༄༅། །གཙང་པ་རྒྱལ་པོའི་སྲིད་གཞུང་གི་སྒྲིག་གཞི་དང༌། རྩ་ཁྲིམས་སྐོར། ༼༡༽

རྩོམ་སྒྲིག་པ།ཡོང་ཁུངས། སྤེལ་དུས། 06-03


    དེ་ཡང་སྤྱི་ལོ་1618པའི་ས་རྟ་ལོར་ཧོར་སོག་གི་དམག་དཔུང་ཚན་ཆེན་ཞིག་བོད་དུ་ཡོང་ནས་ལྷ་སའི་གཙུག་ལག་ཁང་སོགས་བཟུང༌།  སྐྱིད་ཤོད་ལུང་པ་ལ་གནས་བཅས། བྱང་ཕྱོགས་ནག་ཆུའི་ཕྱོགས་ཀྱི་སྡེ་ཕལ་ཆེར་བཅོམ་ནས་དམག་གིས་བཟུང༌།  བོད་ཁམས་ཧོར་སོག་གིས་བཟུང་བའི་ཉེན་ཁ་ཉིན་ལྟར་ཇེ་ཆེར་འགྲོ་བའི་སྐབས་དེར།  གཙང་པ་ཕུན་ཚོགས་རྣམ་རྒྱལ་གྱི་སྲས་ཀརྨ་བསྟན་སྐྱོང་དབང་པོས་གཙང་དམག་ཁྲི་ལྷག་ཙམ་ཁྲིད་ནས་དབུས་སུ་སླེབས།  སོག་དམག་ལ་ཕར་རྒོལ་བྱེད་པའི་སྐབས་སུ། སོག་དམག་གིས་དགེ་ལྡན་པའི་ཆོས་ལུགས་དར་སྤེལ་གཏོང་བའི་ཆེད་དུ་ཡིན་པ་ལ་ཁ་གཡར་ནས་སེར་འབྲས་ཀྱི་གྲྭ་ཚང་རྣམས་ལ་ཁོ་ཚོར་རྒྱབ་སྐྱོར་བྱེད་དགོས་པའི་སྐུལ་མ་བྱས་མཐར།  སེར་འབྲས་ཀྱི་གྲྭ་དམག་ལངས་ཏེ་སོག་དམག་དང་མཉམ་དུ་གཙང་དམག་ལ་འཐབ་འཛིང་བྱས་ཀྱང་མཐར་གཙང་དམག་རྒྱལ་ཏེ་གཙང་པ་ཕུན་ཚོགས་རྣམ་རྒྱལ་གྱིས་དབུས་གཙང་ཡོངས་ལ་དབང་སྒྱུར་བྱེད་པའི་སྲིད་དབང་བཙུགས།  སྤྱི་ལོ་1620པའི་ལྕགས་སྤྲེལ་ལོར་གཙང་པ་རྒྱལ་པོ་ཕུན་ཚོགས་རྣམ་རྒྱལ་འབྲུམ་ནད་ཀྱིས་གྲོངས།  དེའི་སྲས་ཀརྨ་བསྟན་སྐྱོང་དབང་པོ་གཙང་པ་རྒྱལ་པོའི་ཁྲིར་འཁོད།  བོད་ཁམས་ཡོངས་ལ་དབང་སྒྱུར་བྱེད་པའི་སྒྲིག་གཞི་དང་ཁྲིམས་སྲོལ་བཏོད།  །

    1. སྲིད་འཛིན་གྱི་སྒྲིག་གཞི་ལ།       བོད་ཀྱི་ཆབ་སྲིད་ལ་དབང་སྒྱུར་བྱེད་པའི་སྲིད་འཛིན་ཕོ་བྲང་གི་ལྟེ་བ་གཞིས་ཀ་བསམ་འགྲུབ་རྩེར་གཏན་འབེབས་གནང༌།  ཕོ་བྲང་ཆེན་པོ་འདི་ཉིད་ནས་ཐད་ཀར་བདག་སྐྱོང་གནང་བའི་རྫོང་ཆེན་བཅུ་བཞི་བཙུགས།  དེ་དག་རེ་རེའི་མངའ་འོག་ཏུའང་རྫོང་ཕྲན་མང་པོ་བཙུགས་ནས་དབུས་གཙང་རུ་བཞི།  མདོ་ཁམས་སྒང་དྲུག  ལྷོ་མོན་ཁ་བཞི་སོགས་བཀའ་ཁྲིམས་ཆེན་པོའི་མངའ་འོག་ལས་འདའ་བ་མེད་པར་མཛད།  སྔོན་ཕག་གྲུ་སྡེ་སྲིད་ཀྱི་དུས་མཇུག་ཙམ་ན་བཙུགས་པའི་ས་བཙན་རྫོང་བཙན་གྱི་རིགས་རྣམས་མ་འོངས་པ་ན་དུས་ཟིང་གི་རྒྱུར་འགྲོ་བར་དགོངས་ནས་རྨང་མེད་དུ་བཤིགས།  ལྷག་པར་དུ་མཐའ་མཚམས་སྲུང་སྐྱོབ་ཀྱི་ལས་ཀ་བྱེད་པའི་སྡེ་ཚན་ལ་མི་འགྱུར་པའི་རྫོང་བཞིར་གྲགས་པ།  ཤར་མི་འགྱུར་བ་འོལ་དགའ་སྟག་རྩེ་རྫོང༌།   དྭགས་ཀོང་གི་ཁ་གནོན་དུ་བཙུགས།  ལྷོ་མི་འགྱུར་བ་དོ་བོ་རྫོང༌།   ཀློ་མོན་གྱི་ཁ་གནོན་དུ་བཙུགས།  ནུབ་མི་འགྱུར་པ་རྣམ་རྒྱལ་ལྷ་རྩེ་རྫོང༌།  བལ་པོ་དང་རྒྱ་གར་གྱི་ཁ་གནོན་དུ་བཙུགས།   བྱང་མི་འགྱུར་བ་གསང་སྔགས་བདེ་ཆེན་རྫོང༌།  ཧོར་སོག་གི་ཁ་གནོན་དུ་བཙུགས་པ་བཅས་མཐའ་ཁུལ་བརྟན་སྲུང་དང༌།  དུས་ཟིང་ཞོད་འཇགས་ཀྱི་ལས་ལ་ཐུགས་ཁུར་ཆེན་པོ་གནང༌།  །

