ཀ་བ་བུམ་པ་ཅན།
ལྷ་ས་གཙུག་ལག་ཁང་ཆེན་པོའི་ཁྱམས་ར་ནང་མའི་མཐའ་བསྐོར་གྱི་ཀ་ཐུང་གྲས་སུ་ཀ་བ་རྟགས་ཅན་བཞི་ཡོད་པའི་ནང་གསེས་ཞིག་སྟེ། ཀ་བ་འདི་གང་ཡིན་ད་ཕན་ཇོ་བོ་རྗེ་ཨ་ཏི་ཤས་ངོ་མཁྱེན་པ་མ་གཏོགས་སུས་ཀྱང་ངོས་འཛིན་མ་ཐུབ་ཅིང༌། ཇོ་བོ་རྗེས་གསང་བ་སྲུང་བའི་ཕྱིར་དུ་གཙུག་ལག་ཁང་གི་ཕྱོགས་གང་དུ་ཡོད་མེད་གསལ་པོར་གསུངས་མེད། 《བཀའ་ཆེམས་ཀ་ཁོལ་མ》དང༌། 《ཆོས་འབྱུང་མེ་ཏོག་སྙིང་པོ》《མཁས་པའི་དགའ་སྟོན》སོགས་མང་པོ་ཞིག་ལས། རྒྱལ་པོ་སྲོང་བཙན་སྒམ་པོས་ཀ་བ་འདི་དང་ཉེ་བའི་སར་རིན་པོ་ཆེའི་གཏེར་སྦས་པར་གསུངས་པ། ཀ་བའི་གཏེར་རྟགས་མཚན་མར་བརྟགས་ན་དོན་དངོས་དང་མཐུན་ནམ་སྙམ། སྣར་ཐང་མཁན་ཆེན་མཆིམས་ནམ་མཁའ་གྲགས་ཀྱིས་ཕྱོགས་བསྒྲིགས་མཛད་པའི《ཇོ་བོ་རྗེ་ཨ་ཏི་ཤའི་རྣམ་ཐར་རྒྱས་པ》ལས། ཀ་བ་འདི་ནས་འདོམ་གསུམ་དང་ཕྱེད་ཀ་གཞལ་བའི་གདུང་གསེབ་ནས་བཀའ་ཆེམས་ཤོག་དྲིལ་གསུམ་སྟེ། ༡.བློན་པོ་རྣམས་ཀྱིས་བསྒྲིགས་པའི《ཟླ་བ་འདོད་འཇོ》། ༢.བཙུན་མོ་རྣམས་ཀྱིས་མཛད་པའི《དར་དཀར་གསལ་བ》 ༣.རྒྱལ་པོ་ཉིད་ཀྱིས་མཛད་པའི《བཀའ་ཆེམས་ཀ་ཁོལ་མ》བཅས་གཏེར་ནས་བཏོན་གནང་ཐོག ཉིན་མོ་ཅིག་ལ་ཇི་ཙམ་བྲིས་ཟིན་པ་དེ་མ་གཏོགས་བཤུས་མི་ཆོག་ཅེས་གཏེར་བདག་གིས་བཀག་ཆ་བྱས་པ་ལྟར། ཇོ་བོ་རྗེའི་སློབ་མ་རྣལ་འབྱོར་པ་སོགས་བཞིས་ཁག་བགོས་ནས་བཤུས་པ་གནང༌། མཇུག་ནས་ཕྲན་ཙམ་བཤུས་མ་ཚར་བ་དང༌། བཀའ་ཆེམས་གྱི་ནང་དོན་ཞིབ་ཆ་རྣམས་མི་ངན་གྱིས་གཏོར་བཤིག་མི་འབྱུང་ཆེད་བྲིས་བཤུས་མ་མཛད་པར་སྔར་གྱི་རང་གནས་སུ་འཇོག་པར་མཛད་ཅེས་ཇོ་བོའི་རྗེ་རྣམ་ཐར་དང《བཀའ་ཆེམས་ཀ་ཁོལ་མའི》གླེང་གཞི་གཉིས་ཀ་ལས་གསལ། །
ཀ་བ་ཤིང་ལོ་ཅན།
