སྲང་གི་མི་དག་མཚོ་མོའི་ངོས་སུ་ཞུ།།
དབྱར་གྱི་ཁ་ཆེམས་སྤྲིན་པའི་རྒྱབ་ཏུ་བཞུར།།
མཛེས་མའི་རྣ་རྒྱན་འདྲ་བའི་སྐར་འགས།།
འུ་ཅག་རྨས་པའི་ནམ་མཁའ་འཇིག་པར་བྱེད།།
ལམ་གྱི་མདོ་རུ་དབྱངས་ཤིག་འཆི་ལ་ཉེ།།
དབྱངས་དེའི་ཉི་འོད་གསལ་བའི་སྡུག་བསྔལ་མྱོང་།།
སྟོན་ཁའི་སྡོང་ལོ་འཛར་བའི་གར་མ་ལགས།།
རྨ་ཁའི་ལོ་མ་མིག་ཆུའི་བསྲེག་རོགས་ཀྱེ།།
ས་སྲོད་འཁྱག་པར་ལམ་གྱི་ཆབ་རོམ་ཆགས།།
ང་ཡང་སུ་ཡིན་སྲང་འདིར་ཅིའི་ཕྱིར་འོང་།།
མུན་པའི་རྒྱབ་ཏུ་བྱེའུ་ག་ཙམ་འཕུར།།
ལན་བུའི་གསེབ་ཏུ་འཁོར་བ་ཇི་ལྟར་འབྲི།།
ང་ནི་ཁེར་རྐྱང་སྐྱོ་བའི་ཉི་ནུབ་ཡིན།།
ང་ནི་ཁེར་རྐྱང་མཚན་མོའི་འཆི་འཕོ་ཡིན།།
སྤྲིན་པ་བསེད་ནས་སྤྲིན་པའི་སྡུག་བསྔལ་བཙལ།།
ཆུ་བོར་བྱིང་བའི་རྨི་ལམ་ཚ་བ་ལ།།
མེ་ལོང་སྟོང་བར་ཤར་བའི་གྲིབ་མ་དེས།།
ནད་ཁང་ནང་གི་སྐྱེ་དངོས་སྐྱུང་བར་བྱེད།།
བཞུར་ལམ་རང་མོའི་ཆར་བའི་ཚིག་རོ་དག།
ཡིད་ལ་ཉལ་བའི་སྡུག་པའི་མཚམས་སྤྲིན་ཡིན།།
