༄༅།། ཐང་ག་ཇི་ལྟར་བྱུང་བ་དང་དུས་ནམ་ཞིག་ལ་བྱུང་བ།

རྩོམ་སྒྲིག་པ།ཚེ་དཔལ། ཡོང་ཁུངས། བོད་ལྗོངས་རིག་གནས་དྲ་བ་ལས། སྤེལ་དུས། 06-08


        བོད་ཀྱི་ལོ་རྒྱུས་ཆེན་པོ་ཁག་ལས།  རྒྱལ་བོ་སྲོང་བཙན་གྱི་དུས་སུ།  བློན་པོ་མགར་གྱིས་རྒྱལ་བཟའ་ཀོང་ཇོ་བོད་དུ་གདན་འདྲེན་པ་དང་ལྷན་དུ་ཇོ་བོ་ཤཱཀྱ་མུ་ནེ་དང་བཟོ་སྣ་བཅོ་བརྒྱད་ཀྱི་དཔེ།  སྨན་དཔྱད་ཆེན་མོ་དང་།  རྩིས་ཀྱི་པོར་ཐང་བརྒྱད་ཅུ་རྣམས་ཀྱང་བོད་དུ་དྲངས།  ཕན་ཚུན་སློབ་མ་དང་བཟོ་རྩལ་པ་མངགས་སོ་ཞེས་བྱུང་བ་དང་།  ཁྲི་སྲོང་ལྡེ་བཙན་གྱིས་བསམ་ཡས་བཞེངས་སྐབས་དར་ཐང་ཆེན་མོ་གསུམ་བཞེངས་ཚུལ་བཤད་ལ། དེ་ལ་ལོ་རྒྱུས་འགའ་ཞིག་ཏུ་སི་ཐང་ཞེས་ཀྱང་འབྲི་སྣང་མོད་སྒྲ་སྒྱུར་ལ་སི་ཐང་དང་།  དོན་སྒྱུར་ལ་དར་ཐང་ཞེས་བརྗོད་པ་ཡིན་པར་སྙམ།  གང་ལྟར་ཡང་རྒྱལ་བོ་ཁྲི་སྲོང་ལྡེ་བཙན་གོང་དུ་བོད་ལ་ཐང་ག་བཞེངས་སྲོལ་དར་བ་ཤིན་ཏུ་གསལ་ལོ།།
        ཐང་ག་ལ་སྐྱ་ཐང་དང་།  ཚོན་ཐང་།  ཐང་ནག  མཚལ་ཐང་།  གསེར་ཐང་། གོས་སྐུ།  གོས་སྐུ་འབུར་མ།  འཚེམ་ཐང་།  འཐག་ཐང་།  མུ་ཏིག་གི་ཐང་ག  ཕྱིས་སུ་དར་བའི་ཆུ་རིས་མ།  ཕྱི་གླིང་ལུགས་ཀྱི་འབུར་ཚུགས་ཅན་སོགས་ཡོད།
        སྤྱིར་ཐང་ག་ནི་བོད་ཀྱི་བཟོ་དངོས་ཀྱི་གྲུབ་ཆ་གཙོ་བོ་ཞིག་ཡིན་ལ་ཁྱབ་རྒྱ་ཆེ་བ་ཙམ་དུ་མ་ཟད།  རིན་ཐང་གཞལ་དུ་མེད་པའི་བཟོ་རིག་པའི་དངོས་པོ་མང་བོ་བཞུགས་ཏེ། དཔེར་ན་ལྷ་ལྡན་སྤྲུལ་པའི་གཙུག་ལག་ཁང་དུ་བཞུགས་པའི་ཐང་སྐུའི་རྟེན་གཙོ་རྒྱལ་བོ་སྲོང་བཙན་ཡབ་ཡུམ་ཀྱི་ཐང་རྙིང་མེ་ཐུབ་མ་དང་།  དྭགས་ལྷ་སྒམ་པོའི་རྗེ་བཙུན་ཙོང་ཁ་བའི་ཐུགས་དམ་གྱི་རྟེན་བྲིས་ཐང་ཐུབ་པ་གསོ་སྦྱོང་མ་དང་།  ལྷོ་བྲག་སྐུ་སྐྱེ་བསྟན་འཛིན་ནོར་བུས་བྲིས་པའི་རྒྱུད་བཞིའི་ཐང་ག་བརྒྱད་ཅུ་སོགས་དང་།  སྡེ་དགེ་དཔལ་སྤུངས་དང་དབང་བོ་ལྷ་སྟེང་གི་ཐང་ནག་སྒྱུ་རྩལ་རིན་ཐང་བྲལ་བ་རྣམས་དང་།  དགའ་ལྡན་གསེར་ཐང་ཆེན་མོ་དང་། ཁམས་སྡེ་དགེ་དཔལ་སྤུངས་དགོན་དུ་བཞུགས་པའི་བཀའ་བརྒྱུད་གསེར་ཕྲེང་གི་གསེར་ཐང་སོགས་གསེར་ཐོག་བཞག་གམ་གསེར་ལེབ་བྱུགས་ཀྱི་ཐང་ག་རྣམས་དང་།  བཀྲ་ཤིས་ལྷུན་པོའི་པཎ་ཆེན་སྐུ་ཕྲེང་རིམ་བྱོན་གྱི་རྣམ་ཐར་གྱི་འཚེམ་ཐང་བཟོ་རྩལ་འགྲན་ཟླ་དང་བྲལ་བ་རྣམས་དང་།  འབྲི་མཐིལ་འོག་མིན་བྱང་ཆུབ་གླིང་གི་ཨ་ཕྱི་དཀོར་མཛོད་ཆེན་མོའི་ནང་དུ་རྒྱ་ནག་གོང་མས་ཀརྨ་པཀྵི་ལ་ཕུལ་བའི་རྒྱལ་བ་མི་ཕམ་མགོན་པོའི་གོས་སྐུ་ལྷུ་ལག་བཅུ་གཅིག་ཡོད་པ་བོད་ཙམ་ན་ཆེ་བ་སོགས་འཚེམ་ཐང་གི་རིགས་དང་།  