ཚུལ་ཁྲིམས་རྒྱ་མཚོ། 

        ༄༅། །ཐུགས་བསྐྱེད་ལྷག་བསམ་ལྗོན་པའི་རྩ་བ་བརྟན།།རླབས་ཆེན་སྤྱོད་པའི་ཡལ་འདབ་ཕྱོགས་སུ་རྒྱས།།དོན་གཉིས་འབྲས་བུའི་ཁུར་གྱིས་རབ་དུད་པའི། །འཇམ་དཔལ་མི་ཡི་གར་བསྒྱུར་ཞི་བ་ལྷ།།གང་དེའི་རྒྱལ་སྲས་སྤྱོད་པ་རྒྱ་མཚོ་ལས། །སྐྲ་རྩེར་བླངས་པའི་ཟེགས་མའི་ཆ་ཙམ་ཡང་།།བརྗོད་པས་འགྲོ་ལ་སྨན་པའི་གཏེར་གྱུར་ན། །མཐའ་ཡས་ཡོན་ཏན་བརྗོད་པར་སྨོས་ཅི་འཚལ།།དེ་ཕྱིར་བསོད་ནམས་སྦྲང་བཅུད་མངར་བའི་རོར།།སྲེད་པའི་བློ་ཆུང་བུང་བས་མངོན་འདོད་ཀྱིས།།སྨྲ་བའི་འབབ་སྟེགས་ཡངས་པའི་སྒོ་གྲོལ་བས། །ལེགས་མཛད་སྙན་པའི་གླུ་དབྱངས་བསྒྲག་ལ་སྤྲོ།།དེ་ཡང་མགོན་པོ་འཇམ་པའི་དབྱངས་དང་ངོ་བོ་དབྱེར་མ་མཆུས་པའི་རྒྱལ་སྲས་བདག་ཉིད་ཆེན་པོ་བློ་གྲོས་མི་ཟད་པའམ།དཔལ་ཞི་བ་ལྷ་ཞེས་ཡོངས་སུ་གྲགས་པ་དེ་ཉིད་ནི།འཕགས་ཡུལ་རྡོ་རྗེ་གདན་གྱི་ནུབ་ཕྱོགས་ཡུལ་འཁོར་མོ་བཟང་ཞེས་བྱ་བར།ཡབ་རྒྱལ་པོ་དགེ་བའི་གོ་ཆ་དང་། ཡུམ་རྡོ་རྗེ་རྣལ་འབྱོར་མའི་སྤྲུལ་པར་གྲགས་པ་ཞིག་ཡོད་པ་དེ་གཉིས་ཀྱི་སྲས་སུ་སྐུ་འཁྲུངས།མཚན་ཞི་བའི་གོ་ཆ་ཞེས་བཏགས།དགུང་ལོ་དྲག་བཞེས་པའི་ཚེ་སྦས་པའི་བརྟུལ་ཞུགས་འཛིན་པའི་གྲུབ་ཐོབ་པ་ཞིག་དང་མཇལ།འཇམ་དཔལ་རྣོན་པོའི་དབང་དང་སྒྲུབ་ཐབས་ཞུས་ཏེ་སྒོམ་བཟླས་ལ་འབད་པས། རིང་པོར་མ་ཐོགས་པར་རྗེ་བཙུན་འཇམ་པའི་དབྱངས་ཀྱི་ཞལ་གཟིགས་ཤིང་།ཆོས་ཀྱི་གདམས་པ་མང་དུ་བསྩལ།དུས་རེ་ཞིག་ན་ཡབ་རྒྱལ་པོ་འདས་ནས་ཡུལ་ཁམས་དེའིི་འབངས་རྣམས་ཀྱིས་བློ་མཐུན་པར་བདག་ཉིད་ཆེན་པོ་རྒྱལ་པོའི་ཁྲི་ལ་འབྱོན་པར་གསོལ་བ་བཏབ་པ་ན།ཚེ་རབས་མང་པོར་རྒྱལ་སྲས་ཀྱི་སྤྱོད་པ་ལ་བསླེབས་ཏེ་གོམས་པ་ཀློང་དུ་གྱུར་པ་ཞིག་ཡིན་པས།སྲིད་པའི་ཕུན་ཚོགས་ལ་ཆགས་པའི་སྐབས་མེད་པ་ཞིག་ཡིན་ནའང་།ཡུལ་དེའི་འབངས་མི་རྣམས་ཀྱི་ངོ་མ་བཟློག་པར་རྒྱལ་སྲིད་ལ་ཕེབས་པར་ཞལ་གྱིས་བཞེས་ཏེ།ནངས་པར་ཁྲི་ལ་མངའ་གསོལ་རྒྱུའི་དོ་ནུབ་ཀྱི་རྨི་ལམ་དུ།སང་རང་ཉིད་སྡོད་པར་འགྱུར་བའི་ཁྲི་དེ་ལ་རྗེ་བཙུན་འཇམ་པའི་དབྱངས་བཞུགས་ནས།བུ་གཅིག་འདི་ནི་ང་ཡི་སྟན་ཡིན་ཏེ། །ང་ནི་ཁྱོད་ཀྱི་དགེ་བའི་བཤེས་གཉེན་ཡིན།།ང་དང་ཁྱོད་གཉིས་སྟན་གཅིག་ལ་འདུག་པ། །འདི་ནི་རྣམ་པ་ཀུན་ཏུ་རིགས་མ་ཡིན།།ཞེས་གསུངས་པ་དང་། འཕགས་མ་སྒྲོལ་མས་རང་