གཙོ་ངོས།>> དེང་རབས་མི་སྣ།>>རྩོམ་པ་པོ།

སྒྲོལ་མ་ཚེ་བརྟན། རྩོམ་སྒྲིག་པ།ཚེ་དཔལ། ཡོང་ཁུངས།ངེད་དྲ་བ། སྤེལ་དུས། ༢༠༡༦ལོའི་ཟླ་བ་༠༣ཚེས་༠༨ཉིན།

༄༅།། ཨ་སྨྱོན་བཀྲ་ཤིས་དོན་གྲུབ།

སྲིན་པོ་རྫ་འདབས་ཀྱི་སྒྱུ་རྩལ་འཚོལ་སྙེག་མཁན།——རྩོམ་པ་པོ་ཨ་སྨྱོན་བཀྲ་ཤིས་དོན་གྲུབ་ཀྱི་གནས་ཚུལ་ཆེད་བཀོད། 

2011ལོར་《སྦྲང་ཆར།》སྤེལ་ནས་ལོ་འཁོར་30ལོན་པའི་ཚོགས་འདུའི་སྟེང་གཏམ་བཤད་གནང་བཞིན་པ།

  དེང་གི་དུས་སུ་བོད་ཡུལ་གྱི་གཏམ་རྒྱུད་འཆད་ལ་མཁས་ཤིང་བོད་མིའི་སྣང་བརྙན་སྐྲུན་ལ་འཇོན་པའི་རྩོམ་པ་པོ་ཨ་སྨྱོན་བཀྲ་ཤིས་དོན་གྲུབ་ལགས་ནི་སྤྱི་ལོ་1967ལོར་མདོ་སྨད་ཁྲི་ཀ་རྫོང་གི་ཤར་ཕྱོགས་ཀྱི་གནས་རི་ཆེན་པོ་ཨ་མྱེས་སྲིན་པོ་ཡི་འདབས་རོལ་དུ་སྐྱེས། སློབ་ཆུང་དུ་ཞུགས་རྗེས་སྔ་ཕྱིར་ཉིད་ཀྱི་ཕུ་བོ་བན་དེ་ཚེ་རིང་དང་རྒན་གསང་བདག་སྐྱབས་སོགས་དགེ་རྒན་དུ་བསྟེན་ནས་བོད་ཡིག་དང་རྒྱ་ཡིག  རྩིས་རིག་བཅས་སྦྱོང་མགོ་བརྩམས། 1980ལོར་ཕུལ་བྱུང་རྒྱུགས་འབྲས་ལ་བརྟེན་ནས་མཚོ་ལྷོ་ཁུལ་མི་རིགས་དགེ་ཐོན་སློབ་གྲྭར་ཞུགས་ཐུབ་པ་བྱུང་ལ།རིག་པའི་སྡིངས་ཀ་དེ་རུ་ཕ་ཡུལ་གཅིག་པའི་དགེ་རྒན་བསོད་ནམས་དབང་ལྡན་གྱི་འཛིན་གྲྭར་ཁེལ་ཏེ་དག་ཡིག་དང་སུམ་རྟགས། སྙན་ངག་བཅས་ཁ་ཚང་སྦྱོང་བའི་སྐལ་བ་ལྡན་པར་གྱུར། 1986ལོར་སློབ་མཐར་ཕྱིན་མ་ཐག་སློབ་ཆེན་ལ་རྒྱུགས་སྤྲོད་པའི་གྲས་སུ་ཞུགས་པས་བདེ་བླག་ངང་ནུབ་བྱང་མི་རིགས་སློབ་གླིང་དུ་རྒྱུགས་འཕྲོད་ཅིང་། རྒན་དོར་ཞི་ཚང་སོགས་ཀྱི་ཞབས་ལ་གཏུགས་ནས་ 《 སྙན་ཚིག་རིག་པའི་ཤེས་བྱ་གནད་བསྡུས། 》 དང་།  《 བསླབ་བྱ་གཅེས་བསྡུས། 》 《 ནང་དོན་རིག་པའི་རྨང་གཞིའི་ཤེས་བྱ། 》《 རྩོམ་འཇུག 》 《 བོད་བཙན་པོའི་སྐབས་ཀྱི་ལོ་རྒྱུས། བཅས་བསླབ་བྱ་ཁག་མང་བོར་སྦྱང་བ་བྱས་པའི་དུས་མཚུངས་སུ། དུས་ཚོད་ཅུང་ཙམ་ཡོད་ཚེ་སློབ་གླིང་གི་དཔེ་མཛོད་ཁང་དུ་སོང་ནས་རྒྱལ་ཁབ་ཕྱི་ནང་གི་རྩོམ་རིག་གཞུང་ལུགས་དང་རྩོམ་རིག་བརྩམས་ཆོས་གང་ལེགས་ལ་ལྟོགས་པའི་ཟས་དང་སྐོམ་པའི་ཆུ་འདོད་པ་ལྟར་ལྟ་ཀློག་དང་སློབ་སྦྱོང་མི་དམན་པ་མཛད། 1988ལོ་ནས་མགོ་བརྩམས་ཏེ་ཚོད་ལྟའི་ཚུལ་དུ་སྙན་ངག་ 《 ཀ་རྩོམ་ཁྲུས་ཀྱི་རྫིང་བུ། 》 དང་།  《 རི་བོང་། 》《 ཁྲི་ཀའི་དྲུག་པའི་ལྷ་རྩེད། 》  སྒྲུང་གཏམ་ 《 གཡུལ་བཅག་པའི་གཏམ་རྒྱུད། 》 སོགས་བྲིས་པ་སྔ་གཞུག་ཏུ་ 《 སྦྲང་ཆར། 》 དུས་དེབ་སྟེང་བཀོད་པ་བརྒྱུད་ནས་གསར་རྩོམ་གྱི་ལམ་དུ་དངོས་སུ་ཞུགས།

