གླུ་ཐ་ལ་ལ་མོ་ཐ་ལ་རེད། །
   གླུ་ཨ་ལ་ལ་མོ་ཨ་ལ་རེད། །
   སྐྱབས་རྒྱལ་བ་རྒྱ་མཚོའི་ཞབས་ལ་འདུད། །
   ཡང་དག་པའི་ཆོས་ལ་གསོལ་བ་འདེབས། །
   ལྷ་མཁྱེན་པས་གཟིགས་ལ་ཐུགས་རྗེས་ཟུངས། །
   ལམ་སྣ་དྲོངས་དང་སྤྲུལ་བའི་སྐུ། །
   འདན་མིའི་གླུ་ལ་ལེན་རོགས་མཛོད། །
   ས་འདིའི་ས་ངོ་མ་ཤེས་ན། །
   རྨ་དེའུ་ཡག་སྟག་ཐང་ཁྲ་མོ་རེད། །
   ང་དང་ང་ངོ་མ་ཤེས་ན། །
   ཆུ་ར་སྐྱིད་པའི་མར་ནང་ན། །
   ཉ་བུ་སྐྱིད་པའི་ཡར་ནང་ནས། །
   འདན་ཆུ་ལྷ་ཁང་རིང་མོ་ནས། །
   ཤར་ལུང་རི་དྲུག་མཁར་ནང་ནས། །
   ཚ་ཞང་འདན་མ་བྱང་ཁྲ་ཡིན། །
   ཚ་ཞང་མགོ་དང་སྐེ་མགུལ་ཡིན། །
   ཚ་ཞང་ལུས་དང་གྲིབ་མ་ཡིན། །
   ཚ་ཞང་བེར་དང་ཕུ་ཐུང་ཡིན། །
   ཚ་ཞང་མར་དཀར་སྤུ་ལུ་དེ། །
   མེ་ཉི་མ་མིན་པ་ཀུན་ལ་མཛེས། །
   ཚ་ཞང་རས་དཀར་ལྷན་པ་དེ། །
   སྦྲ་རེ་བ་མིན་པ་ཀུན་ལ་མཁོ། །
   ཚ་ཞང་བྱང་ཁྲ་དཀར་པོ་དེ། །
   ཆང་མཆོད་མེ་མིན་པ་ཀུན་ལ་མཁོ། །
   གདོང་འབུམ་པའི་ཞལ་ལུ་དཀར་པོ་ལགས། །
   ཚོ་ཆེན་ལྷ་སྡེ་དཀར་པོ་ལ། །
   དཔའ་བརྟུལ་ང་འདྲ་ཁོ་འདྲ་གདའ། །
   ལས་ཨེ་འདྲ་དཔའ་བརྟུལ་ནང་ཞིག་ནས། །
   བུ་ཆུང་མངགས་བདེ་འདན་མ་རེད། །
   ར་ཐོང་བཤའ་བདེ་འདན་མ་རེད། །
   བཏང་ན་འོས་བདེ་འདན་མ་རེད། །
   ཤི་ན་རོ་ཆུང་འདན་མ་རེད། །
   རོ་ལ་ཕངས་མེད་འདན་མ་རེད། །
   མི་འགྲོ་རྩ་བ་བཤད་པས་ན། །
   ཧོར་ཤན་པའི་ཁ་ཡ་མི་ཡོང་ལགས། །
   རྗེ་གུར་དཀར་འགྲན་ཡ་མི་ཕོད་ལགས། །
   བུ་སྟོབས་ཆེན་དཔུང་ཡ་མི་ཕེར་ལགས། །
   ཨ་ཅང་མི་བདེན་ཀུ་རེ་བྱས། །
   སྨུག་པོ་ལྡོང་གི་སྐུ་རིང་ལ། །
   འདན་མ་བློན་རབས་བཅོ་བརྒྱད་བྱས། །
   སྐུ་འཛམ་གླིང་སེང་ཆེན་རྒྱལ་པོ་དང་། །
   བློན་དམ་ཚིག་འགྱུར་མེད་འདན་མ་ཡིན། །
   ལྡོང་ཞལ་ལུའི་བཀའ་ལ་བཅག་ཕོད་མེད། །
   སོང་ཟེར་ན་ཤི་བདུད་ཡུལ་ལ་འགྲོ། །
   ང་འདན་མ་འགྲོ་ལ་ཆས་ལེ་ཡིན། །
   ང་མི་སྡོད་སེར་པོ་ཧོར་ལ་འགྲོ། །
   ཧོར་སྡེ་བའི་དལ་བྲེལ་བལྟས་ནས་འོང་། །
   དམག་བུ་རྟ་མང་ཉུང་བལྟས་ནས་འོང་། །
   ཕོ་ལ་རྒོད་ཞན་བལྟས་ནས་འོང་། །
   མདའ་ལ་སྐྱེན་ཞན་བལྟས་ནས་འོང་། །
   རྟ་ལ་མགྱོགས་ཞན་བལྟས་ནས་འོང་། །
   ཧོར་གུར་དཀར་བསམ་ཕུགས་ཅི་གདའ་བལྟ། །
   ང་མི་འདུག་སེར་པོ་ཧོར་ལ་འགྲོ། །
   ཚོ་ཆེན་ལྷ་སྡེ་དཀར་པོ་རྣམས། །
   མ་མཇལ་བར་དུ་བདེ་མོར་བཞུགས། །
   ཨེ་མཇལ་མི་ཤེས་བདེ་མོར་བཞུགས། །
   ལས་མི་མཇལ་ཟེར་བ་དགྲ་ལ་བསྒྱུར། །
   གླིང་ཚོ་ཆེན་ཐུགས་ལ་དེ་འདྲ་ཞོག །