སྣང་བ་སྒྱུ་མའི་འཕྲུལ་གྱིས་འཇིག་རྟེན་ན་ཉུལ་ཡང་། །
ཞེན་ཆགས་རླུང་བུ་རྒོད་པོའི་ཟིལ་ཤུགས་དེ་བཙན་པས།།
གཟུགས་མེད་རྣམ་རྟོག་དམར་པོའི་བང་རིམ་གྱི་ཀློང་ན།།
ཁྱོད་ཀྱི་རྨི་ལམ་མཐོང་བའི་ལས་སྐལ་དེ་བརྒྱུས་ཡོད།།
དུངས་པའི་མིག་ལ་སྐྱོ་བའི་ཟེའུ་འབྲུ་དེ་ལྷུང་ཡང་།།
རི་ཁྲོད་མལ་དུ་བྱས་པའི་སེམས་རྩ་དེ་འཕར་པས།།
ཟིན་མེད་སྒོ་ལྔའི་དབང་པོའི་གོམ་སྟབས་ཀྱི་རྒྱུ་བ།།
མུ་མེད་འཇིག་རྟེན་གཞན་པའི་འཚོ་བ་ལ་བྲེལ་ཡོད།།
མར་མེའི་སྡོང་བུར་བསྡེབས་པའི་དེ་རིང་གི་དབུགས་རྒྱུན།།
སུ་ལ་དབང་བ་དེ་ཙམ་གཏན་ཁེལ་རང་མེད་ཀྱང་།།
ལྷན་སྐྱེས་བག་ལ་ཉལ་བའི་ལོ་ཟླ་ལ་བསྐུངས་པའི།།
དྲོད་ཀྱི་རླངས་པ་ཡ་ཆུང་སེམས་ཁུངས་ན་འཁྱིལ་ཡོད།།
མིག་ནས་མཆུ་མའི་རླབས་ཕྲེང་བར་མེད་དུ་འཇོ་ཡང་།།
ཡིད་ལ་དྲན་གདུང་ཁུར་གྱི་ན་ཟུག་དེ་བཅངས་ནས།།
རྒྱུས་མེད་མེ་ཏོག་ཐང་གི་སྒོ་ཐེམ་རང་བརྒལ་བཞིན།།
གཉུག་མའི་བརྩེ་བའི་དར་ཀྱི་མདུད་པ་ལས་གྲོལ་འདོད།།
སྟོན་གྱི་སྡོང་ལོ་ཐོར་བའི་ངང་ཚུལ་ལ་བསམ་དུས།།
བརྙན་གྱི་སྣང་ཤས་ལ་ཡང་ངེས་འབྱུང་རེ་འཆར་ཡོང་།།
དོ་ནུབ་ཟླ་བ་འཛུམ་པའི་འགྱུར་བག་ལ་བསམ་དུས།།
སྣང་སྲིད་འཁོར་བའི་གཤིས་ཀྱང་བདེན་སྣང་རེ་ཤར་སོང་།།
ཐོད་ལ་བརྐོས་པའི་ལས་ཀྱི་རི་མོ་དེའི་དབང་ལས།།
ཤར་ནུབ་འགག་གི་བརྒྱུད་ལམ་སོ་སོ་རུ་མཐོང་ཡང་།།
བདག་གིས་རྣམ་དཀར་དགེ་བའི་ཤེལ་དཀར་གྱི་ཆུན་པོ།།
ཁྱོད་ཀྱི་མགོན་སྐྱབས་དཔུང་གི་རྟེན་སྐལ་དུ་འབུལ་ལོ།།
