བརྔོད་པ་ལན་གཅིག་མེད་པའི་མི་ཡུལ་ཞིག།
མི་སེམས་སྐད་ཅིག་མ་ཡི་འགྱུར་ལྡོག་ཅིག།
དེ་རིང་གཉེན་ཉེའི་གུད་དུ་འཁུ་ན་ཡང་།།
སང་ཉིན་གྱེས་བྲལ་སོང་སྟེ་མིག་ཆུ་དཀུ།།
སྔ་དྲོ་བདེ་སྐྱིད་ཁྲོད་དུ་ལུས་ན་ཡང་།།
ཕྱི་དྲོ་ལྕགས་ཀྱུས་ཟིན་པའི་རོ་རྐྱང་ཞིག།
ད་ལྟ་ནོར་གྱིས་གཏམས་པའི་ཕྱུག་པོ་ཡང་།།
ལ་གོར་ཡུད་ཙམ་མི་འགོར་སྤྲང་པོ་ཞིག།
ཚེ་སྟོད་རང་སྲོག་གཅོད་པའི་དགྲ་བོ་ཞིག།
ཚེ་སྨད་སྲེལ་བར་བྱེད་པའི་དགའ་མར་གྱུར།།
དང་ཐོག་གནམ་ལ་འཕུར་བའི་གྲུབ་པ་ཡང་།།
ཐ་མར་ཕྲུ་གུ་མང་པོའི་ཕ་ཡང་འགྱུར།།
འཇིག་རྟེན་སྒྱུ་མའི་གྲོང་གི་རང་མཚན་པ།།
སྔ་མར་ཡོད་ཀྱང་ཕྱི་མར་ངེས་གཏན་མེད།།
རྨི་ལམ་ཐང་གི་ཁོ་བོའི་རྐམ་པའི་ལུས།།
ཡིད་ཀྱིས་བརྫིས་པའི་ལོངས་སྤྱོད་རྐྱང་རྐྱང་རེད།།
ཚེ་འདི་མི་རྟག་རྒྱུ་སྐར་རྒྱལ་པོ་བཞིན།།
ཡུན་ཞིག་མི་འགོར་ཕ་གིར་ཡིབ་ཅིང་བྱིང་།།
གྲོགས་ནི་མི་རྟག་དེང་གི་འཚོ་བ་བཞིན།།
རེ་ཞིག་འགྲིག་ཀྱང་དུས་ནང་རིམ་གྱིས་འཐོར།།
བཙན་པོ་ཐོག་ལྟར་རྒོད་ན་མི་རྟག་པ།།
ཕྱུག་པོ་ཀླུ་ལྟར་ཡོད་ན་མི་རྟག་པ།།
མི་རྟག་མི་རྟག་དངོས་པོ་རང་མཚན་པ།།
ཀ་ཅ་རྨི་ལམ་ལྟ་བུ་རྟག་བརྟན་ཅི།།