བླ་བྲང་བཀྲ་ཤིས་འཁྱིལ་དུ་བཞུགས་པའི་སྐུ་སྐྱེ་བསྟན་འཛིན་རྒྱ་མཚོས་བཞེངས་པའི་བྱམས་པའི་གོས་སྐུ་ཆེན་མོ།  དར་མདོ་རྡོ་རྗེ་བྲག་གི་གུ་རུ་མཚན་བརྒྱད་ཀྱི་གོས་སྐུ་ཆེན་མོ་སོགས་དགོན་སྡེ་ཁག་གི་གོས་སྐུ་ཆེན་མོ་དང་།  སྐུ་འབུམ་གྱི་གོས་སྐུ་འབུར་མའི་གནས་བཅུའི་ཐང་ག་ཁག་དང་།  ཁྲ་འབྲུག་སྒྲོལ་མ་ལྷ་ཁང་དུ་མུ་ཏིག་གི་ཐང་ག་སྤྱན་རས་གཟིགས་སེམས་ཉིད་ངལ་གསོའི་སྐུ་ཐང་དང་། འབྲི་མཐིལ་འོག་མིན་བྱང་ཆུབ་གླིང་གི་མུ་ཏིག་ཐང་ག་སོགས་མུ་ཏིག་ལས་བསྒྲུབས་པའི་ཐང་ག་རྣམས་དང་།  དཔལ་སྤུངས་ཀྱི་རྗེ་བཙུན་མི་ལའི་སྐུ་ཐང་ཆུ་རིས་མ་དང་།  ཁམས་དཀར་མཛེས་སྟོང་འཁོར་དགོན་གྱི་གནས་བརྟན་ཆུ་རིས་མ་སོགས་སྣག་མདངས་འབའ་ཞིག་ལས་གྲུབ་པའི་ཐང་ག་ཁག་དང་།  མཚལ་ཐང་ནི་བོད་ཁམས་ཀུན་ཏུ་ཁྱབ་པ་དང་།  གཞན་ཡང་སྔོན་བྱོན་མཁས་གྲུབ་རྣམས་ཀྱིས་ཕྱག་སོར་འདུ་བྱེད་ལས་བྱུང་བའི་ཐང་སྐུ་རྩ་ཆེན་ཡང་མང་སྟེ།  དྭགས་ལྷ་སྒམ་པོའི་སྒམ་བདེ་རྩེའི་གཟིམ་ཆུང་དུ་བཞུགས་པའི་སྒྲ་སྒྱུར་མར་པའི་ཕྱག་བྲིས་ནཱ་རོའི་སྐུ་ཐང་དང་།  དྭགས་ལྷ་སྒམ་པོའི་མགོན་ཁང་དུ་མཉམ་མེད་དྭགས་པོ་ལྷ་རྗེའི་ཕྱག་བྲིས་མགོན་པོ་གཙོ་འཁོར་དང་བཅས་པ་ཡེ་ཤེས་པ་མངོན་སུམ་བཞུགས་པར་གྲགས་པ་དང་།  དགའ་ལྡན་བྱང་རྩེའི་གཟིམ་ཁང་དུ་མཁས་གྲུབ་རྗེའི་ཕྱག་བྲིས་གཤིན་རྗེ་གཤེད་དམར་གྱི་སྐུ་ཐང་དང་།  དགོན་ལུང་རྒྱུད་ཁང་དུ་རྒྱལ་དབང་དགེ་འདུན་གྲུབ་ཀྱིས་ཕྱག་བྲིས་སྒྲོན་གསལ་དཔེ་མཁས་གྲུབ་རྗེས་རབ་གནས་མཛད་པ་དང་།  དགོན་པ་དེའི་ལྷ་མོ་བླ་བྲང་གི་ནང་རྟེན་གཙོ་བོ་ལྷ་མོའི་སྐུ་ཐང་སྨན་ཐང་བའི་ཕྱག་བྲིས་དང་།  ཁམས་དཔལ་སྤུངས་དགོན་དུ་བཞུགས་པའི་སི་ཏུ་ཆོས་ཀྱི་འབྱུང་གནས་ཀྱི་ཕྱག་བྲིས་སྐྱེས་རབས་དཔག་བསམ་འཁྲི་ཤིང་སོགས་དང་།  སྐུ་འབུམ་དུ་བཟོ་རྒྱལ་བི་ཤྭ་ཀརྨའི་རྣམ་འཕྲུལ་དུ་བསྔགས་པ་ཆེ་ཤེས་བློ་བཟང་བཤེས་གཉེན་གྱི་ཕྱག་བྲིས་ཐང་ག་ཁག་སོགས་བགྲངས་ཀྱིས་མི་ལང་བ་བཞུགས་པ་ལས་དཔེ་བརྗོད་ཀྱི་ཚུལ་དུ་འགའ་ཞིག་བཀོད་པ་ལས།  ཞིབ་མོ་དགོན་པ་གཅིག་གི་ཐང་ག་ཡང་ངོ་སྤྲོད་དཀའ་ན།  གངས་ཅན་ཡོངས་ཀྱི་ཐང་སྐུ་ནི་དེ་བས་ཀྱང་བརྗོད་པར་མི་ནུས་སོ།།


རྩོམ་ཡིག་རྗེས་མ།
༄༅།། འབྲོག་མི་རྒན་པོ།

དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས། 蜀ICP备14009601号-1