ཕྱུགས་འཚོ་བ་ནི་ཧུང་ཡོན་འབྲོག་དམངས་ཀྱི་ཐོན་ལས་ཀྱི་སྲོག་ཤིང་ལྟ་བུར་གྱུར་པའི་སྲོལ་རྒྱུན་ཐོན་ལས་ཤིག་ཡིན་ལ། རྫོང་ཡོངས་ཀྱི་འབྲོག་པ་མང་ཚོགས་ཀྱི་དཔལ་འབྱོར་ཡོང་འབབ་གཙོ་བོའང་ཡིན།
བོད་ཁུལ་གྱི་ནོར་གནག་ཉེན་འགོག་འགན་ལེན་ནི་ཀྲུང་དབྱང་ནོར་སྲིད་ཀྱིས་ཁ་གསབ་རོགས་དངུལ་སྟེར་བའི་ཞིང་ལས་ཉེན་འགོག་འགན་ལེན་གྱི་རིགས་ཤིག་ཡིན་ལ། ཀྲུང་ཧང་ཨན་མེང་ནོར་སྲིད་ཉེན་འགོག་འགན་ལེན་སྤྱི་གཉེར་ཁང་གིས་2013ལོ་ནས་བཟུང་། ཐོག་མར་རྔ་བ་ཁུལ་ཧུང་ཡོན་རྫོང་དུ་ནོར་གནག་ཉེན་འགོག་འགན་ལེན་ལས་ཀ་རྒྱ་ཆེར་སྤེལ་ནས། ཕྱུགས་འཚོའི་ཉེན་ཁ་འགན་བླངས་པས་རང་བྱུང་གི་གནོད་འཚེ་བྱུང་ཡང་འབྲོག་པ་མང་ཚོགས་ལ་སེམས་ཁྲལ་མེད་པར་གྱུར།
2013ལོར་ནོར་གནག་ཉེན་འགོག་འགན་ལེན་གྱི་སྐྱིན་ཚབ་སྤྲོད་དངུལ་གནད་ལ་འབབ་ཆེད། ཉེན་འགོག་འགན་ལེན་གྱི་འབྲེལ་ཡོད་མི་སྣས་དུས་ཡུན་ཉིན་40ལྷག་གི་རིང་དཀའ་བ་གདོང་གིས་བསུས་ནས་ཉིན་མོར་ཉེན་འགོག་འགན་ལེན་དུ་ཞུགས་པའི་ནོར་གནག་ལ་རྣ་རྟགས་བརྒྱབ་པ་དང་མཚན་མོར་ཉེན་འགོག་འགན་ལེན་གྱི་མིང་ཐོ་རུ་དེ་དག་བསྡུ་སྒྲིག་བྱས་ནས། ནོར་གནག་ཉེན་འགོག་འགན་ལེན་ལས་ཀར་རྨང་གཞི་བརྟན་པོ་བཏིངས།
ཀྲུང་ཧང་ཨན་མེང་ནོར་སྲིད་ཉེན་འགོག་འགན་ལེན་སྤྱི་གཉེར་ཁང་དང་སྲིད་གཞུང་གཉིས་མཉམ་འབྲེལ་སྒོས་ནོར་གནག་ཉེན་འགོག་འགན་ཉེན་ལག་ཏུ་བསྟར་པ་དེས་འབྲོག་པ་མང་ཚོགས་ཀྱི་གྱོང་གུད་རྒྱ་ཆེར་སེལ། 2015ལོར་ནོར་གནག་ཉེན་འགོག་ཏུ་ཞུགས་ཚད་513720རུ་སླེབས་ཤིང་། འབྲོག་པ་དུད་ཚང་36420ལྷག་ལ་ནོར་གནག་ཉེན་འགོག་འགན་ལེན་གྱི་ཁེ་ཕན་ཐོབ།
2016ལོ་ནས་བཟུང་ཀྲུང་ཧང་ཨན་མེང་ནོར་སྲིད་ཉེན་འགོག་འགན་ལེན་སྤྱི་གཉེར་ཁང་དང་ཧུང་ཡོན་རྫོང་སྲིད་གཞུང་གཉིས་མཉམ་འབྲེལ་སྒོས་རྣམ་པ་གསར་བའི་རྣ་རྟགས་ཉོ་སྒྲུབ་བྱས་པར་མ་ཟད་གློག་རྡུལ་ཕྱགས་འགོད་དཔྱད་ཆས་ཆ་ཚང་སྤྲད་ནས་རྣམ་པ་གསར་པའི་རྣ་རྟགས་དོ་དམ་མཉེན་ཆས་བཀོལ་འགོ་ཚུགས། དེས་ལས་ཀའི་ནུས་པ་མཐོར་འདེགས་དང་ལས་ཆོད་ཚད་ལྡན་ཅན་དུ་གཏོང་བ། ནོར་གནག་ཐོན་ལས་དེང་རབས་ཅན་དུ་འཕེལ་རྒྱས་གཏོང་བར་སྐུལ་འདེད་བཏང་།
