སྤྱི་ཟླ་8པའི་ཚེས་22ཉིན། བོད་ལྗོངས་ཀྱི་ཐེངས་ལྔ་བའི་བོད་སྨན་ངོས་འཛིན་འགྲན་བསྡུར་དེ་བོད་ལྗོངས་ལྷ་སར་དངོས་སུ་སྤེལ་བ་དང༌། འགྲན་ཞུགས་མི་སྣས་རྩྭ་སྨན་གྱི་དབྱིབས་དང་ཁ་དོག བྲོ་བ་སོགས་སྲོལ་རྒྱུན་གྱི་ངོས་འཛིན་ཐབས་ལམ་སྤྱད་དེ་སྨན་རིགས200ལྷག་ལ་ཡུལ་དངོས་ནས་ངོས་འཛིན་བྱེད་ཡོད་པ་རེད།
ཐེངས་འདིའི་བྱ་འགུལ་ནི་བོད་ལྗོངས་འཕྲོད་བསྟེན་འཆར་ལྡན་ཨུ་ལྷན་གྱིས་གཙོ་གཉེར་དང་བོད་ལྗོངས་བོད་སྨན་ཁང་གིས་དངོས་སུ་སྤེལ་བ་ཞིག་ཡིན། ཉིན་དེར་བོད་སྨན་སློབ་གླིང་དང་བོད་སྨན་ཁང་སོགས་རུ་ཁག་11གི་མི་སྣ་44དངོས་སུ་འགྲན་བསྡུར་ལ་ཞུགས་པ་དང༌། སྔ་གཞུག་གི་རིམ་པ་ལྟར་རྒྱན་བླངས་པ་དང་དུས་ཚོད་ལ་ལྟ་ཞིབ་དང་ཚོད་འཛིན་བྱས།
