གནམ་སྔོན་པོའི་ཁ་དོག་དྭངས་ས།།ས་དོག་མོའི་ཁ་ཞེང་ཆེ་ས།།གངས་ལྷུན་པོའི་རྩེ་མོ་མཐོ་ས།།བྲག་དམར་ཡག་རྔམ་བརྗིད་ལྡན་ས།།སྤང་རི་བོའི་ཉམས་མདངས་མཛེས་ས།།ཆུ་ལྷུང་ལྷུང་བཞུར་སྒྲ་སྙན་ས།།རྩྭ་རྩི་ཤིང་ཡར་བསྐྱེད་མགྱོགས་ས།།ནོར་གཡང་གི་འཕེལ་ཁ་དར་ས།།གཞོན་རྗེས་རབས་སྐུ་བསོད་ཆེ་ས།།བུ་ང་ཚོའི་ཕ་ས་ཕ་ཡུལ།།ས་མདོ་སྨད་ཨ་མདོའི་ཕྱོགས་ཀྱི།།ཤར་ཅོ་ནེ་རྒྱལ་པོའི་རྒྱལ་རྒྱུད།།ས་དེ་ནས་ཡར་ལ་སོང་ན།།སྡེ་ཆེན་པོ་ཉིན་པ་ཞེས་པའི།།བུ་ང་ཡི་སྐྱེ་ས་སྐྱེ་ཡུལ།།
བཀྲ་ཤིས་པའི་ལྷ་དར་མོད་ས།།ཆོས་ལྷ་སྡེའི་ཆོས་མཁར་ཆེན་མོ།།རྩེ་པོ་ཏ་ལ་ཡི་གཞིས་མལ།།དབུས་ལྷ་ལྡན་ཆོས་ཀྱི་གླིང་ནས།།ཤར་གོམ་ཕྲག་བརྒྱ་ལྷག་སོང་ན།།གནས་ཆེན་པོ་ཆབ་མདོ་ཞེས་པ།།གན་འཕྲེད་བསྟར་རི་བོའི་འགྲམ་ངོགས།།འདི་གཙང་གསུམ་ཆུ་བོའི་ཉེ་འགྲམ།།བོད་ཤར་ཕྱོགས་མུ་ཏིག་མཚན་ཅན།།གནས་དེ་ནས་འཚར་ལོངས་བྱུང་པའི།།སྨན་བུ་མོ་རིན་ཆེན་ཆོས་མཚོ།།གན་སྔོན་བསགས་ལས་ཀྱིས་བསྐོས་པའི།།ལས་ཟེར་བ་ལྡོག་ཐབས་མེས་པས།།བུ་ང་དང་རིན་ཆེན་ཆོས་མཚོ།།རིག་སློབ་གླིང་གཅིག་ནས་འཛོམས་ཐལ།།ཕར་འཁོར་ནས་ཚིག་གསུམ་དྲིས་ནོ།།ཚུར་ལྷད་མེད་འཛུམས་མདངས་གྲོལ་བྱུང་།།བུ་ང་ཚོ་སྐད་ཅིག་མ་དེར།།ཅི་བྱེད་རྒྱུ་དྲན་ཁོམ་མ་བྱུང་།།དུས་ཉིན་དང་ཟླ་བ་འགོར་སོང་།།
སྨན་བུ་མོ་ཇེ་ཡག་ཇེ་ཡག།བུ་ཕོ་རྒོད་ཇེ་མང་ཇེ་མང་།།ད་ཅི་བྱེད་གང་བྱེད་མི་ཤེས།།གྲོགས་བྱེད་འདོད་སེམས་ན་ཡོད་རུང་།།ཁ་སྨྲ་ལྕེ་འགུལ་རྒྱུ་སྐྲག་གི།ཁ་སྨྲ་ལྕེ་འགུལ་རྒྱུ་སྔ་ན།།སྨན་བུ་མོས་འདང་རྒྱག་ཟེར་གྱི།།ཁ་སྨྲ་ལྕེ་འགུལ་རྒྱུ་འཕྱི་ན།།གན་རྗེས་ན་ཕོ་སྐྱེས་མང་གི །ད་གང་དྲན་ཅི་དྲན་མེད་པར།།ལོ་བཞི་ཡི་འཁོར་མོ་ཟད་ཐལ།།
