༄༅།།འཆི་མེད་དབང་མོ།

གངས་དབང་བཀྲ་ཤིས། རྩོམ་སྒྲིག་པ། འོད་ཟེར།ཡོང་ཁུངས།ངེད་དྲ་བ། སྤེལ་དུས། 06-29


སློབ་ལ་བརྩོན་ཞིང་ལས་ལ་འཇོན་པའི་བོད་པའི་བུ་མོ་ཞིག

    1995ལོར་ཁོ་བོ་དགེ་འོས་ཆེད་སྦྱོང་སློབ་གྲྭ་ནས་མཐར་ཕྱིན་ཏེ་མི་ཉག་ར་རྔ་ཁའི་བོད་ཡིག་སློབ་འབྲིང་དུ་གློ་སྙིང་མཆིན་གསུམ་ནས་མོས་པའི་དགེ་རྒན་གྱི་ལས་དོན་རླབས་ཆེ་བ་དེ་ཕྲག་ཐོག་ཏུ་བླངས། སྐབས་དེ་དུས་བོད་ཡིག་སློབ་གྲྭར་སློབ་མ་སུམ་བརྒྱ་ལྷག་ཙམ་དང་དགེ་རྒན་སུམ་ཅུ་ཙམ་ལས་མེད་ནའང་སློབ་མ་ཚོ་ནི་ཤེས་པར་འདོད་ཅིང་རྒན་ལ་བཀུར་བ་དང་དགེ་རྒན་རྣམས་ནི་སློབ་བུར་གཅེས་ཤིང་ལས་ལ་བརྩོན་པ་ཁོ་ན་ཡིན། དགེ་རྒན་ཞིག་གི་རྣ་བར་ཆེས་སྙན་ཞིང་འཇེབས་པ་ནི་སློབ་མ་རྣམས་ཀྱི་དཔེ་ཀློག་གི་སྒྲ་དབྱངས་ཡིན་ལ་མིག་ལམ་དུ་ཆེས་མཛེས་པ་ནི་བག་དང་ལྡན་པའི་སྤྱོད་ལམ་རེད། དེ་དུས་ཕ་ཡུལ་མི་ཉག་ལྕགས་གད་ནས་ཡིན་པའི་འཆི་མེད་དབང་མོ་ནི་དམའ་འབྲིང་སྐབས་གོ་བདུན་པའི་སློབ་མ་ཞིག་ཡིན་ལ་ཆུང་དུས་ནས་བསླབ་ལ་དད་པའི་བག་ཆགས་སད་ནས་ཡོད་ལ་ལུས་སེམས་གཉིས་ལ་རང་རྟོན་ཡིད་ཆེས་ཀྱི་ཁྲག་རྒྱུན་བཞུར་ནས་ཡོད་པས་བརྩོན་འགྲུས་ཅན་གྱི་སློབ་གྲོགས་གཞན་དག་དང་འདྲ་བར་དཔེ་ཆ་ལུས་དང་མ་བྲལ། སེམས་པ་དཔེ་ཆ་དང་མ་བྲལ་བར་དགེ་རྒན་རྣམ་པའི་ལེགས་ཉེས་རྣམ་པར་འབྱེད་པའི་བདུད་རྩི་འཐུང་བཞིན་སློབ་གྲོགས་རྣམས་ཀྱི་ཉི་སྤྲིན་རླུང་གསུམ་ལྟ་བུའི་མཛའ་བཤེས་མྱོང་གིན་དུ་བོད་པའི་བུ་མོ་ཆུང་ཆུང་ཞིག་མཐོ་སྒང་དུ་སྐྱེས་པའི་ཐང་ཤིང་ལྟར་རྩ་བ་རྒྱས་ཤིང་ཡལ་ག་འཁྲུངས་འགོ་བརྩམས། ཉིན་ལྟར་སྐྱ་མདའ་གསལ་ལ་མི་གསལ་བའི་ཁྲོད་དུ་སློབ་གྲྭའི་ར་བའི་ཟུར་ཞིག་ཏུ་ཙོག་པུར་བསྡད་དེ་དཔེ་ཆ་ལྟ་ཀློག་བྱེད་མཁན་ནི་ཁོ་ཡིན་ལ་ཕྱི་དྲོར་མི་ཉག་གླིང་ཆུའི་འགྲམ་ངོགས་སུ་ཉམ་དུངས་དུངས་ཀྱིས་སློབ་ཚན་བློར་འཛིན་བྱེད་མཁན་ཡང་མོ་ཡིན། ཁྱད་པར་དུ་ང་ཚོས་དྲན་ཐུབ་ལ་ཁོ་མོས་ཀྱང་བརྗེད་མི་སྲིད་པ་ནི་གྲང་ངར་ཤིན་ཏུ་ཆེ་བའི་དགུན་ཁར་མོ་ཡིས་ཕྱུ་པ་ཐབས་ཆགས་ཙམ་ཞིག་ལུས་ལ་གྱོན་ཏེ་སློབ་ཁང་དུ་སློབ་ཁྲིད་ལ་ཉན་བཞིན་ལག་པ་ཆུང་ཆུང་བཀྱགས་ཐེངས་མང་པོས་དགེ་རྒན་རྣམས་ལ་བཀའ་འདྲི་དང་དོགས་འདྲི་ཡང་ཡང་ཞུས་པ་ནི་བསམ་གཞིག་ཅན་གྱི་སློབ་མ་ཞིག་གིས་རང་ཚུགས་རང་རྟོན་གྱིས་རིག་པ་དོན་དུ་གཉེར་བའི་ལེའུ་ཞིག་ལགས། དེ་ལྟར་སློབ་ཆུང་གི་དགེ་རྒན་རྣམ་པའི་དྲིན་ལས་རྨང་གཞི་ཅུང་བརྟན་པའི་ཐོག་ལ་སློབ་འབྲིང་གི་དགེ་རྒན་རྣམས་ཀྱིས་བུམ་པ་གང་བྱོལ་གྱིས་གསོ་སྐྱོང་གནང་བར་བརྟེན་ཁོ་མོས་སྦྱངས་འབྲས་དགའ་འོས་པ་བླངས་ཏེ་དེ་སྔོན་གྱི་དར་མདོ་དགེ་འོས་སློབ་གྲྭར་རྒྱུགས་འཕྲོད། འཆི་མེད་དབང་མོ་ལ་མཚོན་ན་ཁོ་རང་དར་མདོ་དགེ་འོས་སློབ་གྲྭར་ཞུགས་ཐུབ་པ་ནི་གསེར་མིག་ཉ་མོ་ཆུ་ལ་འཕྲད་པ་དང་ཐང་དཀར་རྒོད་པོ་གནམ་ལ་འཕུར་བ་ལྟ་བུའི་གོ་སྐབས་བཟང་པོ་ཞིག་སྟེ། དཀྱེལ་ཡངས་ཞི་ལྷོད་ཀྱི་ཁོར་ཡུག་དེ་རུ་ལྟོ་གོས་ཐབས་ཆགས་ཙམ་ལས་མེད་ནའང་བརྩོན་འགྲུས་ཀྱི་སེམས་མ་ཞུམ། དད་བཀུར་གྱི་རྒྱུན་མ་ལྷོད་དེ་བོད་རྒྱ་ཡི་གནའ་དེང་མཁས་དབང་རྣམ་པའི་ཞལ་གདམས་གསེར་ཞུན་ཐིགས་པས་རང་སེམས་གཙང་མར་འཁྲུད་ཀྱིན་འཆད་འབྲི་ཀློག་གསུམ་གྱི་སྦྱངས་བརྡར་མུ་ནས་མུ་རུ་བསྲིངས་པས་མེ་ཏོག་ལྟ་བུའི་བོད་པའི་བུ་མོ་ཞིག་གངས་ཆུ་སྒེག་མོའི་འགྲམ་དུ་ལྷུག་པར་བཞད། །
སྤྱོད་པ་བཟང་ལ་ཡོན་ཏན་ལྡན་པའི་བོད་པའི་མཛངས་མ་ཞིག
