ཀྱེ་ཕུར་མཆོག་གསུམ་ནི་ལོ་རབས་བརྒྱད་ཅུའི་སྟོད་ལ་མདོ་སྨད་མང་ར་རྫོང་གི་ཐར་ཤུལ་ཡུལ་ཚོར་འབོད་པའི་འབྲོག་སྡེ་ཞིག་ཏུ་སྐྱེས། སློབ་གྲྭ་ཆེ་འབྲིང་ཆུང་གསུམ་རིམ་པར་བརྒྱུད་དེ་ད་ལྟ་མདོ་ལྷོའི་འབྲོག་སྡེ་ཆེན་མོ་རྨ་ཆུ་རུ་དགེ་རྒན་གྱི་ལས་ཀ་གཉེར་བཞིན་ཡོད། 2003ལོར་གངས་རྒྱན་ན་ཆུང་ཚགས་པར་གྱིས་སྤེལ་བའི་བོད་ཁམས་ཀྱི་རྩོམ་ཡིག་འགྲན་སྡུར་ཁྲོད་ནས་བྱ་དགའ་ཨང་གསུམ་པ་ཐོབ། 2010ལོར་སི་ཁྲོན་ཞིང་ཆེན་གྱི་མཐུ་སྟོབས་རྡོ་རྗེ་རྟགས་མའི་དཔྱད་རྩོམ་འགྲན་སྡུར་ཁྲོད་བྱ་དགའ་ཨང་གསུམ་པ། 2016ལོར་སྦྲང་ཆར་རྩོམ་སྒྲིག་ཁང་གིས་སྤེལ་བའི་ཁ་བྱང་གཅིག་པའི་སྙན་ངག་འགྲན་སྡུར་ལས་ཨང་གསུམ་པ་ཐོབ། 2017ལོར་ཀན་ལྷོ་བོད་ཡིག་གསར་འགྱུར་ཁང་གིས་སྤེལ་བའི་ཕ་ཡུལ་ཀན་ལྷོ་ཞེས་པའི་ཁ་བྱང་གཅིག་པའི་རྩོམ་ཡིག་འགྲན་སྡུར་ཁྲོད་ཨང་གསུམ་པ་བཅས་ཀྱི་བྱ་དགའ་ཐོབ་མྱོང་།

ཚངས་སྲས་བཞད་པའི་སྒྲ་དབྱངས།
ཁམས་གསུམ་འགྲོ་བའི་རྨོངས་པ་མཁྱེན་དཔྱོད་ཉི་ཟླས་སེལ་མཛད། །
བརྩེ་ཞེན་ཟློས་གར་བསྒྱུར་བའི་འཇམ་དབྱངས་འཕྲུལ་གྱི་ཤིང་རྟས། །
བདག་བློའི་ཉོན་མོངས་དུག་གསུམ་ངན་འགྲོའི་གནས་ལས་དྲངས་ཏེ། །
མཐོ་རིས་འོད་གསལ་རི་ལ་བསྐལ་བའི་མཚན་མར་བསྒྲེངས་རོགས། །
གསུང་དབྱངས་ཡན་ལག་དྲུག་ཅུ་འདོད་དགུའི་ཞིང་དུ་འཕོས་པའི། །
ཡུམ་གཅིག་མཚོ་བྱུང་ལྷ་མོའི་སྐུ་གསུང་ཐུགས་ཀྱི་དཀྱིལ་འཁོར། །
བདག་བློ་བུམ་པའི་སྣོད་ལ་བདུད་རྩིའི་བཅུད་ཀྱིས་ལྟེམས་ཏེ། །
མ་རིག་རྨོངས་པའི་འདམ་མྱགས་གཙང་ཆུའི་རྒྱུན་གྱིས་ཁྲུས་ཤོག །
ལོ་ཟླའི་གྲམ་གཞུང་སྐྱ་བོར་ཚངས་དབྱངས་རྒྱུད་མང་འཁྲོལ་བས། །
སེམས་ཀྱི་པད་མའི་ཚལ་ལ་གཡུ་སྦྲང་གར་སྟབས་འཁྱུག་སོང་། །
ཤེས་རིག་ཟེའུ་འབྲུའི་བཅུད་ཀྱིས་འབྱུང་བཞིའི་ཞིང་ས་བརླན་ཏེ། །
