དམངས་ཁྲོད་ངག་རྒྱུན་གྱི་ཇ་ཡི་འབྱུང་ཁུངས་དང་། ཇ་མཆོད། ཇ་བསྐོལ་དང་གཡང་འབོད་བཅས་བཤད་པ་ཁག་གཅིག་ལ་རྩ་བ་བཟུང་ནས། གདོད་མའི་ཚིག་སྦྱོར་གྱི་བཀོད་ཚུལ་འགྲིག་མིན་ལ་ཧམ་པ་ཆེ་མདོག་གིས་སྣོན་འཕྲི་བཅོས་སྒྱུར་བརྒྱུད་ཡིག་ཐོག་ཏུ་འགོད་ཁུལ་བྱས་པས། ཤེས་མཉམ་སྐྱེས་ཚོགས་ལ་དྲན་པ་བསྐུལ་བ་དང་། མཁྱེན་ལྡན་སྐྱེས་ཚོགས་ལ་གད་མོ་འདྲེན་ཞིང་ངལ་བའི་གསོས་སུ་འབུལ་ལོ། ཇ་བསྐོལ་གྱི་གཡང་འབོད། ཟངས་དཀར་བཀྲ་ཤིས་ལུང་བརྒྱད་ཐབ་ཐོག་བཙུགས།། ཆུ་ནི་གངས་ཆུ་སྔོན་མོ་ཇ་ཆུ་བླུག། རྒྱ་ཇ་གྲུ་བཞིའི་ནག་རིལ་ཇ་གཅིག་བཏབ། ཚྭ་ལ་བྱང་ཚྭ་དཀར་པོ་འབྲིང་གཅིག་བཏབ།། སྡོར་ལ་འབྲི་མར་སེར་པོ་ཆེ་ཙམ་འཕོངས།། མེ་ཆ་ཐོག་ཟེར་འབུམ་འཕྲོས་མེ་ལྷ་དྲངས།། དྲི་ཞིམ་སྒ་རྗེའི་ཤུག་དམར་བུད་ཤིང་བཀོལ།། གུར་གུམ་མདངས་ལྡན་ཞིམ་མངར་བདུད་རྩི་མཆོད།།ཇ་འབྱུང་དང་འབྲེལ་བའི་གཡང་འབོད། ཇ་དང་པོ་འབྱུང་འབྱུང་གང་ནས་འབྱུང་།། ཇ་དང་པོ་རྒྱ་ནག་ཡུལ་ནས་འབྱུང་།། རྒྱ་བུ་མོ་གསུམ་གྱིས་བཙུགས་པའི་ཇ།། བོད་མགོ་ནག་མི་ཡིས་བཏུང་བའི་ཇ།། ཟངས་དཀར་དམར་གསུམ་ནང་བཙོ་བའི་ཇ།། དཀར་སེང་རས་ནང་ལ་བཅོས་པའི་ཇ།། ཚོང་དཔོན་ནོར་བུ་བཟང་པོས་བསྒྲུབས་པའི་ཇ།། དཀར་པོའི་དངུལ་དང་བརྗེས་པའི་ཇ།། ལམ་འགྲོ་དབང་ཐང་བཟང་བའི་ཇ།། སྨུག་ཆུང་དྲེལ་གྱིས་ཁུར་བའི་ཇ།། ལ་ཆེན་ལ་ཆུང་བརྒལ་བའི་ཇ།། སྤང་ཆེན་སྤང་ཆུང་བརྒྱབ་པའི་ཇ།། ཆུ་བོ་ཆུ་ཕྲན་གཏུབ་པའི་ཇ།། གསེར་སྲང་དངུལ་སྲང་བརྗེས་པའི་ཇ།། ས་བོད་ཡུལ་ཕྱོགས་ལ་ཕོག་པའི་ཇ།། ཡུལ་བསོད་ནམས་ཅན་དུ་ཕོག་པའི་ཇ།། ཐབ་རྨ་བྱ་ནང་ལ་བཙུགས་པའི་ཇ།། ལྕགས་ཐབ་མཚོ་མིག་བཙུགས་པའི་ཇ།། ཇ་མཆོད། ཇ་ལ་དང་པོ་གཉིས་པ་གསུམ་སོགས་ཡོད།། ཇ་དང་པོ་ཁང་ཐོག་གནས་རྟེན་བཅུ་དྲུག་དྲངས།། ཇ་གཉིས་པ་བསླུ་མེད་དཀོན་མཆོག་གསུམ་ལ་མཆོད།། ཇ་གསུམ་པ་ཡུལ་ལྷ་གཞི་བདག་རྣམས་ལ་མཆོད།། ཇ་བཞི་པ་ས་མཁས་དཔོན་ཆེན་དག་ལ་མཆོད།། ཇ་ལྔ་བ་རྒན་སྔགས་འཆང་གསུམ་ལ་དྲངས།། ཇ་དྲུག་པ་སྐུ་དྲིན་ཆེ་བའི་ཕ་མར་མཆོད།། ཇ་བདུན་པ་བུ་བཟང་མགྲོན་ཆུང་རང་ཉིད་འཐུང་།། ནག་རིལ་ཇ་ཡི་བཀྲ་ཤིས་ཤོག །
