༄༅།།ལྷ་སྲས་དགྲ་ལྷས་ཡབ་རྒྱ་ཚ་ཞལ་དཀར་ལ་བླངས་པ།

མི་གསལ། རྩོམ་སྒྲིག་པ།དབང་ཆེན།ཡོང་ཁུངས།ཧོར་གླིང་གཡུལ་འགྱེད་སྟོད་ཆ་ལས་དྲངས། སྤེལ་དུས། 05-07


   གླུ་ཐ་ལ་ལ་མོ་ཐ་ལ་ལེན། །
   གླུ་ཨ་ལ་ལ་མོ་ཨ་ལ་ལེན། །
   རྗེ་དཀོན་མཆོག་གསུམ་ལ་གསོལ་བ་འདེབས། །
   བྱིན་རླབས་གཏེར་ཁ་འབྱེད་དུ་གསོལ། །
   དངོས་གྲུབ་བདུད་རྩིའི་ཆར་ཆེན་ཕོབས། །
   རིགས་དྲུག་འཁོར་བའི་འདམ་ནས་དྲོངས། །
   ས་འདིའི་ས་ངོ་མ་ཤེས་ན། །
   རྨ་ཡུལ་སེང་ཆེན་བྱང་སྟོད་ནས། །
   གངས་དཀར་པོ་ཤེལ་གྱི་མཆོད་རྟེན། །
   སེང་ཆེན་གཡུ་རལ་རྒྱས་པའི་རི། །
   ཙནྡན་ཤིང་གི་ར་བ་ནས། །
   རྒྱ་སྟག་འཛུམ་དྲུག་རྒྱས་པའི་རི། །
   གཙང་རྒྱས་ཆུ་ཡི་ཞགས་པ་ལ། །
   ཉ་སྲམ་གསེར་མིག་རྒྱས་པའི་རི། །
   ཞིང་ས་ལྗང་ཆུང་ར་བ་ནས། །
   འབྲུ་དཀར་གཏེར་ཁ་འབྱེད་པའི་རི། །
   རི་བོ་བཞི་ཡི་ས་ཆ་ནས། །
   མཁར་མི་འགྱུར་དངུལ་ཆུ་ཁྲོ་རྫོང་རེད། །
   ཕོ་ང་དང་ང་ངོ་མ་ཤེས་ན། །
   འབུམ་པའི་དགྲ་ལྷ་རྩེ་རྒྱལ་ཡིན། །
   མིང་གཡེར་ཆེན་དགུང་ནས་གྲགས་ན་ཡང་། །
   མའི་ནུ་ཞོ་ཁ་ནས་བཞག་རུང་ཡིན། །
   གླུ་འདི་གླུ་ངོ་མ་ཤེས་ན། །
   འབུམ་མེའི་རྩེ་གླུ་དཀར་མོ་ཡིན། །
   གསོན་དང་མི་ཆེན་ཞལ་དཀར་ལགས། །
   སྐུ་མ་ཁྲོ་བེར་འཇམ་བཅུད་ལ་བཞུགས། །
   གསུང་མ་ཁྲོ་རྒྱ་དར་ངག་ལ་བཞུགས། །
   ཐུགས་མ་ཁྲོ་བྱམས་པའི་དགོངས་པ་ཐོངས། །
   མི་ཆེན་པོས་ཚབ་ཚུབ་མཛད་པ་མིན། །
   གནའ་མི་རྒན་པོའི་གཏམ་དཔེ་ལ། །
   མི་ཆེན་བློ་དང་བྱེ་མའི་རི། །
   མི་ཆེན་བློ་གྲོས་མ་ཉེས་དགོས། །
   ཆེ་ན་མངའ་ཐང་རླུང་ལ་བསྐུར། །
   ཆུང་ན་མཚོན་ཆའི་སོ་ཁ་འབྱེད། །
   བྱེ་རི་སྨུག་པོ་མ་ཞིག་དགོས། །
   ཆེ་ན་མི་དམངས་གཏེར་ཁུང་འཇུག །
   ཆུང་ན་ལུང་གསུམ་ཐལ་འཚུབ་སློང་། །
   དཔེ་དེ་དང་ཁྱད་པར་ག་ལ་ཡོད། །
   ཞལ་ལུ་མི་འབྱོན་བཞུགས་ན་དགའ། །
   གལ་ཏེ་འབྱོན་བསམ་ཡོད་པ་ན། །
   ཆེ་སྲིད་རྗེ་བློན་རྩེ་མེད་བཟོ། །
   ཆུང་ན་ངར་རྒོད་ཧ་ལ་འཕེན། །
   འབྱོན་བསམ་ཐུགས་ལ་མ་འཆར་ལགས། །
   ཡིན་གཅིག་མིན་གཉིས་འབྱོན་བསམ་ན། །
   བུ་རྩེ་རྒྱལ་མི་སྡོད་མཉམ་ཁྲིད་མཛོད། །