འདོད་འདུན་སྤང་ལྗོངས་ངོས་སུ་མེ་ཏོག་དྲི་བསུང་ཆལ་ཆིལ། །
རིམ་བགྲོད་ལོ་ཟླའི་བང་ཁ་ཚན་རྩལ་གློག་གིས་བསྐྱེད་སོང་། །
འཚོ་བའི་ཕྱི་ནང་གསང་གསུམ་དུས་ཀྱི་འོད་ལ་འཁྱུད་སོང་། །
ཤེས་རིག་པད་མའི་ཚལ་ལ་གཡུ་སྦྲང་སྟོང་དུ་འཁོར་པས། །
བློ་མོས་ཚངས་པའི་དབྱངས་ཀྱིས་ང་ཚོ་རྒྱང་ལ་བསྐྱལ་སོང་། །
མཁའ་ཡི་གླང་པོ་ཁྲོས་ཏེ་ཐུགས་རྒྱུད་ཆར་གྱིས་བརླན་པས། །
ནོར་འཛིན་ཨ་མའི་ལྟོ་བར་བྱམས་པའི་མདངས་ཤིག་འཁྲུངས་ཡོང་། །
ཚངས་དབྱངས་གདངས་ལ་འཁྱུད་པའི་རིག་པའི་བུང་བ་ཁྱུ་གཅིག །
གཤོག་རྡང་དར་ལ་བྲེས་ནས་ཕུགས་འདུན་རླབས་ལ་འཇུས་ཡོད། །
ངག་གི་ཁུ་བྱུག་གདངས་ལ་སྙན་པའི་རོལ་མོ་འཁོར་ཡོང་། །
ལུས་ཀྱི་ལྡེམ་མྱུར་རྩལ་ལ་རྨ་བྱའི་སྒེག་འགྲོས་འཁྱུག་ཡོད། །
ཡིད་ཀྱི་ནམ་མཁའི་གཞི་རུ་གཤིས་ཀྱི་ཆུ་འཛིན་འཁྲིགས་ཏེ། །
དགའ་བའི་རྣམ་ཤེས་ཁྲི་འབུམ་ཚངས་དབྱངས་རྟ་ལ་བསྐྱོན་ནོ། །
འཇིག་རྟེན་ལྷ་ཚོགས་མྱོས་པའི་ཟློས་གར་དཔྱིད་དུ་བསྒྱུར་ཏེ། །
འགྲོ་དྲུག་དཔལ་གྱི་ལོངས་སྤྱོད་ཡིད་ཀྱི་དབྱར་ཟླར་ཚེས་པས། །
འབྱུང་བཞིའི་ཡུམ་གྱི་མངལ་དུ་སྤྲོ་དགའི་རྣམ་ཤེས་རུམ་ནས། །
གོ་རྟོགས་ཅང་ཤེས་རྟ་ཕོར་ཚངས་དབྱངས་ལྕག་གིས་གྲབས་ཡོད། །
ཚངས་སྲས་བཞད་པའི་སྒྲ་དབྱངས་སློབ་རའི་མངལ་དུ་སྦྲུམ་ནས། །
བློ་གསལ་གངས་ཕྲུག་སྟོང་གི་ཡིད་དབུས་ཞིང་སར་སྨིན་ཡོད། །
སྙན་འཇེབས་དབྱངས་ཀྱི་འགྱུར་ཁུག་དྲན་པའི་སྣོད་དུ་ལྟེམས་ཏེ། །
རྩོམ་རིག་དབྱངས་ཅན་ལྷ་མོར་བུ་སློབ་འཁོར་དུ་འདུས་ཡོང་། །
ཚངས་སྲས་བཞད་པའི་སྒྲ་དབྱངས་རྒན་གྱི་ངག་ལ་འཁྱིལ་ཏེ། །
གདམས་ངག་བདུད་རྩིའི་ཆབ་རྒྱུན་ཡིད་ཀྱི་གསོས་སུ་སྨིན་སོང་། །
བྱིན་རླབས་ཚིག་གི་བེམ་པོར་རྒྱན་གྱི་ཟེར་མ་འཕྲོས་ནས། །
གཞོན་པའི་སྙན་གྱི་བུ་གར་དུས་ཀྱི་འཇོལ་མོ་གྲགས་འདུག །
