སྐ་གཞུང་ཐང་ནས་སྙན་འཇེབས་ཀྱི་ནོར་གནག་གི་རོལ་དབྱངས་དཀྲོལ་བྱུང་།

རྩོམ་སྒྲིག་པ།ཡོང་ཁུངས། སྤེལ་དུས། 08-03


                            རྔ་བའི་གསར་འགྱུར་དྲ་བའི་འཕྲིན། (གསར་འགོད་པ་ཚེ་རིང་ལྷ་མོ། ) ཟླ་བརྒྱད་པའི་སྐ་གཞུང་རྩྭ་ཐང་ཆེན་མོ་ནི། གཡུ་མདོག་གི་ལྭ་བ་ཞིག་དང་འདྲ་བར་འཛིན་མའི་ཁྱོན་ལ་ཁེབས་ཤིང་། ལྷུང་ལྷུང་དལ་གྱིས་འབབ་པའི་སྐ་ཆུ་ནི་དངུལ་དཀར་གྱི་སྐ་རགས་ཤིག་དང་འདྲ་བར་གཡུ་མདོག་གི་ལྭ་བ་དེ་ལ་དཀྲིས་འདུག  གནས་འདིར་འཚོ་བའི་འབྲོག་པ་རྣམས་ཀྱི་གདོང་ལ་དགའ་བའི་འཛུམ་གྱིས་ཁེངས་ཤིང་ལུས་ལ་སྐྱིད་པའི་ཉམས་ཀྱིས་ཕྱུག་འདུག དེ་ལྟར་སྣོད་བཅུད་ཀྱི་དགེ་མཚན་མ་ལུས་རྫོགས་པའི་གནས་མཆོག་འདི་ནི། བལྟས་པ་ཙམ་གྱིས་ཡིད་འཕྲོག་པ་ཞིག་དང་མཐོང་བ་ཙམ་གྱིས་སྨོན་པ་འཆོར་བའི་ཡུལ་ཁྱད་པར་བ་ཞིག་རེད་ཨང་། 

                             ཟླ8པའི་ཚེས2ཉིན་གྱི་སྔ་དྲོར། ཁ་བ་ལྟར་ལྷབ་ལྷུབ་ཏུ་བསྐྱོད་པའི་རླུང་རྟ་དང་བསང་མཆོད་ཀྱི་ཀི་འབོད་སྙན་མོའི་ཁྲོད། ཧུང་ཡོན་རྫོང་ཁྱུང་མཆུ་གྲོང་རྡལ་ནས་སྐབས་གསུམ་པའི་ཧུང་ཡོན་རྫོང་སྤང་ལྗོངས་ཆེན་མོའི་ནོར་གནག་རོལ་དབྱངས་དུས་སྟོན་དང་སྐབས་བདུན་པའི་ནོར་གནག་རིག་གནས་དུས་སྟོན་དེ་དངོས་སུ་མགོ་བརྩམས་བྱུང་།

                              ཕྱོགས་བཞི་མཚམས་བརྒྱད་ནས་ཐོན་པའི་ལྟད་མོ་པ་དང་ཡུལ་མི་རྣམས་ནི་ཁོད་ཡངས་པའི་ཚོགས་ར་དེ་རུ་མི་ཚོགས་ཀྱི་རྒྱ་མཚོ་ཆེན་མོར་གྲུབ་ཅིང་། སྤྲོ་གསེང་གཏོང་སའི་སྦྲ་གུར་དང་ཟས་རིགས་སྣ་ཚོགས་འཚོང་བའི་ཚོང་ཁང་དང་ཟ་ཁང་། གཞན་ས་གནས་ཀྱི་ཐོན་རྫས་འགྲེམ་སྟོན་གྱི་སྟེགས་བུ་བཅས་ཀྱིས་ཚོགས་རར་ཁ་དོག་གསར་བ་ཞིག་བསྣན་འདུག

                              བོད་མགོ་ནག་རྟེན་འབྲེལ་གྱི་རང་བཞིན་ལྟར། བཀྲ་ཤིས་པའི་ལྷ་བསང་སྔོན་མོས་རྟགས་དང་རྟེན་འབྲེལ་ཐོག་མར་བསྒྲིགས་ཤིང་མགོ་ཚུགས་མཛད་སྒོར་དབུ་ཁྱུད་ཐོག་མ་བྲིས་བྱུང་།

