གླུ་ཐ་ལ་ལ་མོ་ཐ་ལ་ལེན། །
གླུ་ཨ་ལ་ལ་མོ་ཨ་ལ་ལེན། །
སྐྱབས་གནས་དཀོན་མཆོག་གསུམ་པོ་མཁྱེན། །
ཡང་མཁྱེན་རིགས་གསུམ་མགོན་པོ་མཁྱེན། །
ཆོས་མེད་ལུང་པ་ཆོས་ལ་སྒྱུར། །
བསམ་དོན་ཡིད་བཞིན་འགྲུབ་པར་ཤོག །
ས་འདི་ཡི་ས་ངོ་མ་ཤེས་ན། །
ཧོར་ཡུལ་ཐང་ཟམ་རིང་མོ་རེད། །
ང་དང་ང་ངོ་མ་ཤེས་ན། །
གྲུ་པའི་དཔོན་པོ་སངས་རྒྱས་སྐྱབས། །
སྐྱེ་བ་འདི་ཡི་གོང་རོལ་ན། །
དག་པ་ལྷ་ཡི་ཞིང་ཁམས་ནས། །
ལྷ་ཕྲུག་ལྔ་ལ་སྐྱེ་བ་བླངས། །
ཆེ་མགོ་ངང་ཡག་དཀར་བ་དེ། །
འབུམ་པའི་ཞལ་ལུ་དཀར་པོ་རེད། །
མ་དབང་ཧོར་སེར་ལག་ཤོར། །
དེ་འོག་ཤུགས་ཆེན་ངམ་ནག་དེ། །
སྡིག་གཅོད་ཤན་པ་རྨེ་རུ་རྩེ། །
དེ་འོག་ཤུགས་ཆེན་ངམ་ནག་དེ། །
སྡིག་གཅོད་ཤན་པ་རྨེ་རུ་རྩེ། །
དེ་འོག་འབུམ་པ་དཀར་ཆུང་དེ། །
སེང་ཆེན་ནོར་བུ་དགྲ་འདུལ་ཟེར། །
འཛམ་གླིང་སྐྱོབ་པའི་ལྷ་སྐལ་རེད། །
དེ་འོག་ལྷ་རྒོད་དུང་འབུམ་དེ། །
གྲུ་པའི་དཔོན་གྱི་ལུས་ལ་གྲུབ། །
ཆུང་བ་མན་རྩེ་འོད་དཀར་དེ། །
རི་པ་ཐང་རྩེ་གཡུ་འབྲུག་ཟེར། །
དེ་གསུམ་ཧོར་སེར་ཡུལ་ལ་སྐྱེས། །
སྐྱེས་དོན་རྩ་བ་བཤད་པ་ན། །
ལྷ་བརྒྱས་ཚོགས་འཁོར་སྐོར་བའི་ཉིན། །
ཚོགས་ཤ་མ་རྙེད་མི་ཤ་དྲངས། །
ཚོགས་ཆང་མ་རྙེད་ཁྲག་ལ་བྱས། །
དེ་ཡིས་ཧོར་སེར་ཡུལ་ལ་འཁྱམས། །
ཚོགས་ཤ་ཚོགས་ཆང་རྙེད་པ་ན། །
ཁྲ་པོ་གླིང་གི་ས་ཆ་རུ། །
དཔའ་བརྟུལ་ལུས་རྟེན་ལེན་རྒྱུ་ཡིན། །
རྟེན་འབྲེལ་མ་འཛོམ་ཧོར་ཡུལ་ཐལ། །
དེ་ཚོ་གྲུ་པའི་ལོ་རྒྱུས་ཡིན། །
ས་འདི་ཧོར་སེར་ས་ཆ་ཡིན། །
ཆུ་ཆེན་ཧོར་ཆུ་ཁམ་པ་ཡིན། །
རྗེ་དཔོན་ཁྲི་རྗེ་གུར་དཀར་ཡིན། །
དེ་ནས་རྒྱ་ཡི་ཐང་འབུམ་ཉོན། །