   ཤེས་རིག་གི་རྩ་བ་རྒྱས་ལ་མི་ཆོས་ཀྱི་མཁའ་དབུགས་གཙང་བའི་དགེ་འོས་སློབ་གྲྭར་མི་གཞི་ལ་གསེར་མདངས་བྱུག་ཅིང་སྨྲ་བརྗོད་ཀྱི་འཇོན་ཐང་རྒྱས་བཞིན་དུ་2000ལོར་སློབ་གྲྭ་དེ་ལས་མཐར་ཕྱིན་ཏེ་རང་གི་དགའ་ཁ་འཁྱེར་ཕྱོགས་དང་མོས་མཐུན་བློར་འབབ་ལྟར་དར་མདོ་རྫོང་རྒྱང་སྒྲོག་བརྙན་འཕྲིན་ཅུས་ནང་རྒྱང་སྒྲོག་པ་ལ་རྒྱུགས་འཕྲོད་པས་དུས་དེ་ནི་མི་ཚེའི་འགྲོ་ལམ་གྱི་ལམ་འགོ་ཐོག་མར་རྙེད་པའི་སྐལ་བཟང་ཚེས་བཟང་ཞིག་ཡིན་ཐག་ཆོད་རེད། རྩ་བ་ཟབ་ན་རྩེ་མོ་རིང་། ཡལ་ག་སྦོམ་ན་ལོ་མ་རྒྱས་ཞེས་པ་ལྟར་བོད་མིའི་ལྷན་སྐྱེས་ཀྱི་རང་གཤིས་བཟང་ལ་བོད་རྒྱ་ཡིག་རིགས་གཉིས་ཀྱི་གྱེར་འདོན་དང་འཆད་འབྲི་ལ་ཅུང་བྱང་ཆ་ལྡན་པས་རྒྱང་སྒྲོག་བྱེད་རྒྱུ་དང་གསར་འགྱུར་འགོད་རྒྱུ་བཅས་ལ་དཀའ་ངལ་མེད་མོད། འོན་ཀྱང་མོ་ནི་གར་སྟེགས་དེ་ཙམ་གྱིས་ཡིད་མི་ཚིམ་ལ་ཤེས་རིག་ཕྲན་བུས་ཆོག་ཤེས་མ་སྐྱེས་ཏེ་ལས་ཞོར་དུ་རྒྱ་ཡིག་ཆེད་ལས་ཀྱི་དངོས་སྦྱོང་ཚན་ཁག་གི་ཡོན་ཚད་བླངས་པ་མ་ཟད་ལས་གྲོགས་རྒན་པ་རྣམས་དགེ་རྒན་དུ་བསྟེན་ལ་ཆེད་ལས་ཀྱི་རིག་གཞུང་བསམ་པའི་རྒྱགས་ཕྱེ་རུ་བསྒོམ་ཞིང་བོད་རྒྱ་ཚིག་མཛོད་གཉིས་གྲོགས་པོར་བསྒྲིགས་ཏེ་ཡིག་འབྲུ་རེ་རེ་ཡི་སྒྲ་གདངས་ཀྱི་དག་གསལ་དང་ལྕི་ཡང་། རྗོད་བྱེད་ཀྱི་སྡེབ་སྒྲིག་དང་འགྱུར་ཁུག བརྗོད་བྱའི་ཉམས་འགྱུར་སོགས་ལ་གྲི་སོ་རྡོ་ལ་བརྡར་བ་བཞིན་དུ་ཡང་ནས་བསྐྱར་དུ་སྦྱངས་བརྡར་བྱས་པས་ཁོ་ཡིས་རྒྱང་སྒྲོག་དང་མདོ་འཛིན་བྱེད་པ་ལ་དག་གསལ་སྙན་གསུམ་གྱི་ཁྱད་ཆོས་འབུར་འགོ་བརྩམས། ཁོ་མོས་བརྙན་འཕྲིན་ཐོག་ནས་རྒྱང་སྒྲོག་བྱེད་ཀྱང་རུང་། རིག་རྩལ་འཁྲབ་སྟོན་དང་གཉེན་སྟོན་རྟེན་འབྲེལ་གྱི་གར་སྟེགས་ཐོག་མདོ་འཛིན་བྱེད་ནའང་འདྲ། ལུས་ཀྱི་ཆ་ལུགས་དང་ངག་གི་རྗོད་སྟངས། གདངས་ཀྱི་འགྱུར་ཁུག་སོགས་གང་ཅིའི་ཐད་དུའང་གཞན་གྱིས་ཚབ་བྱེད་མི་ཐུབ་པའི་བོད་མི་རང་མཚན་པའི་བག་ལྷོད་དང་བདེན་པ། བརྩེ་ཞེན་ཡོད་པས་རི་ཡི་ཚད་ཀྱི་རི་དྭགས་ཞེས་པ་ལྟར་མོ་ནི་དར་མདོ་ས་ཁུལ་ལ་མིང་གྲགས་ཅུང་ཡོད་པའི་བོད་པའི་མཛངས་མ་ཞིག་ཏུ་ཆགས། །
