གཙང་བོ་འདི།
གྲམ་གཞུང་ན་ཐུར་དུ་འབབ་བཞིན་ཡོད།
ལོ་ཟླ་དང་གྲང་རླུང་གི་མཆེ་བར་ན།
ཐུར་ནས་ཐུར་དུ་འབབ་བཞིན་ཡོད།
གཙང་བོ་འདིས་གླུ་ལེན་ཤེས།
སེམས་རྣལ་ལ་འབབ་ཐུབ་ན།
གཙང་བོའི་གླུ་སྐད་གོ་ཐུབ།
འཇགས་པ་མེད་པའི་གླུ་སྐད་གཅིག་གོ་ཐུབ།
སྐྱོ་གདུང་གིས་ཉན་ན།
གཙང་བོས་སྐྱོ་གླུ་ལེན་གྱིན་འདུག
འཛུམ་མདངས་ཀྱིས་གསན་ན།
གཙང་བོས་སྤྲོ་གླུ་ལེན་གྱིན་འདུག
གླུ་ལེན་ཤེས་པའི་གཙང་བོ་འདི།
སུ་ཞིག་གི་སེམས་འགྱུ་དང་འདྲ་བྱུང་།
གང་ཞིག་གི་བདེ་སྡུག་དང་འདྲ་བྱུང་།
འཇིག་རྟེན་འདི་རུ་གླུ་ལེན་ཤེས་པ་མང་བོ་འདུག
གླུ་སྐད་དེ་ཡང་རང་གི་བདེ་སྡུག་དང་འབྲེལ་འདུག
གླུ་ལེན་ཤེས་པའི་གཙང་བོ་དེས།
མཚན་དཀྱིལ་ཞིག་ལ་ང་གཉིད་ལས་བསླངས་སོང།
ངས་གླུ་སྐད་མ་ཡིན་པའི་གླུ་སྐད་གང་ལ་ཉན་ཨང་།
