ཧི་མ་ལ་ཡ་རྟགས་ཅན་གྱི་སྐབས་བརྒྱད་པའི་སྦྲང་ཆར་རྩོམ་རིག་བྱ་དགའི་ཚོགས་འདུ་གནའ་མཁར་ཟི་ལིང་དུ་བསྡུས།
བྱ་དགའ་ཐོབ་མཁན་གྱི་རྩོམ་པ་པོ་རྣམ་པ།
ལྷན་དུ་བསྐྱོན་པའི་པར།
སྤྱི་ཟླ8པའི་ཚེས11ཉིན། ཧི་མ་ལ་ཡ་རྟགས་ཅན་གྱི་སྐབས་བརྒྱད་པའི་སྦྲང་ཆར་རྩོམ་རིག་བྱ་དགའ་སྤེལ་བའི་ཚོགས་འདུ་གནའ་མཁར་ཟི་ལིང་དུ་བསྡུས།
སྦྲང་ཆར་རྩོམ་རིག་བྱ་དགའ་ནི་མཚོ་སྔོན་མི་རིགས་དཔེ་སྐྲུན་ཁང《 སྦྲང་ཆར 》རྩོམ་སྒྲིག་ཁང་གིས་གཙོ་སྒྲུབ་གནང་བཞིན་པའི་བོད་ཀྱི་རྩོམ་རིག་བྱ་དགའ་ཆེས་མཐོ་ཤོས་དེ་ཡིན། ལོ་གསུམ་རེར་ཐེངས་གཅིག་སྤེལ་བཞིན་ཡོད་ལ། ད་ལྟའི་བར་དུ་སྐབས་བདུན་ལ་སྤེལ་ཟིན།
ཚོགས་འདུའི་སྟེང་། མཚོ་སྔོན་ཞིང་ཆེན་རིག་གནས་དང་གསར་འགྱུར་དཔེ་སྐྲུན་ཐིན་དང་། མཚོ་སྔོན་མི་དམངས་དཔེ་སྐྲུན་ཁང་། མཚོ་སྔོན་མི་རིགས་དཔེ་སྐྲུན་ཁང་བཅས་ཀྱི་མགོ་ཁྲིད་དང་། མཚོ་སྔོན་ཞིང་ཆེན་རྩོམ་པ་པོའི་མཐུན་ཚོགས་ཀྱི་ཚོགས་གཙོ་གཞོན་པ་ལུང་རིན་ཆེན། པེ་ཅིང་ཧི་མ་ལ་ཡ་བཟོ་སྐྲུན་རྒྱན་སྤྲས་འགན་ལེན་ཚད་ཡོད་སྤྱི་གཉེར་ཁང་གི་སྤྱིའི་གཉེར་བ་གངས་ཞུན། 《 སྦྲང་ཆར 》རྩོམ་སྒྲིག་ཁང་གི་གཙོ་སྒྲིག་པ་སྔོན་མ་ཨ་ཁུ་འགྱུར་མེད་དང་གཉའ་བློ་གྲོས་རྒྱལ་མཚན་བཅས་གདན་ཞུ་བྱས་འདུག
རྒྱུས་ལོན་པ་ལྟར་ན། སྐབས་བརྒྱད་པའི་སྦྲང་ཆར་རྩོམ་རིག་བྱ་དགའ་ནི2012-2014ལོའི་བར་གྱི《སྦྲང་ཆར》དུས་དེབ་འདོན་ཐེངས་བཅུ་གཉིས་ལས་དཔྱད་འདེམས་བྱས་ཤིང་། ཐེངས་འདིར་སྦྲང་ཆར་རྩོམ་རིག་བྱ་དགའ3དང་། སྦྲང་ཆར་རྩོམ་རིག་དཔྱད་བརྗོད་བྱ་དགའ1། སྦྲང་ཆར་སྨྱུག་གསར་བྱ་དགའ2བཅས་བདམས་ཏེ། བྱ་དགའ་ཐོབ་མཁན་གྱི་རྩོམ་པ་པོ་དག་ལ་བྱ་དགའི་རྟགས་མ་དང་། དཔང་ཡིག བྱ་དགའི་དངུལ་བཅས་གནང་བར་མ་ཟད། གཞན་ཡང《སྦྲང་ཆར》རྩོམ་སྒྲིག་ཁང་གི་རྩོམ་སྒྲིག་པ་མཁའ་འགྲོ་ཚེ་རིང་དང་། ཆོས་སྐྱོང་། ཚེ་རིང་མཁར། པདྨ་དབང་ཆེན་བཅས་ལ་སྦྲང་ཆར་རྩོམ་སྒྲིག་པའི་བྱ་དགའ་གནང་།
སྦྲང་ཆར་རྩོམ་རིག་བྱ་དགའ།
ལྷ་བྱམས་རྒྱལ། 《ལོ་དེ་ལ》 (སྒྲུང་འབྲིང་།-2014ལོའི་དེབ་དང་པོ)
ཨ་སྨྱོན་བཀྲ་ཤིས་དོན་གྲུབ། 《ཨ་མ•ཙིག་མ》 (སྒྲུང་ཐུང་།-2014ལོའི་དེབ་བཞི་བ)
སྒྲེན་པོ། 《འཆམ་མཐུན་ལ་སྨོན་པ》 (སྙན་རྩོམ།-2013ལོའི་དེབ་དང་པོ)
སྦྲང་ཆར་དཔྱད་བརྗོད་བྱ་དགའ།
བསོད་ནམས་རྒྱལ། 《གཟུགས་འདས་ཀྱི་མཐོ་ཚད་ནས་སྒྲུང་གཏམ་གྱི་ཟབ་ཚད་སྐོར་གླེང་བ》 (དཔྱད་རྩོམ།-2014ལོའི་དེབ་གསུམ་པ)
སྦྲང་ཆར་སྨྱུག་གསར་བྱ་དགའ།
ཨེ་ཉི་མ་ཚེ་རིང་། 《དགོན་འདབས་ཀྱི་འཚོ་བ》 (སྒྲུང་ཐུང་།-2014ལོའི་དེབ་གསུམ་པ)
གངས་སྨྱོན། 《མཁར་གྲོང་གི་རྨི་ལམ་སྐྱ་བོ》 (སྒྲུང་ཐུང་།-2012ལོའི་དེབ་བཞི་བ)
སྐབས་བརྒྱད་པའི་སྦྲང་ཆར་རྩོམ་རིག་བྱ་དགའ་ནི་དེང་རབས་བོད་ཀྱི་རྩོམ་པ་པོ་གྲགས་ཅན། པེ་ཅིང་ཧི་མ་ལ་ཡ་བཟོ་སྐྲུན་རྒྱན་སྤྲས་འགན་ལེན་ཚད་ཡོད་སྤྱི་གཉེར་ཁང་གི་སྤྱིའི་གཉེར་བ་གངས་ཞུན་ལགས་ཀྱིས་སྦྱིན་བདག་མཛད།