སྐད་ལ་བྱང་ཞིང་ཡིག་ལ་མཁས་པའི་བོད་པའི་མདོ་འཛིན་པ་ཞིག
   གསར་འགྱུར་ལས་རིགས་དང་ལོ་ཙཱ་བའི་བྱ་བ། མདོ་འཛིན་པའི་ལས་ཀ་ནི་ཆེད་ལས་རང་བཞིན་ཤིན་ཏུ་ཆེ་བ་ཞིག་ཡིན་པ་ལས་སྐད་བཤད་ཤེས་པ་ཙམ་དང་ཡི་གེ་ཀློག་ཐུབ་པ་ཙམ་གྱིས་ལས་དོན་དེ་དག་འཁྱོལ་དཀའ། འཆི་མེད་དབང་མོས་གནད་དེ་ལ་དམིགས་ནས་རང་གིས་གོ་སྐབས་གཏོད་ཅིང་བཙལ་ནས་2009ལོར་ཞིང་ཆེན་ཡོངས་ཀྱི་རྒྱང་སྒྲོག་བརྙན་འཕྲིན་ལེ་ཚན་གྱི་མདོ་འཛིན་པ་གསོ་སྦྱོང་འཛིན་གྲྭར་ཞུགས་ནས་བརྙན་འཕྲིན་ལེ་ཚན་གྱི་བཅར་འདྲི་བྱེད་སྟངས་དང་སྒྲིག་སྦྱོར་བྱེད་ཚུལ། མདོ་འཛིན་བྱེད་ཐབས་བཅས་ཕྱོགས་ཡོངས་ནས་ཟབ་སྦྱོང་བྱས་པས་མར་ཐོག་ལ་ཚིལ་སྣོན་པ་ལྟར་ཡར་རྒྱས་ཆེན་པོ་ཡོང་ཚོད་འདུག ལོ་དེར་གོང་རིམ་ནས་ཁམས་པའི་བོད་སྐད་བརྙན་འཕྲིན་འཛུགས་པའི་ཆོག་མཆན་གནང་བ་དང་འཆི་མེད་དབང་མོ་ལའང་གཉེན་ཉེ་རིགས་དང་རོགས་གྲོགས་པོ་རྣམས་ཀྱི་རྒྱབ་སྐྱོར་ཐོབ་ནས་བདེ་བླག་ངང་རྒྱུགས་འཕྲོད། དེ་ནས་མདོ་དབུས་ཁམས་གསུམ་གྱི་ཡུལ་མི་སྤུན་ཟླ་རྣམས་ཀྱི་རྣ་ལམ་དུ་ཞི་འཇམ་ཆུ་བོ་ལྷུང་ལྷུང་དུ་བཞུར་བ་ལྟ་བུའི་ཁམས་སྐད་ཀྱིས་རི་བོ་མཐོན་པོའི་ཕྱི་ནང་གི་གནས་ཚུལ་གསལ་པོར་བཤད་པ་ཐོས་ཤིང་མིག་ལམ་དུ་བག་ཆགས་ཉམས་དང་ལྡན་པའི་ཁམས་པའི་བུ་མོ་ཞིག་གི་སྣང་བརྙན་ཤར་བས་ཕ་ཡུལ་གྱི་བྱིས་པ་རྣམས་ཀྱིས་ཨ་ཅེ་འཆི་མེད་དབང་མོ་ཞེས་ཁ་ནས་མ་ཎི་འདོན་འདོན་བྱས་ལ་ཕྱི་རོལ་གྱི་རྒན་གཞོན་ཀུན་གྱིས་ཁམས་སྐད་ལ་རྒྱུས་ལོན་བྱེད་འགོ་བརྩམས། ཁྱད་པར་དུ་2010ལོའི་རྒྱལ་ཡོངས་ཀྱི་ཚོགས་ཆེན་གཉིས་ཀྱི་དུས་སུ་མོ་ཡིས་རྒྱལ་ས་པེ་ཅིན་ནས་བོད་སྐད་ཀྱི་ཐོག་ནས་བོད་པའི་འཐུས་མི་དང་ཨུ་ཡོན་རྣམས་ལ་བཅར་འདྲི་བྱས་ཏེ་ཏང་དང་རྒྱལ་ཁབ་ཀྱི་ཆ་འཕྲིན་ཞིང་འབྲོག་ཡོངས་ལ་གསལ་སྒྲོག་བྱས་པས་སྤུན་ཟླ་རྣམས་ཀྱིས་ཏང་གི་སྲིད་ཇུས་ངོ་མ་གསལ་པོར་ཤེས་པས་བརྗོད་མི་ཤེས་པའི་སྤྲོ་སྣང་སྟེར། 