གྲོང་ཁྱེར་ཟི་ལིང་གི་དྲུག་པའི་གླུ་རོལ་སྐབས་རྩོམ་གྲོགས་འགའ་དང་ལྷན་དུ་འཛོམས་པ།

  བརྩམས་ཆོས་དེ་དག་དུས་དེབ་སྟེང་བཀོད་པའི་ཤུགས་རྐྱེན་ལ་བརྟེན་ནས། 1990ལོར་སློབ་མཐར་ཕྱིན་ཁར་དེ་སྔའི་ 《 སྦྲང་ཆར། 》 གྱི་གཙོ་སྒྲིག་པ་རྒན་འགྱུར་མེད་ལགས་སློབ་གླིང་དུ་ཕེབས་ནས་ཡིག་རྒྱུགས་སྤྲད་དེ་མཚོ་སྔོན་མི་རིགས་དཔེ་སྐྲུན་ཁང་དུ་ལས་ཀར་ཚུད་ཅིང་། མི་ལོ་ཉེར་ལྔའི་རིང་ 《 སྦྲང་ཆར། རྩོམ་སྒྲིག་ཁང་དུ་རྩོམ་སྒྲིག་པའི་བྱ་བ་གཉེར་ཏེ། སྔ་རྗེས་སུ་དུས་དེབ་དེ་གའི་གཙོ་སྒྲིག་གཞོན་པ་དང་རྒྱུན་ལས་གཙོ་སྒྲིག་གཞོན་པ་བཅས་ཀྱི་འགན་འཁུར་བར་དུས་དེབ་རང་ལ་རྒྱལ་ཁབ་དུས་དེབ་བྱ་དགའ་ལས་གཙོ་ཆེའི་དུས་དེབ་སྣ་བརྒྱའི་གྲས་དང་། གསར་འགྱུར་དཔེ་སྐྲུན་སྤྱི་ཁྱབ་ཧྲུའུ་ཡི་ཕན་ཡོན་ཟུང་ལྡན་གྱི་དུས་དེབ། ཀྲུང་གོའི་བྱང་ཕྱོགས་ཕུལ་བྱུང་བཅུའི་དུས་དེབ་བཅས་རྒྱལ་ཁབ་རིམ་པའི་བྱ་དགའ་མང་བོ་ཐོབ་མྱངས། གཞན་དུ་རྩོམ་པ་པོ་ཁོ་ལ་མཚོན་ན་རྩོམ་སྒྲིག་ཁང་གིས་སྔ་ཕྱིར་བསྒྲིགས་པའི་ 《 བོད་ཀྱི་དེང་རབས་དཔེ་ཚོགས། 》( དེབ་10) དང་།  《 སྦྲང་ཆར་ལོ་འཁོར་20དཔེ་ཚོགས། 》 ( དེབ་8 ) 《 དུས་རབས་21པའི་བོད་ཀྱི་རྩོམ་པ་པོའི་དེབ་ཕྲེང་། 》 ( དེབ་30 ) 《 གོང་ས་སྐྱབས་མགོན་པཎ་ཆེན་ཐམས་ཅད་མཁྱེན་པ་སྐུ་ཕྲེང་བཅུ་པ་ཆེན་པོའི་གསུང་འབུམ། 》 ( དེབ་3 ) སོགས་རྩོམ་སྒྲིག་གི་བྱ་བར་ལྷག་བསམ་རྣམ་པར་དག་པའི་སྒོ་ནས་ཞུགས་པར་མ་ཟད། རྩོམ་སྒྲིག་གི་ལས་གནས་སུ་གྲུབ་འབྲས་གཡུར་དུ་ཟ་བ་མང་བོ་བླངས་པར་བརྟེན། 2010ལོར་རྒྱལ་ཡོངས་གསར་འགྱུར་དཔེ་སྐྲུན་ལས་རིགས་ཀྱི་སྣེ་ཁྲིད་མི་སྣ་ཞེས་པའི་གཟེངས་རྟགས་ཐོབ།