མོ་མངའ་རིས་ཡུལ་དུ་འཕུར་ཐལ།།ང་ཨ་མདོ་ཡུལ་ན་ལུས་འདུག།ལོ་བཞི་ཡི་འཁོར་མོ་བསམ་ན།།ཞེ་དྲག་པོའི་འགྱོད་པ་འཁོར་མོད།།མོ་སྔར་བཞིན་མཛངས་མ་དེ་རེད།།ང་སྔར་བཞིན་བུ་ལོ་དེ་ཡིན།།
སྐྱིད་སྡུག་གི་འཁོར་བ་ཟེར་བ།།མཉམ་གཅིག་ཏུ་རོལ་དབང་མེད་མོད།།སེམས་བསམ་པའི་ཟབ་ས་ཞིག་ན།།མོ་གན་ཚོ་གསལ་ལེ་ཡོད་གི །ཚེ་གཅིག་གི་མཐུན་རོགས་མིན་རུང་།། མོ་གན་ཚོ་བརྗེད་ཐབས་མི་འདུག །ལག་དམ་པོར་འཇུས་ནས་འགྲོ་བ།། བུ་ང་ཚོའི་ལག་པ་མིན་རུང་།།མོ་གན་ཚོ་ཡིད་ནས་བོར་མེད།།
སྟོད་མངའ་རིས་ཡུལ་གྱི་བུ་མོ།།སྨད་ཨ་མདོའི་ཕྱོགས་ཀྱི་བུ་ལོ།།སྨན་གན་ཚོ་མཐོང་ཐེངས་རེ་ལ།། ངའི་བློ་སྙིང་སྟེང་འོག་བརྗེས་སོང་།།སྨན་གན་ཚོ་སེམས་ལ་ཤར་ན།།དགོང་རྨི་ལམ་སྐྱིད་པོ་འབྱུང་གི །སྨན་གན་ཚོ་དྲན་ཤེས་ངོས་ལ།།ནམ་ཡིན་རུང་གསལ་ལེར་འཆར་ཡོད།།ངའི་གློ་སྙིང་དོན་ལྔ་སྣོད་དྲུག །སྨན་གན་ཚོའི་འཕུར་ཤུལ་དེད་ནས།།རྫ་མཐོན་པོའི་ཉག་ཁ་བརྒྱུད་དེ།།གན་བྲག་འབབ་ཆུ་མོ་བཞིན་དུ།།སྟོད་ཆབ་མདོ་སེམས་སུ་བསྒོམས་ནས།། སུ་ཞིག་གིས་འགོག་ཐབས་མ་བྱུང་།།
སྐྱབས་བླ་མ་ཡི་དམ་སྲུང་མ།།ང་ཨ་མདོའི་བུ་ལོ་སེམས་པ།།སྟོད་མངའ་རིས་བུ་མོར་ཤོར་བར།།ཐུགས་བརྩེ་བ་ཆེན་པོས་བཟུང་ནས།།ཕྱིར་རང་ལུས་ཞུགས་སུ་འཇུག་རྒྱུ།།མཁྱེན་མཁྱེན་ནོ་རྩ་བའི་བླ་མ།།ལྷོ་གཡུ་འབྲུག་ལྡིར་ལྡིར་གྲགས་པ།།ཆར་ཟིལ་མ་ཤག་ཤག་འཇོ་བའི།།གན་ན་ནིང་དབྱར་གཞུང་ཞིག་ལ།།ངས་ཡུན་རིང་སེམས་སུ་ཉར་བའི།།སྟོད་མངའ་རིས་བུ་མོའི་སྣང་བ།།ཡིག་སུམ་ཅུའི་སྦྱོར་བ་བརྒྱུད་ནས།།རང་སེམས་ཀྱི་སྐད་ཆ་དྲོན་མོ།། གན་འཇིག་རྟེན་མི་བུར་བསྒྲགས་ཟིན།།