2010ལོར་ཀྲུང་དབྱང་བརྙན་འཕྲིན་ཁང་གིས་གཙོ་སྒྲུབ་བྱེད་པའི《བརྩེ་སེམས་ཡུལ་ཤུལ་ལ་བཅངས》ཞེས་པའི་ལེ་ཚན་དུ་མདོ་འཛིན་པ་གྲགས་ཅན་ཀྲུའུ་ཅུན་དང་ཀྲོའུ་ཐའོ་སོགས་དང་མཉམ་དུ་བོད་རྒྱ་སྐད་རིགས་གཉིས་ཀྱི་ཐོག་ནས་མདོ་འཛིན་བྱེད་པས་ཀུན་གྱིས་ཆེས་དོ་སྣང་བྱ་ཡུལ་དུ་གྱུར། 2012ལོར་ཀྲུང་དབྱང་འཐབ་ཕྱོགས་གཅིག་གྱུར་པུའུ་ཡིས་རྩ་འཛུགས་བྱས་པའི་བོད་ཀྱི་ལོ་སར་འཚམས་འདྲིའི་འཁྲབ་སྟོན་ཚོགས་པ་བལ་པོའི་རྒྱལ་ས་ཀ་ན་ཏ་ཀ་ལ་འགྲོ་དུས་འཆི་མེད་དབང་མོ་ཡང་མདོ་འཛིན་དང་བཅར་འདྲི་བྱེད་པར་སོང་། ལྟད་མོ་ལ་ཕེབས་པའི་བོད་རིགས་ཨ་མ་ལགས་ཤིག་གིས་མོ་ཡི་ལག་པ་ལ་འཇུས་ནས་ཁྱེད་ཡོང་བ་ཡིན་ནམ། དཀའ་ཨེ་བྱུང་ཞེས་འཚམས་འདྲི་ཞུས། དེ་ཡིས་འཆི་མེད་དབང་མོ་ལ་སེམས་འགུལ་ཆེན་པོ་ཐེབས་ཏེ་ཡུལ་དུ་ལོག་པ་ནས་བཟུང་དུས་ནམ་ཡང་ཨ་མ་རྒན་མོ་དེ་བརྗེད་རྒྱུ་མེད་པས་རྒྱ་ཆེ་བའི་ལྟད་མོ་བ་རྣམས་ནི་རང་གི་གཉེན་ཉེ་བར་བསྒོམས་ཏེ་དེ་དག་གིས་ལྟ་འདོད་ལ་ཉན་མོས་པའི་བརྙན་འཕྲིན་ལེ་ཚན་ལ་འབད་པ་བྱས། ལོ་རེ་རེ་ཡི་བོད་ཀྱི་ལོ་སར་དགོང་ཚོགས་དེ་བོད་མིའི་མཛེས་དཔྱོད་ལྟ་བ་དང་དང་མཐུན་ལ་རིག་གནས་བསམ་བློ་དང་འཕྲོད་པའི་ཆེད་དུ་ཉིན་ཞག་མང་པོར་དཔེ་ཀློག་ཡང་ཡང་དང་བཀའ་འདྲི་ལན་མང་བྱས་ཏེ་ལྟད་མོ་བ་རྣམས་ལ་ལོ་སར་གྱི་ལེགས་སྐྱེས་གང་ཡག་ཡག་ཕུལ་བ་རེད། སྐབས་རེ་རེའི་བོད་རྒྱའི་གཏམ་བཤད་འགྲན་སྡུར་ནང་ལ་རང་དཔེ་གཞན་སྟོན་གྱིས་སློབ་མ་རྣམས་ལ་བོད་རྒྱ་ཡིག་རིགས་གཉིས་སློབ་སྦྱོང་བྱེད་ཐབས་བསླབས་ཏེ་མེས་རྒྱལ་དགའ་ཞེན་དང་མི་རིགས་ལ་ཤ་ཞེན་ཡོད་དགོས་པའི་སྐུལ་འདེད་བཏང་བས་སློབ་མ་ཀུན་གྱི་བློས་ཐུབ་ཀྱི་གྲོགས་པོར་གྱུར།