ལྷ་ས་གཙུག་ལག་ཁང་གི་ཁྱམས་ར་ནང་མའི་མཐའ་བསྐོར་གྱི་ཀ་ཐུང་གྲས་སུ་ཀ་བ་རྟགས་ཅན་བཞི་ཡོད་པའི་ནང་གསེས་ཞིག་སྟེ། ལོ་རྒྱུས་འགའ་ཞིག་ཏུ། འོད་དཔག་མེད་ཀྱི་ལྷ་ཁང་གི་སྒོའི་གཡས་གཡོན་མདུན་གསུམ་གང་རིགས་ཤིག་ཏུ་ཡོད་པར་བཤད། ཀ་བ་འདི་དང་ཉེ་བའི་སར་གཏེར་གང་ཞིག་སྦས་པའི་སྐོར་ལ་གསུང་ཚུལ་མི་མཐུན་པ་ཡོད། 《རྒྱལ་རབས་གསལ་བའི་མེ་ལོང》དང《མཁས་པའི་དགའ་སྟོན》སོགས་ལས་ཀ་བ་འདི་དང་ཉེ་བའི་སར་རིན་པོ་ཆེའི་གཏེར་སྦས་པར་གསུངས། 《བཀའ་ཐང་སྡེ་ལྔའི་རྒྱལ་པོ་བཀའ་ཐང》ལས་ཀ་བ་འདི་དང་ཉེ་བའི་སར་ཆོས་གཏེར་སྦས་པར་གསུངས་པ་དང༌། 《བཀའ་ཆེམས་ཀ་ཁོལ་མ》དང༌། 《ཆོས་འབྱུང་མེ་ཏོག་སྙིང་པོ》《མཁས་པ་ལྡེའུའི་ཆོས་འབྱུང》《རྗེ་ཙོང་ཁ་པ་ཆེན་པོའི་རྣམ་ཐར》རྒྱས་བསྡུས་བཅས་མཐུན་པར་སྣང༌། 《བཀའ་ཆེམས་ཀ་ཁོལ་མ》ཡི་གཏེར་བྱང་དུམ་བུའི་ནང༌། ཀ་བ་འདི་དང་ཉེ་བའི་སར་གསོ་རིག་སྨན་དཔྱད་ཀྱི་གཞུང་ཁག་གཅིག་ཀྱང་གཏེར་དུ་སྦས་ཞེས་གསལ། །
ཀ་བ་སེང་མགོ་ཅན།
ལྷ་ས་གཙུག་ལག་ཁང་གི་ཁྱམས་ར་ནང་མའི་མཐའ་བསྐོར་གྱི་ཀ་བ་རྟགས་ཅན་བཞིའི་གྲས་ཤིག་སྟེ། ཀ་བ་འདི་དང་ཉེ་བའི་སར་རྒྱལ་པོ་སྲོང་བཙན་སྒམ་པོས་གཙུག་ལག་ཁང་འདིར་མི་དང་མི་མིན་གྱི་གནོད་འཚེ་ཕྱིར་བཟློག་བྱེད་པའི་གསང་སྔགས་ཀྱི་རིགས་རྣམས་གཏེར་དུ་སྦས་ཞེས《བཀའ་ཆེམས་ཀ་ཁོལ་མ》དང༌། 《ཆོས་འབྱུང་མེ་ཏོག་སྙིང་པོ》《མཁས་པའི་དགའ་སྟོན》བཅས་ལས་གསལ། །
ཀ་བ་སྦྲུལ་མགོ་ཅན། ལྷ་ས་གཙུག་ལག་ཁང་གི་ཁྱམས་ར་ནང་མའི་མཐའ་བསྐོར་གྱི་ཀ་ཐུང་རྟགས་ཅན་བཞིའི་གྲས་ཤིག་སྟེ།《བཀའ་ཆེམས་ཀ་ཁོལ་མ》དང《ཆོས་འབྱུང་མེ་ཏོག་སྙིང་པོ》《མཁས་པའི་དགའ་སྟོན》སོགས་ལོ་རྒྱུས་མང་པོར་རྒྱལ་པོ་སྲོང་བཙན་སྒམ་པོས་ཀ་བ་འདི་དང་ཉེ་བའི་སར་གཙུག་ལག་ཁང་འདིར་མི་དང་མི་མིན་གནོད་འཚེ་བཟློག་པའི་ཆེད་དུ་དྲག་སྔགས་ནུས་མཐུའི་གཏེར་ཁ་སྦས་ཞེས་གསལ། །
