དུག་རྫས་ནི་མིའི་རིགས་ཡོངས་ཀྱི་སྤྱི་དགྲ་ཡིན་ལ། དེས་མིའི་རིགས་ཀྱི་བདེ་ཐང་ལ་གནོད་པ་ཚབས་ཆེན་བཟོ་བར་མ་ཟད་སྤྱི་ཚོགས་ཀྱི་སྲོལ་བཟང་ཡང་བརླགས་ཏེ། ཁྲིམས་འགལ་ཉེས་གསོག་གི་སྤྱོད་ངན་སྣ་ཚོགས་ཐད་ཀར་བསླངས་ནས། སྤྱི་ཚོགས་གཏན་འཇགས་ལ་འཇིགས་སྣང་ཆེན་པོ་བསྐུལ། དུག་རྫས་ལ་རྡུང་རྡེག་གཏོང་རྒྱུ་ནི་ལས་འགན་ནན་མོ་ཞིག་ཡིན་པས། དུག་རྫས་བཀག་འགོག་དང་ཉུང་དུ་གཏོང་བ། ཐ་ན་རྩ་མེད་དུ་གཏོང་རྒྱུ་བཅས་ནི་མི་དམངས་ཀྱི་སྤྱི་འདུན་ཡིན།
ཉེ་ཆར་མཛོད་དགེ་རྫོང་ཨུའི་དྲིལ་སྒྲོག་པུའུ་ཡིས་དུག་འགོག་དྲིལ་སྒྲོག་ནུས་ཤུགས་སྔར་ལས་ཆེ་རུ་བཏང་སྟེ། མི་དམངས་མང་ཚོགས་ཀྱི་དུག་འགོག་འདུ་ཤེས་ཆེར་བཏང་ནས། དུག་འགོག་དྲིལ་སྒྲོག་སློབ་གསོ་ཁྱབ་གདལ་དུ་གཏོང་ཆེད། ཅི་ལིན་སློབ་གླིང་གི2023ལོའི་སློབ་ཆེན་སློབ་མའི་དང་བླངས་པ་དང་མཉམ་དུ། ཚོང་ལས་སྲང་ལམ་དུ་མཉམ་འབྲེལ་གྱིས་དུག་རྫས་ནི་མུན་ནག་ཡིན་ལ་དུག་འགོག་ནི་སྐྱ་རེངས་ཡིན་ཞེས་པ་བརྗོད་དོན་གཙོ་བོར་བཟུང་བའི་དུག་འགོག་དྲིལ་སྒྲོག་བྱེད་སྒོ་སྤེལ།
བྱེད་སྒོར་དུག་འགོག་འཕྲེད་ཡིག་བཀལ་བ་དང་དུག་འགོག་ཤེས་བྱའི་དྲི་བ་དྲིས་ལན། དུག་འགོག་སྒྲོག་ཤོག་བཀྲམ་པ། དུག་རྫས་ཀྱི་དཔེ་དབྱིབས་འགྲེལ་བཤད། དུག་འགོག་རིས་ཚོན་བྱུག་པ་སོགས་ཀྱི་ལམ་ནས་དུག་འགོག་དྲིལ་སྒྲོག་བྱས། ཐེངས་འདིའི་དུག་འགོག་བྱེད་སྒོར་སྣང་བརྙན་ཆེ་ལ་གསོན་ཉམས་ཆེས་ལྡན་པ་ནི་དུག་རྫས་ཀྱི་དཔེ་དབྱིབས་འགྲེལ་བཤད་ཡིན་ལ། དུག་འགོག་མིག་མངས་ཀྱི་རོལ་རྩེད་ཁྲོད་དུག་འགོག་ཤེས་བྱ་འདུས་པས། དེས་ཐེངས་འདིའི་དུག་འགོག་བྱེད་སྒོའི་རོལ་རྩེད་རང་བཞིན་ཆེར་བཏང་བ་དང་། དུག་འགོག་རིས་ཚོན་བྱུག་པའི་རོལ་རྩེད་ཀྱིས་གྲོགས་པ་ཆུང་ཆུང་མང་བོའི་ཡིད་སེམས་བཀུག
མང་ཚོགས་མང་ཆེ་བས་རྒྱ་སྐད་མི་གོ་བས། ཡུལ་དངོས་སུ་ད་དུང་བོད་རྒྱ་སྐད་སྒྱུར་ལམ་ནས་དུག་འགོག་རྒྱུན་ཤེས་འགྲེལ་བཤད་བྱས་ཏེ། རྒྱ་ཆེའི་མང་ཚོགས་དུག་རྫས་དང་རིང་དུ་གྱེས་ཤིང་ཚེ་སྲོག་ལ་གཅེས་སྤྲས་བྱེད་པར་ཁྲིད་སྟོན་སྒོས། མང་ཚོགས་ཀྱི་དུག་རྟོགས་དང་དུག་འགོག དུག་འདོར་བཅས་ཀྱི་འདུ་ཤེས་ཆེར་བཏང་སྟེ། མང་ཚོགས་ཀྱི་དུག་རྫས་ངོས་འཛིན་ནུས་པ་དང་བཀག་འགོག་ནུས་པ་ཆེར་བཏང་།
ཐེངས་འདིའི་དུག་འགོག་ཤེས་བྱ་དྲིལ་སྒྲོག་བྱེད་སྒོ་མང་ཚོགས600ལྷག་ལ་ཁྱབ་ཅིང་། བསྡོམས་པའི་དུག་འགོག་སྒྲོག་ཤོག1000ལྷག་བཀྲམ་སྟེ། རྒྱ་ཆེའི་མང་ཚོགས་ལ་སྔར་ལས་དུག་རྫས་ཀྱིས་མི་སྒེར་དང་ཁྱིམ་ཚང་། སྤྱི་ཚོགས་བཅས་ལ་བཟོ་བའི་གནོད་འཚེ་རྟོགས་སུ་བཅུག་ནས། ཚང་མས་དུག་རྫས་མཉམ་འགོག་དང་དུག་འགོག་འཐབ་རྩོད་དུ་ཞུགས་ཏེ། དཔལ་ཡོན་དང་འཆམ་མཐུན་ལྡན་པའི་མཛོད་དགེ་བསྐྲུན་པར་སྤྱི་ཚོགས་ཀྱི་ཁོར་ཡུག་བཟང་བོ་འདོན་སྤྲོད་བྱེད་པར་སྐུལ་འདེད་བཏང་།
