སྤུ་མདོག་གཙང་བས་གཅིག། ངོ་གདོང་གཙང་བས་གཉིས། སེང་གེ་གནམ་མཆོག་ལྟ་བུའི་ལུས་ཀྱིས་གསུམ། དེ་གསུམ་ལ་ཕྱི་ཡི་བཟང་དཔྱད་གསུམ་ཟེར། ངང་མོའི་སྐེ་ལྟར་གཉེན་པས་གཅིག། སྦལ་པའི་མིག་ལྟར་འབུར་པས་གཉིས། རྣ་བ་རྒོད་གཤོག་བརྐྱངས་འདྲ་གསུམ། དེ་གསུམ་ལ་མགོ་བོའི་བཟང་དཔྱད་གསུམ་ཟེར། སེང་གེ་དར་མའི་མཆེ་བ་འདྲ་བས་གཅིག། ཟ་འགྲམ་འཇམ་ཞིང་རིང་བས་གཉིས། སོ་ཆེན་གྲལ་སྟར་སྙོམ་པས་གསུམ། དེ་གསུམ་ལ་འགྲམ་པའི་བཟང་དཔྱད་གསུམ་ཟེར།གཡག་གི་སོག་པ་འདྲ་བས་གཅིག། ཁྲ་ཡི་བྲང་ལྟར་ལྡིར་བས་གཉིས། རྩིབས་མ་ཕྲ་སྦོམ་མེད་དང་གསུམ། དེ་གསུམ་ལ་སྟོད་ཀྱི་དཔྱད་གསུམ་ཟེར། དགོ་བའི་གླ་དང་འདྲ་བས་གཅིག། ཤྭ་ཕོའི་སྨན་ཉག་འདྲ་བས་གཉིས། སྨད་ཚིགས་འབུར་ཐོན་མེད་དང་གསུམ། དེ་གསུམ་ལ་སྨད་ཀྱི་བཟང་དཔྱད་གསུམ་ཟེར། ཤྭ་ཕོའི་རྗེ་ངར་འདྲ་བས་གཅིག། མྱུར་མོ་གློག་དང་འདྲ་བས་གཉིས། རྨིག་པ་ལྕགས་ནག་འདྲ་བས་གསུམ། དེ་གསུམ་ལ་རྐང་པའི་བཟང་དཔྱད་གསུམ་ཟེར། ལག་པ་སྦོམ་ཞིང་རིང་བས་གཅིག། ལག་ངར་གསེར་གྱི་རྐང་གླིང་གཉིས། རྨིག་པ་རྐང་དང་མཚུངས་པས་གསུམ། དེ་གསུམ་ལ་ལག་པའི་བཟང་དཔྱད་གསུམ་ཟེར། ལག་གཤོམ་རླུང་ཆེན་ལྡིང་འདྲ་གཅིག། དཔུང་གཤོག་རླུང་དམར་འཚུབ་འདྲ་གཉིས། རྐང་གཤོག་མེ་ལྕེ་གྱེན་འབར་གསུམ། དེ་གསུམ་ལ་གཤོག་པའི་བཟང་དཔྱད་གསུམ་ཟེར། ལོང་གཙུག་ཨ་ལོང་འཁྱིལ་བས་གཅིག། ཐོད་གཙུག་ནོར་བུ་མེ་འབར་གཉིས། གཡས་གཙུག་རྒྱ་མཚོའི་རླབས་ཀྱིས་གསུམ། དེ་གསུམ་ལ་གཙུག་གི་བཟང་དཔྱད་གསུམ་ཟེར་བ་སོགས་བཟང་དཔྱད་སུམ་ཅུར་བཞེད་དོ།།