ལོ་ཟླ་རྒས་ཟིན།
དུས་ཚིགས་དང་གཙང་པོ་མཉམ་དུ་བཞུར་སོང་།
ས་ཆེན་གྱི་སྙིང་ག་རུ་སིམ་པའི་རྣམ་ཤེས་དག
ལོ་རྒྱུས་ཀྱི་འོད་ངོགས་ནས་ནམ་ཡང་བརྗེད་མི་སྲིད།
དུས་རབས་འགྱུར་ཟིན།
དུས་ཚོད་དང་ཁ་བ་མཉམ་དུ་ཞུ་སོང་།
ལོ་རྒྱུས་ཀྱི་བྲག་སྐྱིབས་སུ་ཡིབ་པའི་རྒོད་པོའི་ཚོགས།
སྐལ་བའི་རུམ་ཁ་ནས་ནམ་ཡང་བོར་མི་སྲིད།
ནམ་ཟླ་འཁྱགས་ཟིན།
ལུག་ཁྱུ་དང་སེམས་པ་མཉམ་དུ་སྨྲེང་སོང་།
རྩྭ་ཐང་གི་བྲང་གཞུང་དུ་འཐིམས་པའི་གྲིབ་གཟུགས་དག
སྲིད་པའི་མིག་ཀོང་ནས་ནམ་ཡང་ཡལ་མི་སྲིད།
ཁྱེད་ཚོ་བཞུད་ཤུལ་དུ།
ས་ཆེན་གྱིས་ཁྱེད་ཚོ་བསྒོམས་བྱུང་།
ལོ་རྒྱུས་ཀྱིས་ཁྱེད་ཚོ་གྱེར་བྱུང་།
རྩྭ་ཐང་གིས་ཁྱེད་ཚོ་གླེང་བྱུང་བས།
ངས་ནམ་ཡང་ཁྱེད་ཚོ་དྲན་དགོས་བྱུང་།
