གཙོ་ངོས།>> རྩོམ་རིག>>སྙན་རྩོམ།

རྨེ་རུ་མགོན་པོ་སྐྱིད།​ རྩོམ་སྒྲིག་པ།ཚེ་དཔལ། ཡོང་ཁུངས།ངེད་དྲ་བ། སྤེལ་དུས། ༢༠༢༢ལོའི་ཟླ་བ་༠༥ཚེས་༡༡ཉིན།

༄༅།། མི་ཞིག་དྲན་དུས།

རྨེ་རུ་མགོན་པོ་སྐྱིད།


མི་ཞིག་དྲན་དུས།

ས་ཆ་ཞིག་དང་ས་ཆ་དེའི་ནམ་མཁའ་དྲན་འོངས།

མཁའ་མཐར་དཔྱངས་པའི་ཟོར་དབྱིབས་ཀྱི་དུང་ཟླ་དང་།

མག་མོག་ཏུ་འཚེར་བའི་སྐར་ཕྲན་དག་ཀྱང་རེ་རེ་བཞིན་དྲན་ཡོང་།

ཡང་དང་བསྐྱར་དུ་ས་ཆ་ཞིག་དྲན་པ་ནི།

ས་ཆ་དེའི་མི་ཞིག་ཡང་ཡང་དྲན་པས་རེད།

ཡང་བསྐོར་བསྐྱར་བསྐོར་གྱིས་མི་ཞིག་དྲན་པ་དེ།

སྐྱ་མདོག་གི་དུས་ཚིགས་ལ་ལྗང་མདོག་གི་ངོ་འབག་འབྲི་བ་དང་མཚུངས་ཀྱང་།

སེམས་ཀྱི་སྒོ་མཁར་གྲུ་བཞིར་རེ་བའི་སྒེའུ་ཁུང་ཕྱེ་ཚུལ་ཞིག་ཏུ་བསམ་ཆོག །

སེམས་གཏིང་ནས་མི་ཞིག་དྲན་དུས།

ཆུ་ནང་དུ་ཟླ་གཟུགས་ཕྱེད་ཀ་ཞིག་འགུལ་ཙམ་གཡོ་ཙམ་བྱེད་པ་མཐོང་ཡོང་།

བཞུད་ཟིན་པའི་མི་ཞིག་དྲན་དུས།

སྒྱུ་མའི་ཁམས་ཆེན་མོའི་ལྟར་སྣང་གི་བསླུ་བྲིད་ཡོད་ཚད་དང་།

ཅིས་ཀྱང་འབྲེལ་ཐག་ཆོད་པའི་ཁས་འཆེས་ཡོད།

སེམས་གཏིང་ནས་མི་ཞིག་དྲན་དུས།

འཇིག་རྟེན་གྱི་ཁ་དོག་དང་རྣམ་པ་གང་ཞིག་ལ་ཡང་།

ཞེ་གཏིང་ནས་ཡི་ག་ཆད་ཡོང་།

གཏན་དུ་ཕྱིར་འོངས་མེད་པ་ཤེས་བཞིན་དུ།

མི་ཞིག་གི་རྒྱབ་གཟུགས་ལ་ཡང་ཡང་བལྟ་འདོད་པ་ནི།

སྡུག་བསྔལ་ནས་བདེ་སྐྱིད་འཚོལ་སྟངས་ཤིག་ཅི་ལ་མིན་ཨང་།

39.7K

ཐག་རག་ཡིག་བསྒྱུར་མ་ལག

དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས། 蜀ICP备14009601号-1