྡོ་རྗེ།དྲེས་མ།ཨུག་ཆོས།ཨུཏྤལ་སྔོན་པོ་དང་སེར་པོ།བོང་བ་དཀར་པོ།ཨ་བྷི་ཥ།ལུག་རུ་དཀར་པོ་དང་སེར་པོ།ལྕེ་ཚ།ཤུག་པ་ཚེར་མ་ཅན།ཤང་དྲིལ།བྱ་རྒོད་སུག་པ།སེ་བ།གུར་ཏིག ཁྱུང་སྡེར།ཨ་ཀྲོང་།སྲོ་ལོ་དམར་པོ།དབྱི་མོང་།སྙ་ལོ།ལྕ་བ་སོགས་སྨན་རིགས་མང་ངོ་།།

     གནས་ཆེན་འདིའི་ཁྱད་ཆོས་ནི།སྐར་བཟང་དུས་བཟང་ལ་ནམ་རྒྱུན་རང་བྱུང་གི་བསང་གཏོང་རྒྱུ་ཀུན་གྱིས་མངོན་སུམ་དུ་མཐོང་རྒྱུ་ཡོད།མ་ཚད་སྲིད་པ་ཆགས་པའི་དར་ཤིང་སོགས་མཐོང་རྒྱུ་ཡོད་ལ་ཡུལ་དེར་སྦས་ཡུལ་ཁྱད་མཚར་ཞིག་ཀྱང་ཡོད་པ་མི་འགས་མཐོང་མྱོང་།ས་བཅུ་ཐོབ་པའི་སེམས་དཔའ་ཆེན་པོ་ཞིག་ཡིན་ཟེར།གནས་རི་འདི་གཞི་བདག་ལྟ་བུ་བྱས་ནས་བསང་བཏང་ན་ཚེ་བསོད་རླུང་རྟ་འཕེལ་བ་དང་ཁ་རྗེ་དབང་ཐང་དར་བས་བསང་གཙང་མ་གཏོང་དགོས།གནས་འདི་ལ་འབྲེལ་བའི་ཕན་ཡོན་ནི།ཚེ་འདི་ལ་རྐྱེན་ངན་བར་ཆད་སེལ་བ་དང་ལས་ངན་གྱི་སྡིག་སྒྲིབ་དག་ནས་ཁ་རྗེ་རླུང་རྟ་དར་ཞིང་།ཕྱི་མ་ཐར་བའི་ལམ་སྣ་ཟིན་པའི་དགོས་པ་ཁྱད་པར་ཅན་འབྱུང་ངོ་། 

    གནས་འདིའི་ཡུལ་ལྷ་འགའི་མིང་། ནོར་ལྷ་གཏེར་བདག་ལབ་ཙེ།ཟུར་གསུམ།བཞག་མོ།  མགར་ཐར་དགོན་པ།  མི་ཉག་རྡོ་ར་དཀར་མོ།དར་མདོའི་བཞག་བྲའི་བསང་ཁྲི།ལྷ་སྒང་གི་སྒྲོལ་མ་རི་སོགས་ནི་གཞི་བདག་འདིའི་ཚབ་བྱེད་ཆོག་པའི་བསང་མཆོད་བྱེད་ས་ཁྱད་པར་ཅན་མང་ངོ་།།


དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས། 蜀ICP备14009601号-1