ཆོས་འཁོར་རྒྱལ་དགོན་ནས་རྐང་ཐང་མར་མཚོ་ལུང་ནང་བརྒྱུད་ཆུ་ཚོད་གསུམ་ལྷག་ཙམ་སོང་ན་རྒྱ་མཚོའི་ངོས་ལས་སྤྱི་ཁྲེ་ལྔ་སྟོང་བརྒྱ་ལྷག་ཙམ་བརྒལ་བའི་མཚོ་ལའི་སྟེང་ནས་བྱང་ཤར་མུ་ལིང་སྟེང་གི་ཁྲག་མཚོ་སྟེ་དཔལ་ལྡན་ལྷ་མོའི་བླ་མཚོ་དེ་མཇལ་བ་རེད།མཚོ་དེ་ནི་རྒྱལ་བ་དགེ་འདུན་རྒྱ་མཚོས་ཆོས་འཁོར་རྒྱལ་དགོན་ཕྱག་བཏབ་གནང་ནས་ལོ་གཉིས་སོང་མཚམས་སྤྱི་ལོ་1511ལ་གནས་སྒོ་ཕྱེས་གནང་མཛད།མཚོ་དེའི་ནང་ནས་སྐྱེ་བོ་སོ་སོར་མཐོང་སྣང་མི་འདྲ་བ་སྣ་ཚོགས་སྟོན་གྱི་ཡོད།ལྷག་པར་དུ་རྒྱལ་བ་སྐུ་ཕྲེང་རིམ་བྱོན་གཙོ་བོར་གྱུར་པས་བོད་ཀྱི་བླ་སྤྲུལ་ཁག་གི་ཡང་སྲིད་རྩད་གཅོད་སྐབས་བླ་སྤྲུལ་རྩ་ཆེན་གདན་ཞུས་ཀྱིས་དཔལ་ལྡན་ལྷ་མོར་གྲོགས་དན་བཅོལ་ཏེ་རྟགས་མཚན་ཐོན་ཐབས་གནང་སྲོལ་ཡོད།  གཞན་ཡང་བླ་མཚོ་དེའི་ཉེ་འགྲམ་དུ་སྒྲོལ་མ་ཉེར་གཅིག་གི་བླ་མཚོ་དང་།གེ་སར་གྱི་བླ་མཚོ། ལྕམ་སྲིང་གི་བླ་མཚོ་སོགས་ཀྱང་མཇལ་རྒྱུ་ཡོད།