2.  དམག་དོན་གྱི་སྐོར་ལ།       སྤྱིར་འགྲོ་མགོན་ཆོས་རྒྱལ་འཕགས་པས་ཆོས་སྲིད་ཟུང་འབྲེལ་གྱི་སྲིད་འཛིན་སྒྲིག་གཞི་ཞིག་བཙུགས་པ་ནས་བཟུང་དེ་ལ་ཞབས་འདེབས་བྱེད་པའི་དམག་དཔུང་གི་སྒྲིག་འཛུགས་རེ་བྱས་ཡོད་ཀྱང༌།  བོད་ཀྱི་ལོ་རྒྱུས་དེབ་ཐེར་དག་ལ་ཆོས་་སྲིད་ཀྱི་མཛད་པ་གཙོ་བོར་བྱས་ནས་བཀོད་ཡོད་པའི་སྟབས་ཀྱིས།  དམག་དོན་གྱི་སྐོར་ལ་ཕྱོགས་མཚོན་ཙམ་རེ་ལས་འཁོད་མི་འདུགདཔེར་ན།   འགྲོ་མགོན་འཕགས་པའི་སྐབས་སུ་མདོ་སྨད་བརྒྱུད་དུ་ས་མཚམས་སྲུང་བའི་ཆེད་དུ་བོད་དམག་འབོར་ཆེན་འདུས་ཚུལ་མདོ་སྨད་ཆོས་འབྱུང་ན་གསལ་བ་ལྟར་དང༌།  ཕག་གྲུའི་གོང་མ་བྱང་ཆུབ་རྒྱལ་མཚན་གྱིས་གཏན་འབེབས་གནང་བའི་ཁྲིམས་ཡིག་ཞལ་ལྕེ་བཅོ་ལྔ་དང༌།   གཙང་པ་རྒྱལ་པོའི་ཁྲིམས་ཡིག་ཞལ་ལྕེ་བཅུ་དྲུག་རྣམས་ཀྱི་ནང་དུ་དཔའ་བོ་སྟག་གི་ཞལ་ལྕེ་ཞེས་པ་དེ་དམག་དོན་སྐོར་གྱི་ཁྲིམས་ཡིག་ཞིག་ཡིན་པར་མ་ཟད།  གཙང་པ་རྒྱལ་པོའི་ཁྲིམས་ཡིག་ནང་དུ།  དམག་དཔུང་རྣམས་ལ་གཡས་རུ་གཡོན་རུ་དབུས་རུ་གསུམ་བྱས།  དེ་ལའང་རུ་དཔོན་བརྒྱ་དཔོན་བཅུ་དཔོན་བསྐོས།   ཞེས་སོགས་དང༌།  དམག་འདི་ལ་མེད་དུ་མི་རུང་བའི་མི་བཞི་དགོས་ཏེ།   ན་བ་གསོ་བའི་སྨན་པ།  ལེགས་ཉེས་སྟོན་པའི་མོ་མ།   དགྲ་གྲོགས་བརྩི་བའི་གཡུལ་རྒྱལ།   དགྲ་ལྷ་གསོལ་བའི་ཐུགས་དཀར་དང་བཞིའོ། །ཞེས་དང༌། དོན་དེ་སེམས་ལ་བཟུང་ནས་རང་རང་གི་སྲོག་འཚོ་བའི་རྟ་ཕོ།  མགོ་ཕིབས་ཀྱི་གུར།   སྲོག་ཁེབས་ཀྱི་ཁྲབ། འཆོར་སྐྱོར་གི་ལུས་ཆས་རྣམས་ལ་ཁྲལ་འཇལ་དུ་མ་སོང་བ་དང་དོད་ཆེ་བར་བྱེད། ཅེས་སོགས་འབྱུང་བ་ལྟར་ཤེས་པར་བྱའོ། ། 

3.  རྩ་ཁྲིམས་ཀྱི་སྐོར་ལ།  གཙང་པ་རྒྱལ་པོས་སྲིད་དབང་སྐྱོང་བ་དང་དུས་མཚུངས་སུ་ཁྲིམས་ཡིག་ཞལ་ལྕེ་བཅུ་དྲུག་གཏན་འབེབས་གནང་ཡོད་པ་འདི་ནི།  ལོ་ངོ་ཉི་ཤུ་ལྷག་ཙམ་གྱི་དུས་ཡུན་ཐུང་ངུའི་ནང་དུ་ཁོང་གིས་ཆབ་སྲིད་སྐྱོང་ཚུལ་ལ་ཞིབ་འཇུག་བྱེད་པར་བརྒྱ་གོ་གཅིག་ཆོད་ཀྱི་དཔྱད་གཞིའི་ཡིག་ཆ་ཞིག་ཏུ་ངེས་པ་དང༌།  འདི་ལ་བརྟེན་ནས་ཁོང་གི་མཁྱེན་པའི་ཡོན་ཏན་དང་སྒམ་པོའི་ཐུགས་རྒྱ་སོགས་དཔོག་ནུས།  དེར་བརྟེན་ཁྲིམས་ཡིག་གི་མ་དཔེ་ཇི་བཞིན་འདིར་དཔྱད་གཞིར་དགོད་རྒྱུ་ཡིན་ལ།  ཞལ་ལྕེ་འགའ་ཞིག་ཕག་གྲུའི་ཁྲིམས་ཡིག་དང་གཅིག་མཐུན་བྱུང་ཡོད་པ་དེ་རིགས་གྲངས་ཀྱི་མིང་ཙམ་ལས་མ་བཀོད།  དེ་དོན་ཞིབ་ཏུ་རྟོགས་པར་འདོད་ན་མ་དཔེ་དངོས་ལ་བལྟའོ། །འོན་ཀྱང་ཕག་གྲུའི་ཁྲིམས་ཡིག་དང་མིང་གཅིག་ཀྱང་དོན་གྱི་འགྲེལ་བཤད་མི་འདྲ་བའི་རིགས་རྣམས་ཇི་བཞིན་དུ་བཀོད་ཡོད།  དཔེར་ན་གཡུ་འབྲུག་སྒྲོག་པའི་ཞལ་ལྕེ་བཅོ་ལྔ་ལས་དཔའ་བོ་སྟག་གི་ཞལ་ལྕེ་ཞེས་པ་དེ།  འགྲེལ་བཤད་དུ་ནང་དོན་ཁ་གསལ་ཞིག་མེད་པ་ལ་འདིར་འགྲེལ་བཤད་ཁ་གསལ་བར་མ་ཟད་ཞལ་ལྕེ་འདི་གཙོ་བོ་དམག་དོན་གྱི་ཁྲིམས་ཡིག་ཡིན་པ་གསལ་བར་བྱས་འདུག་པས་མ་ཡིག་ཇི་བཞིན་བཀོད་པ་གཤམ་གསལ་ལྟར་རོ། །

