༄༅། །གསེར་རྟ་གེ་སར་ཟློས་གར།

དབལ་ཤུལ་རང་བྱུང་། རྩོམ་སྒྲིག་པ།སྒྲོལ་མ་ཚེ་བརྟན།ཡོང་ཁུངས།གླིང་གེ་སར་རིག་གནས་དྲ་བ། སྤེལ་དུས། 08-17


    གེ་སར་ཟློས་གར་ནི་མདོ་སྨད་གསེར་རྟའི་མཆོག་སྤྲུལ་པད་མ་ཐེག་མཆོག་བསྟན་པའི་རྒྱལ་མཚན་མཆོག་གིས་དུས་རབས་ཉི་ཤུ་པའི་ལོ་རབས་བརྒྱད་ཅུ་པའི་ལོ་མགོར་གསར་གཏོད་མཛད་པ་སྟེ། དེ་ནི་བོད་ཁུལ་ཡོངས་དང་འཛམ་གླིང་ལ་ལྟོས་ནས་བཤད་ན་གེ་སར་ཟློས་གར་གར་སྟེགས་སུ་བསྐྱལ་བའི་ལོ་རྒྱུས་རིང་བཞིན་གྱི་གསར་རྩོམ་ཆེན་མོ་ཞིག་ཡིན་ལ། དེའི་ཡན་དུ་བོད་ཁུལ་ཡོངས་སུ་སྲོལ་རྒྱུན་རྣམ་ཐར་ཆེ་བརྒྱད་ཙམ་ལས་གེ་སར་གྱི་སྒྲུང་འཁྲབ་གཞུང་དུ་བསྒྱུར་ཞིང་གར་སྟེགས་སུ་འཁྲབ་སྟོན་བྱེད་སྲོལ་མེད་པས། མཆོག་སྤྲུལ་པདྨ་ཐེག་མཆོག་བསྟན་པའི་རྒྱལ་མཚན་མཆོག་གིས་བོད་ཀྱི་ཟློས་གར་རིག་གནས་ལ་མེད་པ་གསར་སྣོན་ཏེ་བླ་ན་མེད་པའི་མཛད་རྗེས་ཆེན་པོ་འདི་བཞག་གནང་མཛད་པ་ནི་གེ་སར་རིག་གནས་པ་དང་གེ་སར་ཟློས་གར་བ། མི་རིགས་སྒྱུ་རྩལ་བ་ཀུན་གྱིས་བཀའ་དྲིན་ཞུ་འོས་པ་ཞིག་རེད། གསེར་རྟ་གེ་སར་ཟློས་གར་འདི་ད་ལྟ་རྒྱལ་ཁབ་རིམ་པའི་དངོས་པོ་མིན་པའི་རིག་གནས་ཤུལ་བཞག་ཏུ་གྱུར་ཡོད།    

    སྤྱི་ལོ་1986ལོར་གོང་ས་7་ཀུན་གཟིགས་པཎ་ཆེན་བཅུ་པ་མཆོག་གསེར་རྟ་རུ་ཆིབས་བསྒྱུར་གནང་ཞིང་གེ་སར་ཟློས་གར་ལ་ཐུགས་དགྱེས་གཟེངས་བསྟོད་དང་རྒྱབ་སྐྱོར་བླ་ལྷག་མཛད།   གསེར་རྟ་གེ་སར་ཟློས་གར་ཚོགས་པས་གེ་སར་གྱི་འཁྲབ་གཞུང་གང་མང་གསར་རྩོམ་འཁྲབ་སྟོན་བྱས་ཏེ་བོད་ཁུལ་ཡོངས་སུ་གྲགས་འགུལ་བསླངས་བ་མ་ཟད། མཚོ་སྔོན་མགོ་ལོག་གི་ས་ཆ་དང་སི་ཁྲོན་དཀར་མཛེས་ཀྱི་ས་ཆ་གང་མང་དུ་གེ་སར་ཟློས་གར་བརྒྱུད་སྤེལ་གྱིས་ཡན་ལག་མང་དུ་བཙུགས་པ་དང་། བོད་ཁུལ་གྱི་དགོན་ཁག་གང་མང་དུ་གེ་སར་ཟློས་གར་གསར་བཙུགས་གནང་ཡོད་པ་རེད། 

    སྤྱི་ལོ་2000ལོ་གསེར་རྟ་གེ་སར་ཟློས་གར་ཚོགས་པས་གེ་སར་གར་སྟེགས་ཟློས་གར་དེ་རྩྭ་ཐང་དུ་རྟ་ཐོག་ནས་འཁྲབ་ཞིང་"རྟ་རྒྱུག་རྒྱལ་འཇོག་"གློག་བརྙན་དུ་ཕབ། དེའང་བོད་ཁུལ་གྱི་ཆེས་ཐོག་མའི་གེ་སར་རྟ་འཆམ་དང་གློག་བརྙན་ཕབ་བསྐྲུན་གྱི་ལས་གཞི་རུ་གྱུར་ཡོད་པ་རེད། 

    སྤྱི་ལོ་2005ལོར་གསེར་རྟ་གེ་སར་ཟློས་གར་པོ་ལན་རྒྱལ་ཁབ་ཏུ་འཁྲབ་སྟོན་བྱས་ཏེ་སྲོལ་རྒྱུན་ཟློས་གར་གྱི་རྣམ་པའི་གེ་སར་འཁྲབ་སྟོན་རྒྱལ་སྤྱིའི་གར་སྟེགས་སུ་བསྐྱལ་བ་རེད། 

    སྤྱི་ལོ་2007ལོར་གསེར་རྟ་གེ་སར་ཟློས་གར་ཚོགས་པ་དབྱིན་ཇི་རྒྱལ་ཁབ་ཏུ་མཚམས་འདྲིའི་འཁྲབ་སྟོན་དུ་སོང་སྟེ། བོད་ཀྱི་གེ་སར་ཟློས་གར་གསར་རྩོམ་ཚོགས་པ་འདིའི་སྒྱུ་རྩལ་འཁྲབ་སྟོན་གྱི་ཁྱད་ཆོས་ལ་ས་གནས་དེའི་ཆེད་མཁས་པ་དང་སྒྱུ་རྩལ་ལས་གཉེར་པ། ལྟད་མོ་བ་སྟོང་ཕྲག་མག་པོས་དགའ་བསུ་ཐོབ་ཡོད།

    ཚོགས་པ་འདིས་མུ་མཐུད་གེ་སར་ཟློས་གར་ལ་གསར་གཏོད་གསར་སྤེལ་དང་། སྒྱུ་རྩལ་གྱི་མཛེས་ཆ་དང་སྤུས་ཚད་མཐོར་འདེགས་ཀྱིས་གླིང་གེ་སར་ཟློས་གར་གསར་གཏོད་ཀྱི་ལོ་རྒྱུས་རིང་བཞིན་གྱི་གྲུབ་འབྲས་ལ་སྔར་བས་བཀྲག་མདངས་རྒྱས་སུ་འཇུག་པར་འབད་པ་ལྷུར་ལེན་གནང་བཞིན་ཡོད། 


རྩོམ་ཡིག་རྗེས་མ།
༄༅། །གྱང་ངོས་ཀྱི་ཁོ་ཧྥེ།

དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས། 蜀ICP备14009601号-1