¤ གནས་ཆེན་གྱི་ཨ་རང་བྱོན།

 ༡༩༩༧ལོའི་དབྱར་ཟླ་བདུན་པའི་ནང་དུ་དགེ་བའི་བཤེས་གཉེན་ཆེན་པོ་རྡོ་རྗེ་དགྲ་འདུལ་སོགས་དང་མཉམ་དུ་རྒྱལ་རོང་ཡུལ་གྱི་གནས་ཆེན་ཀ་ཀོང་སེང་གེ་གནམ་མཆོང་དུ་གནས་སྐོར་འགྲོ་རྒྱུའི་སྐལ་བ་ཪྙེད་ཅིང་། ང་ཚོ་གཟའ་འཁོར་གཅིག་གི་རིང་དུ་སྒྲུབ་ཕུག་ཏུ་བསྡད་ནས་གནས་སྐོར་ཞིབ་མོ་བྱས་པ་ཡིན། དེ་ཡང་གནས་ཆེན་ཀ་ཀོང་སེང་གེ་གནམ་མཆོང་ནི་ལོ་ཆེན་བཻ་རོ་ཙ་ནས་རྒྱལ་མོ་ཚ་བ་རོང་དུ་གནས་སྒོ་བརྒྱ་རྩ་བརྒྱད་ཕྱེས་པའི་ནང་ནས་གནས་ཆེན་གཙོ་བོ་ཞིག་ཡིན། གནས་ཆེན་འདི་ནི་ད་ལྟ་རྔ་བ་ཁུལ་གྱི་ཆུ་ཆེན་རྫོང་གི་ཀ་ཀོང་འབྲོག་སྡེའི་ཁོངས་གཏོགས་སུ་གནས་ཡོད། ཀ་ཀོང་ཞེས་པ་དེ་ཡུལ་གྱི་མིང་དང་སེང་གེ་གནམ་མཆོང་ཞེས་པ་ནི་སྒྲུབ་གནས་བྲག་ཕུག་གི་གཟུགས་དབྱིབས་སེང་གེ་དཀར་མོ་གནམ་ལ་མཆོང་པ་འདྲ་བས་མཚན་འདི་གསོལ་བ་རེད། ཡུལ་མི་ཚོའི་བསང་ཡིག་སོགས་ལས་ཀ་ཀོང་ཞེས་བ་ལ་ཀ་ཀུན་ཞེས་འབྲི་ཚུལ་གཞན་ཡང་མཐོང་རྒྱུ་ཡོད། དེང་སང་ཡུལ་མི་ཀུན་གྱི་ངག་རྒྱུན་དུ་ཀ་ཀོང་ཞེས་འབོད་སྲོལ་དུ་ཆགས་འདུག

   གནས་ཆེན་ཀ་ཀོང་དུ་གནས་སྐོར་དུ་འགྲོ་དགོས་ན། ཐོག་མར་རྒྱལ་རོང་ཡུལ་གྱི་ལྟེ་གནས་འབར་ཁམས་ས་ཁུལ་ནས་རླངས་འཁོར་བསྡད་དེ་ཆུ་ཆེན་ཕྱོགས་སུ་སྤྱི་ལེ༦༠ལྷག་སོང་རྗེས་ཀ་ཀོང་ལུང་མདོར་སླེབས་ཐུབ། ལུང་མདོ་ན་རྒྱལ་རོང་བའི་ཁྱིམ་ཚང་ཁ་ཤས་འཚོ་གནས་བྱས་ཡོད། དེ་ནས་རི་རྐེད་ཀྱི་གྱ་གེ་གྱོག་གེའི་རྐང་ལམ་ཆུང་ཆུང་བརྒྱུད་དེ་དུས་ཚོད་བདུན་ཙམ་སོང་ཚེ། གནས་ཆེན་ཀ་ཀོང་སེང་གེ་གནམ་མཆོང་གི་སྒྲུབ་གནས་དེ་གནས་སྐོར་བ་ཚོའི་འདྲེན་བྱེད་ལམ་དུ་