   དང་པོ་དཔའ་བོ་སྟག་གི་ཞལ་ལྕེ་ནི།   དགྲ་འདུལ་བ་ལ་དགོས་ཏེ།  དེ་ཡང་འདུལ་བ་ལུང་དུ་རྒྱལ་ཁྲིམས་ཀྱི་ལུང་དྲངས་པར།   མཁས་པ་རྣམས་ནི་གཞོམ་པ་དང༌། །རབ་ཏུ་སྦྱིན་དང་བསླུ་བ་དང༌། །ཀུན་ཏུ་དཔྱད་དང་ལྔ་བར་ནི། །དཔུང་གི་དོན་རྣམས་འགྲུབ་པར་བྱེད། །ཅེས་གསུངས་པ་ལྟར། དགྲ་ཕ་རོལ་པོ་འདུལ་ཐབས་ལ་ཐོག་མར་དྲག་པོ་མཐར་སྐྱེལ་ཡ་འུད་དང་མི་བསྲེ་བར།  འཇིག་རྟེན་གྱི་ཁ་དཔེར།  ཕྱི་པད་མ་དཀར་པོའི་རྒྱ་མ་ཞིག་པ།   ནང་ཅོ་ག་གྲོ་མོའི་ཚང་མ་འཐོར་བ་དགོས་ཟེར་བ་ལྟར་དང༌།  བྱ་མ་འཕུར་སྒོ་ང་ལོན་པའི་དཔེ་ལྟར། 

  (1) མཁས་པ་རྣམས་ནི་གཞོམ་པ་དང༌།  ཞེས་པའི་དོན།   རྒྱལ་སྲིད་ལྟ་བུའི་སྟོབས་དང་གཡུལ་ཕན་ཚུན་སྙོམས་པའི་དགྲའམ་རང་རང་ཚོད་ཀྱི་དགྲ་གང་ལའང་ཐོག་མ་ནས་དགྲ་འདུལ་མི་རྩོམ་པར།  ཁེ་ཉེན་བསྒྲགས།   གོ་བ་བསྐོན།   གསེར་ཡིག་གི་འགྲུལ་བཙུགས་ཏེ་ལབ་ཀྱི་སྒོ་ནས་འདུལ་ཐབས་དང༌།  ཞི་རྒྱས་དབང་དྲག་གང་འགྲོ་གང་ཟབ་དབྱིབས་བལྟ་དགོས་པ་བཞིན།  མི་སྣ་གསེར་ཡིག་གིས་ཀྱང་རང་གི་དཔོན་ཁུངས་ཀྱི་བསྒྲུབ་བྱ་གཙོ་བོར་བཟུང༌།   དྲག་པོ་མཐར་སྐྱེལ་དུ་སོང་ན་ལེགས་ཉེས་སྤྱི་མར་ཡོད་པས་ཁེ་ཉེན་ཤེས་པར་བྱ།  དྲག་པོ་དམག་གི་འཕྲུལ་འཁོར་ལ་སྦྱོར་དངོས་རྗེས་གསུམ་གྱི་བསམ་སྦྱོར་ངན་པ་ཚང་བའི་དགེ་སྡིག་བླང་དོར་མ་ལོག་པའི་སྒོ་ནས་ཐོག་མའི་མི་སྣས་རྒྱུ་བརྔན་པ།  འགྲིམ་འགྲུལ་གྱི་དཀའ་ལས་མ་བསམ་པ།   ཐབས་ལ་མཁས་པར་བྱ་ཞིང་བསམ་པ་ཆེ་བར་བཟུང་ཐེག་པ་ཆེ་བར་འཁུར།   གཏིང་གྱོང་བར་བྱས།   ཁ་འཇམ་པར་བྱས་ནས་སོ་སོའི་བློ་ཁྲིད་པའི་ཁོག་ནས་རང་དོན་ལ་འཇུག་གང་ཐུབ་བྱས་ཏེ་འཇིག་རྟེན་གྱི་ཁ་དཔེ་འདྲ་བ་མཉམ་པོར་གྲུ་བཞི་དྲོས་ཟེར་བ་ལྟར།   ཁེ་ཉེན་བསམ་ལ་བདེན་པའི་བསྒྲུབ་བྱ་བཀོད།  ཕ་རོལ་གྱི་གྲོས་རར་འཚངས་ནས་འཆར་བསྟན།  དེས་མ་ཉན་ན་མི་གཏི་ཐུག་ཅིག་དོན་ལ་འཇུག་མི་ཤེས།  གཡོན་ཅན་དྲང་པོར་སྨྲ་ཟེར་བའི་དཔེ་འདིར་ཡོང༌།  ཕ་རོལ་པོས་རང་གི་བྱ་བ་མ་ཤེས་ན།   སྤྲ་བ་ལ་མེ་མཆེད་པ་ལྟར་གྲོས་ཕྱེད་དགྲ་ལ་དྲིས་བྱ་བ་འདིར་ཡོང༌།  སྡེ་གཟར་ཕ་འཁྲུག་བུ་འཁྲུག་ཀྱང་མི་སྣ་གསེར་ཡིག་འགྲུལ་མི་གཅོད།  ཁ་ངན་དང་ཚིག་ངན་མི་རྒྱགགསེར་ཡིག་གི་སྔོན་འགྱུར་གྱི་བསླུས་ཧམ་སྡེབས་སྟོང་མི་བྱེད།  ཕན་ཚུན་གྱི་བདག་རྐྱེན་བཟང་བ་བྱེད།   མི་སྣ་གསེར་ཡིག་ཕན་ཚུན་སུའི་ཡིན་ཀྱང་སྤྱི་མིར་ཆ་འཇོག  བར་མི་བླ་མ་སྡེ་དཔོན་གཙོ་བོ་སུ་འདྲ་ཞིག་གི་གསེར་ཡིག་ཡིན་ཀྱང་སྐྱེལ་མ་ཐུབ་དགོས་ཤིང༌།    

