༄༅།། དགེ་བའི་བཤེས་གཉེན་རྣམས་ལ་ཕུལ་བའི་བསྟོད་ཚིག་ངག་གི་རོལ་མོ།

དབང་ཆེན། རྩོམ་སྒྲིག་པ།ཚེ་དཔལ།ཡོང་ཁུངས།ངེད་དྲ་བ། སྤེལ་དུས། 11-12


དགེ་རྒན་དུས་ཆེན་ལ་ཕུལ་བའི་ལེགས་སྐྱེས།

འཕགས་བོད་གཞུང་ལུགས་ནམ་མཁའི་ཀློང་ཡངས་སུ།། 

མཁྱེན་དཔྱོད་རྩལ་གྱི་འཁྱུག་པའི་དབྱར་སྐྱེས་རྔ།།

གང་གི་དྲིན་ལས་སྙན་ཚིགས་སྨྲ་བའི་མགྲིན།།

ཅུང་ཟད་གྲོལ་བ་བཛྲའི་མཚན་ཅན་བསྔགས།།

མཁྱེན་བརྩེ་ནུས་པའི་མཛའ་བཟང་གང་ལ་ཡང་།།

འགྲན་པའི་དོ་ཟླ་དབང་ཆེན་གསེར་གཞིའི་སྟེང་།།

རྙེད་མིན་རང་ཉིད་རང་གིས་དཔེར་མཚོན་དེས།།

དགེ་ལེགས་ཤིས་པ་འབུམ་གྱིས་འཁྱུད་གྱུར་ཅིག།

ལོ་ཆེན་བཻ་རོ་རྗེ་བཙུན་གྲོལ་མགོན་སོགས།།

སྐྱེ་རྒྱུད་ཕྲེང་བར་བསྟར་བའི་མཛད་རྗེས་རྣམས།།

འགྱུར་མེད་ལོ་རྒྱུས་གཡུང་དྲུང་རིས་བཞེངས་བའི།།

ངེས་དོན་གྲུབ་པའི་དབང་ཕྱུག་ནིརྨ་ཀཱ།

ལྔ་བརྒྱ་ཐ་མར་གྱུར་པའི་དུས་ཉིད་དུ།།

གང་སྐུ་བརྗིད་ཆགས་གསེར་གྱི་མཛེས་རིས་ཅན།།

དགེ་ལེགས་འདོད་འཇོའི་དཔལ་དུ་རྩེན་པ་ཡིས།།

བསྟན་འགྲོའི་ཕན་བདེ་རྫོགས་ལྡན་གསར་བས་འཚོ།།

སྐུ་གཞོན་གསར་བ་མྱུ་གུའི་སྐབས་དག་ནས།།

ལེགས་བཤད་ཐོས་པ་འཚོལ་བའི་སོ་ནམ་གྱིས།།

རིང་མིན་ཁོ་ལག་རྒྱས་པའི་ལྗོན་ཤིང་རྩེར།།

སྐུ་ཡོན་མེ་ཏོག་བཞད་པའི་ངོ་མཚར་བཞེས།།

སྡོམ་གསུམ་མུ་ཏིག་དཀར་པོའི་དོ་ཤལ་ཕྲེང་།།

ཁྱེད་སྐུ་མཛེས་པའི་རྒྱན་དུ་སྤུད་མ་ཐག།

ལྷར་བཅས་འགྲོ་བའི་མཆོད་སྡོང་ལྕི་གྱུར་བས།།

ཨེ་མ་འདེགས་བཟོད་ནོར་འཛིན་བསོད་ནམས་མཐོ།།

མདོ་རྒྱུད་འོ་མཚོར་འཁྱིལ་བའི་སྡེ་སྣོད་འཇིངས།།

བརྒལ་བའི་འབྲས་རྟགས་སོར་མོའི་རྩེད་འཇོ་ལས།།

འཁྲུངས་པའི་གསུང་རབ་གླེགས་བམ་ནོར་བུའི་དཔྱ།།

ཕྱི་རབས་མཁས་མང་འཇུག་པའི་མཛོད་དུ་གྲུབ།། 

མཁས་པའི་ལྗགས་བཟང་ནོར་འཛིན་སྒེག་མོའི་ཟོལ།།

