སྐུ་སྲས་བདེ་ལེགས་ནི་ཡུན་ནན་ཞིང་ཆེན་བདེ་ཆེན་ཁུལ་དུ་འཚར་ལོངས་བྱུང་ཞིང་། པེ་ཅིན་དེང་རབས་རོལ་དབྱངས་སློབ་གླིང་གི་རོལ་མོའི་ཟློས་གར་འཁྲབ་སྟོན་གྱི་ཆེད་སྦྱོང་འཛིན་གྲྭ་ནས་སློབ་མཐར་ཕྱིན་པའི་བོད་ཀྱི་ན་གཞོན་རེ་བ་ཅན་ཞིག་ཡིན། ད་ལྟའི་བར་དུ་གློག་བརྙན་དང་བརྙན་འཕྲིན་ཟློས་གར་བརྩམས་ཆོས། རྒྱལ་ཁབ་ཕྱི་ནང་གི་རོལ་མོའི་ཟློས་གར་བརྩམས་ཆོས་དུ་མར་འཁྲབ་ཞུགས་བྱས། དེ་ཡང་རྒྱལ་ནང་དང་བོད་ཀྱི་དུས་དར་གྱོན་གོས་སོགས་ཀྱི་སྨྲ་ཚབ་པ་བྱས་ཤིང་། ལྷག་པར་དུ་ལོ་འདི་འགར་ཁོང་གིས་བོད་ཀྱི་དམངས་ཁྲོད་གླུ་གཞས་ལ་བརྩེ་བ་ཟོལ་མེད་བཅངས་ནས་སྲོལ་རྒྱུན་གྱི་དྲི་མ་མ་ཡལ་བའི་བརྩམས་ཆོས་དུ་མ་དཔྱོད་ལྡན་དག་གི་རྣ་བའི་བཅུད་དང་མིག་གི་དགའ་སྟོན་དུ་བཤམས།
ཁོ་རང་བོད་ཁུལ་རོང་འབྲོག་གི་བྱིས་པ་དཀྱུས་མ་དག་དང་འདྲ་བར་ཆུང་བྱིས་དུས་ནས་སུག་བཞི་ནོར་གྱི་རྗེས་སུ་དེད་ཅིང་། ཨ་ཕྱི་དང་མཉམ་དུ་གནས་པའི་ལོ་ཟླ་ནི་ཁོ་རང་བྱིས་དུས་ཀྱི་ཕྱི་དྲན་ཡག་ཤོས་སུ་བརྩི་བཞིན་འདུག བོད་ཁུལ་རོང་འབྲོག་ས་ཆ་གང་ལ་མཚོན་ན་དེ་ལ་ཐུན་མོང་མ་ཡིན་པའི་དམངས་སྲོལ་སྒྱུ་རྩལ་ཡོད་ལ། ལྷག་པར་དུ་རོང་མ་འབྲོག་གི་ས་ཆར་བྲོ་གར་གྱི་དམངས་སྲོལ་རྒྱུགས་ཆེ། ཁོ་རང་དེ་ལྟ་བུའི་ཁོར་ཡུག་ཁྲོད་གླུ་དང་བྲོ་གར་གྱི་བག་ཆགས་ཟབ་མོ་བཞག་ཅིང་། བྱིས་དུས་ཉམས་སུ་མྱོང་བའི་གླུ་གར་གྱི་འགྱུར་བག་དེ་དག་ད་ལྟ་ཁོ་བོའི་ལམ་གྱི་བྲོ་དང་སེམས་ཀྱི་རྟེན་དུ་གྲུབ་འདུག་ལ། འཁྲབ་སྟོན་དང་སྒྱུ་རྩལ་གྱི་ལམ་བུའི་ཁྲོད། ནམ་ཡང་འདི་དང་བྲལ་མ་མྱོང་ལ་འབྲལ་ཡང་མི་ཐུབ་ཞེས་ཁོ་བོས་ཡང་ཡང་བཤད།
ད་ལྟ་ཁོ་བོས་ལོ་རེའི་ནང་དུས་ཚོད་ངེས་ཅན་བེད་སྤྱད་ནས་དམངས་ཁྲོད་དུ་བག་ལ་ཉལ་བའི་གླུ་གར་རིག་གནས་འཚོལ་སྡུད་དང་། ལྷག་པར་ད་ལྟ་ཉམ་དམས་སུ་འགྲོ་བཞིན་པའི་གླུ་གར་རིག་གནས་མྱུར་སྐྱོབ་ཀྱི་ལས་ལ་འཇུག་བཞིན་ཡོད་ལ། ཁོ་བོས་བཤད་ན་འདི་ནི་མི་རིགས་ལ་བཅངས་པའི་སེམས་པ་ཡིན། འདི་ནི་སྒྱུ་རྩལ་ལ་བཅངས་པའི་སེམས་པ་ཡིན། ལྷག་པར་འདི་ནི་ཉམས་ཀྱི་ཕྱུག་པའི་དམངས་ཁྲོད་གླུ་གར་ལ་བཅངས་པའི་བརྩེ་བ་ཡིན་ཞེས་ཡང་ཡང་བཤད། །