གསལ་ལེར་འཆར་ཡོང་། སྒྲུབ་ཕུག་ནི་གངས་རི་དང་རྫ་རི། སྤང་རིས་མཐའ་ནས་སྐོར་ཞིང་རྩི་ཤིང་ནགས་ཚལ་དང་། འདབ་ཆགས་སྐད་སྙན་གྱི་བྱ་རིགས་སྣ་ཚོགས། བུང་བ་འཁོར་ཞིང་ལོ་འདབ་ཡངས་པའི་མེ་ཏོག་སྣ་ཚོགས་ཀྱིས་གནས་ཆེན་ལ་མཆོད་རྫས་བྱས་ཤིང་། དྭངས་ཤིང་བསིལ་བའི་ལུང་པའི་མཚོ་དང་གསུམ་ཟུར་མཚོ། པད་མིག་མཚོ། སྨན་མཚོ། གྱིམ་ཟུར་མཚོ་སོགས་མཚོ་དང་མཚེའུ་ཉིན་མཚན་འཁོར་མོར་མཆོད་ཆུ་བཤམས་པ་ལྟར་ལགས།
   སྤྱི་ཚོགས་ཪྙིང་པའི་སྐབས་སུ་གནས་འདིའི་སྦྱིན་བདག་གཙོ་བོ་ནི་ཁྲོ་སྐྱབས་རྒྱལ་རབས་རིམ་བྱུང་དང་ཆོས་དད་མང་ཚོགས་རྣམས་ཡིན་ཞིང་། ཁ་སང་དེ་རིང་ཡང་ད་རུང་སྒྲུབ་ཕུག་གི་གཡོན་ཟུར་དུ་ཁྲོ་སྐྱབས་རྒྱལ་ཁང་དང་གྲྭ་ཤག་ཞིག་རལ་གྱི་ཤུལ་མང་བོ་མཐོང་རྒྱུ་སྣང་། གནའ་ཤུལ་དེ་དག་ལ་དཔག་ན་གནའ་དུས་སུ་གནས་འདི་དར་རྒྱས་ཆེན་པོ་བྱུང་མྱོང་བ་ཤེས་ཐུབ་པ་གསལ་པོར་མངོན། ད་ནི་ལམ་ཁྲིད་རྒན་པོ་ཚེ་མགོན་གྱིས་ངོ་སྤྲོད་དང་རྡོ་བརྐོས་ཀྱི་གནས་ཡིག་གཉིས་ཟུང་དུ་འབྲེལ་ནས་གནས་ཆེན་གྱི་ཕྱི་སྐོར་ནང་སྐོར་བར་སྐོར་གསུམ་གྱི་མཇལ་རྟེན་ཁྱད་པར་བ་དང་རང་བྱོན་ངོ་མཚར་ཅན་དག་མཐོང་ཐོས་བྱུང་བ་རྣམས་བརྗོད་པར་བྱ་བའོ།
   རྡོ་བརྐོས་ཀྱི་གནས་ཡིག་ལ་ལོ་རྒྱུས་ཀྱི་ཆར་རླུང་དྲག་པོ་ཡུན་རིང་ཕོག་པས། རྡོ་བརྐོས་ཀྱི་གནས་ཡིག་ལ་ལ་དེ་འདྲ་གསལ་མོ་མ་རེད། དེ་བཞིན་ཐོག་མར་ནང་སྐོར་དུ་རྐང་ཐང་སོང་ན་ཕལ་ཆེར་སྐར་མ༡༠ལྷག་ཙམ་གྱིས་སྐོར་བ་གཅིག་རྒྱག་ཐུབ། དེ་ཡང་སྒྲུབ་ཕུག་གི་མདུན་དངོས་སུ་གནས་འགངས་ཆེ་བའི་སྒྲུབ་གནས་སེང་གེ་གནམ་མཆོང་དང་དྭངས་ཤིང་བསིལ་བའི་སྒྲུབ་ཆུ་སེང་གེ་དཀར་མོའི་འོ་མ་རང་བྱོན་མངའ་བ་དེ་ཡུལ་མིའི་བསོད་ནམས་ཀྱི་སྟོབས་ལས་འཁྲུངས་པ་ཡིན་པ་ལྟར་བཞུགས། རྒན་པོ་ཚེ་མགོན་གྱིས་ངོ་སྤྲོད་བྱས་པ་ལྟར་ན། གནའ་སྔ་མོར་སྒྲུབ་ཕུག་ཏུ་བོན་པོའི་ལྷ་ཁང་ཞིག་དང་མཆོད་རྟེན་ཆེ་ཆུང་གཉིས་བཞེངས་ཡོད་པ་ལ། ཕྱིས་སུ་ལྷ་ཁང་མེས་འཇིག་ཐེངས་གཉིས་བྱུང་བ་དང་མཆོད་རྟེན་ཆེ་བ་ནི་བོན་ལུགས་དང་ཆུང་བ་ནི་བན་ལུགས་ཡིན། མཆོད་རྟེན་ཆེ་བ་དེ་ཞིག་རལ་དུ་གྱུར་བ་དང་ཆུང་བ་དེ་ད་རུང་མཇལ་རྒྱུ་ཡོད། ཞིག་རལ་ཆག་གྲུམ་དུ་སོང་བའི་ལྷ་ཁང་དང་མཆོད་རྟེན་གྱི་གྱང་ངོས་སུ་བོན་པའི་ལྷ་སྐུ་མང་བོ་དེང་སང་མཇལ་སྐོར་སོང་ནའང་མཇལ་རྒྱུ་ཡོད།

   དེང་སང་ལྷ་ཁང་ཞིག་གསོ་གནང་ཡོད་པ་དང་ནང་དུ་ཨོ་རྒྱན་རིན་པོ་ཆེན་དང་ལོ་ཆེན་བཻ་རོ་ཙ་ན། ཐང་སྟོང་རྒྱལ་པོ་བཅས་ཀྱི་སྐུ་བཞེངས་པ་དང་། ཟུར་དུ་བན་ལུགས་ཀྱི་དུང་འཁོར་གསར་པ་ཞིག་བཞེངས་འདུག བྲག་ཕུག་ངོས་སུ་སེང་གེ་དང་ལྷ་སྐུ་རང་བྱོན་སོགས་མཆིས་པ་ལ་སྐྱེས་བུ་རང་གིས་དག་སྣང་ལས་མཐོང་སྣང་ཡང་མི་འདྲ་བ་ཡོད་པ་གསུངས། ལོ་ཆེན་བཻ་རོ་ཙ་ནས་སྲིན་མོ་དམ་ལ་བཏགས་ནས་གར་འཁྲབ་པའི་ཞབས་རྗེས་དེ་ཁ་བ་ཐོག་ཏུ་རྐང་རྗེས་བབས་པ་བཞིན་དུ་བྲག་ངོས་སུ་ཁྲ་ལམ་མེར་མངོན་པར་གསལ། བོན་པོ་ཚོས་འཆམ་རྒྱག་པའི་སྤང་ཐང་གྲུ་བཞི་མ་ཞིག་དང་སྲིན་མོ་དམ་ལ་བཏགས་ནས་ཕུར་བ་བཏབ་རྗེས་ཀྱི་ཐང་ཤིང་སྡོང་པོ་གཉིས་སྐྱེས་ཡོད་པ་དེ་སྒྲུབ་ཕུག་གི་མདུན་ངོས་སུ་མཐོང་རྒྱུ་ཡོད། དེ་ནས་གཡས་སྐོར་བྱས་ཏེ་རྒྱབ་ཕྱོགས་སུ་སོང་ན་རྡོ་བརྐོས་ཀྱི་གནས་ཡིག་ཏུ་བྲག་རི་སེང་གེ་འདྲ་བའི་སྟེང་། ཚེ་དབང་རིག་འཛིན་ཆེན་པོ་ཡིས་སྡེ་བརྒྱད་དམ་ལ་བཏགས་པའི་ཕྱིར་ཟིལ་གནོན་དགོངས་པ་བཞུགས་པའི་གནས།། ཚེ་དབང་དྲག་པོའི་ཞབས་རྗེས་རེ།། བཻ་རོ་སྐུ་གསུང་ཐུགས་གསུམ་གྱི།། མཚོན་པའི་ཞབས་རྗེས་རྣམ་གསུམ་དང་།། བཻ་རོ་སྟག་སྤྲུལ་སྟག་རྗེས་དང་།། གཡུ་སྒྲ་ཁྱུང་སྤྲུལ་ཁྱུང་རྗེས་དང་།། དྲན་པ་ཨུ་རྒྱན་ཡབ་ཡུམ་སོགས།། ཞབས་རྗེས་རེ་རེ་མངོན་པར་གསལ།། ཞེས་པ་དང་། སྒོས་སུ་ཨ་ཡིག་རང་བྱོན་ཞིག་བྲག་ངོས་སུ་གསལ་ལེ་བ་ཡོད་པ་དེ་གནས་སྐོར་བ་ཚང་མས་མཇལ་རྒྱུ་མངའ་བ་མ་ཟད། པར་ལེན་འཕྲུལ་ཆས་ཀྱིས་པར་ལེན་ནའང་ཆོག ནང་སྐོར་གྱི་མཇལ་རྟེན་ཁྱད་མཚར་བ་རྣམས་ཕལ་ཆེར་འདི་འདྲ་ཡིན་ནོ།།

¤ གནས་ཆེན་ཀ་ཀོང་སེང་གེ་གནམ་མཆོང་གི་སྒྲུབ་གནས།

   བར་སྐོར་ནི་སྒྲུབ་ཕུག་དང་རང་བྱོན། ཕྱག་རྗེས་ཞབས་རྗེས་སོགས་མཇལ་གནས་ཆེས་མང་ས་དང་སྐོར་ཐེངས་རེ་སོང་ན་ཧ་ལམ་དུས་ཚོད་གཉིས་ཙམ་རེ་འགོར། དེ་ཡང་ཐོག་མར་མཇལ་རྒྱུ་ལོན་པ་ནི་འཇའ་གུར་ཕུག་རེད། དེ་ནས་རིམ་བཞིན་དུ་བཻ་རོ་ཙ་ནའི་བྲག་ངོས་སུ་སྐུ་རྗེས་དང་། གཡས་ཕྱོགས་སུ་ཅུང་ཙམ་སོང་ཚེ་བྲག་ཁྲོད་ན་བཀའ་བརྒྱུད་ཀྱི་སྐུ་ཞལ་རང་བྱོན་དང་སྒྲུབ་ཆུ་བསིལ་མ་རང་འབབ་ཡོད། སྒྲུབ་ཕུག་འོག་གི་བྲག་ངོས་སུ་ཆོས་དུང་དཀར་མོ་རང་གསལ་མངོན། དེའི་འོག་ཕྱོགས་སུ་སྐོར་ན་ངོ་མཚར་ཅན་གྱི་རྩ་གསུམ་སྒྲུབ་ཕུག་མཆིས་ཏེ། རྡོ་བརྐོས་ཀྱི་གནས་ཡིག་ཏུ་འདི་ནི་རྩ་གསུམ་རྡོ་རྗེའི་ཕུག་བཻ་རོ་རྩ་གསུམ་བསྒྲུབས་པའི་གནས་རང་བྱུང་རྡོ་ཡི་ཀ་བ་གསུམ་གསང་ལམ་གོམ་པ་སྤོར་ཆོག་ཡོད་དབུས་སུ་བདུད་རྩིའི་ཆུ་ཡང་འབབ་ཟབ་མོའི་གཏེར་ཁ་མང་དུ་བཞུགས་བཻ་རོ་ཙ་ནའི་ཞབས་རྗེས་གཅིག