༄༅།།མདོ་སྨད་བུ་ལོའི་སེམས་ན་མངའ་རིས་བུ་མོ་ཞིག

​ཅོ་བྱང་སྐར། ཁྲེན་ཏུའུ། རྩོམ་སྒྲིག་པ།ཚེ་དཔལ། ཡོང་ཁུངས།གངས་ལྗོངས་ཉི་གཞོན་དྲ་བ། སྤེལ་དུས། 01-09



ཅོ་བྱང་སྐར། ཁྲེན་ཏུའུ།

གནམ་སྔོན་པོའི་ཁ་མདོག་དྭངས་ས། །
ས་དོག་མོའི་ཁ་ཞེང་ཆེ་ས། །
གངས་ལྷུན་པོའི་རྩེ་མོ་མཐོ་ས། །
བྲག་དམར་ཡག་རྔམ་བརྗིད་ལྡན་ས། །
སྤང་རི་བོའི་མདངས་ཉམས་མཛེས་ས། །
ཆུ་ལྷུང་ལྷུང་བཞུར་སྒྲ་སྙན་ས། །
རྩྭ་རྩི་ཤིང་ཡར་བསྐྱེད་མགྱོགས་ས། །
ནོར་གཡང་གི་འཕེལ་ཁ་དར་ས། །
གཞོན་རྗེས་རབས་སྐུ་བསོད་ཆེ་ས། །
བུ་ང་ཚོའི་ཕ་ས་ཕ་ཡུལ། །
ས་མདོ་སྨད་ཨ་མདོའི་ཕྱོགས་ཀྱི། །
ཤར་ཅོ་ནེ་རྒྱལ་པོའི་རྒྱལ་རྒྱུད། །
ས་དེ་ནས་ཡར་ལ་སོང་ན། །
སྡེ་ཆེན་པོ་ཉིན་པ་ཞེས་པ། །
བུ་ང་ཡི་སྐྱེས་ས་སྐྱེས་ཡུལ། །
བཀྲ་ཤིས་པའི་ལྷ་དར་མོད་ས། །
ཆོས་ལྷ་སྡེའི་ཆོས་མཁར་ཆེན་མོ། །
རྩེ་པོ་ཏ་ལ་ཡི་གཞིས་མལ། །
དབུས་ལྷ་ལྡན་ཆོས་ཀྱི་གླིང་ནས། །
ཤར་གོམ་ཕྲག་བརྒྱ་ལྷག་སོང་ན། །
གནས་ཆེན་པོ་ཆབ་མདོ་ཞེས་པ། །
གན་འཕྲེད་བསྟར་རི་བོའི་འགྲམ་ངོགས། །
འདི་གཙང་གསུམ་ཆུ་བོའི་ཉེ་འགྲམ། །
བོད་ཤར་ཕྱོགས་མུ་ཏིག་མཚན་ཅན། །
གནས་དེ་ནས་འཚར་ལོངས་བྱུང་པའི། །
སྨན་བུ་མོ་རིན་ཆེན་ཆོས་མཚོ། །
གན་སྔོན་བསགས་ལས་ཀྱིས་བསྐོས་པའི། །
ལས་ཟེར་བ་ལྡོག་ཐབས་མེད་པས། །
བུ་ང་དང་རིན་ཆེན་ཆོས་མཚོ། །
རིག་སློབ་གླིང་གཅིག་ནས་འཛོམས་ཐལ། །
ཕར་འཁོར་ནས་ཚིག་གསུམ་དྲིས་པས། །
ཚུར་ལྷད་མེད་འཛུམས་མདངས་གྲོལ་བྱུང་། །
བུ་ང་ཚོ་སྐད་ཅིག་མ་དེར། །
ལས་ཅི་བྱེད་དྲན་ཁོམ་མ་བྱུང་། །
དུས་ཉིན་དང་ཟླ་བ་འགོར་སོང་། །
སྨན་བུ་མོ་ཇེ་ཡག་ཇེ་ཡག །
བུ་ཕོ་རྒོད་ཇེ་མང་ཇེ་མང་། །
ད་ཅི་བྱེད་གང་བྱེད་མི་ཤེས། །
གྲོགས་བྱེད་འདོད་སེམས་ན་ཡོད་རུང་། །
ཁ་སྨྲ་ལྕེ་འགུལ་རྒྱུ་སྐྲག་གི །
ཁ་སྨྲ་ལྕེ་འགུལ་རྒྱུ་སྔ་ན། །
སྨན་བུ་མོས་འདང་རྒྱག་ཟེར་གི །
ཁ་སྨྲ་ལྕེ་འགུལ་རྒྱུ་ཕྱི་ན། །
