ཉེ་ཆར། དཔལ་ཡུལ་རྫོང་གིས་ནགས་ལུང་མཚོ་གནའ་བོའི་འཁྱགས་གཡེང་འདམ་ར་རྒྱལ་ཁབ་ཀྱིA4རིམ་པའི་ཡུལ་སྐོར་ལྗོངས་ཁུལ་བསྐྲུན་པའི་ལས་ཀར་སྐུལ་འདེད་གཏོང་བའི་ཚོགས་འདུ་འཚོགས་པ་རེད།

   ཚོགས་འདུའི་ཐོག་དཔལ་ཡུལ་རྫོང་ཨུའི་ཧྲུའུ་ཅི་གཞོན་པ། རྫོང་དཔོན་ཨ་གཡང་དོན་འགྲུབ་ཀྱིས་ཚོགས་འདུ་གཙོ་སྐྱོང་བྱས་པ་དང་། ནགས་ལུང་མཚོ་གནའ་བོའི་འཁྱགས་གཡེང་འདམ་ར་རྒྱལ་ཁབ་ཀྱིA4རིམ་པའི་ཡུལ་སྐོར་ལྗོངས་ཁུལ་བསྐྲུན་པའི་ལས་ཀ་སྤེལ་ཚུལ་ལ་ཉན་པ་དང་། འབྲེལ་ཡོད་ལས་ཁུངས་ཁག་གིས་གསར་འཛུགས་ལས་ཀ་ཁག་དམ་འཛིན་གྱིས་དོན་འཁྱོལ་བྱེད་བཞིན་ཡོད་པ་རེད།

   ནགས་ལུང་མཚོ་ནི་འཛམ་གླིང་སྟེང་ཆེས་ཁྱད་ཆོས་ལྡན་པའི་འཁྱགས་གཡེང་ཁུལ་ཞིག་ཡིན་ལ། གནའ་བོའི་འཁྱགས་རོམ་ས་གཤིས་རྗེས་ཤུལ་གྱི་མཚོན་བྱེད་གཙོ་བོ་དང་། མཐོ་སྒང་གི་གནའ་བོའི་འཁྱགས་རོམ་ས་གཤིས་ཚན་རིག་ཁྱབ་གདལ་ཞིབ་འཇུག་གི་གསོན་ཉམས་དོད་པའི་བཤམས་མཛོད་ཁང་ཞིག་ཡིན་ཞིང་། རྒྱལ་ཁབ་རིམ་པའི་འདམ་རའི་སྤྱི་གླིང་དང་། འབྲི་ཆུའི་སྟོད་རྒྱུད་ཀྱི་སྐྱེ་ཁམས་ས་ཁུལ་གྱི་སྲུང་ཡོལ་གལ་ཆེན། ཀྲུང་གོའི་མཚོ་བོད་མཐོ་སྒང་གི་མཐོ་གྲང་འདམ་རའི་རིགས་ཀྱི་བསྡུས་གཟུགས་དང་རང་བྱུང་དངོས་མང་སྟོན་ཚོགས་གླིང་བཅས་ཡིན་པས་འོད་སྟོང་འཕྲོ་བའི་མུ་ཏིག་ཅིག་དང་འདྲ་བར་སི་ཁྲོན་ནུབ་བྱང་གི་ཡང་རྩེ་ན་བཀལ་ནས་ཡོད།

   ནགས་ལུང་མཚོ་གནའ་བོའི་འཁྱགས་གཡེང་འདམ་རའི་ཡུལ་སྐོར་ལྗོངས་ཁུལ་གྱི་སྤྱིའི་རྒྱ་ཁྱོན་ལ་སྤྱི་ལེ་གྲུ་བཞི་མ61.5ཡོད་པ་དང་། འགྲིམ་འགྲུལ་སྟབས་བདེ་ཞིང་རྫོང་མཁར་དང་བར་ཐག་སྤྱི་ལེ140ཡོད་པ་དང་། དཀར་མཛེས་རྫོང་མཁར་དང་སྤྱི་ལེ70ཡོད་པ།གེ་སར་གནམ་གྲུ་ཐང་དང་སྤྱི་ལེ130ཡོད་དོ།།