ཚངས་སྲས་བཞད་པའི་རང་སྒྲ་དགོན་སྡེའི་མཆོད་ཆར་འཁྱིལ་ཏེ། །
གཟན་ཤམ་དམར་པོའི་སུལ་ལ་ཚུལ་ཁྲིམས་དྲི་ངད་ལྡང་བྱུང་། །
ཌཱ་རུ་དྲིལ་བུའི་ལྗོན་ཚལ་བྱིན་རླབས་ཆར་གྱིས་བརླན་པས། །
མཁས་མང་གསེར་རིའི་ཕྲེང་བ་པད་མའི་གདན་ལ་འཁོད་འདུག །
ཚངས་སྲས་བཞད་པའི་སྒྲ་དབྱངས་དམ་པའི་ངག་ལས་འཕོས་ཏེ། །
ཤོག་དཀར་སྤྲིན་པའི་ཚལ་ལ་ཡིག་ཆུང་གཟུགས་རིས་ཕབ་ཡོད། །
ཐུགས་དགོངས་གསེར་གྱི་རྒྱ་ཕིབས་ག་ལེར་བོད་ལ་གྲོལ་བས། །
གསང་བའི་མདུད་པ་དམ་པོ་ཚིག་འབྲུའི་གསེབ་ཏུ་ལྷོད་འདུག །
ཚངས་སྲས་བཞད་པའི་སྒྲ་དབྱངས་ཉི་ཟླའི་མགུལ་ལ་དཔྱངས་པས། །
བློ་གསལ་སྐར་མའི་འཛུམ་ཆུང་མཚན་མོའི་གསང་བས་དྲངས་སོང་། །
ཀུན་གསལ་མཐིང་ཀའི་ཞལ་རིས་སྒོ་གླེགས་བཞིན་དུ་བརྐྱངས་ཏེ། །
སྤྲོ་དགའི་གཡུ་འབྲུག་སྔོན་མོ་བག་གསར་ཁྱིམ་ལ་བསུ་ཆོག །
ཚངས་སྲས་བཞད་པའི་སྒྲ་དབྱངས་མེ་ཏོག་འདབ་མར་འཁྱུད་པས། །
དོན་གྱི་ཟེའུ་འབྲུ་སྣུམ་པོ་ཡིག་འབྲུའི་གཤོག་པར་འཐམས་ཏེ། །
སྤང་ལྗོངས་གཡང་དཀར་ཚལ་ནས་རྫི་བོའི་ངག་ཏུ་འཁྲུངས་སམ། །
དམ་པའི་མཚན་གྱི་དབྱར་རྔས་ས་ཆེན་ལྟོ་བ་གཤགས་སོང་། །
མཁྱེན་དཔྱོད་མཚོ་མོའི་རླབས་ལ་ངེས་དོན་གསེར་ཉ་འཁྱུག་སྟེ། །
འགྲོ་བའི་དོན་ཀུན་ཐུགས་རྗེ་སྙིང་རྗེ་རླབས་ལ་སྤྲུལ་བའི། །
དམ་པའི་མཚན་གྱི་ཟུར་ཞིག་ཐབས་ཀྱིས་དྲས་པའི་སྦྱོར་བ། །
ཐ་སྙད་སྟོང་གི་སྲོག་ལ་རྟགས་དང་མཚན་མས་ཞུགས་ཡོད། །
ཚངས་དབྱངས་གདངས་ལ་འཁྱུད་པའི་ངེས་དོན་དམ་པའི་སྐུ་ཚེ། །
སྲིད་མཐའི་བར་དུ་བརྟན་ཞེས་སྨོན་ལམ་ལོག་ལ་མི་འཇོག །
སྐུ་གསུང་ཐུགས་ཀྱི་ནོར་ལ་དུས་མིན་འཚེ་བ་མེད་པར། །
འགྲོ་བའི་མྱ་ངམ་ཐང་ལ་ཐུགས་ཀྱི་སྦྲང་ཆར་འབེབས་མཛོད། །
ཨ་མ་དང་ལོ་ཟླའི་གས་ཆག
ལོ་རྒན་བདུན་ཅུས་དུང་སོ་དཀར་མོའི་ཕྲེང་ཐགས་གནོང་མེད་སེམས་ཀྱིས་བཅད། །
