བཀྲ་ཤིས་པའི་མཚོན་བྱེད་རྟགས་བརྒྱད་ཀྱི་རི་མོའི་མཚོན་ཚུལ་མདོ་ཙམ་བརྗོད་པར་བྱ་བ་ལ། 
(1).འཁོར་ལོ་ནི།    ཚངས་པ་ལ་སོགས་པས་དེ་བཞིན་གཤེགས་པར་ཕུལ་ཞིང་། དེ་བཞིན་གཤེགས་པའི་ཞབས་ཀྱི་མཐིལ་དུ་བསོད་ནམས་ཀྱི་སྟོབས་ལས་འཁོར་ལོའི་མཚན་མ་རང་བཞིན་གྱིས་མངོན་པ་སྟེ་དེ་བཞིན་གཤེགས་པའི་ཞབས་ཀྱི་མཚོན་བྱེད་སྲིད་པའི་དྲ་བ་ཉོན་མོངས་པའི་རང་བཞིན་ཅན། རྩད་ནས་གཅོད་ཅིང་ཕ་རོལ་གྱི་རྒོལ་བ་ཐམས་ཅད་ཟིལ་གྱིས་གནོན་པར་བྱེད་པའི་གསེར་གྱི་རྩིབས་སྟོང་དང་ལྡན་པ་རང་གི་དཔལ་དང་ལོངས་སྤྱོད་དབང་ཐང་ཐམས་ཅད་བསྐྱེད། ཐེག་གསུམ་ཆོས་ཀྱི་འཁོར་ལོ་བསྐོར་ནས་གདུལ་བྱ་ཐམས་ཅད་ཡོངས་སུ་སྨིན་པར་བྱེད་པ།
(2).གདུགས་ནི།  ཚངས་པ་ལ་སོགས་པས་སངས་རྒྱས་ལ་ཕུལ་བ་དང་། སངས་རྒྱས་རང་གི་སྐུ་ལ་ཐོད་ཁྱིམ་ཟླུམ་པོ་གདུགས་ལྟར་དུ་ཡོད་པ་སོགས་བསོད་ནམས་དང་ཡེ་ཤེས་ཀྱི་རང་རྩལ་ལས་སོ་སོའི་མཚན་མ་མངོན་པའི་རིན་ཆེན་གདུགས་གསེར་གྱི་ཡུ་བ་ཅན་སེམས་ཅན་ཐམས་ཅད་ཉོན་མོངས་པའི་ཚ་གདུང་སེལ་བར་བྱེད་པ།
(3).རྒྱལ་མཚན་ནི། ཟ་འོག་ལས་གྲུབ་པའི་བསྟན་པ་མི་ནུབ་བསྐལ་བརྒྱར་གནས་པའི་རྒྱལ་མཚན་རྫོགས་པའི་སངས་རྒྱས་ཀྱི་སྐུ་ལུས་ལྟ་བུ་ཕས་ཀྱི་རྒོལ་བ་དང་མི་མཐུན་པའི་ཕྱོགས་ཐམས་ཅད་ལས་རྣམ་པར་རྒྱལ་བའི་རྒྱལ་མཚན་མི་མཐུན་གཡུལ་རྒྱལ་གྱི་མཚན་མས་རབ་ཏུ་རྒྱན་པ།
(4).དཔལ་བེའུ་ནི།བདེ་བར་གཤེགས་པ་ཐམས་ཅད་ཀྱི་ཐུགས་ཀྱི་མཚོན་བྱེད་རིན་པོ་ཆེ་དཔལ་བེའུ་འཇའ་དང་འོད་ཀྱི་རང་བཞིན་ཅན་སངས་རྒྱས་ཀྱི་མཁྱེན་པ་ཐམས་ཅད་ཐོགས་མེད་དུ་མཁྱེན་ཅིང་གཏིང་དཔག་པར་དཀའ་བའི་སྟོབས་ཐམས་ཅད་རང་གི་རྒྱུད་ལ་འཐོབ་པར་བྱེད་པ།
(5).དུང་དཀར་གཡས་འཁྱིལ་ནི། བཀྲ་ཤིས་པའི་དུང་དཀར་ནི་བྱང་ཆུབ་སེམས་དཔའ་གཞན་དོན་དུ་དུང་དཀར་གཡས་སུ་འཁྱིལ་བར་སྐྱེ་བ་ཞེས་པ་དེ་ལ་སངས་རྒྱས་ཀྱི་ཚེམས་ཕྲེང་བཞི་བཅུའི་མཚན་མ་གསལ་བ་སོགས་དང་གཞན་ཡང་ལྷའི་དབང་བོ་རྒྱལ་བྱིན་གྱིས་སངས་རྒྱས་བཅོམ་ལྡན་འདས་ལ་དུང་དཀར་གཡས་འཁྱིལ་ཕུལ་བ་བཀྲ་ཤིས་པའི་རྫས་སུ་བྱིན་གྱིས་རླབས་པ་སོགས་དང་།
(6).གཏེར་ཆེན་པོའི་བུམ་པ་ནི།དེ་བཞིན་གཤེགས་པའི་མགུལ་གྱི་རྣམ་པ་སྟེ། གསེར་གྱི་བུམ་པ་འཆི་མེད་བདུད་རྩིས་གང་བའམ་ཡང་ན་རིན་པོ་ཆེས་གང་བ་མ་ཟད་མི་ཤེས་པའི་བཅུད་ཀྱི་གང་བ་ལྟར་རང་རྒྱུད་ཆོས་ཀྱི་གང་ནས་གདུལ་བྱའི་རྒྱུད་ཚིམས་པ་དང་ཡང་ན་འདོད་དགུ་ལོངས་སྤྱོད་ཐམས་ཅད་འབད་མེད་དུ་འབྱུང་བའི་གཏེར་གྱི་བུམ་པ་པད་མ་འདམ་ལས་སྐྱེས་ཀྱང་འདམ་གྱི་དྲི་མས་མ་གོས་པ་ལྟར་འཁོར་བ་ལ་གནས་ཀྱང་འཁོར་བའི་སྐྱོན་གྱིས་མི་གོས་པ་མཚོན་བྱེད།
(7).མེ་ཏོག་པདྨ་ནི།མཛེས་ཤིང་དྲི་བཟང་པོ་ཕྱོགས་མེད་དུ་འཐུལ་བ། རྫུན་ལ་སོགས་ངག་གི་མི་དགེ་བ་ཐམས་ཅད་ཡོངས་སུ་སྤངས་ཏེ་ཚིག་འཇམ་པོ་སྨྲ་མཁས་པ།དམ་པའི་ཆོས་ཀྱི་བདུད་རྩི་མྱངས་ནས་འཆད་རྩོད་ལ་ཐོགས་པ་མེད་པའི་ལྗགས་པདྨ་ལྟ་བུ་འཐོབ་པར་བྱེད་པ།
(8).གསེར་ཉ་ནི།ཤེས་རབ་དང་ཡེ་ཤེས་ཀྱི་སྤྱན་གྱི་མཚོན་བྱེད་གཡུའི་འདབ་གཤོག་དང་ལྡན་པ། གསེར་མིག་སྒོར་ཞིང་མཛེས་ལ་འོད་འཁྱུག་པ་སྐྱེ་བོ་ཀུན་ལ་ཤེས་རབ་ཀྱི་མིག་སྦྱིན་པར་བྱེད་པ་བཅས་དང་སངས་རྒྱས་ཀྱི་སྐུ་ལ་བཀྲ་ཤིས་བའི་རྫས་བརྒྱད་ཚང་བའི་སྐོར་དཔེར་ན་མདོ་བཀྲ་ཤིས་བརྩེགས་པ་ལས། ན་མོ། །དབུ་ལ་བཀྲ་ཤིས་གདུགས་ལྟར་སྐྱོབས། སྐུ་ལ་བཀྲ་ཤིས་མི་ནུབ་རྒྱལ་མཚན་མཆོག གསུང་ལ་བཀྲ་ཤིས་ཆོས་དུང་གཡས་སུ་འཁྱིལ། ཐུགས་ལ་བཀྲ་ཤིས་དཔལ་གྱི་བེའུ་གསལ། སྤྱན་ལ་བཀྲ་ཤིས་རིན་ཆེན་གསེར་གྱི་ཉ། ལྗགས་ལ་བཀྲ་ཤིས་པད་མོ་ལོ་འདབ་རྒྱས། མགུལ་ལ་བཀྲ་ཤིས་རྫས་བརྒྱད་དངོས་གྲུབ་དམ་པའི་མཆོག རྫས་མཆོག་བརྒྱད་ཀྱི་བཀྲ་ཤིས་གང་ཡིན་པ། དེང་འདིར་བདག་ཅག་རྣམས་ལ་བཀྲ་ཤིས་ཤོག ། །