   (2)  རབ་ཏུ་སྦྱིན་དང༌།   ཞེས་པའི་དོན་ནི་དགྲ་ལ་ནོར་རྫས་ཟང་ཟིང་དངོས་པོ་སྦྱིན་ཏེ་གཏན་གྱི་དོན་དང༌།  དགྲ་དཔུང་ཚོགས་ཆེ་བ་ཡོད་ན།   དགྲ་གཉིས་བྱུང་ན་དགྲ་གཅིག་པང་དུ་ལོངས་ཟེར་བའི་དཔེ་ལྟར།  དགྲའི་དཔུང་ཚོགས་ནས་ནང་ཚན་ཕྲལ་ཏེ།  ས་ཁང་ཡུལ་མཁར་སོགས་བྱིན་ཏེ།   དགྲ་ལྟེ་བ་ནུས་པ་ཇེ་ཆུང་ལ་གཏོང་བའི་ཐབས་དང༌། 

   (3) བསླུ་བ་དང་ཞེས་པ།   མནའ་ཟ་བ་དང༌།   ཉེ་སྦྲེལ་བ་དང༌།   གྲོགས་པོ་བྱས་ནས་བསླུ་བ་མ་ཡིན་ཏེ།  ཐབས་མཁས་ཀྱིས་ཁ་དྲངས་ནས་མགོ་སྐོར་བའམ།  ལབ་ཀྱི་སྒོ་ནས་བློ་བྲིད་དེ་བཙོན་དུ་འཇུག་པ།   ཡོད་མེད་གོ་ལོག་གིས་དགྲ་ཐབས་ཀྱིས་སྐུངས་འཇུག་པ་དང༌།  འབེབས་སྤྲོད་པ།  དཔུང་ངོ་བརྫུས་རྟ་བརྫུས།   བྱ་ལོག་གཏམ་ལོག མཚན་མོ་དགྲ་ཕྱོགས་ཀྱི་ཐག་ཉེ་མ་རིང་ངོ་མ་ཕག་ཏུ།   མེ་ཁ་མང་པོ་སྦར་ཏེ་རྡབས་སྤྲད་ནས་བསླུ་བ་ཡིན་ཞིང༌།  དཔའ་བོ་དྲག་ཐབས་ལ་མཁས་པ་ཞེས།  རང་ཟོང་ཟད་ལ་མ་སོང་བའི་ཐབས་མཁས་ཀྱིས་བསླུ་ཞིང་མནའ་ཟོས་དུག་སྦྱོར་གྱིས་བསླུས་ན་ཁྲེལ་མེད་ངོ་ཚ་བོར་བའི་གསོན་པོ་ལས།  བག་ཡོད་ཚུལ་དང་ལྡན་པའི་ཤི་བོ་མཆོག་ཟེར་བ་ལྟར་ཕོ་རབ་ཀྱི་དགོས་པ་འདི་ཡིན་ལགས། 

   (4) ཀུན་ཏུ་དཔྱད་དང༌།  ཞེས་པ་ནི་བརྟག་དཔྱད་ལེགས་པར་བྱས་ཏེ།   གཞན་ཕྱོགས་གཉེན་པོ་གང་འགྲོ་བརྩམས་པ་དང༌།  ས་ཆུ་ལུང་པའི་གནས་དབྱིབས་རྫོང་ལྟ་བུའི་བཙན་དམིགས་ལ་བརྟག་དཔྱད་བྱས་ནས་དམག་དཔུང་གི་འཁྱེར་འཁྲིད་དང༌།  འཚང་ཁའི་གནས་ཡུལ་དང་རང་ཕྱོགས་བཙན་དམིགས།   གཞན་ཕྱོགས་ཕ་རོལ་གང་ཡོང་གང་བྱེད་ལ་བརྟག་དཔྱད་དང༌།  རང་སྐྱོན་སྐྱོར་ནས་དགྲ་དང་འཐབ་ཟེར་བའི་དཔེ་ལྟར་ཁེ་ཉེན་གྱི་བརྟག་དཔྱད་ལེགས་པར་བྱེད་དགོས་ཤིང༌།

    (5) དཔུང་གི་དོན་རྣམས་སྒྲུབ་པར་བྱེད།   ཅེས་པ་ནི་གོང་གི་ཐབས་རྣམས་ཀྱིས་མ་ཐུལ་ན།  དཔུང་དང་དམག་གི་གཡུལ་བཤམས་ཏེ་དགྲ་ཕ་རོལ་འདུལ་དགོས་ཏེ།  དེ་ལ་རང་ཕྱོགས་ཐམས་ཅད་བསམ་པ་གཅིག་ཏུ་འཛོམ་དགོས་པས།  ཁ་དཔེར།   གསེར་བཅག་དངུལ་དཀྲུམས་ར་གན་ལྷད་ཕུད་ཟེར་བ་བཞིན།   རང་ཕྱོགས་འདྲིལ་བའི་སྲིད་པོ་རྣམས་སྐྱིད་ཚང་གཅིག་དང་སྡུག་སྐོར་གཅིགགཞུ་ཕྱོགས་གཅིག་ཏུ་བདུངས།  སྐྲ་གཅིག་ནས་འཐེན་ན་མགོ་ཡོངས་ཚ་ཟེར་བ་ལྟར་འོག་ཞོལ་ཕྱི་ནུད་མི་བྱེད་པ་སོགས་བསྐྱར་སྦྱངས་ལེགས་པར་བྱས།  བློ་མི་ཁེལ་བ་རྣམས་ཐབས་མཁས་ཀྱིས་རང་སྲིད་མ་ལོག་ཙམ་གྱི་སྒོ་ནས་སྤངས།  ན་ནུས་འཆི་ནུས་བགྱིད་ནུས་པའི་བསམ་པ་གཅིག་ཏུ་བྱུང་བ་རྣམས་བློ་སྟོབས་ཀྱིས་སྲིད་པ་འདེགས་ནུས་པ།  ང་རྒྱལ་གྱིས་ཕའང་བརྡེག་ནུས་པ།   ཁེ་ཉེན་བལ་འདབ་རྡོ་གནོན་ཏུ་བརྩི་ཤེས་པ།  འགྲོ་འཚམས་ལ་མཁས་པ།   