ལོ་རྒན་བདུན་ཅུས་དབུ་སྐྲའི་ཞྭ་མོ་དགོས་མེད་དབུ་ལ་བཙན་གྱིས་གསོལ། །
ལོ་རྒན་བདུན་ཅུས་མིག་གི་རྒྱལ་མོ་འཇབ་བུའི་ཟོལ་དུ་དལ་གྱིས་འཕྲོག །
ལོ་རྒན་བདུན་ཅུས་ཨ་མའི་སྐུ་ལུས་བརྙས་པའི་བརྡ་རུ་གཞུ་ལ་བཀུག །
ཨ་མ་གནམ་གྱི་རྒྱལ་མོ་མིན་ཡང་ཨ་མའི་སེམས་རྒྱ་གནམ་ལས་ཡངས། །
ཨ་མ་ས་ཡི་གཞི་འཛིན་མིན་ཡང་ཨ་མའི་གཤིས་ཀ་སྤང་ལས་མཛེས། །
ཨ་མ་ཐམས་ཅད་མཁྱེན་པ་མིན་ཡང་ཨ་མས་ཐམས་ཅད་མཁྱེན་ཡང་སྲིད། །
ཨ་མ་ལོ་ཟླའི་རྒས་གཉེར་ཁྲོད་ན་མིག་ཟུང་རབ་རིབ་བུ་ལ་འཁོར། །
ཁ་སང་མཐིང་སྨུག་སྦྲ་ཡི་འདབ་ན་ཨ་མའི་འཛུམ་ཆུང་མེ་ཏོག་འཐོར། །
ཁ་སང་ཐོད་དཀར་འབྲི་མོའི་འགྲམ་ན་ཨ་མའི་འཇོ་གླུའི་གཏམ་རྒྱུད་ལུས། །
ཁ་སང་རང་ཁྱིམ་དྲོན་མོའི་དབྱིངས་ན་ཨ་མའི་བརྩེ་མཚར་སྤྲིན་དུ་ཆགས། །
ཁ་སང་བུ་ཆུང་ང་ཡི་མདུན་ལམ་ཨ་མས་རྔུལ་ཆུས་ཡང་ཡང་བཀྲུས། །
དེ་རིང་བསམ་གཞིག་ལྕི་མོའི་ཀློང་ན་ཨ་མས་རྔན་པ་གྲངས་སུ་རྩི། །
དེ་རིང་རྒོད་པོ་འཕུར་བའི་ཤུལ་ན་ཨ་མས་དྲན་པའི་སྔས་གཞི་བརླན། །
དེ་རིང་འཚོ་བ་མགུར་དུ་བཞེངས་ཀྱང་ཨ་མས་དྲན་པ་ཟིན་ཚོད་མེད། །
དེ་རིང་ཉི་ནུབ་དགོང་ཁའི་ཁིས་ན་ཨ་མའི་ལུས་པོ་ལམ་ལམ་འཚེར། །
ཨ་མས་འཇིག་རྟེན་སྟེགས་བུར་བཞེངས་ཏེ་དགའ་སྐྱོའི་ཟློས་གར་ཅི་ཡང་འཁྲབ། །
ཨ་མས་ཟུངས་ཁྲག་ཇ་རུ་སྐོལ་ནས་བུ་ལ་མགྲོན་ཁ་མང་དུ་བྱས། །
ཨ་མས་ངག་ཚིག་ཆུ་རུ་གདུས་ནས་བསླབ་བྱའི་གཡོས་སྦྱོར་བུ་ལ་བརྩམས། །
ཨ་མས་སྣོད་བཅུད་འདྲི་གཞིའི་ཁྲོད་ནས་སྤོབས་པའི་སྙིང་སྟོབས་ལན་དགུར་བཙས། །
ང་ཡི་སྙན་ངག་ཚིག་གི་བར་ན་ཨ་མའི་རྒས་གཉེར་ལྟེབས་བཞིན་ཡོད། །
ང་ཡི་ཐུན་གསུམ་རྨི་ལམ་ཁྲོད་ན་ཨ་མའི་བཀའ་དྲིན་བཟླ་བཞིན་ཡོད། །
ང་ཡི་སེམས་ཀྱི་གཡུ་སྦྲང་གཞོན་ནུ་ཨ་མའི་ལུས་ཀྱི་པདྨར་འཁོར། །
ང་ཡི་འཚོ་བའི་རི་སུལ་རེ་ན་ཨ་མར་དུངས་པའི་རྡེའུ་འབུམ་སྤུངས། །