ཉི་མ་གཞེས་ནིང་གནམ་ལོ་ལ། །
ཧོར་དམག་ཁྲ་མོ་གླིང་ལ་སོང། །
འབྲུག་མོ་ནོམ་ལ་བཅད་ནས་བྱུང་། །
དེ་ཕན་ཧོར་ཆུ་ཁམ་པ་འདི། །
ཟམ་མེད་མ་ཡིན་ཟམ་ཡོད་ཡིན། །
ཧོར་ཟམ་རིང་མོ་སྲིད་ལེ་ཡིན། །
ཉི་མ་དེ་ཚོའི་ཚུན་ཆད་ནས། །
དོགས་པ་བྱས་ནས་གྲུ་ལ་བསྒྱུར། །
ཧོར་ཆུས་གླིང་དམག་གི་ཁོག་ཀྱང་། །
གྲུ་བཙུགས་ད་རུང་བརླིང་ཆ་ཆེ། །
ཧོར་གྱི་ཉ་སྦལ་ལྕོང་མོ་གསུམ། །
གྲུ་སོ་གསུམ་གྱི་སོ་ལ་བཞག །
སྟོད་གྲུ་ཐང་ཟམ་རིང་མོ་འདིར། །
ལྕོང་མོའི་གྲུ་པ་ང་རང་ཡིན། །
བར་གྲུ་ཐང་རྒོད་གྲུ་སོ་ན། །
ཉ་པའི་ཨ་མགོ་ལྕགས་མིག་ཡོད། །
སྨད་གྲུ་ཐང་ནག་གྲུ་སོ་ལ། །
སྦལ་པའི་མི་བཙན་ཁ་ཤོ་ཡོད། །
སྨད་གྲུ་ཐང་ནག་གྲུ་སོ་ལ། །
སྦལ་པའི་མི་བཙན་ཁ་ཤོ་ཡོད། །
གྲུ་གཡོག་མི་མགོ་བཅུ་རེ་ཡོད། །
ཚུར་ཡོང་བརྒྱ་བྱུང་གྲུ་ཐོ་འགོད། །
ཕར་འགྲོ་སྟོང་བྱུང་ཐམས་ཅད་འདུས། །
ཨེ་གཏོང་གྲོས་ཁ་བསྡུར་ལེ་ཡིན། །
ཁ་འཆམ་མཐུན་ན་གཏོང་ལེ་ཡིན། །
ལ་བཞིན་ཧོར་སེར་མ་གཏགས་པ། །
སུ་ཡིན་འགྲོ་འོང་བྱེད་ས་མེད། །
ཧོར་རྗེ་རྒྱལ་པོའི་རྒྱལ་ཁྲིམས་ཡོད། །
བྱེ་མ་ཉག་ལའི་ཚུན་ཆོད་ན། །
ཚུར་ཡོང་རྗེས་ན་ཉུལ་མ་ཡོད། །
ཕར་འགྲོའི་རྗེས་ན་རྒྱབ་འདེད་ཡོད། །
ཁྱེད་རང་འདིར་ཡོང་མ་ལེགས་གདའ། །
དེ་སྟེ་མི་ཆུང་རྒྱ་ཡི་བུ། །
དོ་ནུབ་གྲུ་པའི་ཁྱིམ་དུ་སྡོད། །
ཟ་མ་ལོངས་སྤྱོད་ཞོར་ལ་ཟོ། །
མཆོད་རྟེན་ལྷ་ཁང་ཕུག་ལ་ཞོག །
མཆོད་པ་ཞོར་ལ་འབུལ་བས་ཆོག །
སང་ཉིན་གྲུ་པའི་གྲོས་ར་བསྡུ། །
གྲུ་ལ་ཨེ་གཏོང་གྲོས་ཀྱིས་གཅོད། །
གོ་ན་རྣ་བའི་བདུད་རྩི་ལ། །
མ་གོ་གླུ་ཡི་འགྲེལ་བ་གྱིས། །