ཡིད་མི་ལྷོད་ཅིང་བློ་མི་འགེལ་བ་ཚེར་ཕུང་སྟེང་ཉལ་བ་ལྟར་གཞན་གྱི་བློ་འདྲི་འབྲུ་ལ་མཁས་ཤིང་གང་ཟེར་ལ་མི་གཏོང་བ་མཚང་འབྲུ་འཇབ་ཤེས་སོགས་ཡོན་ཏན་དེ་དག་དང་ལྡན་པའི་དཔའ་བོ་རྣམས་ཀྱིས་གཡུལ་བཤམས་ཏེ་དྲག་ཤུལ་དང་གདུག་རྩུབ་བཙན་ཆས་པ་ལྟར་དགོས་ཤིང་བུ་དམག་ལ་ཆས་གདོང་དུ་ཕ་མ་སྡོད་བྱ་བ་དེ་འདི་ཡིན།   འོན་ཀྱང་མི་ཕྱེད་སྲིན་པོར་སོང་ཡང་གཞོག་ཕྱེད་ཁྲིམས་ལ་བརྟེན་ཟེར་བའི་དཔེ་འདིར་འཇུག་པ་ཡིན་པས།  ཁྲིམས་ལ་བརྟེན་པ་ཞིག་མ་བྱུང་ན་ནང་འཐབ་ནང་འཁྲུག་ནང་རྐུན་སོགས་གྲ་མ་འགྲིག་གི་རྒྱུར་འགྲོ་བས་ཐོག་མར་རྒྱལ་པོ་དང་དཔོན་པོའི་ལུང་དང་ཡུལ་མི་གཙོ་དཔོན་གྲོ་དཔོན་སོགས་ཀྱི་དམག་དཔོན་མྱོང་བ་ཆེ་ཞིང་ཚན་ཆེ་བ།  རང་འདོད་ཆུང་བ།   སྤྱི་གཙིགས་ཆེ་བ་ཞིག་བསྐོས།  དེས་ཀྱང་དམག་ལས་དཔའ་སྡར་མཛངས་གསུམ་ཚང་བ་ལས་ལ་འཇུག་པ་གཉིས་བསྐོས།  དམག་དཔུང་རྣམས་ལ་གཡས་རུ་གཡོན་རུ་དབུས་རུ་གསུམ་དུ་བྱས།  དེ་ལའང་རུ་དཔོན་རེ་དང་བརྒྱ་དཔོན་བཅུ་དཔོན་བསྐོས།  དཔོན་གྱིས་ལྟོ་གོས་ཀྱིས་བསྐྱངས་པའི་དད་ཞེན་ཆེ་ཞིང་དང་དོད་ལྡན་པའི་དཔའ་བོ་སྐྱེམ་པ་བསྡུས་པའི་སྐྱེམ་འདུས་སྐུ་ལ་བཅར་པའི་གཟིམ་ཆུང་བ།  ཡུལ་དམག་ལྟ་བུ་ཡིན་ན།  དཔའ་ཚན་ཅན་དེ་རྣམས་ལའང་ལྡིང་ལོགས་སུ་བཅོས་ནས།   ལྡིང་དཔོན་མགོ་བཅུན་པ་ལ་མཁས་པ་རེ་བསྐོས་ཏེ་ཐོག་མར་མགོ་མིར་གཏོགས་པ་རྣམས་དམག་དཔོན་གྱིས་བསགས་ནས།   ཕ་རོལ་གྱི་དགྲ་ཆེ་གེ་མོས་རྒྱལ་པོའི་གཡུལ་ཡིན་ན་ཆོས་ཀྱི་རྒྱལ་པོའི་མཚན་དོན་ལ་དགྲས་རྒོལ་ལུགས་འདི་རིང་ན་མངའ་འབངས་མི་བདེ་བས།  བདེ་གཟར་ཞེས་པའི་མིང་དང་མཐུན་པའི་དུས་མི་བདེ་ལུགས།   ཡུལ་དམག་ཡིན་ན་ཡུལ་གྱི་སྤྱི་ཚིས་ལ་གནོད་ཅིང་འཐུས་པ་འདི་དང་འདི་ཞེས་བྱུང་ཟེར་བའི་བདེན་པ་བདར།  ཁེ་ཉེན་ལེགས་པར་བཤད།  དགྲ་ལ་མཚོན་རྩེ།   གཉེན་ལ་སྐྱོར་ཁ་གཅིག་ཟེར་བའི་ལུང་དོན་ལྟར་དགྲ་ལ་ནུས་འདོན་དང་རང་ཕྱོགས་སུ་འོད་འཇགས་དགོས་པ་སོགས་སྤང་བླང་གན་རྒྱར་བཀོད།  དོན་འགག་ཐེར་ལུང་གིས་བསྡམས།  གན་རྒྱའམ་གལ་ཐོའི་དོན་ཉན་སྒྲུབ་བྱེད་པ་ལས་མི་འདའ་བའི་དོན་དུ་འདུན་པ་ལྟར།  ཁ་དཔེར་དཔེ་རྒྱ་ཤོག་དཀར་ཆུང་ལ་དོན་སྣག་ཚའི་རི་མོ།  འགག་ཐེལ་ཙེ་ཁྲ་མོ་ཟེར་བ་ལྟར།   དོན་ཉན་ལོག་སྤང་བླང་གི་དོན་རྩ་བའི་འགག་ལ་སོ་སོས་ནན་ཏན་དགོས་པའི་ཕྱིར་དང་མི་འགྱུར་བའི་ཕྱིར་མིང་བྲིས་རྟགས་བཞག་དེ་དོན་སེམས་ལ་བཟུང་ནས་རང་རང་གི་སྲོག་འཚོ་བའི་རྟ་ཕོ།  མགོ་ཕིབས་ཀྱི་གུར།   སྲོག་ཁེབས་ཀྱི་ཁྲབ།   འཆོར་སྐྱོང་གི་ལུས་ཆས་རྣམས་ལ་ཁྲལ་འཇལ་དུ་མ་སོང་བར་དང་དོད་ཆེ་བར་བྱེད།   ལྟད་སྟོན་གྱི་ཡུལ་མིའི་ཁྲོམ་ཚོགས་སར་འཆོར་སྐྱོང་བྱེད་ཟེར་བ་དང་མི་འདྲརྒྱལ་ཁམས་ཀྱི་མི་ང་ཡིན་བསམ་པ་ཀུན་འདིར་འཚོགས་པ་ཡིན།  རང་ལ་དཔགས་པའི་ཟལ་ཐོན་པར་བྱེད་དགོས་སོ།   །  དམག་འདི་ལ་མེད་དུ་མི་རུང་བའི་མི་བཞི་དགོས་ཏེ།  ན་བ་གསོ་བའི་སྨན་པ།  