གཙོ་ངོས།>> དེང་རབས་མི་སྣ།>>མཁས་པའི་དབང་པོ།

མི་གསལ། རྩོམ་སྒྲིག་པ། དབང་ཆེན།ཡོང་ཁུངས།ངེད་དྲ་བ། སྤེལ་དུས། ༢༠༡༤ལོའི་ཟླ་བ་༠༦ཚེས་༢༦ཉིན།

དཔའ་རིས་སངས་རྒྱས།

    དགེ་རྒན་ཆེན་མོ་དཔལ་རིས་སངས་རྒྱས་ལགས་ནི། 1931ལོར་མདོ་སྨད་དཔའ་རིས་སུ་འཁྲུངས།1951ལོར་ནུབ་བྱང་མི་རིགས་སློབ་གྲྭ་ཆེན་མོར་སློབ་གཉེར་དུ་ཕྱིན་ནས་བོད་རྒྱ་མི་རིགས་གཉིས་ཀྱི་རིག་གནས་ལ་སྦྱངས་འབྲས་ཕུལ་དུ་བྱུང་བ་བླངས།1954ལོར་སློབ་མཐར་ཕྱིན་ཏེ་གནས་དེར་ལས་གནས་ལ་ཞུགས།1955ལོར་ཀན་ལྷོ་མི་རིགས་སློབ་འབྲིང་འཛུགས་རྒྱུའི་གྲ་སྒྲིག་ལས་དོན་དུ་ཞུགས་པ་དང་།བསླབ་དེབ་སྒྲིག་ཚན་གྱི་འགན་ཁུར་དང་དུ་བླངས་ཤིང་།བྲེལ་ཚེགས་ཆེ་བའི་སློབ་ཁྲིད་ཀྱི་ཞོར་དུ་སློབ་གྲྭའི་བོད་ཡིག་བསླབ་དེབ་དྲུག་དང་།གཞན་སློབ་ཆུང་གིས་བསླབ་དེབ་བཅུ་ཐམ་པ་བསྒྲིགས།1978ལོར་ཁོང་ཉིད་སླར་ནུབ་བྱང་མི་རིགས་སློབ་གྲྭ་ཆེན་མོར་གདན་དྲངས།སྔ་ཕྱིར་བོད་ཡིག་སྡེ་ཚན་གྱི་དགེ་རྒན་དང་ཞིབ་འཇུག་སློབ་མའི་མཛུབ་སྟོན་དགེ་རྒན་གྱི་འགན་བཞེས་པ་སོགས་རྟག་ཏུ་ཆེ་གྲགས་སྙན་གསུམ་གྱི་བགྱི་བ་བོར་ཏེ།མཁས་པའི་བྱ་བ་རྣམ་གསུམ་མི་ཚེའི་མཆོག་ཏུ་བཟུང་ནས་མི་རིགས་ཀྱི་རིག་གནས་ལ་ཕན་ངེས་སུ་གྱུར་པའི་ལྗགས་རྩོམ་རྒྱལ་ཡོངས་མི་རིགས་སློབ་གྲྭ་ཆེན་མོ་སོགས་ཀྱི་བསླབ་གཞི་རུ་གྱུར་པའི《བརྡ་སྤྲོད་གསལ་བྱེད་ངག་སྒྲོན》དང་《སྡེབ་སྦྱོར་རིག་པའི་སྲོལ་འབྱེད།》《བོད་ཡིག་འབྲི་ཚུལ་མཐོང་བ་ཀུན་སྨོན》《དག་ཡིག་རིག་པའི་གབ་པ་མངོན་ཕྱུང》《དཔེ་ཆོས་རྣ་བའི་བདུད་རྩི》《དཔེ་ཆོས་ཚིག་མཛོད་》སོགས་དང་།དཔྱད་རྩོམ་གྱི་སྐོར་ལ《སྐད་ཆ་དང་ཡི་གེ་ནི་རིག་གནས་ཀྱི་གཏེར་མཛོད་ཆེ་ཤོས་ཡིན》ཞེས་པ་དང་།《བྱ་བའི་མིང་གི་རིགས་གསུམ་གྱི་དབྱེ་བ་དང་འབྲེལ་བའི་ངེས་སྲོལ་རྣམ་པར་བཤད་པ།》《བོད་ཡིག་གི་བྱུང་རབས་དང་རྩོད་གཞིའི་མཐའ་དཔྱད་པ》《བོད་ཀྱི་སྒྱུ་རྩལ་རྩོམ་པའི་ཁོག་འབུབས》《ཐབས་ཤེས་ཟུང་འཇུག་གི་བསླབ་དེབ》《མངོན་བརྗོད་ཀྱི་བྱུང་རབས་དང་ཕན་ཡོན》《ངག་གི་སྒྱུ་རྩལ་བང་མཛོད་གེ་སར་སྒྲུང་ཟུར་ཙམ་གླེང་བ》《བོད་འགྱུར་དུ་བྱ་བའི་མིང་གི་སྦྱོར་བ་ཉོག་ཚུལ་དག་པར་བྱ་བར་རེམ་རེམ》ཞེས་པ་སོགས།དེ་བཞིན་བསྒྱུར་རྩོམ་ལ《ཚན་རིག་རྒྱུན་ཤེས་མ》གཞན་《དཔའ་རིས་རབ་གསལ་གྱི་གསུང་འབུམ》དང་།《བླ་མ་དཀར་པོའི་རྣམ་ཐར》གླིང་སྒྲུང་《ལྷ་གླིང་》སོགས་ཞུས་དག་གུང་བསྒྲིགས་གནང་བ་དང་།ལྷག་པར་དུ1984ལོ་དང1986ལོ་ལ་སྔ་རྗེས་སུ་ཀན་སུའུ་མི་རིགས་པར་སྐྲུན་ཁང་ནས་བསྐྲུན་པའི་གླིང་རྗེ་གེ་སར་སྐྱེས་བུ་ཆེན་མོའི་རྣམ་ཐར་བསྟོད་སྒྲུང་《གྲུ་གུ་གོ་རྫོང》མི་འདྲ་བ་དུ་མའི་ནང་ནས་རྙིང་ཤོས་དང་ལེགས་ཤོག དེབ་ཆེན་སྟོད་སྨད་བཞིས་གྲུབ་པ་ཁྱོན་ཤོག་ངོས1799ཅན་དེ་དག་སྒྲིག་ལེགས་བཅོས་གནང་བ་ནི།དཔའ་བོ་གླིང་གི་རྣམ་སྒྲུང་སྲུང་སྐྱོབ་ལེགས་སྐྲུན་གྱི་མིག་དཔེ་ལྟ་བུ་བཟོས་འདུག་པ་སོགས་བྱས་རྗེས་དང་གཟི་བརྗིད་ཀྱི་མི་ཚེ་ཡོངས་སུ་འཁྱོངས་བཞིན་ད་ལྟ་ཡང་སྐུ་འཚོ་ཞིང་བཞུགས་པ་ལགས་སོ།།

39.7K

རྩོམ་ཡིག་སྔོན་མ།
རྩོམ་ཡིག་རྗེས་མ།
དཔལ་ལྡན་ཉི་མ།

ཐག་རག་ཡིག་བསྒྱུར་མ་ལག

དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས།蜀ICP备14009601号-1