ཨ་མ་བདག་གི་མཚན་ལྗོངས་གསལ་བའི་རྒྱུ་སྐར་ཁྲོད་ཀྱི་ཟླ་བ་ཡིན། །
ཨ་མ་བདག་གི་ལམ་སྣ་འདྲེན་པའི་ཐོ་རེངས་བསུ་བའི་སྐར་ཆེན་ཡིན། །
ཨ་མ་བདག་གི་རྨོངས་བློ་གཏོར་བའི་གནམ་ལྕགས་ཐོག་གི་དོ་ཡ་ཡིན། །
ཨ་མ་བདག་གི་འགྲོ་འདུག་སློབ་པའི་ལས་ཀྱི་སློབ་དཔོན་དང་པོ་ཡིན། །
དུས་ཀྱི་གོམ་འགྲོས་མདུན་དུ་བསྐྱོད་ན་ཨ་མའི་སེམས་ཀྱི་གཏིང་སར་ལྷུང་། །
དུས་ཀྱི་སྲིན་མོའི་ཁྲོ་གཉེར་དབུས་ན་ཨ་མའི་སེམས་ཁྲལ་ཉམས་སུ་ཐག །
དུས་ཡུན་ཞིག་གི་མནར་གཅོད་དྲག་པོས་ཨ་མ་སྟོན་གྱི་སྡོང་ལོར་འཁུམས། །
དུས་ལ་བྱམས་པའི་བརྩེ་བ་དབེན་ཡང་བདག་གི་བརྩེ་འཕྲིན་རི་བཞིན་བརྩིགས། །
ཉིན་དང་མཚན་གྱི་གོ་རིམ་བར་ནས་ཨ་མ་ཡིད་ཀྱི་གསོས་སུ་སྨིན། །
ཨ་མའི་བཀའ་དྲིན་སྙིང་ལ་འཕགས་པས་ལུས་ཀྱི་འཁྲི་ཤིང་ལྕུག་ལྕུག་འདར། །
ཨ་མའི་ལང་ཚོ་མིག་ལ་ཤར་ན་དོན་གྱི་སྙིང་པོས་ཀུན་ནས་དབེན། །
ཨ་མའི་འདས་སོང་གཏམ་རྒྱུད་ཆུ་མོ་དྲན་པའི་དབུས་སུ་རླབས་ཀྱིས་འཕྱུར། །
ཨ་མའི་བཀའ་དྲིན་ཡི་གེའི་དྲུག་མ་རྨི་ལམ་ཞིང་ན་ཡང་ཡང་ཟླས། །
ཨ་མའི་རྔུལ་ཆུའི་ཐིགས་པ་དཀར་པོ་དོན་སྣོད་ཁམས་ལ་ཡང་ཡང་འཁྱིལ། །
ཨ་མའི་ལྷག་བསམ་ཚིག་གི་སྦྱོར་བ་རྟག་ཏུ་ངག་ལ་ཡང་ཡང་འཁོར། །
ཨ་མའི་བཀའ་དྲིན་རི་རབ་ལྷུན་པོ་འདྲེན་བྱེད་ཟུང་གི་འབེན་ལ་ཕོག །
འཇིག་རྟེན་མ་ཡུམ་ཡོད་ཚད་གནམ་གྱིས་སྲུང་།
ནམ་རྒྱུན་དུ། མུན་ནག་ཅེས་པའི་ཡོལ་བ་དེས་བདག་གི་མིག་ཟུང་བསྒྲིབས་ཡོང་དུས། ངས་ཞེད་སྣང་ཞིག་དང་ལྷན་དུ་ཨ་མ་ལན་འགར་འབོད་དགོས་བྱུང་། དེ་ནི་ངས་དག་ཞིང་གཞན་ལ་བཞུད་སོང་བའི་ཨ་མར་རྗེས་དྲན་ཙམ་བྱ་འདོད་པ་ཡིན་ལ། ངས་མཐོང་ཡུལ་དུ་མ་གྱུར་བའི་ཨ་མའི་ཡན་ལག་རེ་རེར་ལག་པས་ཡང་ཡང་རེག་འདོད་པས་ཡིན།