གཏེར་བདག་མཁའ་འགྲོའི་ཞབས་རྗེས་གཉིས་ངོ་མཚར་བཀོད་པ་གྲངས་ལས་འདས་ཞེས་རང་བྱོན་གྱི་རྡོའི་ཀ་བ་གསུམ་དང་བཻ་རོའི་ཞབས་རྗེས་གཅིག མཁའ་འགྲོའི་ཞབས་རྗེས་གཉིས་སོགས་དངོས་སུ་མཇལ་རྒྱུའི་སྐལ་བ་ཪྙེད་སྲིད། དེའི་ཟུར་ན་སྟག་གིས་རྔམ་སྒྲ་སྒྲོག་པའི་རྡོ་གཟུགས་རང་བྱོན་དང་མ་འོངས་པའི་གནས་སྒོ་ཕྱེ་ས་ཞེས་པའི་རྡོ་སྒོ་གྲུ་བཞི་མ་ཞིག་སྣང་། གཡས་སུ་ཅུང་ཙམ་སོང་ན་བོན་པོའི་བྱམས་མ་སྒྲུབ་ཕུག་མཆིས་ཏེ། རྡོ་བརྐོས་ཀྱི་གནས་ཡིག་ཏུ་ཐུགས་རྗེ་བྱམས་མའི་སྒྲུབ་ཕུག་ན། གཡས་སུ་ཨ་རང་བྱོན་དང་སྐུ་གཟུགས་རང་བྱོན། གཡོན་དུ་ཐུགས་བྱམས་ཞབས་རྗེས། ཞེས་བོན་པོའི་བྱམས་མའི་སྒྲུབ་ཕུག་དང་བན་དེའི་སྒྲོལ་མ་སྒྲུབ་ཕུག་ཞེས་པ་ཡུལ་མི་ཀུན་གྱི་ངག་རྒྱུན་དུ་ཆགས་ཡོད།
   དེའི་འཕྲོས་བཻ་རོའི་ཇ་བསྐོལ་རྗེས་ཀྱི་རྡོའི་སྒྱེད་པུ་རང་བྱོན་དང་དམྱལ་ཟངས་ནི་བྲག་རི་ལས་གྲུབ་པ་དང་དེ་མཇལ་རྒྱུ་ལོན་ན་དམྱལ་ཟངས་སུ་ལྷུང་མི་དགོས་པའི་ཕན་ཡོན་ཡོད་པ་སྐད། མཁའ་འགྲོ་ཡེ་ཤེས་མཚོ་རྒྱལ་གྱི་སྒྲུབ་ཕུག་ཟུར་ན་ཡོད་དེ། རྡོ་བརྐོས་ཀྱི་གནས་ཡིག་ཏུ་མཁའ་འགྲོ་ཡེ་ཤེས་མཚོ་རྒྱལ་གྱིས།། བདུད་རྩི་སྨན་སྒྲུབ་བསྒྲུབ་པའི་ཕུག་འཆི་མེད་བདུད་རྩི་འཐུང་ཆོག་འབེབ་ཅེས་པ་དང་། རང་བྱུང་སྒོ་མོའི་གཡོན་ཕྱོགས་སུ།། བྲག་རི་སེང་གེ་འདྲ་བ་ལ་སྟག་ལྷ་མེ་འབར་སྒྲུབ་ཕུག་དང་།། བཀའ་གསང་ལྷ་མོའི་ཕོ་བྲང་ཡོད།། བཀའ་རྟགས་བཻ་རོའི་ཞབས་རྗེས་གཅིག་ཅེས་སྟག་ལྷ་མེ་འབར་གྱི་སྒྲུབ་ཕུག་ཡོད། དེ་ནས་བར་དོ་འཕྲང་ངམ་དམྱལ་བ་ཆགས་ཚུལ་དང་གཡོན་ཟུར་ན་འཆི་མེད