《བརྡ་སྤྲོད་གཟི་མིག་དགུ་པ།》དཔེ་སྐྲུན་འགྲེམ་སྤེལ་བྱས།

རྩོམ་སྒྲིག་པ།ཡོང་ཁུངས། སྤེལ་དུས། 06-24


    


        རྒྱལ་གཤེན་ཞང་བོད་རིག་གཞུང་སློབ་གཉེར་ཁང་གི་ཡན་ལག་(རྒྱལ་གཤེན་དཔེ་སྐྲུན་ཁང་།)གིས་ལོ་ཤས་གོང་ནས་བཟུང་ཞང་བོད་ཀྱི་རྒྱལ་རབས་ལོ་རྒྱུས་དང་། སྒོམ་སྒྲུབ་ཉམས་ལེན། ལེགས་བཤད་ལམ་རིམ་བཅས་ཀྱི་སྡེ་ཚན་གནད་འདུས་ཅན་གང་འཚམ་ཞིག་བོད་ཡིག་ནས་ནུབ་གླིང་གི་སྐད་ཡིག་ཁག་ཏུ་བསྒྱུར་བ་སོགས་གཡུང་དྲུང་བོན་གྱི་བསྟན་པ་རིན་པོ་ཆེ་ཕྱོགས་མཐའ་ཀུན་ཏུ་དར་བའི་མཐུན་རྐྱེན་ཞབས་འདེགས་དང་། སྒོས་སུ་ཞང་བོད་གནའ་རབས་ཀྱི་ལོ་རྒྱུས་ཞིབ་འཇུག་པ་དང་བོན་སྤྱོད་ཉམས་ལེན་པ་རྣམས་ལ་ཕན་བདེའི་སྲི་ཞུར་དམིགས་ཏེ་བྱ་བ་མང་པོ་ཞིག་ལུས་སེམས་གཉིས་གཅིག་ཏུ་སྒྲིལ་བའི་སྒོ་ནས་ནུས་པ་ཡོད་ཚད་ཀྱིས་བསྒྲུབས་དང་སྒྲུབ་ཞུ་བཞིན་པའི་ཁུལ་དུ་མཆིས། དེ་ཙམ་མ་ཡིན་པར་ཚོགས་པ་འདིའི་དམིགས་ཡུལ་གཙོ་བོའི་གྲས་སུ་ཡོད་པ་གཞན་ཞིག་ནི་ད་ལྟའི་རྩོམ་པ་པོ་དང་། མཁས་པ་རྣམས་ཀྱི་རྩོམ་འབྲིའི་ཁོར་ཡུག་གི་གཞི་རྒྱ་ཆེ་རུ་གཏོང་བར་ཕྱོགས་གང་ཅིའི་ཐད་ནས་མཐུན་རྐྱེན་གང་འཚམས་རེ་རིམ་གྱིས་བསྐྲུན་ཐུབ་ན་སྙམ་པའི་སེམས་བསྐྱེད་ཀྱིས་གཞི་བཟུང་སྟེ། སྔ་ལོར་སྨན་རིའི་དཔོན་སློབ་ཡང་སྟོན་འཕྲིན་ལས་ཉི་མ་རིན་པོ་ཆེས་བརྩམས་གནང་བའི་དཔྱད་རྩོམ་ཕྱོགས་བསྒྲིགས་དཔར་སྐྲུན་ཞུས་ཏེ། བོད་ཕྱི་ནང་གང་སར་འགྲེམ་སྤེལ་གྲུབ་ཟིན།
        འདི་ལོར་གཡུང་དྲུང་བོན་གྱི་གདན་ས་སྨན་རིའི་གླིང་གི་རྩོམ་པ་པོ་ཐུན་མོང་དང་། ཐུན་མིན་གྱི་ཤེས་བྱ་ཀུན་ལ་མཁས་པའི་རྣམ་དཔྱོད་རབ་ཏུ་ཡངས་པའི་ཁྲི་གཡུང་དྲུང་གིས་བརྩམས་པའི་གནའ་བོའི་བོན་ལུགས་དང་འབྲེལ་ཏེ་བོད་ཀྱི་བརྡ་སྤྲོད་པའི་བྱུང་བ་དང་དེའི་ཁྱད་ཆོས་ལ་དཔྱད་པའི་རྩོམ་དེབ《བརྡ་སྤྲོད་གཟི་མིག་དགུ་པཞེས་པར་རྒྱལ་སྤྱིའི་བོད་རིག་པའི་མཁས་དབང་སྟོང་གི་སྤྱི་ཕུད་འགས་གདེངས་འཇོག་ཚད་མཐོ་གནང་ཡོད་ཅིང་། དགོན་སྡེ་དང་སློབ་གྲྭ་ཁག་ཏུ་བརྡ་སྤྲོད་པའི་རིག་གནས་ལ་སློབ་པ་ལམ་ཞུགས་རྣམས་ལ་ཟུར་བལྟའི་དཔེ་ཀློག་དང་། ཞང་བོད་ཀྱི་སྐད་ཡིག་ཞིབ་འཇུག་པ་མང་པོར་ཀློག་རིན་ངེས་ཅན་ལྡན་པའི་དཔེ་དེབ་འདི་ཉིད་དགའ་བ་དང་སྤྲོ་བའི་སྒོ་ནས་དཔེ་སྐྲུན་ཁང་གིས་ད་ལམ་དཔར་སྐྲུན་དངོས་སུ་གྲུབ་ཡོད། མ་འོངས་པར་ཡང་དེ་དེ་བཞིན་བོད་ཕྱི་ནང་གང་སར་བཞུགས་པའི་རང་རེའི་རྩོམ་པ་པོ་རྣམས་ཀྱིས་གཡུང་དྲུང་བོན་གྱི་ཐུན་མོང་མ་ཡིན་པའི་ཁྱད་ཡོན་འབུར་དུ་བཏོན་པའི་རྩོམ་དེབ་གསར་པའི་རིགས་ལོ་ནས་ལོར་མཐུད་དེ་དཔར་སྐྲུན་ཞུ་འཆར་ཡོད། 



དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས། 蜀ICP备14009601号-1