༄༅། །ཨོཾ་སྭ་སྟི་སིངྡྷཾ། རྒྱལ་ཀུན་ཡེ་ཤེས་སྤྱི་འདུས་མཚན་དཔེའི་སྐུ། །རིག་གསུམ་པདྨའི་རྣམ་འཕྲུལ་མཚོ་སྐྱེས་རྗེའི། །ཐུགས་ཀྱི་ཐུ་བོ་དགྲ་ལྷའི་དཔུང་དང་བཅས། །སྐྱེ་མཆོག་སེང་ཆེན་རྒྱལ་པོའི་ཤིས་པར་སྩོལ། །གང་གི་ཐུགས་བསྐྱེད་ཀུན་གསལ་ཡངས་པོ་རུ། །ཚད་མེད་ཐུགས་རྗེའི་ཆུ་འཛིན་རབ་འཁྲིགས་ཏེ། །བསྟན་དགྲ་བྱད་མའི་ཚོགས་རྣམས་མངོན་སྤྱོད་ཀྱི། །ཕྲིན་ལས་དྲག་པོའི་རྩལ་གྱིས་གཞོམས་པར་མཛད། །རྫུལ་འཕྲུལ་ཐབས་དང་ཐུགས་རྗེའི་དབྱེར་མེད་ངང་། །དཔའ་བོའི་འཁོར་གསུམ་སྐུ་ལ་ཡོངས་རྫོགས་པའི། །ནག་ཕྱོགས་བདུད་སྡེ་དཔུང་བཅས་ཟིལ་གནོན་གྱི། །དཔའ་ཐུལ་དགྲ་ལྷ་ཝེར་མའི་འཁོར་གྱིས་བསྐོར། །གང་སྐུ་ཡེ་ཤེས་སྒྱུ་མའི་རྣམ་རོལ་ལས། །ཐུགས་རྗེའི་སྤྱན་ཟུང་ཉི་ཟླའི་སྣང་བ་ཡིས། །མཁྱེན་བརྩེའི་འཛུམ་ཞལ་མཛེས་པའི་གཟི་མདངས་བཅས། །མཚན་དཔེའི་ཡེ་ཤེས་ཕུང་པོ་ལྷམ་མེར་གསལ། །ལྷོ་ཕྱོགས་འཛམ་གླིང་འཛིན་མའི་ཁྱོན་འདིར་ཡང་། །འཇིགས་རུང་ཕྱོགས་ཀྱི་བདུད་བཞིའི་བཙེས་པ་ཡིས། །མི་མཐུན་འགལ་རྐྱེན་ཉེ་འཚེ་ཀུན་ཞི་ནས། །བདེ་ལེགས་ཕུན་ཚོགས་དབྱར་གྱི་མཚོ་ལྟར་རྒྱས། །ཀུན་རྫོབ་སྒྱུ་མའི་གཟུགས་སྣང་ཇི་སྙེད་ཀུན། །ཡེ་ནས་རང་བཞིན་དག་པ་རབ་འབྱམས་སུ། །རྣམ་པར་སྣང་མཛད་དཀྱིལ་འཁོར་འཁོར་ལོ་རུ། །སྐུ་དང་ཡེ་ཤེས་སྣང་བ་འབྱམས་སུ་ཀླས། །འཁོར་འདས་བདེ་སྡུག་ ཚོར་སྣང་མ་ལུས་ཀུན། །དོན་ལ་སྐྱེ་མེད་རང་བཞིན་ཤེས་ནས་སུ། །རིན་ཆེན་འབྱུང་ལྡན་རྒྱལ་བ་རྒྱ་མཚོའི་ཚོགས། །རྣམ་དག་རང་སྣང་ཞིང་གི་བཀོད་པར་མཛེས། །ཡུལ་སྣང་ཡིད་དཔྱོད་བརྟག་པའི་འདུ་ཤེས་ཀུན། །གཅིག་འཕྲོར་གཅིག་གིས་རྩ་བ་ཆོད་ནས་སུ། །ངེས་དོན་སྣང་བ་མཐའ་ཡས་ངོ་བོ་རུ། །མངོན་སུམ་རིག་པར་བདེ་ཆེན་ཞིང་སྣང་འཆར། །གཟུང་འཛིན་ལས་ཀྱི་སྣང་བའི་འདུ་བྱེད་ཀྱི། །ཀུན་རྟོག་གཉེན་པོ་སྟོང་དང་རྟེན་འབྱུང་གིས། །སྣང་བའི་ཆོས་ཀུན་དོན་ཡོད་གྲུབ་པའི་ཞིང་། །གདོད་ནས་དག་པའི་རང་བཞིན་རྫོགས་པར་གྱུར། །ཀུན་བྱེད་རྒྱལ་པོའི་རྣམ་ཤེས་མཚང་འདོན་ཏེ། །ཀུན་ཉོན་སྲིད་པའི་ས་བོན་དྲུང་འབྱིན་ནས། །རང་བྱུང་རིག་པའི་སྣང་བ་རང་རྩལ་གྱིས། །བཅོམ་ལྡན་མི་སྐྱོད་རིགས་ཀྱི་བདག་པོ་གྱུར། །མ་བཅོས་སྤྲོས་བྲལ་ཆོས་དབྱིངས་ཡེ་ཤེས་ལས། །སྒྲིབ་བྲལ་མཁྱེན་བརྩེ་མེ་ལོང་ཡེ་ཤེས་སུ། །ཆོས་ཀུན་མ་འདྲེས་སོར་རྟོག་ཡེ་ཤེས་ཀྱི། །སྣོད་བཅུད་དག་པར་མཉམ་ཉིད་ཡེ་ཤེས་འཆར། །ཚོགས་གཉིས་ཡོངས་རྫོགས་བསོད་ནམས་དམ་པའི་སྐྱེས། །སྐུ་གསུམ་ལྷུན་གྲུབ་མཚན་དཔེའི་དཔལ་འབར་བའི། །སྣང་སྲིད་ཡེ་ནས་དག་པའི་དཀྱིལ་འཁོར་དུ། །བྱ་གྲུབ་ཡེ་ཤེས་དོན་གཉིས་ལྷུན་གྱིས་གྲུབ་། །ཀུན་རྟོགས་མ་རིག་བློ་བུར་འཁྲུལ་པའི་གཟུགས། །འབྱུང་པོ་གདོན་བགེགས་བདུད་ཀྱི་སྣང་བ་ཀུན། །བག་ཆགས་སེམས་སུ་རྫུས་པ་ཤེས་ནས་སུ། །སེམས་ཉིད་གདོད་ནས་སྐྱེ་མེད་དབྱིངས་སུ་ཞི། །སྡུག་ཀུན་འཁོར་བའི་ཆོས་སུ་སྣང་བ་ཀུན། །རང་སྣང་སྐུ་དང་ཡེ་ཤེས་དབྱེར་མེད་ཀྱི། །དགྲ་ལྷའི་ཟོ་དོར་ཝེར་མའི་དཔུང་དང་བཅས། །སྣ་ཚོགས་སྤྲུལ་དང་མཚན་དཔེའི་གཟུགས་སྐུ་བཞེངས། ། རབ་འབྱམས་རྒྱལ་བ་དགྱེས་པའི་ཐུགས་རྗེའི་གཟུགས། །སྐུ་གསུམ་ལྷུན་གྲུབ་ཡེ་ཤེས་ལྔ་ལྡན་གྱི། །དཔའ་བོའིའཁོར་གསུམ་སྐུ་ལ་རྫོགས་གྱུར་ཏེ། །སྤྲུལ་པས་འགྲོ་དོན་མཛད་ལ་གུས་ཕྱག་འཚལ། །