་བདུད་རྩིའི་སྒྲུབ་ཕུག་མངའ་ལགས། རྡོ་བརྐོས་ཀྱི་གནས་ཡིག་ཏུ་འཆི་མེད་བདུད་རྩི་ཕུག་རིང་ལ་གསང་ལམ་གོམ་པ་སྤོར་ཆོག་ཡོད་གཡས་གཡོན་བཻ་རོའི་ཞབས་རྗེས་སོ།། ཞེས་པ་དང་། དེའི་འོག་ཕྱོགས་སུ་སེང་གདོང་སྒྲུབ་ཕུག་མཇལ་རྒྱུ་ཡོད་དེ། རྡོ་བརྐོས་ཀྱི་གནས་ཡིག་ཏུ་བྲག་རི་ཆེན་མོ་རྩ་བ་ཡི། ཡུམ་ཆེན་སེང་གདོང་བསྒྲུབས་པའི་ཕུག་སྤྲུལ་སྐུ་སངས་རྒྱས་གླིང་བ་ཡིས་དྲན་པའི་ཡང་གསང་དྲག་པའི་རྒྱུད་ཟབ་མོའི་གཏེར་ཁ་སྤྱན་དྲངས་གནས་བཀའ།། ཞེས་འཕྲོ་མའི་ཚིག་རྣམས་མི་གསལ་བས་ཡི་གེར་འབྲི་རྒྱུ་ཧ་ཅང་དཀའ། དེ་ནས་རྣམ་རྒྱལ་མཆོད་རྟེན་དང་རང་བྱོན་རྡོའི་ཀ་བ་སྤུན་གསུམ། སྒྲུབ་ཕུག་ཐག་ཉེ་སར་ཐོན་དུས་རྡོ་བརྐོས་ཀྱི་གནས་ཡིག་ཏུ་བྲག་རི་སེང་ཕྲུག་འདྲ་བའི་འོག། ཐར་ལམ་འཛུལ་ཆོག་རང་གྲོལ་ཡོད་མི་འགྱུར་གནས་ཀྱི་བཀའ་རྟགས་སུ་བཻ་རོ་སྙིང་རྗེ་ཚད་མེད་ཀྱིས་ཞབས་རྗེས་གཅིག་ནི་གསལ་བ་ཡོད་ཅེས་པ་དང་། དེ་ནས་སྒྲུབ་ཕུག་ཕྱོགས་སུ་སྐོར་ན་བཻ་རོ་དང་ཡེ་ཤེས་མཚོ་རྒྱལ་རྣམ་གཉིས་ཀྱི་སྒྲུབ་ཕུག་དང་ཞབས་རྗེས་མཇལ་རྒྱུ་མཆིས་ལགས།
   གོང་དུ་བརྗོད་པའི་ཁྱད་མཚར་གྱི་སྒྲུབ་ཕུག་དག་ཏུ་ཡུལ་ཁམས་སོ་སོ་ནས་སྐྱེས་མཆོག་དམ་པ་དང་ལོ་པཎ་གྲངས་མེད་ཕེབས་ཤིང་སྒོམ་སྒྲུབ་ཉམས་ལེན་དང་སྐྱེ་འགྲོ་སྟོང་ཕྲག་མང་པོ་མྱ་ངན་གྱི་བྱེ་ཐང་ལས་ཐར་ལམ་དུ་དྲངས་པའོ།།
   ཕྱི་སྐོར་ནི་བར་སྐོར་དང་ནང་སྐོར་གཉིས་དང་མི་འདྲ་ལ། ཐག་ཅུང་རིང་ཞིང་སྐོར་ལམ་ཡང་འགྲོ་བདེ་མོ་ཞིག་མ་རེད། ཀྱག་ཀྱོག་གི་སྐོར་ལམ་དུ་ངོ་མཚར་གཏམ་གྱི་བང་མཛོད་དང་མཇལ་གནས་ཕུན་སུམ་ཚོགས་པ་ཡོད། སྐོར་ལམ་དུ་མ་ཎི་མ་ཏྲིའི་རྡོ་འབུམ་དང་རྡོ་རྟགས་གེ་རེ་ལངས་ཡོད་པའི་ལམ་རྟགས་ཀྱང་མང་པོ་མཐོང་རྒྱུ་ཡོད། ལྷ་བསྐོས་ཀྱི་བཻ་རོའི་བཞུགས་ཁྲི་མཇལ་རྒྱུ་དང་མཇལ་བ་རྣམས་ཁྲི་སྟེང་དུ་བཞུགས་ནས་གསོལ་འདེབས་སྨོན་ལམ་ཞུ་ཆོག དེ་ནས་སྐོར་ལམ་བརྒྱུད་ནས་སོང་ན། གཏེར་ཆུ་དང་རྡོ་རྔ་རང་བྱོན། སྟག་གིས་ཆིབས་རྟ་བསད་པ་ལ་བཻ་རོ་ཁྲོས་ནས་སྟག་བཏུལ་རྗེས་དང་དེའི་ཁྲག་བྲག་ངོས་སུ་ཐོར་ཡོད་པ་དང་། བཻ་རོས་འགྱོད་བཤགས་ཆེད་དུ་གྲུབ་རྟགས་ངང་ཐར་མདོ་རང་བྱོན་ཤར། དེའི་འཕྲོས་བཻ་རོའི་བཞེས་ཆང་དང་བཞེས་ཕོར་སོགས་མཇལ་རྟེན་ངོ་མཚར་བ་མང་པོ་མཇལ་རྒྱུ་ཡོད། ལམ་ཁྲིད་པས་ངོ་སྤྲོད་པ་ལ་སྐར་བཟང་ཉིན་བཟང་གི་ཚེ་ལ་ཆང་དྲི་སྣོམ་ཐུབ་པའང་ཡོད་ཟེར། མཐར་སློབ་དཔོན་པད་མ་འབྱུང་གནས་ཀྱི་དབུ་རྗེས་སུ་ཐོད་པ་ཐུག་ནས་སྨོན་ལམ་འདེབས་དགོས་སོ།།

   སྒྲུབ་ཕུག་གི་མདུན་ལྗོངས་སུ་ཊ་ཡིག་ཟེར་བའི་གནས་ཤིག་ཡོད་པ་ལ། སྔོན་བཻ་རོས་སྲིན་མོ་དམ་ལ་བཏགས་པའི་ཡུལ་ཡིན་སྟབས། བྲག་རི་དེའི་གཟུགས་དབྱིབས་དེ་ཊ་ཡིག་འདྲ་བའི་གཟུགས་སུ་མཇལ་རྒྱུ་སྣང་ཨགནས་ཆེན་ཀ་ཀོང་སེང་གེ་གནམ་མཆོང་གི་སྒྲུབ་ཕུག་དང་ཕྱག་རྗེས། ཞབས་རྗེས། སྐུ་རྗེས། མཆོད་རྟེན་ལྷ་ཁང་། མ་ཎི་མ་ཏྲིའི་རྡོ་བརྐོས། གྱང་ངོས་སུ་བྲིས་པ་དང་རྡོར་བརྐོས་པའི་སྐུ་བཪྙན། རང་བྱོན་ཀ་བ་དང་དུང་དཀར། རྡོ་ངོས་སུ་ཨ་རང་བྱོན་སོགས་མཇལ་རྟེན་མང་པོ་མངའ་བས། དད་ལྡན་མང་ཚོགས་ཀྱི་ཕྱག་སྐོར་དང་མཆོད་འབུལ། ཡིད་བཅོལ་སྡིག་སྒྲིབ་སེལ་བའི་གནས་མཆོག་ཁྱད་འཕགས་ཅན་ཞིག་ཏུ་གྱུར་ཡོད་དོ།།

¤ གནས་ཆེན་གྱི་རྡོའི་ཀ་བ་རང་བྱོན།