ལེགས་ཉེས་སྟོན་པའི་མོ་མ།   དགྲ་གྲོགས་བརྩི་བའི་གཡུལ་རྒྱལ།  དགྲ་ལྷ་གསོལ་བའི་ཐུགས་དཀར་དང་བཞིའོ།   །  དང་པོ་གཡུལ་རྒྱལ་གྱིས་གཟའ་སྐར་དང་སྒྲ་གཅན་གྱི་འགྲོས་དང་ཕྱོགས་རྩིས།  གཏོ་བསྒྱུར་གཟའ་གསོལ་ཏེ།   དཔའ་བོ་སྟག་ལྟར་ཆས་པའི་ཁྲིམས་ཀྱི་ཐོག་མ།  དམག་ལས་ཀྱི་སྒར་ཐོ་བརྒྱབ།   དེ་ལས་མ་འགལ་བར་སྒར་ཕབ།  དགྲ་ཕྱོགས་སྒར་སྒོ་དང་མཚོན་རྩེ་གཏད།   རང་ཡུལ་ལ་དཀོན་མཆོག་གི་རྟེན་དང་སྔས་བསྟན།  རྟགས་དུང་རྟགས་རུ་བཏེགས་ནས་ཟུང་སྒྲིག་མ་འཆུག་པར་བྱ།  རྟགས་དུང་གསུམ་པ་ལ་དཀྱིལ་སྒར་དུ་དོ་དམ་པ་རྣམས་འཛོམས་ཚར་བ་བྱས་ནས་དམག་ལས་ཀྱི་འདེགས་ཁྲིམས་ཚུགས་མལ་ཤོ་རིམ་བཟན་ལེན་ཤོ་རྒྱག་སོགས་དགྲ་ཆ་གྲོགས་ཆའི་སྒར་སྐད་བསླབ་སྟོན་མཐིལ་ཕྱིན་པ་བྱེད་དགོས།   འགྲིམ་དུས་འདེགས་དུང་གསུམ་གྱི་དང་པོ་ལ་མེ་ཁ་གསོ་བ།  གཉིས་པ་ལ་གུར་བསྡུ་བ།   གསུམ་པ་ལ་གཡས་རུ་ནས་རིམ་བཞིན་གཤེགས་པའི་དགྲ་ཟོན་ལམ་འཕྲང་ལ་དཔགས་པའི་འགྲིམ་ལུགས་ཤོ་རིམ་བྱས་ཏེ།  ཆུང་ཁལ་ཆེ་ཁལ་གྱིས་མི་བརྫི།   ནད་པ་ལ་སྦུད་མི་རྒྱག ཀོ་གྲུ་སྲ་བཙན་དུ་འཛིན།   ལམ་ལ་ཆས་པ་བསྒྱུར་བ་རྩད་ཆོད་ན་བརྔན་པ་མི་དགོས།  སྦེད་བློ་ཤུགས་བློ་བྱས་ན་ལྡབ་འཇལ།   གོང་གཏོགས་བྱས་པ་ལ་ངོ་བོ་བརྒྱད་འཇལ།   ཉིན་རྐུན་ལ་སྦྱིན་འཁྲིད་ཚབ་གསུམ་དང་ཆད་པ།  མཚན་རྐུན་ལ་ངོ་སྤྲོད་མ་གཏོག་ཆད་པ་མི་དགོས།  རྐུན་མ་ཟིན་ན་ལག་པ་རྒྱབ་བཀྱིག་ཙམ་མ་གཏོགས་བརྡུངས་བཙོགས་མི་བྱེད།  ཁྲིམས་རར་མི་འཛུད་དེ།   སྒར་མཚན་མོ་གསང་བའི་དགོས་པ་ཡིན དགྲ་དང་ནོར་ནད་བསད་པ།  མདའ་འཁྱམས་རྡོ་འཁྱམས་སོགས་ཀྱིས་བསད་པ་ལ་དགེ་བ།   ནང་འཐབ་མི་དཔུང་དགྲ་སྡེབས་གོ་གྱོན་མཚོན་ཐོགས་ཀྱིས་བསད་པ་ལ་ཆད་པ་ལྡབ་འཕར་དང༌།  སྙིང་གནོན་ལྡབ་འཇལ།   རྨས་འཇལ་ཡང་དེ་འགྲོས་བྱུར་ཆགས་ཐུབ་པ་དཔེ་འདྲ།  ལོང་ཅན་རྭ་ཅན་གྱིས་བསད་པ་རུ་དམར།  ཡུལ་བསྲུང་དང་ལྕོག་བཅོམ་པ།   རང་ཕྱོགས་བཅོམ་པ་སོགས་ལ།  འགོ་མིའི་རྟ་ཁྲབ་དཀྱིལ་སྒར་དུ་བཞེས་པ།   བཤེར་ངོ་ཡོད་ངོ་མ།   ངོ་མེད་སྐྱིན་ཚབ།   སྤྲོད་ལེན་མི་སྣ་ལ་བཅུ་ཁ།  ཇག་པའི་ཁྲབ་ཤུལ་ཟེར་ཁྲབ་གང་ཡོད་ལ་རྒྱུ་ནོར་གྱི་བཅུ་ཟུར་ལེན།  ཐོབ་ཤོར་ཁ་གྲངས་ལ་མ་འཆམས་ན།   མནའ་གཡག་ཏུ་ཁུག་ཅེས་ཤོ་བརྒྱབ་པའི་ཐོབ་པོས་ཁ་གྲང་ལ་སྐྱེལ།   ཤོར་པོས་སྐྱིན་ཚབ་ལ་སྐྱེལ།  དགྲ་གཉེན་ཆ་ཕྱེད་ལ་བགོད་ཁོངས་གང་བྱུང་ཇག་པ་མནའ་སྐྱེལ་དང་སྤྲོད་གསུམ་སྤྲོད་ཟེར།  སེམས་ཅན་ཆེ་ཆུང་ཅི་ཤོར་ཀྱང་ཁ་ཚང་གི་ཆ་གཅིག་དབྱར་གཉིས་ཀྱི་ཆ་གཅིག་་བེ ་ལུག་གི་ཆ་གཅིག་སྤྲོད་པ།    དཔེ་གཡང་མོ་རྦབ་ལ་ཤོར་ན་ལྷུ་དྲུག་ལྤགས་ཁུད་མི་ཚང་ཟེར་བ་ཡོང་དམག་རོང་རིགས་ལ་འགྲིམ་ན་ཁྱི་བཀྱེ་རི་དྭགས་པ་ཉིན་གཅིག་ཙམ་གྱི་སྔོན་ལ་བཏང་ནས་ས་འཁྲུ།  