གཙོ་ངོས།>> དམངས་སྲོལ།>>དུས་ཆེན།

རྡོ་མགོན་གསང་བདག་རྡོ་རྗེ་དང་དགའ་བ་པ་སངས། རྩོམ་སྒྲིག་པ།ཚེ་དཔལ། ཡོང་ཁུངས།གངས་ལྗོངས་ཉི་གཞོན་དྲ་བ། སྤེལ་དུས། ༢༠༡༧ལོའི་ཟླ་བ་༠༢ཚེས་༠༦ཉིན།

༄༅།། སོ་ནམ་ལོ་གསར་བྱུང་ཚུལ།

རྡོ་མགོན་གསང་བདག་རྡོ་རྗེ་དང་དགའ་བ་པ་སངས།

        བོད་ཟླ་12པའི་ཚེས་1ཉིན་གཏོང་བའི་སོ་ནམ་ལོ་གསར་གྱི་བྱུང་ཚུལ་ཐད་བྱམས་པ་རྒྱལ་མཚན་ལགས་ནས་1984ལོའི《ལྷ་ས་སྐྱིད་ཆུ》ཞེས་པའི་དུས་དེབ་དང་པོར《བོད་སྔ་རབས་ཀྱི་མཛད་ཆེན་དང་དུས་སྟོན་ཁག་གི་གཏམ་ངོ་མཚར་ཅན་གྱི་ལྟད་མོ》ཞེས་པ་ཞིག་བཀོད་ཅིང་། དེའི་ནང་དུས་རབས་བརྒྱད་པ་ཁྲི་སྲོང་ལྡེ་བཙན་གྱི་དུས་བོན་ཆོས་ཉམས་པ་དང་ཕྱོགས་མཚུངས《བར་འགྱུར་གསལ་སྒྲོན་སྦས་བཅས་ཅན་གྱི་ལུགས》(གྱིམ་ཤིང་ཀོང་ཇོའི་དུས་བོད་དུ་བསྒྱུར་བའི་རྩིས་ཀྱི་དཔེ་ཆ་ཞིག)ཞེས་བོད་ཟླ་12པའི་ཚེས་1ལ་རྒྱ་ནག་གི་སོ་ནམ་ལོ་གསར་འཁེལ་བ་དང་ལྷན་དུ་བོད་ཀྱི་ལོ་གསར་གཏོང་སྲོལ་ཆགས་པ་དེ་གནའ་སྲོལ་དང“ཀོང་ཇོ་ཕྱི་མའི་ལུགས”ཞེས་གསལ་བ་ལྟར་ཀོང་ཇོ་ཕྱི་མ་སྟེ་གྱིམ་ཤིང་ཀོང་ཇོའི་དུས་སུ་བྱུང་བའི་ལོ་གསར་གཏོང་སྲོལ་ཡིན་པ་དང་། ལོ་གསར་འདི་ནི་གཙང་ཕྱོགས་ཀྱི་ཡུལ་གྲུ་མང་ཆེ་བ་དང་། སྟོད་མངའ་རིས་ཁུལ་གྱི་བྱང་ཐང་འབྲོག་པ་སོགས་ཀྱིས་གཏོང་སྲོལ་ཡོད། གོང་གསལ་ཡུལ་གྲུ་དེ་དག་གིས་སོ་ནམ་ལོ་གསར་གཏོང་བ་མ་ཟད། རྒྱལ་པོ་ལོ་གསར་ཡང་གཏོང་སྲོལ་ཡོད། སྟོད་མངའ་རིས་ཁུལ་དུ་སོ་ནམ་ལོ་གསར་གཏོང་སྲོལ་གྱི་སྐོར་ལ《ཞང་ཞུང་སྲིད་པའི་གྲེ་འགྱུར》ཞེས་པའི་ཤོག་གྲངས་133ལས“རུ་ཐོག་ཁྱུང་རྫོང་དཀར་མོའི་ལོ་གསར་དང་དུས་ཆེན་གཏོང་སྲོལ་སྐོར་ཆེ་ལོང་ཙམ་བརྗོད་པ”ཞེས་པའི་ནང་བྱང་ཐང་འབྲོག་པའི་ལོ་གསར་བོད་ཟླ་11པའི་ཚེས་29ཉིན་དགུ་ཐུག་བཏང་། དགུ་གཏོར་མེ་རོ་དབྱུགས་པ་བཅས་བྱེད། ཚེས་30ཉིན་ཐབ་གཟན་ཟ་བ། ཟླ་12ཚེས་1ཉིན་ཞོགས་པ་སྔ་མོ་ནས་ནང་མི་རྒན་གཞོན་ཚང་མ་གཟབ་མཆོར་སྤྲས་ནས་རྒན་གྲས་ལ་གུས་ཕྱག་བྱེད་ཅེས་སོ་ནམ་ལོ་གསར་གཏོང་སྲོལ་ཡོད་པ་དེ་རྟོགས་ཐུབ།  
(རྡོ་མགོན་གསང་བདག་རྡོ་རྗེ་དང་དགའ་བ་པ་སངས་ཀྱི《བོད་ཀྱི་ཡུལ་སྲོལ་རྣམ་བཤད》ཅེས་པ་ལས་བཏུས)

39.7K

ཐག་རག་ཡིག་བསྒྱུར་མ་ལག

དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས།蜀ICP备14009601号-1