གཙོ་ངོས།>> གནས་མཇལ།>>རི་ཆུའི་རིག་གནས།

རྩོམ་པ་པོ། མི་གསལ། རྩོམ་སྒྲིག་པ།དབང་ཆེན།ཡོང་ཁུངས།ཁམས་པའི་རིག་གནས་དྲ་བ། སྤེལ་དུས། ༢༠༢༡ལོའི་ཟླ་བ་༠༩ཚེས་༢༢ཉིན།

༄༅།།བོད་ཀྱི་ས་ཁམས་ཁོར་ཡུག་གི་ཁྱད་ཆོས།

         གཅིག སྤྱིའི་ཆགས་ཚུལ།
    བོད་ཡུལ་ནི་ལོ་རྒྱུས་ཀྱི་དུས་སྐབས་སོ་སོར་རྒྱ་ཆེ་ཆུང་ལ་འགྱུར་བ་བྱུང་ཡང་།མ  དོ་སྨད་ཆོས་འབྱུང་དང་སྐུ་འབུམ་བྱམས་པ་གླིང་གི་གདན་རབས་དོན་ལྡན་ཚངས་པའི་དབྱངས་སྙན་སོགས་ཞལ་མཐུན་པར་སྟོད་སྨད་བར་གསུམ་དུ་ཕྱེས་འདུག ཇི་སྐད་དུ་མདོ་སྨད་ཆོས་འབྱུང་ལས་བོད་ཡུལ་འདི་ལ་ནང་གསེས་ཀྱིས་ཕྱེ་བའི་སྟོད་མངའ་རིས་སྐོར་གསུམ་ནི།  སྤུ་རངས་མང་ཡུལ་ཟངས་དཀར་གསུམ་སྐོར་གཅིག ལི་བྲུ་ཤ་སྦལ་ཏི་གསུམ་སྐོར་གཅིག ཞང་ཞུང་ཁྲི་ཏེ་སྟོད་སྨད་གསུམ་སྐོར་གཅིག་ཏུ་བྱེད། བར་དབུས་གཙང་རུ་བཞི་ནི།  སྔར་གཙང་ལ་གཡས་རུ་དང་།  རུ་ལག་གཉིས།དབུས་ལ་དབུ་རུ་དང་། གཡོ་རུ་གཉིས་ཟེར་ཡང་།  ཆོས་རྒྱལ་ཀུ་ཤྲི་ཧན་གྱིས་བོད་ཁྲི་སྐོར་བཅུ་གསུམ་དབང་དུ་བསྡུས་ཏེ་རྒྱལ་དབང་རིན་པོ་ཆེར་ཕུལ་ཕྱིན་ལ་གཡས་རུ། གཡོན་རུ།  སྦུས་རུ།  གུང་རུ་བཞིར་བྱེད་དོ།  མདོ་ཁམས་སྒང་དྲུག་ནི།  ཟལ་མོ་སྒང་།  ཚ་བ་སྒང་།  སྨར་ཁམས་སྒང་།  སྤོ་འབོར་སྒང་།དམར་རྫ་སྒང་།མི་ཉག་རབ་སྒང་།  དང་དྲུག་ལ་བྱེད་ཅེས་གསུངས།   དེ་ལས་མདོ་ཁམས་སྒང་དྲུག་ནི་རི་ཅུའི་རྒྱུག་ཕྱོགས་དང་བསྟུན་ནས་བཤད་ན།  འབྲི་ཆུ་དང་ཉག་ཆུའི་བར་རྒྱུད་ལ་ཟལ་མོ་སྒང་། རྒྱལ་མོ་རྔུལ་ཆུ་དང་རྫ་ཆུའི་བར་རྒྱུད་ལ་ཚ་བ་སྒང་། རྫ་ཆུ་དང་འབྲི་ཆུའི་བྱང་རྒྱུད་བར་གྱི་ས་ཁུལ་ལ་སྨར་ཁམས་སྒང་། འབྲི་ཆུ་དང་ཉག་ཆུའི་ལྷོ་རྒྱུད་བར་གྱི་ས་ཁུལ་ལ་སྤོ་འབོར་སྒང་། དེང་གི་མཚོ་སྔོན་ཞིང་ཆེན་རྨ་ཆུའི་ལྷོ་ནས་ཉག་ཆུའི་སྟོད་ཀྱི་ཤར་བར་ལ་དམར་རྫ་སྒང་། ཉག་ཆུའི་དཀྱིལ་རྒྱུད་ཤར་གྱི་ཁུལ་ལ་མི་ཉག་རབ་སྒང་ངོ།།     མདོ་ཁམས་ནི་ཨ་མདོ་དང་ཁམས་ཀྱི་ས་ཁུལ་རྒྱ་ཆེ་བ་དེ་ཡིན་ཞིང་།  ཨ་མདོ་དང་ཁམས་ཁྱི་བསྡུས་མིང་སྟེ།  ཨ་མདོ་ཞེས་པ་ཡོངས་གྲགས་སུ་ཨ་ཆེན་གངས་རྒྱབ་ཀྱི་རི་དང་མདོ་ལ་རིང་མོ་གཉིས་ཀྱི་མིང་བསྡོམས་པས་བཏགས་པར་གྲགས་སོ།།   ཁམས་ཞེས་པ་ནི་སྒྲ་དོན་དུ་མར་འཇུག་ཀྱང་།  ས་མིང་གི་དབང་དུ་བྱས་ན་དོན་གཉིས་སྟེ། གཅིག་ནི་མཐའ་མཚམས་སམ་ས་མཐའ་ལ་འཇུག་པ།  ཁམས་ཀྱི་གཡར་མོ་ཐང་ཞེས་པས་མཚོན་པར་མ་ཟད།  རྒྱ་ནག་སྐད་ཀྱི་ཀན་སུའུ་ནི་ཁམས་ཞེས་པའི་ཐ་སྙད་ལས་འོངས་ཤིང་སྒྲ་ཟུར་ཆག་པས་ཀྱང་ཤེས་ཐུབ་བོ།  ཅིག་ཤོས་ནི་མདོ་ཁམས་གཉིས་སུ་ཕྱེ་བའི་ཡ་གྱལ་ཁམས་པ་བ་གནས་ཡུལ་ལ་འཇུག་སྟེ།  དཔེར་ན་ཁམས་ཕྱོགས་སུ་སོང་ཞེས་པ་ལྟ་བུས་མཚ།  སྐུ་འབུམ་བྱམས་པ་གླིང་གི་གདན་རབས་དོན་ལྡན་ཚངས་པའི་དབྱངས་སྙན་ལས་ཡང་བོད་ཆོལ་ཁ་གསུམ་ཟེར་བ་ནི་མངའ་རིས་གུང་ཐང་ནས་ཤོག་ལྭ་སྐྱ་བོ་ཡན་ཆད་དབུས་གཙང་ཆོས་ཀྱི་ཆོལ་ཁ།དེ་ནས་རྨ་ཆུའི་ཁུག་སོ་དང་པོ་ཡན་ཆད་མདོ་སྟོད་མིའི་ཆོལ་ཁ།དེ་ནས་རྒྱའི་མཆོད་རྟེན་དཀར་པོ་ཡན་ཆད་ལ་མདོ་སྨད་རྟའི་ཆོལ་ཁ་གསུམ་ཡིན་ནོ།  ཞེས་པ་ལྟར་བོད་ཡུལ་ཆོལ་ཁ་གསུམ་དུ་ཕྱེས་པའང་སྣང་ངོ།།
 

39.7K

ཐག་རག་ཡིག་བསྒྱུར་མ་ལག

དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས། 蜀ICP备14009601号-1