༄༅།། འདོད་ཡོན་རྒྱན་དུ་རོལ་བ།

དབང་ཆེན། རྩོམ་སྒྲིག་པ།ཚེ་དཔལ།ཡོང་ཁུངས།ངེད་དྲ་བ། སྤེལ་དུས། 11-26


  ༄༅།།  འདོད་ཁམས་ས་ཡི་དཀྱིལ་འཁོར་ལ་བརྟེན་ཏེ། །འདོད་ཡོན་བདེ་བར་རོལ་བའི་རྒྱལ་ཁམས་སུ།།འདོད་པས་སུན་པ་མེད་པའི་འཇིག་རྟེནའདིར།  །འདོད་པའི་ལྷ་ཡིས་དངོས་གྲུབ་སྩལ་དུ་གསོལ།

  རྒྱ་ཆེན་ཤེས་བྱའི་སྐྱེད་ཚལ་ཡངས་པོ་རུ།  །རྣམ་རིག་གཙུག་ལག་འདབ་སྟོང་རབ་བཞད་དེ།  ། བློ་ལྡན་ར་ཡིག་གཉིས་པའི་བརྟུལ་ཞུགས་ཀྱིས།  ། ཐོས་བརྩོན་སྦྲང་རྩིའི་དགའ་སྟོན་དགྱེས་པར་རོལ། །ལང་ཚོ་པད་དཀར་གཞོན་ནུའི་བཞིན་རས་ལ།  །མཆུ་སྒྲོས་འདབ་བརྒྱ་གྲོལ་བའི་འཛུམ་མདངས་ཀྱིས།  །ཚེམས་ཕྲེང་གེ་སར་གསར་པའི་གཟི་འོད་རྩེར།  །གནག་སྣུམ་འདྲེན་བྱེད་བུང་བས་རྩེ་དགའ་རོལ། །ལྡེམ་འགྱུར་ལུས་ཀྱི་ཉམས་འགྱུར་ལྗོན་ཤིང་ལས།  །འཇམ་མཉེན་ཕྱག་གི་ཡལ་ག་དྲི་བཞོན་གྱིས། །དུང་བའི་ཟོལ་གྱིས་བསྐུལ་བའི་ལྕགས་ཀྱུ་ཡིས།  །ཁོ་བོའི་ཡིད་ཀྱི་དྲན་པ་དབང་མེད་འགུག །མྱོས་པའི་མཁུར་ཚོས་དམར་བའི་བཞིན་རས་ངོས།  །ངོ་མཚར་པད་དཀར་བཞད་པའི་ཞལ་སྒོ་ནས།  །མཛའ་བའི་གསང་གཏམ་ཁྲོལ་བའི་རོལ་མོ་ནི། །རྣ་བའི་དཔྱིད་ལ་ཡིད་ཀྱི་དང་བ་འདྲེན། །ཁྱེད་སྐུ་ཟླ་གཞོན་ཟེགས་མའི་ག་བུའི་རྡུལ། །བསིལ་བའི་ཐིགས་པ་ལྷུང་བའི་རེག་བྱ་ནི། །རྩུབ་པའི་མཚོན་ཆ་ཕལ་གྱིས་མི་བསྒྲུན་བའི། །མི་བཟོད་ལུས་ཀྱི་ཆ་ཀུན་དགའ་བདེས་འཇོམས། །འདོད་ལྷའི་བདག་པོའི་བྱིན་རླབས་ཆུ་རྒྱུན་ལས། ལུས་སེམས་བདེ་ཆེན་ཞིང་དུ་དྲོངས་བ་ཡིས། །ན་ཚོད་ལང་ཚོ་གསར་པའི་འཇོ་སྒེག་ལ།  །འཇམ་མཉེན་རྩེ་དགའི་མེ་ཏོག་ལན་བརྒྱར་སྦྱིན། །སྲིད་གསུམ་བདེ་བའི་ལམ་གྱི་གྲོང་ཁྱེར་དུ།  །ཆགས་པས་རྗེས་སུ་སྙེགས་པའི་འཇིག་རྟེན་འདི།  ། ངལ་གསོའི་བསྟི་གནས་བདེ་བའི་གནས་མཆོག་ཏུ།  །ངོ་མཚར་མཆོག་གིས་དགའ་བར་དགྱེས་པར་རོལ།  །མི་རིང་ཚེ་འདི་ཆགས་པའི་ཞིང་ས་རུ།  །ལས་ཀྱིས་འཕོངས་པའི་སྒྱུ་ལུས་གཡར་པོ་འདི།  །ནམ་ཞིག་ཆོས་ཉིད་གནམ་གྱི་རྒྱལ་མོ་དང་། །མ་མཇལ་བར་དུ་ཆགས་པའི་བདེ་ལ་སྦྱོར།  །དགའ་མགུ་མཉེས་དང་སིམ་པའི་རྩེ་དགའ་ཡིས།  །ལུས་སེམས་དགའ་བདེའི་སྙོམས་འཇུག་སྟོང་ཆེན་གྱི།  །མཁའ་ལ་ཉི་གཞོན་གསལ་བའི་འོད་སྣང་གི།  །འཁོར་འདས་རོ་མཉམ་ལྟད་མོ་དུས་གཅིག་མཐོང།  །བཅུ་དྲུག་ལང་ཚོ་བཞད་པའི་ཀུན་དཱ་མས།  །ནམ་མཁའི་བ་མོ་འཇོ་བར་དགའ་བའི་དཔྱིད།  །ཕུང་ཁམས་སྐྱེ་མཆེད་སྣང་སྲིད་སྣོད་བཅུད་ཀུན།  །བདེ་བ་ཆེན་པོའི་ཀློང་དུ་ཐིམ་པར་འགྱུར།  །བརྗོད་མེད་སྟོང་ཆེན་ཤེས་རབ་ལྷ་མོ་ནི།  ། གཟུགས་མེད་གསལ་རིག་སེམས་ཀྱི་བུ་ཆུང་དང་།  །ཟུང་དུ་སྦྱོར་བའི་ཐབས་ལ་མཁས་གྱུར་ན།  །འབྲས་བུ་ལྷན་སྐྱེས་བདག་སྲས་དམ་པ་འཁྲུངས།  །ཀུན་དཀྲིས་བདེ་བའི་རོ་ལ་ཞེན་པ་ཡིས།  །སྙོམས་འཇུག་གསང་བའི་གནས་སུ་ཡིད་རྟོན་གྱི། །འཇིག་རྟེན་ཐ་མའི་རྟོག་པས་བསླད་པར་ནི། གཏན་གྱི་འདུན་མ་བརླག་པའི་རྒྱུ་རུ་འགྲོ།  །ཕྱི་སྣང་ཀུན་རྫོབ་སྒྱུ་མའི་གྲོང་ཁྱེར་དུ།  །སྲིད་ཞིའི་ཕུན་ཚོགས་འདོད་ཡོན་རྒྱན་དུ་རོལ།  །ནང་ལྟར་རྟོག་ཚོགས་རིག་པའི་རང་རྩལ་གྱིས། །རྗེས་མེད་སྟོང་ཉིད་མཁའ་ལ་ཞི་བ་བརྙེས།  །དེ་སྐད་རང་བྱུང་རིག་པའི་ཁྱེའུ་དེས་།  །རང་སྣང་སྒྱུ་མའི་ཟློས་གར་རྩེན་པ་ཡིས།  ། ཕོ་མོའི་ལས་ལ་གཞོལ་བའི་སྐྱེ་བོ་ལ།  ། འདོད་ཡོན་འཇའ་ཚོན་རི་མོ་ལམ་དུ་བཀྲ།  །ངོ་མཚར་ཆགས་བསྐྱེད་འདོད་ཡོན་རྣམ་ལྔ་ལ།  །གང་སྣང་གཏད་མེད་རིག་པའི་རང་རྩལ་དུ།  །ཉེ་བར་སྤྱད་པའི་སྤྱོད་པ་མི་འདོར་བ།  །བསྐལ་བཟང་ཞི་བའི་སྒོ་ལ་འཇུག་པར་གྱུར།  །སེམས་ཉིད་སྟོང་པའི་ནམ་མཁའ་ཡངས་པོ་རུ།  །ལྷག་བསམ་སྤྲིན་གྱི་འདབ་མ་རབ་གཡོས་ཏེ། །ཕན་བདེ་ཆར་དུ་བསྙིལ་བའི་ལེགས་སྐྱེས་འདི།  །གངས་ལྗོངས་རིགས་མཐུན་རིག་པའི་བུ་ལ་སྦྱིན།  ། ཅེས་པ་ནི་དབང་ཆེན་གྱིས་སྦྱར་བས་དགེ་ཞིང་བཀྲ་ཤིས་པར་གྱུར་ཅིག   །སརྦ་མངྒ་ལཾ། །


དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས། 蜀ICP备14009601号-1