རྒན་མི་ཉམས་ཆེ་བས་རྫབ་ལྟོས།   དང་པོ་དགྲ་འཚོལ་དེ་ནས་ཤ་ལྟོས།  རྒྱ་རུ་ཚོམ་སྤྲོད།   གཞོན་པས་དང་པོ་ས་འཁྲུ།   དེ་ནས་ཁྱི་བཀྱེ།   དགྲ་འདུག་ན་ཤ་ཞོག་ལ་ལན་ཐོངས།   ས་འཇམ་ན་ཤ་འཚོལ།   གཞོན་ལས་ཀྱིས་དབུགས་ལོང༌།   རྒྱ་ཁྱི་འཇམ་པ་བཅུ་ལ་གླ་རྩི།   ཁྱི་ལ་མགོ་མཇིང༌།   རྒྱ་ལ་པགས་པ།   ཤ་ལོངས་པ་ལ་ཤ་འགྱེད་དུ་ཆེ་ཐོབ་ཆུང་ཐོབ་ཏུ་བགོ་དགོས།  བྱང་ཐང་ཡངས་པ་དང་དགྲ་ཁ་སོ་ཐུག་པར་རྟ་ཕོ་གཏོང་དགོས་ཏེ།   དེ་ཡང་ས་ངོ་མ་ཕག་གི་རྩིབས་བཅད་དེ།  མཚན་སྔ་རུ་ལ་ལྡན་པ་ཕབ།   ཉིན་ཕྱི་རུ་ལ་ཧོར་བཏེགས་ཀྱིས་ཟེར་མཚན་ལ་ས་ཉན།  ཉིན་ལ་མིག་སྒྲུངས་ཏེ་དགྲའི་འགྲིམ་འགྲུལ་བྱེད་པ་དང༌།  རི་དྭགས་རྒྱུ་ས་ལ་མ་འཁྲུལ་བ་དགོས་ཤིང༌།  དགྲ་འགྲིམས་པའི་རྟ་རྨིག་ཤུལ་ནི།   གཅིག་ཏུ་འཕྱུར་སེ་གནམ་ལ་འཕྱུར་འགྲོ་ཞིང༌།  རི་དྭགས་ཀྱིས་རྒྱུགས་པའི་རྡུལ་ནི་འཐོར་ཞིང་སྐབས་རེ་སྐབས་རེར་སྐྱ་འཕྱུར་འཕྱུར།  ཕར་ཡལ་ཚུར་ཡལ་བྱེད་པར་གཞན་ལས་བྱིངས་བ་ཆུང་བ་ཞིག་ཡོང༌།  དངོས་སུ་མཐོང་བ་ནི་རི་དྭགས་རྐྱང་འགྲིམ་པ་ན་སྐྱ་ལྷེབ་ལྷེབ་པ།  འབྲོང་འགྲིམ་པ་ན་ནག་ཉིལ་ཉིལ་བ་ཡོང༌།   དགྲའི་རྟ་པ་བྱང་རིགས་ཧོར་སོག་ཡིན་ན་ཐུམས་སེ་འགྲིམ་པ་དང༌།  བོད་རྟ་ཡིན་ན་ཤར་སེ་འགྲིམ་པ།  ཁལ་མ་ཡིན་ན་ཉོར་འགྲོས་སུ་ཡོང་བ།   རྐང་དམག་ཡིན་ན་ཆགས་སེ་འགྲིམ་ཡོང་བ་དེ་རྣམས་བརྟགས་ཤིང༌།  དགྲས་བྱ་ལོག་གི་མེ་བརྫུས་དང༌།   ཡང་སྒར་ཕབ་པའི་མེ་ཁ་མ་ནོར་བ་དགོས་ཏེ།   མེ་བརྫུས་མ་ནི་གཞན་ལས་བཀྲག་ཆེ་བ་གཅིག་གཅིག་གཉིས་ནས་འདྲེན་ཐུབ་པ།  ས་ཡུལ་དེ་གཞན་ལས་ཐང་དཀར་ཞིང་སྐྱ་མཚམས་པ་ཞིག་ཡོང༌།   སྒར་མེ་ངོ་བོ་ནི་ས་ཡུལ་གཞན་ལས་བྱིངས་ཆེ་བ།   མེ་རབ་རིབ་མང་བ།   མེ་དམར་ནག་རྩེགས་རྩེགས་ཡོང་བ་ཞིག་འདུག་ན་ཡིན་ཏེ་མ་འཁྲུལ་བར་བརྟག་དགོས་སོ།  །  རུ་འཛིན་གྱི་དར་འཕྱོར།   སོ་པས་སོ་སྒྲིམས་ཤིང༌།   དེ་ནས་དགྲ་དང་གཡུལ་ཐབས་པའི་དུས་སུ་རུ་གསུམ་ལ་ཐུགས་གསུམ་རྔ་བརྡ་གསུམ།  ཐམས་ཅད་དུང་ཆེན་དང་རྐང་གླིང་གནམ་ས་འབིར་བ་ལྟ་བུ།   གཡས་ཀྱི་གདོང་དུ་མེ་མདའ་བ།   གཡོན་གྱི་གདོང་དུ་མདའ་བ།   བར་བར་དུ་མདུང་དང་མདུང་ཐུང་དང་སྟ་གྲི་ཐོགས་པ།   ཞོལ་བཏགས་ལྕགས་སྤྲེལ་ཁྱེར་བ།   དེའི་རྒྱབ་ཏུ་རྟ་རྐང་བསྲེས་པའི་དམག་ཚོགས་བཙན་ཆས་པ་ལྟ་བུ།   དེའི་རྒྱབ་ཏུ་དམག་དཔུང་གི་ཚོགས་བྱ་སྤུ་སྣོལ་དུ་ཡོད་པ།  ཟུར་དམག་གཡས་གཡོན་རྟ་པ་སག་ཐག་པའི་རིགས་རྟ་སྒྲོམས་སུ་སྤུངས་ནས་ཐུམ་ཧྲིལ་སེ་འཕྱོ་བ།  རུ་ཁྱེར་འཁྲིད་བརྡ་རོལ་ལ་བལྟས་ནས་འགྲིམ་ན་ཅབ་སེ་འགྲིམ།  སྡོད་ན་ཐུམས་སེ་སྡོད་པའི་དཔུང་དེས།   བྱང་རྟ་དམག་གི་དགྲ་ལ་སྤུང་བ་དང༌།  ལྷོ་མོན་གྱི་དགྲ་ལ་འགུགས་པ་དང༌།   