   བརྙན་འཕྲིན་གྱི་མདོ་འཛིན་པ་ནི་རིམ་བཞིན་མིང་གྲགས་ཡོད་པར་གྱུར་ཏེ་ས་ཆ་གང་དུ་འགྲོ་ན་ངོ་ཤེས་མཁན་མང་ལ་ཡུལ་ལུང་གང་དུ་བསྡད་ནའང་ཧ་གོ་མཁན་འབེལ་བས་མདོ་འཛིན་པ་མང་པོ་ཞིག་བྱ་སྤུ་རླུང་གིས་བཀྱགས་པ་ལྟར་རྐང་འོག་གི་འགྲོ་ལམ་ཡང་མི་མཐོང་བའི་ང་རྒྱལ་ཁེངས་དྲེགས་སྐྱེས་སྲིད་མོད། མོ་ནི་དེ་ལས་ལྡོག་སྟེ་རང་ཉིད་ངོ་ཤེས་མཁན་དེ་ལས་མང་ན་ཕྲག་ཐོག་གི་འགན་ལྕི་སྔར་ལས་ལྗིད་པ་ཚོར་ཞིང་མིང་གྲགས་ཇེ་ཆེར་འགྲོ་བ་དང་བསྟུན་ནས་ཉེན་ཁའི་འདུ་ཤེས་ཀྱང་དེ་བས་ཆེན་པོར་བསྐྱེད་དེ་མདོ་འཛིན་པ་ཞིག་ལ་མེད་དུ་མི་རུང་བའི་སྤྱི་ཚོགས་ཀྱི་འགན་ཁུར་བའི་འདུ་ཤེས་དང་ཆབ་སྲིད་བསམ་བློའི་ཆུ་ཚད། མི་སྒེར་གྱི་མི་གཞི་དང་རང་གཤིས། སེམས་ཁམས་བཅས་ལུས་ངག་ཡིད་གསུམ་གྱི་ཐོག་ནས་ཤིན་སྦྱངས་ཡང་ཡང་བྱས་པར་བརྟེན་སི་ཁྲོན་བརྙན་འཕྲིན་ཁང་གི་རྒྱ་སྐད་འཕྲིན་ལམ་དུའང་ཁོ་ཡིས་རྒྱང་སྒྲོག་བྱས་དང་བྱེད་བཞིན་ཡོད། ཁམས་པའི་བོད་སྐད་བརྙན་འཕྲིན་བཙུགས་ནས་ཡུན་མི་རིང་བར་གོང་རིམ་དབུ་ཁྲིད་རྣམས་ཀྱིས《འཆི་མེད་ཀྱི་གླེང་མོལ》ཞེས་པའི་ལེ་ཚན་གསར་པ་ཞིག་མོ་ཡི་སྐལ་བ་ལ་བརྫངས། ལེ་ཚན་དེ་ནི་རིག་གནས་པ་དང་སྒྱུ་རྩལ་པ། འགོ་ཁྲིད་དང་དཔེ་བཟང་མི་སྣ་རྣམས་ལ་གཏིང་ཟབ་མོས་བཅར་འདྲི་དང་གླེང་མོལ་བྱས་ཏེ་བོད་ཀྱི་དམངས་ཁྲོད་རིག་གནས་དང་ཏང་གི་མི་རིགས་སྲིད་ཇུས། དུས་རབས་གསར་པའི་སྙིང་སྟོབས་ཆེན་པོ། འབངས་མི་སེར་གྱི་བྱ་བ་སྤྱོད་བཟང་སོགས་བརྙན་འཕྲིན་གྱི་ལམ་ནས་བརྒྱུད་སྒྲོག་བྱེད་དགོས་པའི་ལེ་ཚན་ཞིག་ཡིན་པས་《འཆི་མེད་ཀྱི་གླེང་མོལ》ནི་ལྟ་མོས་ལ་ཉན་འདོད་པའི་ལེ་ཚན་ཞིག་ཏུ་ཆགས། མོ་ཡིས་བརྙན་འཕྲིན་ལས་དོན་པ་ཞིག་ལ་མཚོན་ན་ཆེས་དགའ་བའི་འབྲས་བུ་ནི་མཇལ་འཕྲད་ཀྱི་སྐལ་བ་ལྡན་པའི་མི་དང་རང་ཉིད་ཀྱིས་ཉམས་སུ་མྱོང་བའི་དོན་དག་རྣམས་ལས་ཐོབ་པའི་བརྩེ་བ་དྲོན་མོ་དང་སེམས་འགུལ་ཆེན་པོ་ཡིན་ལ་བོད་མི་ཡོད་པའི་གཞི་རིམ་ལ་སོང་ནས་མིག་གིས་ནན་གྱིས་བལྟས་ཤིང་རྣ་བས་ཞིབ་ཀྱིས་ཉན་ལ་སེམས་ཀྱིས་མྱོང་ཚོར་བྱས་པའི་ཉམས་མྱོང་ནི་ཆེས་མཆོག་ཏུ་གྱུར་བའི་རྒྱུ་ནོར་ཡིན་ཞེས་བཤད་པ་ལྟར་མཐོང་ཐོས་མང་ལ་བསམ་པ་ཡོད་པའི་བརྙན་འཕྲིན་པ་ཞིག་གིས་ལྟད་མོ་བ་རྣམས་ལ་དྲོད་ལྷང་ལྷང་གི་ཚོར་ཤེས་ཤིག་མི་སྟེར་ཅི་ལ་སྲིད།  
འབྲས་རྟགས་དེ་དང་དེ་ལ་སོགས་པ་ལ་དམིགས་ནས་2013ལོའི་ཟླ་བ་10པར་འཆི་མེད་དབང་མོ་ལ་སྐབས་བརྒྱད་པའི་རྒྱལ་ཡོངས་ཀྱི་སྤྱོད་ཡོན་གཉིས་ལེགས་ཀྱི་བརྙན་འཕྲིན་སྒྱུ་རྩལ་ལས་སྒྲུབ་པའི་གཟེངས་རྟགས་ཐོབ། མོ་ཡིས་བྱ་དགའ་གནང་བའི་ཚོགས་ཐོག་ཏུ་དེ་རིང་ང་ལ་བྱ་དགའ་འདི་ཐོབ་པ་ནི་དངོས་གནས་གཟི་བརྗིད་ལྡན་པ་ཞིག་རེད། ངས་དེ་ནི་གོང་རིམ་གྱི་རྟིང་སྐུལ་དང་ལྟད་མོ་བ་རྣམས་ཀྱི་རེ་སྒུག་ལ་བསྒྱུར་ནས་དུས་ནམ་ཡང་བོད་རྒྱ་ཡིག་རིགས་གཉིས་ཀྱི་བརྙན་འཕྲིན་གྱི་ལམ་དུ་རྐང་གཉིས་ལ་བརྟེན་ནས་འགྲོ་སྐྱོད་བྱས་ཏེ་དེ་ལས་མང་བའི་ལྟད་མོ་བ་རྣམས་ལ་སྲི་ཞུ་བསྒྲུབ་རྒྱུ་ཡིན་ཞེས་བཤད། གཟེངས་རྟགས་དེ་ནི་ཁོ་མོའི་མི་ཚེའི་ལམ་ཐོག་གི་བཞི་ཤད་མིན་པར་ཡོད་ཚད་ཀྱི་འགོ་གཞི་ནས་ཚུགས་པའི་དབུ་ཁྱུད་བསླུ་བྲིད་ལྡན་པ་ཞིག་ལགས་པས་ཁྱེད་ཀྱིས་བུ་མོའི་དུས་ཀྱི་བརྩོན་སེམས་མ་ལྷོད། མཛངས་མའི་སྐབས་ཀྱི་མཐུན་སེམས་མ་འདོར་བར་གཤོག་ཟུང་ལ་འཕུར་ཤུགས་ལྡན་པའི་བྱ་རྒོད་ཀྱི་སྙིང་སྟོབས་སེམས་སུ་བཅངས་ནས་མདོ་འཛིན་པའི་ལམ་དུ་མིག་རྒྱང་རིང་པོ་དང་རྐང་ཟུང་བརྟན་པོ། སེམས་རྒྱ་ཆེན་པོ་དང་དྲན་ཤེས་ཟབ་མོས་མུ་མཐུད་ནས་མདུན་དུ་སྐྱོད་དགོས།། །།  




རྩོམ་ཡིག་སྔོན་མ།
༄༅།།བྱམས་པ་རྡོ་རྗེ།
རྩོམ་ཡིག་རྗེས་མ།
༄༅།།འབྲུག་མོ་རྒྱལ།

དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས། 蜀ICP备14009601号-1