༄༅།། ཁུ་ཀྱུ་དཔོན་ཚང་གི་ཤུལ།

ཉན་ཤུལ་འཇམ་དབྱངས་གྲགས་པ། རྩོམ་སྒྲིག་པ།དབང་ཆེན། ཡོང་ཁུངས། ཁམས་པའི་དྲ་བ། སྤེལ་དུས། 07-07


        ཁུ་ཀྱུ་དཔོན་ནི། ཤའུ་གཤིས་པའི་སྨད་ཕྱོགས་ཀྱི་དཔོན་ཚང་ཡིན། སྔོན་ཁུ་ཀྱུ་དཔོན་བསྟན་པ་ཞེས་པར་སྲིང་མོ་བདུན་ཡོད་པ་སྐབས་དེའི་དུད་ཁྱིམ་ཆེ་བ་མང་པོར་མནའ་མ་སོང་བ། དཔེར་ན་རྟའུ་མ་བུ་བ་དང་། དར་མདོའི་ཞབས་པ་ཨ་ཀྱ་ཚང་། སོག་རག་གི་དཔོན་ཚང་སོག་བཟའ་ཚང་། དཔལ་སྨད་ཀྱི་དཔོན་ཚང་། རྨུ་འཛི་གཤིས་པ། ས་ལྕམ་དུ་འགྲོ་ང་ཁང་རྒན་ཚང་། ཚ་ཉག་སྟོད་པའི་གཉེར་པ་ཚང་སོགས་ལ་ཕྱིན་པའི་རིགས་རྒྱུད་ཆེས་མང་ཞིང་། ཁྱད་པར་དུ་བླ་སྤྲུལ་མང་དུ་བྱུང་བ་མགར་ཐར་སྐུ་བཅར་བློ་བཟང་རབ་རྒྱས། ར་ཤལ་སྤྲུལ་སྐུ་ཉི་ཟླ་སྙིང་པོ། ར་ཤལ་སྤྲུལ་སྐུ་པདྨ་འགྱུར་མེད། ཉན་ཤུལ་རྒྱལ་ཁོ། ཉན་ཤུལ་རྒྱལ་དབང་ཉི་མ། དཔལ་རི་སྤྲུལ་སྐུ་ཉན་ཤུལ་མཁྱེན་རབ་འོད་གསལ། བྲག་ཡབ་སྐྱབས་མགོན། མི་ཉག་འགི་བ་ཁ་བའི་སྤྲུལ་སྐུ་ཆོས་ཀྱི་རྒྱལ་མཚན། ད་ལྟ་ཀ་བཞི་དགོན་གྱི་གྲྭ་པ་མི་ཉག་ཞི་བདེ་དགོན་ཆེན་གྱི་མཁན་པོ་ཡིད་བཞིན་འཇིགས་མེད། སྤྲུལ་སྐུ་བློ་བཟང་རྒྱལ་མཚན་སོགས་མང་དུ་བྱུང་བ་དང་། དེའི་མི་རྒྱུད་རྣམས་མགར་ཐར་དང་། རྟའུ། ལྷ་ས། རྒྱ་གར། རོའུ་ཧྲུ། ས་ལྕམ། དཔལ་སྨད། དཔལ་ཡུལ་གྲོང་མགོ  སོག་རག  ཀོ་རོ་མ། ཚ་ཉག་བ། ཤ་འུ་གཤིས་སོགས་གར་སར་ཁྱབ་ཡོད་ཅིང་། ཁྱིམ་ཤུལ་དངོས་ནི། ཁུ་ཀྱུ་པུག་པུག་གི་བུ་ཚེ་དབང་མགོན་པོ་སོགས་ད་ལྟ་ཀོ་རོ་མའི་ཤོག་ཁར་ཡོད་དོ། །ཁང་ཤུལ་ནི། ལུང་པ་འདིའི་མདའ་ལ་ཆུ་མདའ་ཞེས་ཆུ་གསུམ་གྱི་འདུས་མདོའི་ཕར་ཁའི་རི་འདབས་དེ་ཡིན་ཞིང་། ད་ལྟ་དེ་ན། སྤྱི་ལོ་1970སྐོར་ལ་ཚ་ཉག་རྒྱ་ཚོགས་ཚང་ཞེས་པའི་གནས་བཅས་ཏེ། འདྲ་བ་ཚེ་དབང་བསྟན་འཛིན་ཚང་དང་། དེ་ལས་མཆེད་པའི་ཁྱིམ་ཚང་འགའ་གནས་སོ། །ཁྱིམ་ཚང་དེ་ར་ཤལ་སྤྲུལ་སྐུ་སྐུ་ཕྲེང་གསུམ་པ་གར་དབང་དོན་གྲུབ་ཅེས་པའི་འཁྲུངས་ཁང་ཡིན་ནོ། །
           ༼ ཉན་ཤུལ་འཇམ་དབྱངས་གྲགས་པའི་གསུང་རྩོམ་ལས་དྲངས། ༽


དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས། 蜀ICP备14009601号-1