དེ་རིང་ནི་བདག་གི་ཨ་མ་འགྲུལ་བཞུད་ལ་ཆས་པའི་ལོ་ལྔ་བ་ཡིན། ཕྱི་དྲོ་དེར་ཕུ་བོས་ཁ་པར་ལས་ཨ་མ་ནད་གཞིའི་གདོན་བགེགས་ཤིག་གིས་གློ་བུར་དུ་བཟུང་བར་བསྒྲགས་པས། ང་རང་གི་ལུས་ངག་ཡིད་གསུམ་དང་དབང་པོ་རྣམ་ལྔ་ལའང་ཡིད་ཆེས་དཀའ་བའི་ཚོར་ཤེས་ལྡོམ་པོ་ཞིག་གིས་ཀུན་ནས་བསྡམས་ཏེ་མིག་ཆུ་སྐྱུར་པོ་ཞིག་གདོང་ལ་དབང་མེད་འདྲིལ་བྱུང་།
རྒྱུ་མཚན། ངའི་ཨ་མ་དགུང་ལོ་དོན་གསུམ་ཡིན་ཡང་ད་དུང་རང་གི་སྐ་རགས་རང་གིས་བཅིངས་ཐུབ་ལ། རང་གི་སྐྲ་ལོ་རང་གིས་ཤད་ཐུབ་ཅིང་། ཕར་བཤད་ཚིག་གི་བརྡ་དག་ཅིང་ཚུར་བཤད་དོན་གྱི་གནད་གོ་བའི་གཞོན་ཉམས་ཡོད་པས། རུ་ཁ་ཁྱིམ་མཚེས་དང་ངེད་མིང་སྲིང་ཚོར་མེད་དུ་མི་རུང་བའི་མཛའ་མཐུན་གྱི་འོད་ཕུང་ཞིག་གམ་སེམས་རྟེན་གྱི་རྒྱབ་རི་ཞིག་ཡིན་པས་སོ།
ངས་ལས་གནས་ལ་གནང་བ་ཞུས་ཏེ་ཉིན་ཞག་གཉིས་ཀྱི་སེམས་ངལ་གྱིས་ཡུལ་ལ་ཐོན་དུས་ནམ་གུང་གི་དུས་ཚོད་དང་པོ་རེད། ངའི་ཕུ་ནུ་མིང་སྲིང་ཚོས། ངའི་རུ་ཁ་ཁྱིམ་མཚེས་ཚོས། ངའི་ཨ་ཁུ་ཨ་ནེ་ཚོས། ངེད་ཚང་གི་ཁྱིམ་གཞི་འཁྱགས་པ་འདི་སེམས་གསོ་དང་ཡིག་དྲུག་གིས་གསོ་བཞིན། ངའི་ཨ་མའི་རྣམ་ཤེས་ལ་ལམ་བྲོ་མོད་པོ་ཞིག་དང་། མིག་ཆུ་མང་པོ་ཞིག་གིས་བསྐྱེལ་མ་བྱེད་རྩིས་འདུག ངས་ངུ་ངག་དང་མཆི་མས་བརྣངས་པའི་མགྲིན་སྒོ་ནས། ཨ་མ། ང་ཕྱིར་ལ་ཐོན་ཡོད། ཁྱེད་ལ་ཞེན་ཆགས་དང་འཁྲེང་སེམས་མེད་པར་གྱིས། ཁྱེད་ལ་འཇིགས་སྐྲག་དང་ངན་སོང་མེད་པར་གྱིས། ཞེས་ལབ་པ་ཡིན་ལ། ཨ་མའི་ངག་གི་སྒོ་མོ་སྔར་ནས་བསྡམས་ཟིན་ཡང་མཆུ་སྒྲོས་འགུལ་ཙམ་འགུལ་ཙམ་བྱེད་པའི་སྣང་ཚུལ་ལས། ཕྲན་ལ་གདམས་ངག་གི་ཆབ་རྒྱུན་གང་ཞིག་འཇོ་བཞིན་ཡོད་ཀྱང་སྲིད་ལ། ཕྲན་ལ་དྲན་གདུང་གི་སྡུག་ཡུས་གང་ཞིག་ཞུ་བཞིན་ཡོད་ཀྱང་སྲིད། ཡང་ན། ཕྲན་ལ་གྱེས་གཏམ་གྱི་སྙིང་ཕུར་གང་ཞིག་གདབ་བཞིན་ཡོད་ཀྱང་སྲིད།