                              ཁུལ་གླུ་གར་ཚོགས་པའི་ནོར་གནག་གི་གཏམ་རྒྱུད་དང་། སྦྲ་ཆེན་སློབ་ཆུང་གི་ལང་ཚོའི་གར་སྟབས། རྩྭ་ཐང་སྒྱུ་རྩལ་ཚོགས་པའི་འུར་རྡོ་བཅས་ཀྱི་ཞབས་བྲོའི་སྟངས་སྟབས་རེ་རེ་དང་། དམངས་ཁྲོད་གླུ་བ་རིག་འཛིན་གྱི་དམངས་གཞས་དང་། མག་གསར་རྡུང་ལེན་ཚོགས་པའི་གངས་གཞས། ཨ་མོས་ཡུལ་ཚོའི་སློབ་ཆུང་གི་སློབ་མ་རྣམས་ཀྱི་མཉམ་ལེན་སོགས་སྙན་འཇེབས་གླུ་ཡི་འགྱུར་ཁུགས་རེ་རེ་མིག་གི་ལོངས་སྤྱོད་དང་རྣ་བའི་བུ་རམ་དུ་གྱུར་པར་མ་ཟད། ཡིད་ཀྱི་བརྟན་པའང་ཅིག་ཅར་དུ་འཕྲོག་ནས་དགའ་བའི་ཀི་འབོད་དང་སྐྱིད་པའི་དགོད་སྒྲ་རེ་རེ་སྐ་ཆུ་རིང་མོའི་རླབས་རྩེ་རུ་འཕྱོ་ཞིང་ལྡིང་ཞོར། ཁྱུང་མཆུ་རྩྭ་ཐང་ཆེན་མོའི་བར་སྣང་དུ་སྤྲིན་གྱི་ཕུང་བོ་རེ་རེར་འགྲོགས་པའི་སྙན་འཇེབས་ཀྱི་དབྱངས་རྟ་ཞིག་ཏུ་གྱུར་སོང་།

                             དེ་ལྟར་དགའ་བའི་འབོད་སྒྲ་དང་སྐྱིད་པའི་དགོད་སྒྲའི་ཁྲོད། ཉིན་བདུན་རིང་གི་རིང་ལ་སྐ་གཞུང་རྩྭ་ཐང་ཆེན་མོ་ནས་སྲོལ་རྒྱུན་གྱི་དམངས་གླུ་དང་རྡུང་ལེན། དེང་རབས་ཀྱི་ཁྱད་ཆོས་འདྲ་མིན་ལྡན་པའི་གླུ་གཞས་སྣ་ཚོགས། དྲག་རྩལ་གྱི་དཔའ་སྟོབས། མཛེས་པའི་གཟུགས་བྱད་སོགས་ལྟད་མོ་སྣ་ཚོགས་འཁྲབ་སྟོན་བྱེད་རྒྱུ་རེད། 

                             རྒྱུས་ལོན་པ་ལྟར་ན། ཐེངས་འདིའི་ནོར་གནག་རོལ་དབྱངས་དུས་སྟོན་སྐབས་སུ་ནོར་གནག་རིག་གནས་དུས་སྟོན་དང་། 2018ལོའི་ཧུང་ཡོནABAརྒྱལ་སྤྱིའི་ཕྱོགས་བསྡུས་དྲག་རྩལ་འགྲན་བསྡུར། ནོར་གནག་རོལ་དབྱངས་དུས་སྟོན། བོད་ཆའང་དབྱིས་གསུམ་གྱི་གླུ་གཞས་གསར་རྩོམ་ཆེད་ཚོགས། 2018ལོའི“ཅན་ལུ་ཏོ”རྟགས་མའི་སི་ཁྲོན་ཞིང་ཆེན་གྱི་གཟུགས་མཛེས་ཁམས་བཟང་གི་ལུས་སྦྱོང་འགྲན་བསྡུར།  ལྗང་མདོག་གི་ཀྲུང་གོའི་འགྲུལ་བཞུད་ཧུང་ཡོན་དུ་བསྐྱོད་པ་བཅས་ལྟད་མོ་རིགས་མི་འདྲ་བ་ཆེན་པོ་དྲུག་བཀོད་སྒྲིག་བྱས་ཡོད་པས། རྒྱ་ཆེ་བའི་སྐུ་མགྲོན་རྣམས་དུས་ལྟར་ཕེབས་དང་། ཡིད་ཀྱི་དགོས་འདོད་རེ་རེ་ཇི་བཞིན་དུ་བསྐང་ཐུབ་ངེས། 



དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས། 蜀ICP备14009601号-1