དྲིན་ཆེན་ཕ་མ་ཟེར་མྱོང་། །
དྲིན་ལན་འཇལ་ཡོང་བརྗོད་མྱོང་། །
དོན་དངོས་ལག་ལེན་དབུལ་བའི། །
སེམས་འདི་རྫུན་གྱི་ཚིག་མཛོད། །
དགེ་བའི་བཤེས་གཉེན་ཟེར་མྱོང་། །
མུན་སེལ་སྒྲོན་མེ་བརྗོད་མྱོང་། །
དད་པའི་རྩ་བ་མི་བརྟན། །
སེམས་འདི་ཆུ་ཡི་ཝུ་བ། །
སློབ་སྦྱོང་འགངས་ཆེ་ཟེར་མྱོང་། །
བརྩོན་འགྲུས་གྲོགས་བསྟེན་བརྗོད་མྱོང་། །
དཔེ་ཀློག་རྒྱུན་བསྲིངས་བྲལ་བའི། །
སེམས་འདི་ཁ་གསོན་ལག་ཤི། །
སྔོན་བྱོན་མཁས་དབང་ཟེར་མྱོང་། །
མེས་པོའི་ཕྱག་རྗེས་བརྗོད་མྱོང་། །
རང་གིས་གང་ལ་མི་སློབ། །
སེམས་འདི་ཕྱི་ཚུལ་རིང་ལུགས། །
དགེ་བའི་གྲོགས་པོ་ཟེར་མྱོང་། །
ཕྱི་ཐག་ཆུ་རྒྱུན་བརྗོད་མྱོང་། །
ཨ་གསར་ནོར་ལ་དགའ་བའི། །
སེམས་འདི་དངུལ་གྱི་བྲན་གཡོག །
མཐོན་པོ་ཡིན་ན་ཟེར་མྱོང་། །
དམའ་པོ་ཡིན་ན་བརྗོད་མྱོང་། །
མཐོ་དམའ་ཀུན་གྱིས་མི་འགྲིག །
སེམས་འདི་ལ་ཁའི་དར་ལྕོག །
ཁྱོད་ལ་དགའ་ཆོག་ཟེར་མྱོང་། །
གཏན་གྲོགས་བྱེད་དོ་བརྗོད་མྱོང་། །
ཁ་སྟོང་ནང་གི་ཚིག་སྟོང་། །
སེམས་འདི་སྲབ་མེད་རྟ་ཕོ། །
ཡ་གིའི་བསོད་ནམས་ཟེར་མྱོང་། །
མ་གིའི་བདེ་སྐྱིད་བརྗོད་མྱོང་། །
རང་ཉིད་སྡུག་རབས་ཁོ་ན། །
སེམས་འདི་མེད་མེད་སྤྲང་པོ། །
རྒྱུ་དང་དཔལ་འབྱོར་ཟེར་མྱོང་། །
མཐོ་དང་གོ་ས་བརྗོད་མྱོང་། །
འདོད་ཆུང་ཆོག་ཤེས་བྲལ་བའི། །
སེམས་འདི་གཏིང་མེད་རྒྱ་མཚོ། །
ཡོད་ན་ཡོད་པས་མི་ཆོག །
མེད་ན་མེད་ཀྱང་མི་འགྲིག །
ཡོད་མེད་ཁ་ཚོན་གཅོད་དཀའི། །
སེམས་འདི་སུས་ཀྱང་རྟོགས་དཀའ། །