གང་ལྟར། ཕྱི་ཉིན་གྱི་ཉིན་གུང་ཙམ་ལ་ངའི་ཨ་མ་དག་ཞིང་གང་ཞིག་ལ་ག་ལེར་ཕེབས་སོང་། ངེད་མིང་སྲིང་ཚོའི་རེ་བའི་རྒྱབ་རི་གཅིག་པུ་འདི་ལྟར་འགྱེལ་སོང་། ངས་སྣང་ཚུལ་འདི་དག་བསམ་ཐེངས་རེ་རེར། གནོན་དཀའ་བའི་གཟེར་ཆེན་གྱི་ལྕགས་འཛེར་ཞིག་གིས་ངའི་ལྷུ་ཆེན་དང་ལྷུ་ཆུང་རེ་རེ་ཐོལ་གྱིས་ཕུག་འགྲོ་ལ། ངའི་དྲན་པའི་ནེའུ་གསེང་ན་བག་ཡངས་ཀྱིས་རྒྱུ་བའི་དགའ་སྐྱིད་དང་དགོད་སྒྲ་ཡི་བྱེའུ་ཆུང་ཚོ་ཡང་ཅི་ཞིག་གི་གཟེབ་དྲར་ཀུན་ནས་ཚུད་སོང་། །
སྡེ་གྲོང་འདིའི་མི་ཁ།
སྡེ་གྲོང་འདིར། ཚིག་ལ་རྭ་དང་རྭ་ལ་ཙོར་ལོ་འདོགས་མཁན་གྱི་སྐྱེས་པ། སྐྱེས་མ། དཔོན་པོ་དང་འབངས་མི། ལོ་ལོན་དང་བྱིས་པ་ཚོ། གཟན་ལ་འདུར་བའི་རི་སྤྱང་བཞིན། རི་གསུམ་གྱི་རྩེ་དང་ལུང་གསུམ་གྱི་མདོ་ན། འདུར་རྒྱུགས་ཀྱིས་འཚོ་ཞིང་། འཚོལ་སྙེག་གིས་འདུར།
དམའ་མོ་སྤང་གཞོང་ནས་རྣ་བ་ཁྲུ་གང་བླགས་ཤིང་། མཐོན་པོ་རི་རྩེ་ནས་འདྲེན་བྱེད་ཁ་གང་བགྲད་དེ། ཉིན་མོའི་རི་སུལ་ལ་རྒྱང་ལྟ་བྱས་ཤིང་། མཚན་མོའི་རུམ་ཁ་ལ་ལྐོགས་ཉན་བརྒྱབ་ནས། སྡེ་གྲོང་ཧྲིལ་པོ་འུར་ལ་བསྐུར་འགྲོ།
སྡེ་ཆེན་པོའི་མི་ཁ་རྒོད་ས་ན། ནང་ན་ཟླའི་རྩེ་མཚར་མོད་ས་ན། གཏམ་ཚིག་གསུམ་རྣ་ལ་རག་ཚེ་མ་དྲིས་པར་བཤད་འགྲོ་ལ། ལས་གང་ཞིག་མིག་གིས་མཐོང་ཚེ་སྒྲོ་འདོགས་ཀྱི་ཐབས་ལམ་སྤྱད་ནས་གླིང་བཞིར་སྤུར་བ་ཆོས་ཉིད་ཡིན།
སྡེ་གྲོང་འདི། དཔའ་བོ་ཇག་ལ་ཆས་པའི་འཐབ་ར་ཞིག་གམ། སྨན་ཤར་གནས་ལ་འགྲོ་སའི་ཁྱིམ་གཞིས་ཤིག ཡང་ན། མཁས་ཆེན་ཞབས་ཀྱིས་བཅགས་པའི་གདན་ས་ཞིག གེ་སར་རྟ་རྒྱུགས་བྱེད་སའི་ཐང་ཆེན་ཞིག གང་ལྟར། གནས་འདིའི་གཏམ་ཡན་གྱི་རླུང་བུ་རྒོད་ཅིང་། རེ་བའི་གཙང་ཆེན་ལ་འགྲམ་དར་ཆགས་འདུག