ས་ལ་འགྱིང་བའི་ཤྲྀ་སེང་དཔལ་གྱི་རིར།།

བོད་ཡིག་སློབ་གྲྭའི་འཆད་ཉན་དབུ་བསླངས་ཚེ།།

སྒྲ་རིག་ལེགས་སྦྱར་སྐད་ཀྱི་ཆོས་འཁོར་བསྐོར།།

བསྟུན་མར་ཞབས་རྡུལ་ཁྲིར་འཁོད་བྱིན་རླབས་ཀྱིས།།

དེང་གི་བར་དུ་གྲངས་མེད་བློ་གསལ་གྱི།།

རིགས་གཞུང་ལེགས་བཤད་མྱོང་བའི་དགའ་སྟོད་དག།

དངོས་སམ་བརྒྱུད་པའི་བཀའ་དྲིན་བསྒྱུར་དུ་མེད།།

བསྒྲང་བྱ་བཅུ་ཕྲག་འདས་པའི་ལོ་རྒྱུས་ཁྲོད།།

ཐུགས་རྗེ་གདུགས་དཀར་ཕུབ་པའི་གྲིབ་བསིལ་འོག།

ལེགས་བཤད་ཆོས་ཀྱིས་བསྐྱངས་བའི་དགའ་སྟོན་རྣམས།།

ད་ལྟ་ཕྱིར་དྲན་རྟོག་པའི་མིག་ན་བཀྲ།

ཟབ་མོའི་དེ་ཉིད་གཞལ་བའི་པདྨའི་ཁ།།

ཀླུ་སྒྲུབ་དགོངས་པའི་ཟེར་གྱིས་ཕྱེས་པའི་མོད།།

སྒྲོ་སྐུར་རྟག་ཆད་ཀུན་དཱ་ཟུམ་དང་ལྷན།།

ཡང་དག་ལྟ་བའི་གཏད་སོ་ཉིན་མོར་བྱས།།

ཕྱི་ཚུལ་ནང་མཛོད་འདུལ་བའི་བབ་དང་བསྟུན།།

ནང་གི་རྟོགས་པ་ནམ་མཁའི་མཐའ་མཉམ་པའི།།

དགེ་བའི་བཤེས་གཉེན་དཔག་བསམ་ལྗོན་པའི་ཞལ།།

མཇལ་བའི་ལུས་ཅན་དག་གི་སྐལ་བ་སྦོམ།།

ཐུན་མོང་ལམ་གྱི་སྦྱང་བ་མཐར་སོན་ནས།།

ཕྱག་རྫོགས་རྩེ་མོའི་ཐེག་པའི་ཉམས་བཞེས་སོགས།།

མཛད་པ་ཆ་ཤས་རྫོགས་པའི་རྣམ་ཐར་རྣམས།།

རྗེ་བཙུན་བཞད་པ་རྡོ་རྗེའི་ཟླ་བོར་གྲུབ།།

སྙན་པའི་གྲགས་པ་སྲིད་པའི་མཐའ་བརྒལ་ཡང་།།

བྱ་བཏང་སྦས་པའི་བརྟུལ་ཞུགས་ལ་དགྱེས་པའི།།

དམ་པ་རྩོད་དུས་བླ་མའི་བླ་གྱུར་ཞེས།།

བསྔགས་པའི་མེ་ཏོག་སྤྱི་བོར་བཅིངས་པ་མང་།།

གང་སྐུ་བརྗིད་ཆགས་གསེར་གྱི་ལྷུན་པོའི་རྩེར།།

འཕྲིན་ལས་མཚམས་སྤྲིན་གསར་བའི་མཛེས་པ་ངོམ།།

ཕྱོགས་བཞི་སྤང་གཞུང་གཡུ་ཡི་གདན་སྟེང་དུ།།

མི་ཤིགས་རྡོ་རྗེའི་ཁམས་སུ་རྟག་བརྟན་ཤོག།།


དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས། 蜀ICP备14009601号-1