གི་མའི་ཚུལ་བཟུང་སྟེ།ཆུ་ཚན་སྤྱི་བོར་བླུགས་པས། རྒྱལ་སྲས་ཀྱིས། འདི་ཅིའི་ཕྱིར་མཛད་ཅེས་ཞུས་པ་ན། འཕགས་མས།རྒྱལ་སྲིད་ནི་དམྱལ་བའི་ཆུ་ཚན་མི་བཟད་པ་ཡིན་ཏེ། དེས་ཁྱོད་ལ་དབང་བསྐུར་བ་ཡིན་ནོ།ཞེས་གསུངས་པས། རྒྱལ་སྲིད་བཟུང་དུ་མི་རུང་བར་མཁྱེན་ནས་ནུབ་དེར་གཞན་དུ་བྲོས་སོ།དེ་ནས་ཞག་ཉེར་གཅིག་ཕྱིན་པ་ན། ནགས་ཚུལ་ཞིག་གི་མདུན་དུ་ཆུ་མིག་ཆེན་པོ་ཞིག་འདུག་པ་གཟིགས་ནས་དེ་བཏུང་བར་བརྩམས་པ་ན།གློ་བུར་དུ་བུད་མེད་ཆུ་བུམ་པ་གང་འཁུར་བ་ཞིག་མདུན་དུ་ལྷགས་ཏེ་ཁྱོད་ཀྱིས་ཅི་བྱེད་ཅེས་དྲིས་པས།སྐོམ་པས་ཆུ་འདི་བཏུང་བར་འདོད་དོ་ཞེས་གསུངས་པ་ན། བུད་མེད་དེས།སྐོམ་པས་ཆུ་འདི་བཏུང་མི་རུང་བས། ངེད་ཀྱི་བུམ་པའི་ནང་གི་ཆུ་འདི་འཐུངས་ཤིག་ཅེས་བུམ་པའི་ནང་གི་ཆུ་དེ་བླུད་ནས།ནགས་ཚལ་དེའི་ཕུག་ན་རྣལ་འབྱོར་བ་ཞིག་འདུག་པ་དེའི་དྲུང་དུ་ཁྲིད།དེ་ལས་ཐེག་པ་ཆེན་པོའི་ཆོས་ཀྱི་གདམས་ངག་མང་དུ་མནོས་ཤིང་བསྒོམས་པས།སྐུ་ཚེས་འདིའི་དབང་དུ་བྱས་པའི་བདག་བས་གཞན་གཅེས་པའི་བྱང་ཆུབ་ཀྱི་སེམས་བཅོས་མ་མ་ཡིན་པ་ཐུགས་རྒྱུད་ལ་འཁྲུངས་ཤིང་།གཞན་ཡང་གཟུངས་སྤོབས་ཀྱི་ཏིང་ངེ་འཛིན་ལ་སོགས་པའི་ཡོན་ཏན་དཔག་ཏུ་མེད་པ་ལ་མངའ་བརྙེས་པར་གྱུར།རྣལ་འབྱོར་བ་དེ་ནི་འཇམ་དཔལ་དབྱངས་དང་། བུད་མེད་དེ་ནི་རྗེ་བཙུན་སྒྲོལ་མ་ཡིན་ལ།དེ་ནས་བཟུང་རྗེ་བཙུན་འཇམ་པའི་དབྱངས་ཀྱིས་རྗེས་སུ་བཟུང་སྟེ། ནམ་འདོད་དུ་ཞལ་དངོས་སུ་གཟིགས་སོ།དེ་ནས་སེམས་ཅན་གྱི་དོན་ཇི་ལྟ་བུ་ཞིག་བྱ་སྙམ་དུ་མངོན་པར་ཤེས་པས་གཟིགས་པ་ན།རྩོད་པས་རྒྱུད་འཁྲུངས་པའི་སེམས་ཅན་མང་པོ་ཞིག་གི་དོན་བྱ་དགོས་པར་གཟིགས་ནས་ཤར་ཕྱོགས་སུ་བྱོན་ཏེ་རྩོད་པ་ཆེན་པོ་བྱེད་པ་ཞིག་གི་འཐབ་ཟླ་མཛད་པས།རྫུ་འཕྲུལ་གྱིས་ཐམས་ཅད་འདུམས་པར་བྱས་ཏེ་བདེ་བ་ལ་བཀོད་དོ།།དེ་ནས་ཡང་རྒྱལ་བའི་བསྟན་པ་ལ་བྱ་བ་ཇི་ལྟར་བྱ་སྙམ་དུ་དགོངས་པ་ན།རྒྱལ་པོ་གདུག་ཅན་ཞིག་བཏུལ་ན་སྐྱེ་འགྲོ་མང་པོ་དང་།བསྟན་པ་ལ་ཕན་ཆེ་བར་གཟིགས་ནས་རྒྱ་གར་ཤར་ཕྱོགས་སུ་ཕེབས།དེ་དུས་རྒྱ་གར་ཤར་ཕྱོགས་ཀྱི་རྒྱལ་པོ་སཻངྒ་ལྔ་པ་ཞེས་བྱ་བ་དེས་བྱང་ཕྱོགས་བལ་པོ་ནས་ཤར་ཕྱོགས་རྒྱ་མཚོའི་མཐའ་ལ་ཐུག་གི་བར་དུ་དབང་སྒྱུར་བའི་སྐབས་ཡིན་ལ།རྒྱལ་སྲས་བདག་ཉིད་ཆེན་པོ་འདིས་རྒྱལ་པོ་གདུག་ཅན་འདི་ཉིད་འདུལ་བའི་ཕྱིར་དུ།རྒྱལ་པོའི་འཁོར་གྱི་ནང་དུ་ཞུགས་ཏེ།བློ་གྲོས་ཆེ་ཞིང་སྒྱུ་རྩལ་གྱི་གནས་ཐམས་ཅད་ལ་མཁས་པས་བཟོ་བའི་གནས་མང་པོ་དར་བར་མཛད།སྐབས་ཤིག་ན་གྲོང་ཁྱེར་དེར་སྐྱེ་བོ་མི་བསྲུན་པ་མང་པོ་འདུས་ཏེ་རྒྱས་པོའི་དཔལ་འབྱོར་ལ་ཐོ་འཚམས་པའི་བྱ་བ་བྱེད་པར་བརྩམས་པ་ན།རྒྱལ་སྲས་འདིས་རྒྱལ་པོའི་སྐུ་བསྲུང་བར་ཞལ་གྱིས་བཞེས།རང་ཉིད་ཀྱིས་ཡི་དམ་ལྷའི་ཕྱག་མཚན་ཤིང་གི་རལ་གྲི་ཞིག་རྒྱུན་དུ་བསྣམས་ཡོད་པ་དེ།བློན་པོ་རྣམས་ཀྱིས་མཐོང་བས། རྒྱལ་པོ་ལ།འདི་ནི་སྐྱེ་བོ་གཡོ་ཅན་ཞིག་སྟེ་ཤིང་གི་རལ་གྲི་ཞིག་ལས་མཚོན་ཆ་གཞན་མེད་ཅེས་ཞུས་པ་ན།རྒྱལ་པོ་ཁྲོས་ཏེ། རྒྱལ་སྲས་ལ་ཁྱོད་ཀྱི་རལ་གྲི་ཕྱུངས་ཤིག་སྨྲས་པས།འདི་ཕྱུང་ན་ལྷ་ཉིད་ལ་གནོད་པར་འགྱུར་རོ་ཞེས་གསུངས་པ་ན།རྒྱལ་པོ་ལྷག་པར་ཐེ་ཚོམ་སྐྱེས་ཏེ། གནོད་ཀྱང་བླ་ཡི། ངེས་པར་ཕྱུངས་ཤིག་ཟེར།འོ་ན་ལྷའི་སྤྱན་གཅིག་བཀབ་སྟེ་སྤྱན་གཅིག་གིས་གཟིགས་ཤིག་གསུངས་ཏེ། རལ་གྲི་ཕྱུང་བས།དེའི་འོད་ཟེར་གྱིས་རྒྱལ་པོའི་མིག་གཅིག་ཞར་བ་དང་།རྒྱལ་པོའི་བཟོད་པར་གསོལ་ཏེ་སྐྱབས་གནས་སུ་མཆོད་ཅིང་བསྙེན་བཀུར་ཕུན་སུམ་ཚོགས་པ་བྱས།ཕྱིན་ཆད་རྒྱལ་སྲིད་ཆོས་བཞིན་སྐྱོང་བ་དང་། ཆོས་གཞི་ཉི་ཤུ་འཛུགས་པར་བསྒོས་པ་ལྟར།རྒྱལ་པོས་ཁས་བླངས་སོ། དེ་ནས་རྒྱལ་སྲས་བདག་ཉིད་ཆེན་པོ་ནཱ་ལེནྡྲར་བྱོན།པཎྜི་ཏ་རྒྱལ་བའི་ལྷ་ལས་རབ་ཏུ་བྱུང་སྟེ། མཚན་ཞི་བ་ལྷ་ཞེས་བཏགས།མཁན་པོ་དེའི་དྲུང་དུ་སྡེ་སྣོད་གསུམ་ལ་སྦྱངས་པས་མཁས་པའི་ཕུལ་དུ་ཕྱིན་པར་གྱུར་ཅིང་།ལྷག་པར་མགོན་པོ་འཇམ་པའི་དབྱངས་ལས་དངོས་སུ་ཆོས་གསན་ཏེ།མདོ་སྔགས་ཀྱི་བཀའ་དང་གདམས་ངག་མ་ལུས་པ་ཐུགས་སུ་ཆུད།དེར་པཎྜི་ཏ་རྣམས་དང་ལྷན་ཅིག་ཏུ་བཞུགས་ཤིང་ཕྱི་ནང་གི་གཡེང་བ་ཐམས་ཅད་བཅད་དེ།ནང་དུ་ཡང་དག་འཇོག་ལ་རྩེ་གཅིག་ཏུ་བཞུགས་པས་ས་ལམ་མཐོན་པོར་བྱོན་ཞིང་།བསླབ་པ་ཀུན་ལས་བཏུས་པ་དང་། མདོ་སྡེ་ཀུན་ལས་བཏུས་པ་སོགས་རྒྱལ་སྲས་ཀྱི་སྤྱོད་པ་རླབས་པོ་ཆེ་སྟོན་པའི་བསྟན་བཅོས་བརྩམས་པ་དང་།རང་དང་གཞན་གྱི་ཚེ་རབས་བརྒྱ་སྟོང་དྲན་པའི་མངོན་པར་ཤེས་པ་ཐོབ་པ་དང་།རྫུ་འཕྲུལ་གྱིས་ཡུལ་ལ་ཐོགས་པ་མེད་པར་འཇུག་པ་སོགས།ནང་དུ་ས་དང་ལམ་གྱི་རྟོགས་པ་མཐོན་པོ་ལ་མངའ་བསྒྱུར་ན་ཡང་། ཕྱི་ཚུལ་གྱི་སྤྱོད་པ་ནི་ཁ་