གཡུ་རྔོག་ལུང་རྟོགས། (དཀར་མཛེས།)
ངག་གི་རབ་ཁ་ཤོར་ཏེ་སྙན་ཚིག་འཆོལ།།
ཚོར་བའི་བུས་པ་ངུས་ཏེ་ལུས་སེམས་སྐྱོམ།།
ལུས་ངག་ཡིད་གསུམ་ཆང་གིས་སྦང་བ་བཞིན།།
རབ་རིབ་ཅིག་ཏུ་གསེར་གྱི་ལོ་མ་འགའ།།
གཟས་ཏེ་མིག་གི་ཐད་སོར་ལྷུང་བ་བཞིན།།
བརྡ་དང་ཐ་སྙད་དག་གི་རི་ཉིལ་ཏེ།།
རྒྱ་མཚོའི་རླབས་ཀྱི་ངོས་ན་འདྲིལ་བ་དང་།།
མེ་ལྕེའི་རལ་གྲིའི་རྩེ་ན་འཕྱོ་བ་འོ།།
ལྷམ་མཐིལ་རལ་བའི་ཨ་སྐྱོ་བ་ཞིག་གིས།།
བྱིན་རླབས་སྙིང་གི་དཀྱིལ་ལ་སྒོམ་སྒོམ་ནས།།
དད་པའི་གོང་བུར་སྙིམ་པའི་མེ་ཏོག་དག།
བཅོས་མིན་ཤུགས་འབྱུང་བཞད་པ་དང་འདྲ་སྟེ།།
སྙིང་སྡུག་སེམས་ན་འཕག་པའི་གནས་ཡུལ་གྱི།།
བུ་མོ་ཐོལ་གྱིས་སྟབས་ཀ་འགྲིག་བྱུང་སྟེ།།
ག་ཤེད་མུན་ནག་ནང་དུ་སྙིང་སྡུག་ལ།།
ཐུག་པའི་ཚོར་བ་བྲང་ལ་ཆུ་བྱོ་ལྟར།།
དོ་ནུབ་ཚོར་བ་འདི་གས་དེད་ཡོང་སྟེ།།
ང་ཡི་མགྲིན་པར་སྨུག་པའི་རྡུལ་འཚངས་སོ།།
བྱེ་སྒང་མེ་ཏོག་དག་གི་བསླུ་བྲིད་ཀྱི།།
དུང་བའི་འོ་མ་བྱོ་བ་མིག་ཟུང་གིས།།
གཞིབ་པའི་ངང་ཚུལ་ཡར་བའི་མོད་ལ་ནི།།
སྨུག་རྒྱུའི་ཐང་དུ་འཁོར་བ་ཟགས་ཏེ་འོང་།།
འཁོར་བའི་པང་དུ་སྡུག་བསྔལ་ཚེར་མ་དག།
ལུས་ཀྱི་བ་སྤུ་བཞིན་དུ་གཟེངས་ཏེ་འོང་།།
བ་སྤུའི་རྩེ་མོ་རེ་ནས་རྡུལ་སྙེད་ཀྱི།།
ཌཱ་ཀིའི་ཚོགས་དག་སྙིང་ལ་འཚེངས་བར་ཤོག།
ཕྱི་དྲོ་དེར། ངས་འདི་ལྟར་སྙམ།
རྩྭ་ལོ་འདི་དག་སྟོན་གྱི་ཉི་མ་ཡིས།།
བསྲེག་བྱེད་སྟོབས་ཀྱི་མེ་ལྕེ་མཆེད་ན་ཡང་།།
རང་རྟོན་སྙིང་དུ་སིམ་པའི་འདུ་བྱེད་ཀྱིས།།
རི་བོའི་གྲིབ་བསིལ་བརྟེན་ཏེ་རང་ཉིད་ཀྱི།།
ལང་ཚོའི་སྲོག་ལ་གཅེས་པའི་ངང་ཚུལ་འདིས།།
རྨི་ལམ་ཟེར་ཡ་དེ་ནི་ཁྲག་རྩ་རུ།།
དྲག་ཏུ་རྒྱུ་བའི་ཟུངས་ཀྱི་དྭངས་མ་སྟེ།།
དེ་ཉིད་བདོག་ཚེ་གསོན་པོ་ཉིད་ཡིན་ཏེ།།
འཆར་ཡན་དག་ནི་རྒྱ་མཚོའི་རླབས་བཞིན་ནོ།།
མཚར་སྡུག་འཇའ་ཚོན་དག་ཀྱང་འཆར་ནས་ཡོང་།།
དེ་མིན་རི་མོར་བྲིས་པའི་མེ་ཏོག་སྟེ།།
ཆག་གྲུམ་ཤོར་བའི་མཛེས་མའི་མེ་ལོང་ངོ་།།