དྲིན་ཨ་མས་ཆུ་མོ་དཀྲུགས་ནས་མར་ལོ་བླངས་ཚུལ། ཡབ་དམ་པས་རྡོ་བ་བཙས་ནས་ཁུ་བ་བཙགས་ཚུལ། རྨ་ཆེན་གངས་རི་དང་། ཇོ་མོ་བླ་རི། ད་དུང་ཁྲི་ཤོར་རྒྱལ་མོ། ཡར་ཀླུང་གཙང་པོའི་ངོགས་ནས་རླབས་སྒྲ་བཞིན་བརྡོལ་བཞིན་ཡོད་ལ། ལྷགས་རླུང་ལྟར་ལྡང་བཞིན་འདུག་ཀྱང་། དེ་ནི་ལོ་རྒྱུས་ཤིག་རེད། གཏམ་རྒྱུད་ཅིག་རེད། ཁ་ཕོ་ཞིག་རེད།
སྡེ་གྲོང་འདིར། རུ་དམར་རྐྱང་ལ་འདྲེས་པ་གཏམ་ཡན་ཞིག་རེད། རྐྱང་དམར་བང་ཁ་མགྱོགས་པའང་གླེང་ཕྱོགས་ཤིག་རེད། གནས་འདིར་ཆར་ཆུ་དཀོན་ཡང་། མི་ཁའི་ལྗང་ལོ་སྔར་ལྟར་རྒྱས་བཞིན་འདུག་ལ། གནས་འདིར་བུད་ཤིང་མེད་ཀྱང་། མི་ཁའི་མེ་ལྕེ་སྔར་ལྟར་འབར་བཞིན་འདུག ད་དུང་གནས་འདི་ན་གྲང་ངར་རྒོད་ཀྱང་། མི་ཁའི་ཆུ་མོ་ལ་ཅིའི་ཕྱིར་འགྲམ་དར་མ་ཆགས།
གནས་འདིའི་མི་ཁ། འཆི་མེད་རྒས་མེད་ཀྱི་ཚེ་རིང་བུ། རྡོ་རྗེ་བྲག ཁྱིམ་ཚང་ཕྱུག་པོ་ཚང་གི་ནང་གྲོས་ན། དཔོན་པོ་སྐུ་བསོད་ཅན་གྱི་སྒྲིག་ཡིག་ན། དགོན་པ་སྡོམ་ཁྲིམས་ཅན་གྱི་བཅའ་ཁྲིམས་ན། ཉིན་མོའི་འུག་པ་བཞིན་སྐུང་ནས་འདུག་ལ། མཚན་མོའི་རི་སྤྱང་བཞིན་འཇབ་ནས་འགྲོ ལ་དགུ་ལུང་བརྒྱད་ལ་འདུར་རྒྱུགས་བྱེད་ཅིང་། ཕྱི་ནང་གསང་གསུམ་ལ་སྔོག་བཤེར་བརྒྱབ་ནས། ཚིག་གསུམ་རླུང་རྟ་རུ་སྤུར་ནས། ལས་གང་ཁ་བ་ལྟར་བྱོ་འགྲོ། ཡག་པ་བྱེའུ་འདྲ། སྙིང་རྗེ་འབུ་འབུ་འདྲ། ཡིག་ནོར་དང་ཚིག་སྐྱོན་ལ་སྡེབས་ནས་བཤད་འགྲོ་ལ། མངོན་བརྗོད་དང་བརྡ་རྙིང་ལ་བརྒྱུས་ནས་བསྒྲགས་འགྲོ་ཡང་། ཡང་སྙིང་དེ་ནི་མི་ཁ་རེད། བཤད་ཡམས་རེད། ཕུང་དཀྲུགས་རེད། སོག་ལེ་རེད། སྟ་རེ་རེད། སྤུ་གྲི་རེད། མི་ཁ་འདིས་ངའི་ལུས་ཀྱི་ཕྱི་ནང་ལ་རྨ་ཁ་མེད་པའི་རྨ་ཁ་གང་མང་བཟོས་སོང་། མི་ཁ་འདིས་ངའི་རེ་བའི་རི་བོ་སྙིལ་ཞིང་སྤོབས་པའི་མེ་ལྕེ་གཟིམ་སོང་།
སྡེ་གྲོང་འདིར། སྦྲ་མཐའ་བསྐོར་ནས་མིག་རེད། སྡེ་མཐའ་བསྐོར་ནས་རྣ་རེད། མི་ཁ་ནི་ལྕགས་མདའ་དང་འདྲ་བར་ནམ་རྒྱུན་ཁྱོད་ཀྱི་སྙིང་ལ་ཟུག་ཉེན་ཆེ། ཟུག་ཉེན་ཆེ། །