དགའ་རྟགས་སྐོར་ཞིག

  གོང་སྨྲས་ལྟར་རྩོམ་པ་པོ་ཁོ་ལ་ 《 སྦྲང་ཆར། 》 རྩོམ་སྒྲིག་ཁང་དུ་ལས་ཀ་གཉེར་བའི་གོ་སྐབས་ཐོབ་པ་ཡིས།རྩོམ་རིག་གསར་རྩོམ་གྱི་ལམ་བུར་ཞུགས་པའི་གོམ་པ་གྲོང་ཁྱེར་ཟི་ལིང་གི་དྲུག་པའི་གླུ་རོལ་སྐབས་རྩོམ་གྲོགས་འགའ་དང་ལྷན་དུ་འཛོམས་པ།ཇེ་བརྟན་དུ་གྱུར་པས་ན། ཕུལ་བྱུང་བརྩམས་ཆོས་སྐོར་ཞིག་ནི་ཆར་ཤུལ་གྱི་ཤ་མོ་བརྡོལ་བ་བཞིན་བོད་ཁུལ་གྱི་དུས་དེབ་དང་ཚགས་པར་སྣ་ཚོགས་སྟེང་མངོན་པར་སྣང་སྟེ། བརྩམས་ཆོས་གཙོ་བོ་ལ་སྒྲུང་གཏམ་ཐད་《 སྤྱང་ཀི ལུག་རྫི་དང་ཁོའི་ཆུང་མ། 》 དང་།  《 གངས་ལྗོངས། རྣམ་ཤེས་ཀྱི་འཇིག་རྟེན། 》 《 ཨ་ཁུ་རྣམ་རྒྱལ་དང་ཁོའི་གནའ་རྒྱའི་ཚེ་ལོ། 》 《 ཨ་མ་དང་ཙིག་མ། 》 སོགས་འདུག དེ་ལས་སྔ་མ་དང་ཕྱི་མ་གཉིས་ལ་སོ་སོར་སྐབས་དང་པོ་དང་སྐབས་བརྒྱད་པའི་སྦྲང་ཆར་རྩོམ་རིག་བྱ་དགའ་ཐོབ་ཅིང་། སྙན་ངག་ལ་ 《 རིག་པའི་བུ་ཆུང་ཡི་མུག་གཏམ་གྱིས་འཆི། 》 དང་།  《 མཚང་བརྟོལ་དྲང་སྲོང་ངག་གི་ཕུར་བུ། 》 《 སྡེ་ཆེན་རྩེ་ར། 》 《 སྲིན་པོ་རྫ་འདབས་ཀྱི་མགྱོགས་བྲིས། 》 བཅས་ཡོད་པ་དང་། ལྷུག་རྩོམ་ནི་《 ལྕགས་ཐབ། 》 དང་།  《 སིལ་སྡོང་། 》 《 མཐའ་མཇུག་གི་ཞལ་མཇལ། 》 སོགས་འདུག་ལ། དཔྱད་རྩོམ་ཐད་ 《 རྩོམ་སྒྲིག་པའི་སྤུས་ཚད་ཇི་ལྟར་མཐོར་འདེགས་གཏོང་བའི་སྐོར་གྱི་བསམ་གཞིག 》 དང་།  《 གེ་སར་སྒྲུང་ལས་སྣང་ངུ་གཡུ་སྟག་གི་དཔའ་བོའི་སྣང་བརྙན་ལེགས་གྲུབ་བྱུང་བའི་རྒྱུ་རྐྱེན་ལ་དཔྱད་པ། 》 བཅས་ཡོད་དོ། ། དེ་དག་ལས་སྒྲུང་གཏམ་ཐད་བླངས་པའི་གྲུབ་འབྲས་ནི་གཟེངས་སུ་ཐོན་ཏེ། 1999ལོར་མཚོ་སྔོན་མི་རིགས་དཔེ་སྐྲུན་ཁང་གིས་རྒྱལ་ཁབ་དབུ་བརྙེས་ནས་ལོ་50འཁོར་བའི་ལེགས་སྐྱེས་སུ་ཨ་སྨྱོན་བཀྲ་ཤིས་དོན་གྲུབ་ཀྱི་སྒྲུང་གཏམ་དེབ་ 《 སྟོན་གྱི་རང་སྒྲ 》 ཞེས་པ་པར་སྐྲུན་འགྲེམ་སྤེལ་བྱས་པར། རྒྱ་ཆེའི་ཀློག་མཁན་མང་པོས་དགའ་བསུ་ཐོབ་པ་བཅས་ལས་གཞན། སྒྲུང་གཏམ་དེབ་འདི་ལ་སྔ་ཕྱིར་སྐབས་བདུན་པའི་རྒྱལ་ཡོངས་གྲངས་ཉུང་མི་རིགས་རྩོམ་རིག་རྟ་མཆོག་བྱ་དགའ་དང་། སྐབས་གཉིས་པའི་རྒྱལ་ཡོངས་གངས་རྒྱན་རྟགས་མ་ཡི་རྩོམ་རིག་གསར་རྩོམ་བྱ་དགའ་སོགས་ཐོབ།