ཟས་ཀྱང་འབྲས་བྲེ་བོ་ཆེ་ལྔ་ལྔ་གསོལ་བ་དང་།ཉིན་མཚན་ཁོར་མོ་ཡུག་ཏུ་ཉལ་བ་དང་། བཤང་གཅི་འདོར་བ་མ་གཏོགས།ཐོས་བསམ་སྒོམ་གསུམ་གྱི་བྱ་བ་གང་ཡང་མ་མཛད་པས།བྷུ་སུ་ཀ་སྟེ་འདུ་ཤེས་གསུམ་པ་བར་གྲགས་སོ།དེའི་ཚེ་མངོན་ཤེས་མེད་པའི་དགེ་འདུན་རྣམས་ཀྱིས། རབ་ཏུ་བྱུང་བའི་ལས་ནི་འཁོར་ལོ་གསུམ་གྱི་ལས་ལ་བརྩོན་པ་ཡིན་པས།བྷུ་སུ་ཀ་འདིས་དད་པས་བྱིན་པ་ལོངས་སུ་སྤྱོད་མི་རུང་བས།དགེ་འདུན་གྱི་གནས་ནས་བསྐྲད་དགོས་པར་བསམ་ཞིང་། འོན་ཀྱང་རྒྱལ་པོའི་རིགས་སྲས་ཡིན་པས།བཙན་ཐབས་ཀྱིས་སྐྲོད་མི་ནུས་པར་མདོ་འདོན་རེས་བྱས་ན་འདི་ལ་འདོན་རྒྱུ་མེད་པས། རང་འབུད་བྱེད་ཅེས་བགྲོས་ཏེ།མདོ་འདོན་པར་གསོལ་བས། རྒྱལ་སྲས་འདིས་དེ་ལྟ་བུ་བདག་གིས་ག་ལ་ནུས་ཞེས་ཞལ་གྱིས་མ་བཞེས།སླར་ཡང་ནན་གྱིས་གསོལ་བས། འོ་ན། གདན་ཁྲི་རྩིགས་དང་འདོན་པར་བྱའོ། ཞེས་གསུངས་པ་ན།ནཱ་ནྡྲའི་དགེ་འདུན་ཐམས་ཅད་འདུས་པའི་དབུས་སུ་ཁྲི་ཧ་ཅང་མཐོན་པོ་ཞིག་བཤམས་ཏེ། བྷུ་སུ་ཀ་ནི་ཁྲིའི་སྟེང་འཛེག་ཀྱང་མི་ཤེས་སོ་སྙམ་པ་ན།རྒྱལ་སྲས་འདིའི་ཕྱག་གིས་ཁྲི་ཅུང་ཟད་མནན་པས། ཁྲིའི་མཐོ་དམན་རན་པར་གྱུར་པས།ཐམས་ཅད་ཀྱི་ཡིད་ཐེ་ཚོམ་དུ་གྱུར། དེ་ནས་ཁྲིའི་སྟེང་དུ་བཞུགས་ཏེ།མདོ་སྔོན་ཆད་གྲགས་པ་ཞིག་འདོན་ནམ་མ་གྲགས་པ་ཞིག་འདོན་ཞེས་དྲི་བ་གནང་ཚེ། ཐམས་ཅད་ཀྱིས་ཚོད་བགམ་པའི་ཕྱིར་མ་གྲགས་པ་ཞིག་གསུངས་བར་ཞུ་ཞུས་པས།རྒྱལ་སྲས་བདག་ཉིད་ཆེན་པོ་འདིས། བདེ་གཤེགས་ཆོས་ཀྱི་སྐུ་མངའ་སྲས་དང་བཅས།།ཕྱག་འོས་ཀུན་ལའང་གུས་པར་ཕྱག་འཚལ་ཏེ། ། བདེ་གཤེགས་སྲས་ཀྱི་སྡོམ་ལ་འཇུག་པ་ནི།།ལུང་བཞིན་མདོར་བསྡུས་ནས་ནི་བརྗོད་པར་བྱ། །ཞེས་པ་ནས། གང་ཚེ་དངོས་དང་དངོས་མེད་དག།བློ་ཡི་མདུན་ན་མི་གནས་པ།།ཞེས་པའི་ཚིག་མཚམས་ནས་གསུང་བཞིན་དུ་རྫུ་འཕྲུལ་གྱིས་སྐུ་ནམ་མཁའ་ལ་འཕགས་ཏེ།ཇེ་མཐོ་ཇེ་མཐོར་སོང་ནས་མཐར་སྐུ་མི་སྣང་ཞིང་།གསུང་གི་སྣང་བ་བར་མ་ཆད་པར་མཇུག་མ་རྫོགས་ཀྱི་བར་དུ་གྲགས།དེ་ཚེ་པཎྜི་ཏ་རྣ་བའི་མངོན་ཤེས་དང་། མི་བརྗེད་པའི་གཟུངས་ལ་དབང་འབྱོར་བ་རྣམས་ཀྱིས་བློ་ལ་བཟུང་།ཁ་ཆེ་བ་རྣམས་ཀྱིས་བསྔོ་ལེ་མི་འདོད་པར་ལེའུ་དགུ་ཡོད་པར་བཟུང་སྟེ།མཆོད་བརྗོད་རང་གིས་སྦྱར། ཤར་བ་རྣམས་ཀྱིས་ཤོ་ལོ་ཀ་བདུན་བརྒྱ་ལས་མེད་པར་བཟུང་སྟེ།མཆོད་བརྗོད་དབུ་མ་རྩ་བའི་དེ་བཅུག