གན་རྗེས་ན་ཕོ་སྐྱེས་མང་གི །
ད་གང་དྲན་ཅི་དྲན་མེད་པར། །
ལོ་བཞི་ཡི་འཁོར་མོ་ཟད་ཐལ། །
མོ་མངའ་རིས་ཡུལ་དུ་འཕུར་ཐལ། །
ང་ཨ་མདོ་ཡུལ་ན་ལུས་སོང་། །
ལོ་བཞི་ཡི་འཁོར་མོ་བསམ་ན། །
ཞེ་དྲག་པོའི་འགྱོད་པ་འཁོར་མོད། །
མོ་སྔར་བཞིན་མཛངས་མ་དེ་རེད། །
ང་སྔར་བཞིན་བུ་ལོ་དེ་ཡིན། །
སྐྱིད་སྡུག་གི་འཁོར་བ་ཟེར་བ། །
མཉམ་གཅིག་ཏུ་རོལ་དབང་མེད་མོད། །
སེམས་བསམ་པའི་ཟབ་ས་ཞིག་ན། །
མོ་གན་ཚོ་གསལ་ལེ་ཡོད་གི །
ཚེ་གཅིག་གི་མཐུན་རོགས་མིན་རུང་། །
མོ་གན་ཚོ་བརྗེད་པ་མི་འདུག །
ལག་དམ་པོ་འཇུས་ནས་འགྲོ་བ། །
བུ་ང་ཚོའི་ལག་པ་མིན་རུང་། །
མོ་གན་ཚོ་ཡིད་ནས་བོར་མེད། །
སྟོད་མངའ་རིས་ཡུལ་གྱི་བུ་མོ། །
སྨད་ཨ་མདོའི་ཕྱོགས་ཀྱི་བུ་ལོ། །
སྨན་གན་ཚོ་མཐོང་ཐེངས་རེ་ལ། །
ངའི་བློ་སྙིང་སྟེང་འོག་བརྗེས་སོང །
སྨན་གན་ཚོ་སེམས་ལ་ཤར་ན། །
དགོང་རྨི་ལམ་སྐྱིད་པོ་འབྱུང་གི །
སྨན་གན་ཚོ་དྲན་ཤེས་ངོས་ལ། །
ནམ་ཡིན་རུང་གསལ་ལེར་འཆར་ཡོད། །
ངའི་གློ་སྙིང་དོན་ལྔ་སྣོད་དྲུག །
སྨན་གན་ཚོའི་འཕུར་ཤུལ་དེད་ནས། །
རྫ་མཐོན་པོའི་ཉག་ག་བརྒྱུད་དེ། །
གན་བྲག་འབབ་ཆུ་མོ་བཞིན་དུ། །
སྟོད་ཆབ་མདོ་སེམས་སུ་བསྒོམས་ནས། །
སུ་ཞིག་གིས་འགོག་ཐབས་མ་བྱུང་། །
སྐྱབས་བླ་མ་ཡི་དམ་སྲུང་མ། །
ང་ཨ་མདོའི་བུ་ལོ་སེམས་པ། །
སྟོད་མངའ་རིས་བུ་མོར་ཤོར་བ། །
ཐུགས་བརྩེ་བ་ཆེན་པོས་བཟུང་ནས། །
ཕྱིར་རང་ལུས་ཞུགས་སུ་འཇུག་རྒྱུ། །
མཁྱེན་མཁྱེན་ནོ་རྩ་བའི་བླ་མ། །
ལྷོ་གཡུ་འབྲུག་ལྡིར་ལྡིར་གྲགས་པ། །
ཆར་ཟིལ་མ་ཤག་ཤག་འཇོ་བའི། །
གན་ན་ནིང་དབྱར་གཞུང་ཞིག་ལ། །
ངས་ཡུན་རིང་སེམས་སུ་ཉར་བའི། །
སྟོད་མངའ་རིས་བུ་མོའི་སྣང་བ། །
ཡིག་སུམ་ཅུའི་སྦྱོར་བ་བརྒྱུད་ནས། །
རང་སེམས་ཀྱི་སྐད་ཆ་དྲོན་མོ། །
གན་འཇིག་རྟེན་མི་བུར་བསྒྲོགས་ཟིན། ། 


དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས། 蜀ICP备14009601号-1