གསར་རྩོམ་གྱི་རྒྱུ་ཆ་འཚོལ་བཞིན་པ།

  བར་སྐབས་དེར་རྩོམ་པ་པོ་ཁོ་ནི་རྒྱ་བོད་ཡིག་བསྒྱུར་གྱི་ལས་ཀའང་མང་པོར་ཞུགས་ཟིན་ཏེ།  《 སྦྲང་ཆར་ལོ་འཁོར་20དཔེ་ཚོགས། 》 ལས་ 《 བསྒྱུར་རྩོམ་མུ་ཏིག་ཕྲེང་མཛེས། 》 དང་། ཨ་ལེ་ཡི་སྒྲུང་རིང་ 《 རྡུལ་འཚུབ་དྭངས་སོང་། 》 ( ཚར་མེད། ) གཉིས་མཉམ་བསྒྱུར་བྱས་པའི་བྱ་བར་ཞུགས་པར་མ་ཟད། པེ་ཅིང་མི་རིགས་དཔེ་སྐྲུན་ཁང་གིས་པར་དུ་སྐྲུན་པའི་ 《 ཀྲུང་གོའི་ན་ཆུང་བྱིས་པའི་ཤེས་བྱ་ཀུན་འདུས། 》 ལས་《 འཚོ་བའི་རྒྱུན་ཤེས། 》 དང་། སི་ཁྲོན་དཔེ་སྐྲུན་ཚོགས་པ་དང་སི་ཁྲོན་རིག་རྩལ་དཔེ་སྐྲུན་ཁང་གཉིས་ཀྱིས་མཉམ་པོར་པར་སྐྲུན་བྱས་པའི་ 《 ཤེས་རབ་འཕེལ་བའི་བསྟན་བཅོས། 》 ཞེས་པའི་དེབ་གཉིས་སྔ་ཕྱིར་བསྒྱུར་པ་དང་། ལྷག་དོན་2011ལོར་མཚོ་སྔོན་མི་རིགས་རྩོམ་རིག་ཡིག་བསྒྱུར་ཚོགས་པ་འཛུགས་དུས།རྩོམ་པ་པོ་ཁོ་ཚོགས་པ་དེའི་ཚོགས་གཙོ་གཞོན་པར་བདམས་ཐོན་བྱུང་ལ། ཕྱི་ལོ་ནས་བཟུང་ཀྲུང་གོའི་རྩོམ་པ་པོ་མཐུན་ཚོགས་ཀྱིས་བསྒྲིགས་ཤིང་། རྩོམ་པོ་པོ་དཔེ་སྐྲུན་ཁང་གིས་པར་དུ་བསྐྲུན་པའི་ 《 ཀྲུང་གོའི་དེང་རབས་རྩོམ་རིག་བརྩམས་ཆོས་གཅེས་བཏུས། 》 2012ལོ་དང་2013ལོ་ཡི་སྒྲུང་གཏམ་དེབ་( སྟོད་ཆ ) དང་། སྙན་ངག་དེབ་གཉིས་ཀྱི་གཙོ་སྒྲིག་པའི་འགན་འཁུར་ནས་ལས་ཀ་དེ་དུས་ལྟར་འགྲུབ་པར་བྱས་ལ། སྒོས་སུ་2014ལོ་ཡི་རྣམ་གྲངས་དེའི་དཔེ་དེབ་ལྔ་པོའི་ཡིག་བསྒྱུར་དང་གཏག་སྒྲིག པར་སྐྲུན་ཡོད་ཚད་མཚོ་སྔོན་ཞིང་ཆེན་རྩོམ་པ་པོ་མཐུན་ཚོགས་ཀྱིས་འགན་གཙང་ལེན་བྱས་པར། བཀྲ་ཤིས་དོན་གྲུབ་ལགས་ནི་དཔེ་ཚོགས་དེའི་ཀྲུའུ་རེན་གཞོན་པར་བསྐོས་ཏེ། སོ་སོའི་དེབ་ཀྱི་གཙོ་སྒྲིག་པ་དག་དང་མཉམ་གཅིག་ཏུ་བྱ་བ་དེ་སྔར་ལས་འཐུས་ཚང་དང་གྲལ་དག་པོར་འགྲུབ་པར་མཛད་ལ། དེབ་དེ་དག་ཁྲོད་ཀྱི་སྒྲུང་འབྲིང་ 《 ལིའུ་ཝན་ཧྥུ་ཡི་གྱོད་དོན། 》 དང་།《 ཐུའུ་ཙི་ཆང་གི་སྒེར་གྱི་སྐྱོ་གདུང་། 》 《 ཐུན་མིན་འདྲི་རྩད། 》 བཅས་ལེགས་པོར་བསྒྱུར་ཐུབ་ཡོད། 


བུ་ཆུང་ལ་བོད་ཡིག་ཟུར་ཁྲིད་བྱེད་བཞིན་པ། 

  2013ལོའི་ལོ་སྨད་དུ། ཨ་སྨྱོན་བཀྲ་ཤིས་དོན་གྲུབ་ནི་མཚོ་སྔོན་ཞིང་ཆེན་རྩོམ་པ་པོ་མཐུན་ཚོགས་ཀྱིས་འོས་སྦྱོར་གནང་བ་ལྟར། པེ་ཅིང་གི་ལུའུ་ཞུན་རྩོམ་རིག་སློབ་གླིང་གི་སྐབས་ཉེར་གཅིག་པའི་གཞོན་དར་རྩོམ་པ་པོ་མཐོ་རིམ་དཔྱད་གླེང་འཛིན་གྲྭར་ཞུགས་ཏེ། རྒྱལ་ཡོངས་ཀྱི་ཞིང་ཆེན་སོ་སོ་ནས་ཕེབས་པའི་རྩོམ་པ་པོ་ཞེ་བརྒྱད་དང་ལྷན་དུ། ཆེད་མཁས་པ་མང་པོས་རྩོམ་རིག་གཙོ་བྱས་བསླབ་བྱ་སྣ་ཚོགས་ཀྱི་འཆད་ཁྲིད་མཛད་པར་ཞིབ་ཏུ་ཉན་ཏེ། རང་ངོས་ཀྱི་ལྟ་རྒྱ་ཐོས་རྒྱ་ཇེ་ཆེར་གཏོང་བའི་ཐད་འབད་པ་ལྷུར་ལེན་བྱས། དུས་མཚུངས་སུ་ཁོས་སློབ་གླིང་དེ་རུ་རྩོམ་འཕྲོར་ལུས་པའི་སྒྲུང་འབྲིང་ 《 བློ་མང་དོན་གྲུབ། 》 ཅེས་པ་མཇུག་གྲུབ་པར་མཛད་ཐོག དཔྱད་རྩོམ་ 《 བོད་ཀྱི་སྒྲུང་གཏམ་གསར་རྩོམ་གྱི་གནས་བབ་དང་དེའི་ཆུ་ཚད་མཐོར་འདེགས་གཏོང་བའི་ཐབས་ལམ་སྐོར་གླེང་བ། 》 ཞེས་པའང་རྫོགས་པར་བྱས་ནས། ཀྲུང་དབྱང་མི་རིགས་སློབ་གླིང་དུ་འཆད་ཁྲིད་གནང་བར་སློབ་བུ་མང་པོས་དགའ་བསུ་ཐོབ། གཞན་དུ་ལོ་མཇུག་དེར་མཚོ་སྔོན་ཞིང་ཆེན་རྩོམ་པ་པོ་མཐུན་ཚོགས་ཀྱིས་སྐབས་བདུན་པའི་རྩོམ་པ་པོའི་འཐུས་མི་ཚོགས་ཆེན་བསྡུས་པར། ཁོ་རང་གསར་དུ་མཐུན་ཚོགས་དེའི་ཀྲུའུ་ཞི་གཞོན་པར་བདམས་ཐོན་བྱུང་ལ། ལོ་འདི་དག་རིང་དེ་གའི་འབྲེལ་ཡོད་མགོ་ཁྲི་དང་ལས་བྱེད་མི་སྣ་ཚོར་མཉམ་འབྲེལ་གྱིས་ཚོགས་མི་བསྡུ་བ་དང་། སློབ་སྦྱོང་ལ་མངགས་གཏོང་བྱེད་པ། འབྲེལ་ཡོད་རྣམ་གྲངས་བརྩོན་ལེན་བཅས་ཀྱི་ལས་ཀ་སྐོར་ཞིག་བསྒྲུབས་དང་སྒྲུབ་བཞིན་མཆིས།

  2015ལོའི་ཟླ་6པར། ཀྲུང་གོའི་བོད་རིག་པ་དཔེ་སྐྲུན་ཁང་གིས་ཁོའི་སྒྲུང་འབྲིང་དེབ་ 《 བློ་མང་དོན་གྲུབ། 》 ཅེས་པ་པར་སྐྲུན་འགྲེམ་སྤེལ་བྱས་པར། ཞིང་ཆེན་ཕྱི་ནང་གི་རྒྱ་ཆེའི་ཀློག་པ་པོ་དང་ཆེད་མཁས་པ་ཚོས་གདེང་འཇོག་མཐོན་པོ་གནང་བཞིན་པ་ནི་རྩོམ་པ་པོར་མཚོན་ན་རྟིང་སྐུལ་ལམ་སྒུལ་ཤུགས་སུ་གྱུར་འདུག་སྟེ། ལོ་འདི་གཉིས་ནང་ཡིག་འབྲུ་ཁྲི་ཉེར་དྲུག་གི་བདག་ཉིད་ཅན་གྱི་སྒྲུང་རིང་ཐོག་མའང་ལོ་དེའི་ཟླ་9པའི་ནང་བརྩམས་གྲུབ་བྱུང་ཟིན་པར་སྐད་དེ། ད་ལྟ་ཡང་དང་བསྐྱར་དུ་བཟོ་བཅོས་བྱེད་པའི་སྒང་ཡིན་པ་ལགས་ན། ང་ཚོས་སྲིན་པོ་རྫ་འདབས་ཀྱི་སྒྱུ་རྩལ་འཚོལ་སྙེག་མཁན་མཆོག་གི་སྒྲུང་རིང་དེ་སྔ་མོ་ནས་མཇལ་ཐུབ་པར་རེ་སྨོན་བྱེད་བཞིན་པ་བཅས་སོ། 

                                 2016ལོའི《གངས་ལྗོངས་ཉི་གཞོན།》དེབ་གཉིས་པ་ལས་བཤུས། 

                                   ཨ་སྨྱོན་བཀྲ་ཤིས་དོན་གྲུབ་ཀྱིས་པར་མཁོ་འདོན་བྱས།


39.7K

ཐག་རག་ཡིག་བསྒྱུར་མ་ལག

དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས།蜀ICP备14009601号-1