༄༅།། བཀྲ་བྷ།

མི་གསལ། རྩོམ་སྒྲིག་པ།ཚེ་དཔལ།ཡོང་ཁུངས། མཚོ་སྔོན་པོ་དྲ་བ། སྤེལ་དུས། 04-22


  བཀྲ་བྷ། འབུམ་རམས་པ། 1963ལོར་མཚོ་སྔོན་མཚོ་ལྷོ་རུ་སྐྱེས། ད་སྐབས་ཀྲུང་དབྱང་མི་རིགས་སློབ་གྲྭ་ཆེན་མོའི་བོད་རིག་པ་ཞིབ་འཇུག་གླིང་གི་གླིང་གཙོ་གཞོན་པ་དང་། དགེ་རྒན་ཆེན་མོ་གཞོན་པ། བོད་ཀྱི་དེང་རབས་རྩོམ་རིག་ཕྱོགས་ཀྱི་ཤེས་རམས་པའི་མཛུབ་སྟོན་དགེ་རྒན་བཅས་ཡིན། ཁོང་གིས་དུས་ཡུན་རིང་པོར་རྩོམ་རིག་གསར་རྩོམ་དང་རིག་གཞུང་ཞིབ་འཇུག་གི་ལས་ཀ་གཉེར་ཏེ། སྔ་ཕྱིར་སྒྲུང་གཏམ་དང་སྙན་ངག ལྷུག་རྩོམ། རིག་གཞུང་དཔྱད་རྩོམ་སོགས་བརྩམས་ཆོས་བརྒྱ་ལྷག་སྤེལ་བ་དང་། རྩོམ་རིག་བརྩམས་ཆོས《སྒྲོལ་མ་ཉེར་གཅིག》དང་། 《སྲིན་པོ་གཡུ་རྔོག་དང་ཉི་མ་ལྷ་ས།》《འཚུབ་མ་ཁེར་རྐྱང་།》བསླབ་དེབ་《རྩོམ་པ་ལ་འཇུག་པའི་སྒོ།》《གསར་འགྱུར་རྩོམ་པ་ལ་འཇུག་པའི་སྒོ།》རིག་གཞུང་ཞིབ་འཇུག་གི་འབྲས་རྟགས་《བོན་གྱི་ལྷ་རབས་ལ་དཔྱད་པ།》《ཁྲི་འདུས་སྲོང་གི་མགུར་གླུར་དཔྱད་པ།》རྣམས་པར་སྐྲུན་འགྲེམ་སྤེལ་བྱས་ཡོད་ཅིང་། ཁོང་གི་སྒྲུང་གཏམ《ར་བྷ་འདྲེ་མིག་དང་རིན་ཆེན་རྐྱལ་ཁ།》《སྲིན་པོ་གཡུ་རྔོག་དང་ཉི་མ་ལྷ་ས།》《ནས།》《འཚུབ་མ་ཁེར་རྐྱང་།》བཅས་ལ་སྔ་ཕྱིར་མཚོ་སྔོན་ཞིང་ཆེན་གྱི་སྐབས་དང་པོའི་ན་གཞོན་རྩོམ་རིག་བྱ་དགའ་དང་། སྐབས་གསུམ་པའི་སྦྲང་ཆར་རྩོམ་རིག་བྱ་དགའ། སྐབས་བདུན་པའི་སྦྲང་ཆར་རྩོམ་རིག་བྱ་དགའ་སྐབས་བཅུ་བའི་རྒྱལ་ཡོངས་གྲངས་ཉུང་མི་རིགས་རྩོམ་རིག་གསར་རྩོམ་ཐད་ཀྱི་རྟ་མཆོག་བྱ་དགའ་བཅས་ཐོབ། གཞན་ཁོང་ལ་པེ་ཅིན་གྲོང་ཁྱེར་གྱི་ཕུལ་བྱུང་དགེ་རྒན་གྱི་མཚན་སྙན་དང་། པའོ་ཀང་ཕུལ་བྱུང་དགེ་རྒན་གྱི་ཁྱད་འཕགས་བྱ་དགའི་མིང་འདོན་བྱ་དགའ་སོགས་ཀྱང་ཐོབ་བོ། །


དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས། 蜀ICP备14009601号-1