དེ་ལ་བཤགས་ལེ་དང་། ཤེར་ལེ་ཆད་པར་གྲགས། ཡུལ་དབུས་པ་རྣམས་ཀྱིས་མཆོད་བརྗོད་དང་བསྔོ་ལེ་བཅས་ཤོ་ལོ་ཀ་སྟོང་།ལེའུ་བཅུའི་བདག་ཉིད་དུ་འདོད་པ་དང་། ཡང་། བསླབ་པ་ཀུན་ལས་བཏུས་པ་ཡང་།།ངེས་པར་ཡང་དང་ཡང་དུ་བལྟ། ། ཡང་ན་རེ་ཞིག་མདོར་བསྡུས་པ།།མདོ་སྡེ་ཀུན་ལས་བཏུས་པ་བལྟ། །ཞེས་གསུངས་པའི་བསྟན་བཅོས་གཉིས་པོ་གང་ཡིན་སྙམ་དུ་ཐེ་ཚོམ་དུ་གྱུར་པ་ན།དུས་ནམ་ཞིག་གི་ཚེ།བདག་ཉིད་ཆེན་པོ་འདི་དྲི་ལེངྒའི་ཆར་གཏོགས་པའི་གྲོང་ཁྱེར་ཀ་ལིངྒར་གཤེགས་ཏེ།དེ་ན་བཞུགས་པ་ཐོས་པས་པཎྜི་ཏ་གསུམ་སྤྱན་འདྲེན་དུ་བཏང་།འདི་ལ་ཆོས་འབྱུང་ལ་ལར་ལྷོ་ཕྱོགས་མཆོད་རྟེན་དཔལ་ཡོན་ཞེས་བྱ་བ་ན་བཞུགས་པ་ཐོས་པས།དགེ་སློང་གཉིས་སྤྱན་འདྲེན་ཏུ་བཏང་བར་གསུངས་པའང་ཡོད།བདག་ཉིད་ཆེན་པོ་ནཱ་ལེནྡྲར་འབྱོན་པར་མ་བཞེད་པས། འོ་ན། བསླབ་པ་ཀུན་ལས་བཏུས་པ་དང་།མདོ་སྡེ་ཀུན་ལས་བཏུས་པ་ལ་བལྟ་བར་བྱ་གསུངས་པའི་དེ་གཉིས་གང་ཡིན།སྤྱོད་པ་ལ་འཇུག་པར་ལེའུ་དང་ཤོ་ལོ་ཀའི་གྲངས་ལ་བཤད་ཚུལ་མི་མཐུན་པ་གསུམ་བྱུང་ཡོད་པས།གང་ལྟར་འཛིན་དགོས། ཞེས་ཞུས་པ་ན། བསླབ་བཏུས་དང་།མདོ་བཏུས་གཉིས་པོ་ཁོ་བོའི་སྤོང་ཁང་གི་གདུང་གསེབ་ན་པཎྜི་ཏའི་ཡི་གེ་ཕྲ་མོར་བྲིས་ནས་ཡོད།སྤྱོད་འཇུག་གི་གཞུང་ཚད་ཡུལ་དབུས་པ་རྣམས་ཀྱིས་བསྡུས་པ་ལྟར་ཡིན་གསུངས་ཤིང་།གཞན་ཡང་སྤྱོད་འཇུག་དང་། བསླབ་བཏུས་གཉིས་ཀའི་མན་ངག་རྣམས་ཀྱང་རྫོགས་པར་གནང་ངོ་།ཡུལ་དེར་ནགས་ཚལ་ཆེན་པོ་ཞིག་ཡོད་པ་དེ་ན་གཙུག་ལག་ཁང་དང་དགེ་འདུན་ལྔ་བརྒྱ་ཙམ་བཞུགས་ཡོད་པ་དེར་བྱོན་ནས་དགེ་འདུན་རྣམས་དང་ལྷན་དུ་བཞུགས་ཤིང་།ནགས་ཚལ་དེ་ན་རི་དྭགས་མང་དུ་ཡོད་ཅིང་།རི་དྭགས་མང་པོ་སློབ་དཔོན་རང་ཉིད་བཞུགས་སའི་གྲྭ་ཁང་དུ་འོངས་པ་ཉིད་ཀྱིས་འཕྲལ་གྱིས་རི་དྭགས་ཀྱི་ཤ་གསོལ་བས།དགེ་སློང་རྣམས་ཀྱིས་རི་དྭགས་མང་པོ་སློབ་དཔོན་གྱི་གྲྭ་ཁང་དུ་སོང་བ་མཐོང་ཞིང་།ཕྱིར་བྱུང་བ་མ་མཐོང་ལ། ནགས་ཚལ་དེའི་རི་དྭགས་ཚོགས་པ་བྲི་བར་ཤེས་སོ།དེ་ནས་དགེ་འདུན་རྣམས་ཀྱིས་རྒོལ་བར་བརྩམས་པ་ན།སློབ་དཔོན་གྱི་རྫུ་འཕྲུལ་གྱིས་རི་དྭགས་རྣམས་སླར་གསོས་ཏེ། སྔར་ལས་ཀྱང་ཉམས་སྟོབས་དང་ལྡན་པར་གྱུར་ནས་ཕྱིར་བྱུང་སྟེ་སོང་བ་ན།དགེ་འདུན་རྣམས་ངོ་མཚར་ཞིང་བཟོད་པར་གསོལ་ཏེ།བསྙེན་བཀུར་དང་བཅས་བཞུགས་སུ་གསོལ་བར་ཞུས་ཀྱང་མ་བཞེད་པར་རྒྱལ་བའི་བསྟན་པ་ལ་ལོག་པར་འཁུ་བའི་མུ་སྟེགས་ཅན་མང་པོ་ཞིག་འདུལ་བའི་དུས་ལ་བབ་པར་གཟིགས་ནས་རྒྱ་གར་ལྷོ་ཕྱོགས་སུ་བྱོན་ཏེ།ཨུ་ཙུཥྨའི་སྤྱོད་པ་སྟེ།གཅེར་བུ་འཁྲུད་མ་ཕོ་བའི་ཚིགས་མ་ཁོ་ནའི་འཚོ་བ་རོལ་བའི་སྤྲང་པོའི་ཆ་བྱད་ཀྱིས་ཡུལ་དེར་བཞུགས་པ་ན།ཉིན་ཞིག་ཁ་ཏི་བི་ཧ་རའི་རྒྱལ་པོའི་བྲན་མོ་ཀ་ཙ་མ་ཧ་ཟེར་བ་ཞིག་གིས་འཁྲུད་མ་ཕོ་བའི་ཆུའི་ཟེགས་མ་སློབ་དཔོན་གྱི་ཞབས་ལ་ཕོག་པས།ལྕགས་བསྲེགས་ལ་བྲན་པ་ལྟར་ཁོལ་བ་མཐོང་ནས་ཤིན་ཏུ་ངོ་མཚར།དེ་ཚེ་རྒྱལ་པོ་དེ་ལ་མུ་སྟེགས་ཀྱི་སྟོན་པ་ཤང་ཀར་དེ་བ་ཞེས་བྱ་བས།ནང་པའི་པཎྜི་ཏ་དང་རྩོད་ཅིང་རྫུ་འཕྲུལ་འགྲན་པར་བྱས་ཏེ།སུ་ཕམ་པ་དེ་སུའི་བསྟན་པ་ལ་འཇུག་ཅིང་།དེའི་ཆོས་དང་གཙུག་ལག་ཁང་སོགས་ཀྱང་མེར་སྲེག་པར་བྱེད་པས་རྒྱལ་པོ་ཁྱོད་ཀྱིས་དཔང་མཛད་པར་ཞུ་ཞེས་པས།རྒྱལ་པོས་ཕོ་ཉ་བཀྱེ་སྟེ་ནང་པའི་དགེ་འདུན་རྣམས་བསྡུས་ནས། དོན་དེ་བསྙད་པ་ན།སུས་ཀྱང་ཁས་ལེན་མ་ནུས་པས།རྒྱལ་པོ་མྱ་ངན་དུ་གྱུར་པའི་ཚེ་བྲན་མོ་ཀ་ཙ་མ་ཧས་རྒྱལ་པོ་ལ་སྔར་ཁོ་མོས་མཐོང་བ་དེ་བཤད་པས།རྒྱལ་པོས། དེ་ལྟ་བུའི་སེམས་དཔའ་ཆེན་པོ་དེ་གང་ན་འདུག་ཀྱང་ཚོལ་ཅིག་གསུངས་ནས།ཕྱོགས་ཀུན་ཏུ་བཙལ་བས་ཤིང་སྡོང་ཞིག་གི་དྲུང་ན་བཞུགས་པ་མཇལ་ཏེ།མུ་སྟེགས་ཀྱི་རྩོད་པ་དང་རྫུ་འཕྲུལ་ཕམ་པར་མཛད་དགོས་པར་གསོལ་བ་བཏབ་པ་ན།སློབ་དཔོན་གྱིས་ཞལ་ནས། དེ་ལྟ་བུ་ཁོ་བོས་ནུས་ཀྱི། ཆུ་བུམ་པ་གང་དང་། རས་ཡུག་གཉིས།མི་རྣམས་བཅས་སྟ་གོན་གྱིས་ཤིག་གསུངས་ནས། དེ་ལྟར་བྱས་སོ།དེ་ནས་སྐྱེ་བོའི་ཚོགས་མང་པོ་འདུས་པའི་དབུས་སུ་གདན་ཁྲི་བཤམས་ཏེ།དབུས་སུ་རྒྱལ་པོ་དང་། གཡས་གཡོན་དུ་སློབ་དཔོན་ཉིད་དང་།མུ་སྟེགས་ཀྱི་སྟོན་པ་རྣམས་འཁོད་ནས་རྩོད་པ་མཛད་པས།བདག་ཉིད་ཆེན་པོ་འདིའི་ལུང་དང་རིགས་པའི་མཐུ་ཕུལ་དུ་བྱུང་བས། མུ་སྟེགས་བྱེད་རྣམས་ལན་མེད་དུ་མཛད་དོ།སླར་ཡང་མུ་སྟེགས་བྱེད་དེས་རྫུ་འཕྲུལ་འགྲན་པར་བྱས་ཏེ།བར་སྣང་ལ་དབང་ཕྱུག་ཆེན་པོའི་དཀྱིལ་འཁོར་བྲིས་ནས་ཤར་སྒོ་ཙམ་ཟིན་པ་ན།སློབ་དཔོན་འདིས་ཟད་པར་རླུང་གི་ཏིང་ངེ་འཛིན་ལ་སྙོམས་པར་བཞུགས་པས།འཚུབ་མ་ཆེན་པོ་ལངས་ཏེ། རྩྭ་དང་ཤིང་དང་གྲོང་ཁྱེར་ཐམས་ཅད་ཀྱང་འགྱེལ་ལ་ཐུག་པར་ལྡེགདཀྱིལ་འཁོར་དང་བཅས་པའི་མུ་སྟེགས་ཀྱི་སྟོན་པ་གཙོ་འཁོར་ཐམས་ཅད་འཐོར་རླུང་གིས་ཁྱེར་ཏེ་ཆུ་བོ་ཆེན་པོ་ཞིག་ཡོད་པའི་ཕ་རོལ་ཏུ་འཕངས།ཕྱོགས་མཚམས་ཐམས་ཅད་དུ་མུན་པ་ཆེན་པོར་གྱུར་ཏོ།དེ་ནས་སློབ་དཔོན་གྱི་སྨིན་མཚམས་ནས་འོད་ཕྱུང་སྟེ། རྒྱལ་པོ་བཙུན་མོ་འཁོར་གཡོག་དང་བཅས་པ་ལ་ལམ་བསྟན་ནས་མདུན་དུ་བཀུག་སྟེ།གོས་དང་བྲལ་ཞིང་རྡུལ་གྱིས་གཡོགས་པ་ལ་ཆུས་བཀྲུས་ནས་རས་གསར་བ་གཡོགས་པས་བདེ་བར་བྱས་སོ།།དེ་ནས་མུ་སྟེགས་ཀྱི་ལྷ་ཁང་རྣམས་བཤིགམུ་སྟེགས་པའི་རྗེས་འཇུག་མང་པོ་སངས་རྒྱས་ཀྱི་བསྟན་པ་ལ་བཙུད་པས།ད་ལྟའི་བར་དུ་ཡུལ་དེ་ལ་མུ་སྟེགས་ཕམ་པའི་ཡུལ་ཞེས་གྲགས་སོ།དེ་ནས་སེམས་ཅན་གྱི་དོན་ཇི་ལྟ་བུ་ཞིག་བྱ་དགོས་སྙམ་དུ་དགོངས་པ་ན།ལྟ་བ་ངན་པའི་གཡང་སར་ལྷུང་བ་མང་པོ་ཞིག་འདུལ་དགོས་པར་གཟིགས་ནས་ཡུལ་མ་ག་ངྷའི་ནུབ་ཕྱོགས་ཧ་ཅང་མི་རིང་བ་ཞིག་ན།ཡ་མཚན་ཅན་གྱི་ལྟ་བ་ལོག་པ་འཛིན་པ་ལྔ་བརྒྱ་གནས་པ་དེ་དག་གི་འཁོར་དུ་ཞུགས་ནས་དེ་རྣམས་མགུ་བར་མཛད།དེ་ནས་རྒྱལ་སྲས་བདག་ཉིད་ཆེན་པོ་འདིའི་ཐུགས་བསྐྱེད་ཕུན་སུམ་ཚོགས་པ་དང་།ལོག་པར་སྨྲ་བ་དེ་དག་གི་སྔོན་གྱི་སྨོན་ལམ་རྣམ་པར་དག་པའི་མཐུས།དུས་ནམ་ཞིག་གི་ཚེ་ཞག་བདུན་གྱི་བར་དུ་བུ་ཡུག་ཆེན་པོ་བྱུང་བས་སྐྱེ་བོ་རྣམས་བཟའ་བཏུང་ཆད་དེ་སྡུག་བསྔལ་བར་གྱུར་ནས།སུ་ཞིག་གིས་སློང་ནུས་པ་དེ་དཔོན་དུ་བསྐོ་ཞིང་བསྒོ་བ་ཉན་པར་བགྲོས་ཏེ་ཐམས་ཅད་བློ་མཐུན་པར་གྱུར་བ་ན།སློབ་དཔོན་འདིས་འབྲས་ཆན་ལྷུང་བཟེད་གང་བླངས་ཏེ་བྱིན་གྱིས་བརླབས་ནས།སྐྱེ་བོའི་ཚོགས་ཐམས་ཅད་ཚིམ་པར་མཛད།སྔར་གྱི་ལྟ་བ་ངན་པ་དེ་རྣམས་སུན་ཕྱུང་སྟེ་སངས་རྒྱས་ཀྱི་བསྟན་པ་ལ་བཙུད་དོ། དེ་ནས་ཡང་ཉམ་ཐག་པའི་འགྲོ་བ་མང་པོ་ལ་ཕན་གདགས་པར་དགོངས་ནས།མུ་གེ་ཆེན་པོ་བྱུང་བའི་ཡུལ་ཕྱོགས་ཞིག་ཏུ་ཕེབས་ཏེ།བཟའ་བཏུང་ཆད་པས་འཆི་བ་ལ་ཉེ་བའི་མུ་ཏོ་བ་སྟོང་ཕྲག་ལྷག་ཙམ་རྒྱལ་སྲས་བདག་ཉིད་ཆེན་པོ་འདིས་རྫུ་འཕྲུལ་གྱིས་འཚོ་བ་ཕུན་སུམ་ཚོགས་པ་ལ་སྦྱར་ཞིང་ཆོས་བསྟན་ཏེ་བདེ་བ་ལ་བཀོད་དོ།།དེ་ལྟ་བུའི་རྒྱལ་སྲས་བདག་ཉིད་ཆེན་པོ་འདི་ནི།ངེས་པའི་དོན་དུ་མགོན་པོ་འཇམ་དབྱངས་དང་དབྱེར་མེད་ཀྱང་།དྲང་དོན་གདུལ་བྱའི་སྣང་ངོར་སེམས་ཅན་འབའ་ཞིག་གི་དོན་དུ་བསམ་བཞིན་འཇིག་རྟེན་གྱི་ཁམས་འདིར་སོ་སོ་སྐྱེ་