   ཕ་ཁུའི་ཉམས་ལ་མ་ཕན་ན། །
   བུ་མིང་གྲགས་ཆེ་ཡང་ཕན་པ་མེད། །
   ཕ་ཇུས་བུ་ཡིས་མ་མཐོང་ན། །
   སྣང་ངུ་བྱས་པ་དོན་རེ་ཆུང་། །
   དར་གོས་གྱོན་པ་ངོ་རེ་ཚ། །
   ཞིམ་མངར་བྱིན་པ་ཆུད་རེ་ཟོས། །
   བྱམས་པས་སྐྱོང་བ་ཡི་རེ་མུག །
   དེ་ཨེ་རེད་ཞལ་ལུ་སྐུ་ཚེ་ལགས། །
   ངས་ལུས་ལ་འགྲིག་པའི་ཁྲབ་དཀར་གཅིག །
   མགོ་ལ་འཚམ་པའི་རྨོག་དཀར་གཉིས། །
   རྨོག་ལ་མཛེས་པའི་དར་འཕྲུ་གསུམ། །
   སྐེད་ལ་རན་པའི་མཚོན་དཀར་བཞི། །
   མགྱོགས་ལ་རྒྱུག་པའི་འདོ་བ་ལྔ། །
   དཀར་པོ་ལྔ་ཚན་འགྲིགས་པས་ན། །
   ཧོར་འབུམ་ད་མག་དལ་བྲེལ་ལྟ་དགོས་བསམ། །
   ད་རུང་མི་དོ་བསམ་པ་ན། །
   སྔ་དྲོ་སྔ་རུའི་གོང་ལ་ཞོག །
   འདེད་དགོས་བྱུང་ན་མི་གཏོང་ངེས། །
   ཁྲ་ཧོར་པས་བྱེའུ་ཁྱུ་འདེད་འདེད་བསམ། །
   ཕྱི་དྲོ་ཕྱི་རུའི་གོང་ལ་ཞོག །
   འབྲོས་དགོས་ལན་པོ་འཕྲོད་ངེས་ཡིན། །
   རྫོང་ཆེན་རྒྱ་སྒོ་བསྡམ་བསྡམ་བསམ། །
   དེ་སྟེ་ལོ་གསུམ་མ་བྱུང་བར། །
   བྱང་ནས་སེང་ཆེན་བསྒུགས་ན་བསམ། །
   སྣང་ངུས་བཅུ་གསུམ་ལོན་ན་བསམ། །
   གེ་སར་དམག་གི་རྒྱལ་པོ་ལ། །
   སྨོན་ལམ་གཅིག་པའི་དམག་ཊི་བསྐོར། །
   ཧོར་སེར་པོའི་ལྟག་པ་མནན་ན་བསམ། །
   རེད་ཨེ་དགོངས་མི་ཆེན་ཞལ་དཀར་ལགས། །
   འཇིག་རྟེན་སྲིད་པའི་ས་ཆ་ན། །
   ཉི་མ་ཁེར་ཤར་གཟའ་དང་ཐུག །
   ཟླ་བ་གཅིག་འབྱོན་མར་ངོས་སྒྲིབ། །
   སྐར་ཚོགས་དཔུང་འགྲོས་འགྱུར་བ་མེད། །
   སེང་ཆེན་རྒྱ་མཚོ་རྡོ་སྐྱར་ལ། །
   ཞལ་ལུ་སྟོན་པའི་མེ་ཏོག་འདྲ། །
   གླིང་དཀར་ཕ་ཇུས་གྲུ་བཞི་འདི། །
   དེ་སྔ་ངར་མའི་དཔུང་བས་བཟུང་། །
   རྒོད་མཐའ་རླུང་ལ་མ་སྐུར་ལགས། །
   གོ་ན་རྣ་བའི་བདུད་རྩི་ལ། །
   མ་གོ་གླུ་ཡི་འབྲེལ་བ་ཞུ། །
   ཕ་ཞལ་ལུའི་དགོངས་པའི་ཟུར་ལ་ཞོག །
   ཅེས་དེ་ལྟར་བླངས་པ་དང་། རྒྱ་ཚ་ཉིད་ཀྱི་ཞལ་ནས། འོ་ན་སྣང་རྒྱལ་འབུམ་མེ་ཉོན། ཨ་ཕྲུག་གི་གླ་བོས་རྣ་བ་ཚ། ཁ་བདེ་པོས་མི་ཚེ་འཁྱོལ་བ་མིན། དོན་རྡོ་ཁའི་གླུ་ལ་རྣ་བས་ཉོན། ཅེས་གླུ་འདི་ལྟར་བཞེངས་པར་གདའ་འོ། །


དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས། 蜀ICP备14009601号-1