ནོར་གནག་ཉེན་འགོག་འགན་ལེན་སྐོར་གླེང་དུས་ཧུང་ཡོན་གསེར་དེའུ་ཡུལ་ཤོག་གི་འབྲོག་པ་བཀྲ་ཤིས་ཀྱིས་གདོང་ལ་འཛུམ་ཞིག་ལངས་ནས། ནོར་གནག་ཉེན་འགོག་འགན་ལེན་ནི་ང་ཚོ་འབྲོག་པ་ཚོར་ཕན་ཐོགས་ཤིན་ཏུ་ཆེ་བའི་དོན་བཟང་ཞིག་རེད། ངེད་ཚང་ལ་ནོར་གནག་ཉིས་བརྒྱ་ལྷག་ཡོད་ལ། ཚང་མ་ཉེན་འགོག་འགན་ལེན་དུ་ཞུགས་ཡོད། 2015ལོའི་དཔྱིད་ཀ་རྒྱུན་མཐུད་ཁ་བ་ཆེན་པོ་འབབ་པ་དང་གྲང་ངར་ཆེ་བ་སོགས་ཀྱི་གནམ་གཤིས་ངན་པས་ངེད་ཚང་གི་ནོར་གནག་ལ་ཤི་རྐྱེན་མང་པོ་ཐེབས་མོད། ནོར་གནག་ཉེན་འགོག་འགན་ལེན་དུ་ཞུགས་ཡོད་པས་གྱོང་གུད་ཕལ་ཆེར་ཁ་གསབ་བྱུང་ཞེས་བཤད།
ནོར་གནག་ཉེན་འགོག་འགན་ལེན་དུ་ཞུགས་པར་ཀྲུང་དབྱང་དང་ཁུལ། རྫོང་སོགས་རིམ་པ་སོ་སོའི་སྲིད་གཞུང་གིས་རོགས་སྐྱོར་བྱས་པར་བརྟེན། ང་ཚོ་འབྲོག་པ་རང་གིས་ནོར་གནག་རེར་སྒོར་24ལས་སྤྲོད་མི་དགོས། འགན་ལེན་དུ་ཞུགས་ནས་ཡ་རུ་ཞིག་ཤི་ན་ཡང་སྒོར་1000རེའི་སྐྱིན་ཚབ་ཡོད་པས། ངེད་ཚང་ལ་མཚོན་ན་ལོ་གཅིག་ལ་མ་མཐའ་ཡང་ནོར་གནག་ཆེ་ཆུང་10ལྷག་ཤི་ཁོ་ཐག་ཡིན་པས་ནོར་གནག་ཉེན་འགོག་འགན་ལེན་འདིས་ང་ཚོའི་གྱོང་གུད་དངོས་སུ་གསབ་པས་འཚོ་སྐྱོང་གི་སེམས་ཁྲལ་ཆེན་པོ་སེལ་ཐུབ་པ་རེད་ཅེས་སྦྲ་ཆེན་གྲོང་རྡལ་རུ་ཁག་བཞི་བའི་འབྲོག་པ་སྐར་རྒྱམ་གྱིས་གསར་འགོད་པར་བཤད།
སྡེ་བ་རེ་ལ་བོད་རྒྱ་སྐད་གཉིས་ཤེས་པའི་ནོར་གནག་ཉེན་འགོག་འགན་ལེན་ལས་མཁན་རེ་ཡོད། ད་ལོའི་དཔྱིད་མགོར་ཁ་བ་ཆེན་པོ་རྒྱུན་མཐུད་ངང་བབས་ཀྱང་ང་ཚོ་སྡེ་བ་འདི་དང་སྤྱིར་རྫོང་ཡོངས་ཀྱི་ནོར་གནག་ཤི་ཚད་ལོ་སྔོན་མ་དག་ལས་ཀྱང་ཉུང་ཉུང་ཡིན། ནོར་གནག་ཉེན་འགོག་འགན་ལེན་གྱི་ལས་ཀ་ནི་རྒྱ་ཆེའི་འབྲོག་པ་མང་ཚོགས་ལ་ཁེ་ཕན་སྦྱིན་པའི་དམངས་ཕན་གྱི་ལས་དོན་བཟང་པོ་ཞིག་དང་འབྲོག་པ་ཚོའི་སེམས་ཁྲལ་སེལ་བའི་ཐབས་མཆོག་ཅིག་རེད་ཅེས་གསེར་དེའུ་ཡུལ་ཤོག་རོང་ཐ་སྡེ་བའི་ཉེན་འགོག་འགན་ལེན་ལས་སྒྲུབ་པ་བསོད་ནམས་དབང་མོས་གསར་འགོད་པར་བཤད། །