བོ་ཕལ་བའི་མཛད་པ་ལྷུར་བཞེས་ཏེ།འཁོར་བ་མཐའ་དག་མེ་འབར་བའི་ཀློང་ལྟར་གཟིགས་ནས།རྒྱལ་སྲིད་ཐལ་བའི་ཕུང་པོ་ལྟར་རིང་དུ་དོར་ཏེ་བསྟན་པའི་གཞི་མ་སོ་སོར་ཐར་བའི་ཚུལ་ཁྲིམས་རྣམ་པར་དག་པ་ཉམས་སུ་བཞེས་པས་གནས་བརྟན་འདུལ་བ་འཛིན་པ་ཆེན་པོར་གྱུར་པ་དང་།རྒྱལ་བའི་བཀའ་སྡེ་སྣོད་གསུམ་དང་རྒྱུད་སྡེ་བཞི་དགོངས་འགྲེལ་དང་བཅས་པ་ལ་སྦྱངསཔ་མཐར་ཕྱིན་པ་མཛད་ནས། རང་དང་གཞན་གྱི་གྲུབ་མཐའ་རྒྱ་མཚོའི་ཕ་རོལ་ཏུ་ཕྱིན་ཏེ་བསྟན་པའི་གནད་ཐམས་ཅད་ཕྱིན་ཅི་མ་ལོག་པར་ཐུགས་སུ་ཆུད་པ་མཛད་པས་པཎྜི་ཏ་ཆེན་པོའི་སྙན་པའི་གྲགས་པ་ས་གསུམ་དུ་ཁྱབ་པ་དང་།བྱམས་པ་སྙིང་རྗེ་རྩ་བ་ཅན་གྱི་བྱང་ཆུབ་ཀྱི་སེམས་སྦྱོང་བའི་གདམས་ངག་སྤྱི་དང་ཁྱད་པར་དུ་བདག་གཅེས་འཛིན་གྱི་སྐྱོན་དང་།གཞན་གཅེས་འཛིན་གྱི་ཕན་ཡོན་སྒོ་དུ་མ་ནས་བསམས་ཏེ།སེམས་ཅན་ཐམས་ཅད་རང་ལ་རྣམ་པ་ཀུན་ཏུ་ཕན་བདེ་མ་ལུས་པ་སྟེར་བའི་ཡིད་བཞིན་གྱི་ནོར་བུ་ལྟར་བསྒོམས་པའི་བདག་གཞན་མཉམ་བརྗེའི་སྒོ་ནས་བྱང་ཆུབ་ཀྱི་སེམས་རིན་པོ་ཆེ་ཇི་ལྟར་བསྐྱེད་པའི་གདམས་ངག་ཆ་ལག་དང་བཅས་མགོན་པོ་འཇམ་པའི་དབྱངས་ཀྱིས་དངོས་སུ་དགེ་བའི་བཤེས་གཉེན་མཛད་པ་ལ་བརྟེན་ནས།ཐེག་པ་ཆེན་པོའི་ལམ་གྱི་རིམ་པའི་གནད་ཡོངས་སུ་རྫོགས་པའི་མན་ངག་ཆ་ཚང་བ་གསན་ཞིང་ཉམས་སུ་བཞེས་པས།བདག་བས་གཞན་གཅེས་པའི་བྱང་ཆུབ་ཀྱི་སེམས་སོགས་ས་དང་ལམ་གྱི་རྟོགས་པ་ཁྱད་པར་ཅན་ཐུགས་རྒྱུད་ལ་འཁྲུངས་ཤིང་།ཤིན་ཏུ་སྤྲོས་མེད་ཀྱི་སྤྱོད་པ་ལ་བརྟེན་ནས།རྒྱལ་སྲས་བྱང་ཆུབ་སེམས་དཔའི་སྤྱོད་པ་རླབས་པོ་ཆེ་མཐའ་དག་མཐར་ཕྱིན་པ་མཛད་དེ༑དོན་གཉིས་ལྷུན་གྱིས་འགྲུབ་པའི་སྐུ་མངོན་དུ་གྱུར་ཀྱང་།སེམས་ཅན་གྱི་དོན་ལ་སྐད་ཅིག་ཀྱང་གཡེལ་བ་མེད་པར་ནམ་མཁའ་ཇི་སྲིད་གནས་ཀྱི་བར་དུ་འཕྲིན་ལས་ཀྱི་འཇུག་པ་རྒྱུན་མི་འཆད་པ་ནི།ཇི་སྐད་དུ། ཕྱོགས་བཅུ་ནམ་མཁའི་མཐའ་གཏུགས་པའི། །ཇི་ལྟར་འཇམ་དབྱངས་སྤྱོད་མཛད་པ། །བདག་གི་སྤྱོད་པའང་དེ་འདྲར་ཤོག །ཇི་སྲིད་ནམ་མཁའ་གནས་པ་ན། །འགྲོ་བ་ཇི་སྲིད་གནས་གྱུར་པ། །དེ་སྲིད་བདག་ནི་གནས་གྱུར་ནས།།འགྲོ་བའི་སྡུག་བསྔལ་སེལ་བར་ཤོག །ཅེས་གསུངས་སོ།གངས་ཅན་རིག་བརྒྱའི་སྒོ་འབྱེད་ལྡེ་མིག་དེབ་བརྒྱད་པ་ལས་བཤུས། 

2018.5.20.ཚུལ་ཁྲིམས་རྒྱ་མཚོས་གློག་རྡུལ་ཡིག་ཚགས་སུ་གཏག