སྤྱི་ཟླ་3པའི་ཚེས་21ནས་ཚེས་22ཉིན། རྒྱལ་ཡོངས་ཀྱི་དཔྱིད་ཀའི་ཞིང་ལས་ཐོན་སྐྱེད་དང་དེང་རབས་ཞིང་ལས་ཐོན་ལས་ར་བ་འཛུགས་སྐྲུན་བྱེད་པའི་བྱ་བའི་གྲོས་ཚོགས་ཧི་པེ་ཞིང་ཆེན་ཧྲི་ཅཱ་ཀྲོང་གྲོང་ཁྱེར་ནས་འཚོགས། ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་རྒྱུན་ལས་ཨུ་ཡོན། རྒྱལ་སྲིད་སྤྱི་ཁྱབ་ཁང་གི་ཙུང་ལི་ལི་ཁེ་ཆང་གིས་མཆན་བཀོད་མཛུབ་སྟོན་གལ་ཆེན་གནང་། ཁོང་གིས་མིག་སྔར། རྒྱལ་ཡོངས་དཔྱིད་རྨོ་འདེབས་དང་རྨོ་འདེབས་ལ་གྲ་སྒྲིག་བྱེད་པའི་དུས་སྐབས་སུ་སླེབས་ཡོད་པ་རེད། ལོ་ཧྲིལ་བོའི་ཞིང་ལས་ཐོན་སྐྱེད་ཀྱི་གནད་འགག་དུས་ཚིགས་སུ་ཡང་སླེབས་ཡོད་པས། ས་ཁུལ་སོ་སོ་དང་སྡེ་ཁག་སོ་སོས་ཀྲུང་དབྱང་གི་ཞིང་སྡེ་ལས་ཀའི་གྲོས་ཚོགས་དང་སྲིད་གཞུང་ལས་ཀའི་སྙན་ཞུའི་ཇུས་ཆོད་བཀོད་སྒྲིག་ལག་ལེན་མཐར་ཕྱིན་བྱེད་པ་དང་། ཞིང་ལས་ཀྱི་མཁོ་འདོན་ཕྱོགས་ཀྱི་སྒྲིག་གཞི་རང་བཞིན་གྱི་བཅོས་བསྒྱུར་གཙོ་གནད་དུ་བཟུང་ནས། ཞིང་དར་ཞིང་ཕན་གྱི་སྲིད་ཇུས་འཐུས་ཚང་དུ་གཏོང་བ། ཞིང་ལས་གྲུབ་ཚུལ་ལེགས་བསྒྱུར་བྱེད་པར་ཤུགས་སྣོན་པ། དཔྱིད་ཀའི་རྨོ་འདེབས་ལས་ཀ་དམ་འཛིན་བྱས་ཏེ། ཞིང་ལས་རྒྱུ་ཆས་མཁོ་འདོན་དང་ཞིང་སའི་ཆུ་བེད་འཛུགས་སྐྲུན། ཆུ་ལོག་འགོག་པ་དང་ཐན་སྐམ་འགོག་པ་སོགས་ཀྱི་ཞིང་ལས་ཐད་ཞབས་འདེགས་ཞུ་བའི་བྱ་བ་སྣ་ཚོགས་བཟང་པོར་བསྒྲུབ་དགོས། ཞིང་ལས་དང་ཞིང་སྡེའི་འཕེལ་རྒྱས་སྒྲིག་གཞི་འཐུས་ཚང་དུ་གཏོང་བའི་ཐད་ཤུགས་སྣོན་བྱེད་པ་དང་། རིགས་གསར་པའི་ཞིང་ལས་བདག་གཉེར་གཙོ་བོ་སྐྱེད་སྲིང་བྱེད་པ་དང་། ས་བབ་དང་བསྟུན་ནས་རྣམ་པ་མི་འདྲ་བའི་གཞི་ཁྱོན་འོས་འཚམ་གྱི་ཚོང་གཉེར་འཕེལ་རྒྱས་སུ་གཏོང་བའི་ཐད་ནས་ཤུགས་སྣོན་དང་འཚོལ་ཞིབ་བྱེད་པ། ཞིང་ལས་ཐོན་རྫས་ཀྱི་རྒྱུ་སྤུས་བདེ་འཇགས་ལ་འགན་སྲུང་བྱེད་པ་དང་ཚོང་ལས་འགྲན་རྩོད་ཇེ་དྲག་ཏུ་གཏོང་བའི་ཐད་ནས་གྲུབ་འབྲས་བརྩོན་ལེན་བྱེད་པ། ཞིང་ལས་གཏན་འཇགས་འཕེལ་རྒྱས་སུ་གཏོང་བའི་ནུས་པ་དང་ཞིང་སྡེའི་འཕེལ་རྒྱས་ཆུ་ཚད་སྔར་ལས་མཐོར་འདེགས་བྱེད་པ། ཞིང་བའི་ཡོང་སྒོ་རྒྱུན་མཐུད་དེ་ཇེ་མང་དུ་བཏང་སྟེ། གྲུབ་འབྲས་བཟང་པོས་ཏང་གི་ཚོགས་ཆེན་བཅུ་དགུ་པ་རྒྱལ་ཁའི་ངང་བསྡུ་བར་བསུ་མ་བྱ་དགོས་ཞེས་བསྟན།།