ལུའུ་ཐུའུ་གསར་འགྱུར་ཁང་གིས་ཚེས་19ཉིན་གནས་ཚུལ་སྤེལ་བར་གཞིགས་ན། ཨ་རིའི་ཕྱི་ནད་ཚན་ཁག་གི་སྨན་པས་མིའི་ལུས་པོར་ཕག་པའི་མཁལ་མ་སྤོ་འཛུགས་བྱེད་པའི་ཚོད་ལྟ་བྱས་ཡོད་ཅིང་། མིའི་ལུས་ཀྱི་རིམས་འགོག་མ་ལག་གིས་ཕག་པའི་མཁལ་མ་འཕྲལ་མར་ཟུར་འབུད་བྱེད་པའི་གནས་ཚུལ་ཐོན་མེད་པ་རེད། གནས་འཕྲིན་དེའི་ནང་། དེ་ནི་གྲུབ་འབྲས་ཧ་ཅང་ཆེན་པོ་ཞིག་ཡིན་ཞིང་། མིའི་དབང་པོ་སྤོ་འཛུགས་བྱེད་པའི་མཁོ་མང་འདོན་ཉུང་གི་གནད་དོན་སེལ་བའི་མཐུན་རྐྱེན་དུ་འགྲོ་ཐུབ་པའི་རེ་བ་ཆེ་སྐོར་བརྗོད་ཡོད།

     གནས་ཚུལ་སྤེལ་བར་གཞིགས་ན། ཚོད་ལྟ་དེ་ཉིའུ་ཡུའེ་གཙུག་ལག་སློབ་གྲྭ་ཆེན་མོའི་ལང་ཀེ་ཉི་བདེ་ཐང་ལྟེ་གནས་（NYULangone Health）སུ་སྤེལ་བ་དང་། རིགས་གཅིག་མཁས་ཅན་གྱིས་གཞི་རྒྱུ་འགྱུར་བ་བྱུང་ནས་མི་ལུས་ཀྱིས་ཕྱིར་འབུད་བྱེད་རྐྱེན་དུ་འགྲོ་བའི་ཆ་རྡུལ་མེད་པར་གྱུར་པའི་ཕག་པའི་མཁལ་མ་ཞིག་མི་ཡི་ལུས་སུ་སྤོ་འཛུགས་བྱས་པ་དང་། སྤོ་འཛུགས་བྱ་ཡུལ་ནི་ཀླད་ཤི་ནད་ཕོག་ཅིང་མཁལ་མའི་ནུས་པ་ཆ་ཚང་མེད་པའི་བུད་མེད་ཀླད་ནད་ཅན་ཞིག་ཡིན་པ་རེད། ཁོ་མོའི་ཚེ་སྲོག་གི་རྒྱུན་སྐྱོང་བའི་མ་ལག་མ་བཅད་གོང་ནང་མིས་ཚོད་ལྟ་དེར་མོས་མཐུན་བྱས་ཡོད།

     གནས་ཚུལ་སྤེལ་དོན་ལྟར་ན། ཉིན་གསུམ་གྱི་དུས་ཡུན་ནང་མཁལ་མ་གསར་པ་དང་ནད་པའི་ཁྲག་རྩ་སྦྲེལ་མཐུད་ཐུབ་ཡོད་ཅིང་། མཁལ་མ་དེ་ལུས་ཕུང་གི་ཕྱི་རུ་ཉར་ཚགས་བྱས་ཡོད་པས་ཞིབ་འཇུག་མི་སྣས་ལྟ་སྐུལ་ཚོད་འཛིན་བྱེད་བདེ་བོ་བྱུང་ཡོད།

        ཞིབ་འཇུག་དེའི་འགན་འཁུར་མཁན་ཕྱི་ནད་ཚན་ཁག་གི་སྨན་པ་འབུམ་རམས་པ་ལུའོ་པོ་ཐེ·མོང་ཀོ་མ་ལི་ཡིས་ལུའུ་ཐུའུ་ཁང་གིས་བཅར་འདྲི་དང་ལེན་བྱེད་སྐབས། སྤོ་འཛུགས་བྱས་པའི་མཁལ་མའི་ནུས་པར་ཚད་ལེན་ཚོད་ལྟ་བྱས་འབྲས་“ཧ་ཅང་རྒྱུན་ལྡན་དུ་མཐོང་”ཞིང་། མཁལ་མ་གསར་པའི་གཅིན་གཤེར་ཐོན་ཚད་“སྔོན་དཔག་དང་མཐུན་”འདུག གཞན་ཡང་། ལེགས་བཅོས་མ་བྱས་པའི་ཕག་པའི་མཁལ་མ་མི་མ་ཡིན་པའི་བློ་ལྡན་སྲོག་ཆགས་ཀྱི་ལུས་སུ་སྤོ་འཛུགས་བྱས་པར། སྤོ་འཛུགས་བྱས་པ་ཐག་ནས་ཕྱིར་འབུད་བྱེད་པ་ར་སྤྲོད་ཐུབ་པའི་དཔང་རྟགས་ཀྱང་རྙེད་མེད་ཅེས་བརྗོད་པ་རེད།

     མོང་ཀོ་མ་ལི་ཡིས་མཁལ་མ་སྤོ་འཛུགས་ཀྱི་ཚོད་ལྟ་དེས་འབྱུང་འགྱུར་གྱི་ལོ་གཅིག་གཉིས་ནང་མཁལ་མའི་ནུས་པ་ཉམས་པའི་མཇུག་དུས་སུ་སླེབས་པའི་ནད་པར་ཚོད་ལྟ་བྱེད་པར་གདམ་གསེས་གསར་པ་ཞིག་བསྐྲུན་ཡོད། ཚོད་ལྟ་འདི་རིགས་ནད་གཞི་ལྕི་པོ་ཕོག་པའི་ནད་པར་མིའི་རིགས་ཀྱི་མཁལ་མ་རྙེད་རག་བར་གྱི་དུས་ཐུང་གི་སྨན་བཅོས་ཇུས་གཞིར་སྤྱོད་རྒྱུ་ཡིན་པ་དང་། དེ་གཏན་འཇགས་རང་བཞིན་གྱིས་སྤོ་འཛུགས་བྱེད་ཐུབ་ངེས་ཀྱང་སྲིད་ཅེས་བརྗོད་པ་རེད།

མོང་ཀོ་མ་ལི་ཡིས་ད་དུང་མིག་སྔའི་ཚོད་ལྟ་དེ་མཁལ་མའི་སྤོ་འཛུགས་ཁོ་ནའི་ཚོད་ལྟ་ཞིག་ཡིན་མོད། མཁལ་མ་ལུས་ཐོག་ཏུ་ཉིན་གསུམ་འཚོ་གནས་ཐུབ་ཡོད་པས་སླད་ཕྱིན་གྱི་ཚོད་ལྟ་གང་རུང་ཁྲོད་གནད་དོན་ཐག་གཅོད་བྱེད་ཐབས་གསར་པ་རྙེད་ངེས་ཡིན་ཞེས་བརྗོད་པ་རེད།