བོད་རྟ་རྐང་གི་དགྲ་ལ་བསྒྲིགས་ནས།   དམག་དཔོན་གྱི་བྱུས་ཁ་ཏ་ལ་རྣ་བ་གཅིག་ཏུ་གཏད་ནས་ཉན་ཏེ།  དགྲ་ལ་འཁྱུ་བའི་ས་སྐལ་མ་བཞག་ན་གཡག་ཆད་གད་ལ་མཆོང་བ་དང་འདྲ།  རང་ལ་འཁྱུ་བའི་ས་ཆ་མ་བཙལ་ན་གྲོག་པོ་མགོ་སྟུམ་དུ་ཆུག་པ་འདྲ་ཟེར་བ་ཡིན་པས།  འདས་མ་འོངས་ལེགས་པར་རྩིས།   ཐུགས་གསུམ་གྱི་འཕྱར་སྟབས་ལ་བལྟས།   འཛིངས་པས་གཡུལ་ལས་རྣམ་པར་རྒྱལ་ཏེ་དཔའ་བོ་སྟག་གི་མིང་བཟང་པོ་ཐོབ་སྟེ།  དེ་ཉིན་དམག་གིས་གང་སླེབས་ཀྱི་ས་ཆ་ཡུལ་མཁར་རྟ་མིག་ཁྲབ་བཤམ་ཟེར།  དམག་བྱུས་ཀྱི་བསྡུ་སོ་འཇོག་ཁའི་སྐབས་ལ་ཡང་བརྗོད་མེད་དུ་དཔའ་ཚན་ལ་ཆོད་འགྲོ་བ་ཡིན་ནོ།   །

      གཉིས་པ་སྡར་མ་ཝའི་ཞལ་ལྕེ་ནི།   འདི་ཡང་《གཡུ་འབྲུག་སྒྲོག་པའི་ཞལ་ལྕེ་བཅོ་ལྔ་》ཞེས་པའི་ནང་དུ་བཀོད་པ་དང་དོན་མི་གཅིག་པས།   མ་དཔེ་ཇི་བཞིན་བཀོད་དོ།   །སྡར་མ་ཝའི་ཞལ་ལྕེ་ནི།   ཞུམ་པའི་ཐ་སྙད་དུ་བྱས་ཏེ།   དཔའ་བོས་རྫོང་མཐའ་ལ་བསྐོར་ན།  ཁ་འདོན་དང་འབོར་ཉུག་མང་པོ་མི་བྱེད།  གཞི་མཁྲེག་པར་བཟུང༌།   མདའ་རྡོའི་ལག་ཆ་དགོས་མེད་ལ་མི་རྒྱགབཙན་དམིགས་དང་ཆུ་སྤེལ་ལ་གཟབ།   ཕྱི་ནང་འདྲེས་སུ་མི་བྱེད།   ཇོ་མི་བཟང༌།   བར་ཆིངས་ལ་རྒྱག་མི་བསྒུལ།   གཡུལ་དུས་འཕམ་ན་སྐུ་ཆེ་ཆུང་ལ་མ་ལྟོས་པའི་ཁྲབ་རྨོག་དཔའ་བོ་ལ་སྤྲོད།  དེ་བབས་པ་མཐོང་ན་བསད་པའི་དཔེ་མེད།   གལ་སྲིད་བསད་པ་བྱུང་ན་སྡར་མ་མཚོན་འོག་ཏུ་དཔའ་ཟེར་བའི་ཁ་གཤགས་མི་ཐུབ།  དམག་དཔོན་དང་དམག་དཔོན་ཐུག་ནས་སྡར་མས་སྲོག་བབ་བཏང་ན་ལག་པ་དར་མདུད་ཀྱིས་བཀྱིགས།   རྟ་རང་རྟ་ལ་བསྐྱོན་ནས་རང་ཡུལ་གཉན་མི་གཉན་ལ་དཔགས་པའི་སྟོང་གོས་གཡོགས་ཏེ་ཚུར་མ་དོར་བར་འཁྲིད།  ཕལ་པ་དྲན་སྤྲ་ལག་ཅན་ལ་ལག་པ་རྒྱབ་ཏུ་བཀྱིགས།   སྐྲ་སྙིལ་དོར་འཇོལ་བྱས་ལ་འཁྲིད་པ་དང་མགོ་མི་ཡིན་ན་རྟ་ངན་ལ་སྒ་ཆག་མཇུག་ཕབ་དྲེས་ཡོབ་དྲེས་མཐུར་བྱས་ཏེ་འཁྲིད་པའི་སྲོལ་འདུགརྫོང་མཁར་ནས་ཕབ་ན་དམའ་འབེབས་ལ་གོང་དང་འདྲ་ཞིང༌།  ལབ་ཁོག་ནས་ཕབ་ན།   དམག་དཔོན་དམག་ཆས་ལ་བབ་རྟེན་རྒྱུ་ནོར་སྟེར་དགོས་ཤིང་བབ་གཏད་ནས་ཁ་ངན་ཚིག་ངན་མི་གཏོང༌།   གདན་བཟོས་བདག་རྐྱེན་སྔ་བབས་ལས་ལོད་པ་མི་བྱེད།  སྐུ་ཆེ་བ་ཡིན་ཡང་འདི་སྐབས་ཆིབས་བསུ་ཆིབས་སྐྱེལ་མི་དགོས།   ལབ་རིགས་ཀྱི་བུ་གཏེ་ལ་ཆས་ཟུར་གསོས་ལྷ་མགུ་མི་མགུ་གཏོང༌།  འགྲོ་རྫོངས་བཟང་བཙོན་ཡིན་ཡང་ལབ་གདན་ལ་འཁྱོལ་ནས་གཏོང་བ་ལ་བཙོན་རྫོངས་དྲག་ཞན་ལ་དཔགས་པ་སྟེར།  ཕྱིན་ཆད་ཀྱི་སྡོམ་ལ་ཀོ་དམར་མདུང་ཚོམས་ཁྲག་གཞོང་སོགས་སུ་རྩི་ཁ་དམ་པར་ལེན།  མི་རབས་མ་སོང་གི་བར་འཕམ་སློག་བློ་ངན་གྲོས་ངན་མི་བྱེད་པའོ།  །



དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས། 蜀ICP备14009601号-1