ས་སྐྱོན་ནི་ཕྱུགས་ཀྱི་མཚེར་པ་ལ་ནད་ཕོག་པའི་འགོ་ནད་ཚབས་ཆེན་ཞིག་ཡིན། སྟོན་ཁ་རུ་འདུག་སའི་ཕྱོགས་སུ་ས་སྐྱོན་ཡོད་མེད་འཚོལ་ན་བ་མོ་བཞག་པའི་སྔ་མོ་ཡར་ལངས་ནས་ས་ཡར་མར་ལ་བལྟས་ནས་བ་མོ་ཆགས་མེད་ས་གོར་གོར་ལ་ས་སྐྱོན་གྱི་ནད་འབུ་ཡོད་པ་རེད། དེའི་ཐོག་ཏུ་ཟངས་ཀྱི་སླ་ང་ཆེན་པོ་ཞིག་ཁ་མར་བསྐོར་ནས་མེ་ལ་བསྲེགས། སླ་ངའི་ནང་དུ་སྤང་འབུར་ནས་ཐོག་དུ་བ་ཚ་འདྲ་བ་མང་པོ་ཆགས་ཡོད་ན་ས་སྐྱོན་གྱི་འབུ་མེད་པར་གྱུར་རྟགས་ཡིན། སྒོ་ཕྱུགས་ཤི་བའི་ཁྲག་མ་ཆགས་ན་ས་སྐྱོན་ཡིན་པས་ས་སྐྱོན་གྱིས་ན་མྱོང་པའི་མི་ཞིག་མངགས་ནས་བཤའ་བ་དང་ཟངས་ཀྱི་སླ་ང་ཞིག་གི་ནང་དུ་བཙོ་དགོས། ཟངས་ཀྱི་སླ་ང་མ་ལོན་ན་སྣོད་གཞན་པའི་ནང་དུ་ཟངས་ལེབ་དང་ཟངས་ཕྱེ་འཕངས་ནས་བཙོ་དགོས། ཟངས་ཀྱི་ནང་དུ་ས་སྐྱོན་གྱི་ནད་འབུ་འཆི་སླ་བ་ནི་ད་ལྟའི་ཚན་རིག་གིས་ར་སྤྲོད་བྱས་ཡོད་ལ་གནའ་ནས་བཟུང་བོད་མི་ཕལ་བ་ཞིག་ཡིན་ཡང་ཟངས་སྤྱད་ནས་ས་སྐྱོན་གྱི་ནད་འབུ་མེད་པར་གཏོང་བའི་ཚན་རིག་དེ་ཤེས་ཀྱི་ཡོད་པ་རེད། 
མདོར་ན་དེ་ལྟ་བུ་མང་ནའང་ཐམས་ཅད་འདིར་ཡང་འགོད་ཐབས་བྲལ། དཔེར་ན། ཚན་རིག་གིས་ཆུ་ནང་དུ་འབུ་ཕྲ་མོ་ཡོད་པ་ཤེས་ནས་ལོ་བརྒྱ་ཚོ་གསུམ་ལས་ཡན་མིན། བོད་ཀྱིས་སྲོལ་རྒྱུན་འཚོ་བའི་ཁྲོད་དུ་གནའ་ནས་ད་བར་དུ་ས་ཁྱབ་རྡོ་ཁྱབ་ཡིན་ལ་མ་མཐའ་ཡང་ལོ་སྟོང་གཉིས་ལ་ཉེ་བའི་སྔོན་དུ་བན་བོན་གྱི་འདུལ་བ་སོགས་རིག་པའི་གཙུག་ལག་ནང་དུ་ཡིག་ཐོག་ལ་བཀོད་ཡོད་པ་རེད། དུག་སེལ་དང་ནད་འབུ་འགོག་པའང་མེ་ཡིས་དུག་སེལ་དང་ལྷ་ཤིང་ཤུག་པ། ཙན་དན་དཀར་དམར་སོགས་དྲི་ཞིམ་པའི་རིགས་ཀྱིས་དུ་བསང་བྱ། ཐང་ཁྲོམ། གུ་གུལ་སོགས་གྱིས་དུག་སྦྱོང་བར་བྱེད་པ་སོགས་མང་ངོ་།།