ལི་ཁེ་ཆང་གིས་ཧྥ་རན་སིའི་ཙུང་ལི་ཁ་ཙུག་ན་ཧྥི་དང་གྲོས་མོལ་མཛད།

རྩོམ་སྒྲིག་པ།ཚེ་དཔལ། ཡོང་ཁུངས།ཞིན་ཧྭ་དྲ་བ། སྤེལ་དུས། 02-22


        སྤྱི་ཟླ་2པའི་ཚེས་21ཉིན།  རྒྱལ་སྲིད་སྤྱི་ཁྱབ་ཁང་གི་ཙུང་ལི་ལི་ཁེ་ཆང་གིས་ཧྥ་རན་སིའི་ཙུང་ལི་ཁ་ཙུག་ན་ཧྥི་དང་གྲོས་མོལ་མཛད། 
        ལི་ཁེ་ཆང་གིས་ཀྲུང་གོ་དང་ཧྥ་རན་སི་གཉིས་ཀ་མཉམ་འབྲེལ་རྒྱལ་ཚོགས་བདེ་འཇགས་ལས་འཛིན་ལྷན་ཚོགས་ཀྱི་རྒྱུན་ཁུར་ལས་འཛིན་རྒྱལ་ཁབ་ཡིན་པ་དང་། རྒྱལ་ཁབ་གཉིས་ཀྱི་འབྲེལ་བ་དེ་ནམ་ཡང་ཀྲུང་གོ་དང་ནུབ་ཕྱོགས་རྒྱལ་ཁབ་བར་གྱི་འབྲེལ་བའི་མདུན་གྲས་སུ་བསྐྱོད་བཞིན་ཡོད་པས། ཕྱོགས་གཉིས་ཀྱིས་ནམ་ཡང་ཕན་ཚུན་བརྩི་འཇོག་དང་འདྲ་མཉམ་མཉམ་ལས། གཉིས་ཕན་མཉམ་རྒྱལ་གྱི་འདུ་ཤེས་རྒྱུན་འཁྱོངས་བྱེད་པ་དང་། རྒྱལ་སྤྱིའི་ལས་དོན་ཁྲོད་ཀྱི་བརྗེ་རེས་མཐུན་སྦྱོར་ལ་ཤུགས་སྣོན་བྱེད་པ། མིག་སྔའི་རྙོག་འཛིང་ཆེ་ཞིང་འགྱུར་ལྡོག་ཆེ་བའི་རྒྱལ་སྤྱིའི་གནས་བབ་འོག མཉམ་དུ་འཛམ་གླིང་ཞི་བདེ་དང་གཏན་འཇགས། འཕེལ་རྒྱས་ལ་སྲུང་སྐྱོབ་བྱེད་པར་ཤུགས་བཏོན་སྟེ། གཏན་འཇགས་རང་བཞིན་གྱིས་གཏན་ཁེལ་མིན་པའི་རང་བཞིན་ལ་ཁ་གཏད་འཇལ་དགོས་ཞེས་བསྟན། 
        ལི་ཁེ་ཆང་གིས་ཀྲུང་གོ་ཕྱོགས་ཀྱིས་ཧྥ་རན་སི་བར་གྱི་ཉིང་རྡུལ་ནུས་པའི་ཐོན་ལས་སྦྲེལ་ཐག་ཡོངས་ཀྱི་མཉམ་ལས་གཏིང་ཟབ་ཏུ་སྤེལ་བ་དང་། ཀྲུང་གོ་དང་ཧྥ་རན་སི། དབྱིན་ཇིའི་རྒྱལ་ཁབ་གསུམ་བར་གྱི་ཞིན་ཁི་ལིས་ཅོ་ཉིང་རྡུལ་གློག་གི་ལས་གཞི་བརྟན་བརླིང་ངང་ལག་བསྟར་བྱེད་པ། མཉམ་དུ་ཕྱོགས་གསུམ་པའི་ཉིང་རྡུལ་གློག་གི་ཚོང་ར་གསར་སྤེལ་བྱེད་པའི་ཐད་ནས་འཚོལ་ཞིབ་དང་བགྲོ་གླེང་བྱེད་པ། མཁའ་འགྲུལ་དང་འཇིག་རྟེན་འཕུར་བསྐྱོད་ཐད་ཀྱི་མཉམ་ལས་རྒྱ་བསྐྱེད་པ། མཁའ་དབུགས་འགྱུར་ལྡོག་ལ་ཁ་གཏད་འཇལ་བའི་ཐད་ཀྱི་མཉམ་ལས་གཏིང་ཟབ་ཏུ་སྤེལ་བ། ཝུའུ་ཧན་སྐྱེ་ཁམས་མཁར་གྲོང་ལས་གཞི་མྱུར་དུ་ལག་བསྟར་བྱེད་པ། ཞིང་ལས་ཐོན་ལས་སྦྲེལ་ཐག་ཡོངས་དང་སྨན་བཅོས་འཕྲོད་བསྟེན། ལོ་ན་རྒས་པའི་མི་ཇེ་མང་དུ་འགྲོ་བར་ཁ་གཏད་འཇལ་བའི་ཐད་ཀྱི་མཉམ་ལས་སྤེལ་བར་བགྲོ་གླེང་གྲོས་ཞིབ་བྱེད་པ། ཚན་རིག་སློབ་གསོ་དང་རིག་གནས་འཕྲོད་བསྟེན། ལུས་རྩལ་སོགས་ཐད་ཀྱི་མཉམ་ལས་ལ་ཤུགས་སྣོན་པ། དངོས་སྦྱོང་སློབ་མ་སྟོང་གི་འཆར་གཞི་དང་ཐེངས་འདིའི་འཚམས་འདྲི་སྐབས་སུ་འགོད་རྒྱུ་ཡིན་པའི་ཀྲུང་གོ་དང་ཧྥ་རན་སི་གཉིས་ཀྱི་ཁ་ལོ་བའི་འཛིན་ཡིག་ཕན་ཚུན་ཁས་ལེན་བྱེད་པའི་གྲོས་མཐུན་སོགས་ལག་བསྟར་བཟང་བོ་བྱས་ཏེ། རྒྱལ་ཁབ་གཉིས་བར་གྱི་མིའི་འགྲོ་འོང་ཐད་སྔར་ལས་སྟབས་བདེ་བསྐྲུན་འདོད་ཡོད་པ་དང་། ཧྥ་རན་སིའི་ཕྱོགས་ཀྱིས་ཀྱང་ཀྲུང་གོའི་གནས་སྐོར་བར་བདེ་འཇགས་འགན་སྲུང་དང་སྟབས་བདེ་ཞབས་ཞུ་སྔར་ལས་མང་པོ་འདོན་སྤྲོད་བྱ་རྒྱུའི་རེ་བ་བཏོན། 
        ལི་ཁེ་ཆང་གིས་ཀྲུང་གོ་ཕྱོགས་ཀྱིས་ནམ་ཡང་ཡོ་རོབ་གླིང་གཞི་གཅིག་ཅན་དུ་བསྒྱུར་བར་རྒྱབ་སྐྱོར་བརྟན་པོ་བྱེད་ཀྱིན་ཡོད་པ་དང་། མཐུན་སྒྲིལ་དང་དར་རྒྱས། གཏན་འཇགས་ཀྱི་ཡོ་རོབ་གླིང་མནའ་འབྲེལ་ཞིག་མཐོང་འདོད་ཡོད་ལ། དེ་ཀྲུང་གོ་དང་ཧྥ་རན་སི་དང་། ཀྲུང་གོ་དང་ཡོ་རོབ་གླིང་བར་གྱི་འབྲེལ་ཇེ་བཟང་དུ་གཏོང་བར་ཕན་པ་ཡོད་པ་མ་ཟད། ཕྱོགས་མང་རིང་ལུགས་དང་འཛམ་གླིང་ཅན་འཕེལ་རྒྱས་སུ་གཏོང་བར་ཡང་ཕན་པ་ཡོད་པས། ཡོ་རོབ་གླིང་ཕྱོགས་ཀྱིས་ཀྲུང་གོ་འཛམ་གླིང་ཉོ་ཚོང་རྩ་འཛུགས་ཁྲོད་ཞུགས་པའི་ཆོད་ཡིག་གི་འོས་འགན་བཅོ་ལྔ་བ་ལག་བསྟར་བྱས་ཏེ། ཀྲུང་གོ་དང་ཡོ་རོབ་གླིང་བར་གྱི་དངོས་གཉེར་མཉམ་ལས་བདེ་ཐང་དང་གཏན་འཇགས་ངང་འཕེལ་རྒྱས་སུ་གཏོང་བའི་ཐད་ཆ་རྐྱེན་བསྐྲུན་དགོས་ཞེས་བསྟན། 
        ཁ་ཙུག་ན་ཧྥི་ཡིས་ཧྥ་རན་སི་དང་ཀྲུང་གོ་བར་གྱི་འབྲེལ་བ་ཧ་ཅང་བཟང་ལ། དམངས་བཀོལ་ཉིང་རྡུལ་ནུས་པའི་ཐད་ཀྱི་མཉམ་ལས་གྲུབ་འབྲས་མངོན་གསལ་ཡིན་པ་དང་། ཞིང་ལས་མཉམ་ལས་ཀྱི་གོ་སྐབས་མང་ལ། ཁོར་ཡུག་སྲུང་སྐྱོབ་སོགས་རྒྱུན་མཐུད་ངང་འཕེལ་རྒྱས་སུ་བཏང་ཆོག་པའི་ཐོན་ལས་མཉམ་ལས་ཐད་ནས་དཔེ་སྟོན་གྱི་དོན་སྙིང་ལྡན། མིག་སྔའི་གནས་བབ་འོག ཧྥ་རན་སི་དང་ཀྲུང་གོ་གཉིས་ཀྱིས་འགྲོ་འོང་སྔར་ལས་ཇེ་དམ་དུ་གཏོང་བ་དང་། མཉམ་ལས་གཏིང་ཟབ་ཏུ་སྤེལ་ནས། མཉམ་དུ་ཉོ་ཚོང་རང་དབང་ཅན་ལ་སྲུང་སྐྱོབ་བྱེད་པ་དང་། སྲུང་སྐྱོབ་རང་བཞིན་ཐག་གཅོད་དགོས་ཞེས་བསྟན།། 

 


དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས། 蜀ICP备14009601号-1